“Ẹsọn̄ọ Ẹn̄wana Kaban̄a Ikọ Mbuọtidem”!

“Ẹsọn̄ọ ẹn̄wana kaban̄a ikọ mbuọtidem, emi ẹma ẹkeyak ini kiet ko ẹsịn nti ikọt Abasi ke ubọk.”—JUDE 3.

1. Ke nso usụn̄ifiọk ke mme ata Christian mfịn ẹdu ke ekọn̄?

MBONEKỌN̄ ẹmi ẹdude ke ekọn̄ ẹsisobo n̄kpọsọn̄ idaha kpukpru ini. Kere ndisịne ofụri n̄kpọekọn̄ nnyụn̄ nsan̄a anana-ibat kilomita ke kpukpru orụk idaha, ọbọde ọkpọsọn̄ ukpep ke nte ẹkamade mme n̄kpọekọn̄, mîdịghe odomode ndinyan̄a idem mbọhọ kpukpru orụk afai afai ndịghe oro ẹkemede ndida uwem nnyụn̄ nnọ unan. Nte ededi, mme ata Christian itieneke ibuana ke mme ekọn̄ eke mme idụt. (Isaiah 2:2-4; John 17:14) Kpa ye oro, inaha nnyịn idede ifre nte ke kpukpru nnyịn idu ke ekọn̄ ke ndusụk usụn̄. Satan enen̄ede asua Jesus Christ ye mme anditiene enye ke isọn̄. (Ediyarade 12:17) Ẹsịn enyịn̄ kpukpru mbon oro ẹbierede ndinam n̄kpọ Jehovah Abasi, yak idọhọ, nte mbonekọn̄ ndin̄wana ekọn̄ eke spirit.—2 Corinth 10:4.

2. Didie ke Jude etịn̄ aban̄a ekọn̄ Christian, ndien didie ke leta esie ekeme ndin̄wam nnyịn ndisọn̄ọ nda ke ekọn̄?

² Nte odotde, Jude eyeneka Jesus ewet ete: “Ndima, ke ini nsịnde ifịk eti-eti n̄wet nnọ mbufo mban̄a edinyan̄a eke enyenede nnyịn kpukpru, esịt enyịk mi n̄ko ndiwet n̄kekpe ye mbufo nte, ẹsọn̄ọ ẹn̄wana kaban̄a ikọ mbuọtidem, emi ẹma ẹkeyak ini kiet ko ẹsịn nti ikọt Abasi ke ubọk.” (Jude 3) Ke ini Jude akpakde mme Christian ete “ẹsọn̄ọ ẹn̄wana,” enye ada ikọ oro enyenede ebuana ye ikọ oro adade ọnọ “ọkpọsọn̄ ubiak.” Ih, en̄wan emi ekeme ndisọn̄, idem akamade ọkpọsọn̄ ubiak! Nte esidi ọkpọsọn̄ n̄kpọ ọnọ fi ndusụk ini ndiyọ ke ekọn̄ emi? Ibio ibio okopodudu leta Jude ekeme ndin̄wam nnyịn. Enye akpak nnyịn ndibiọn̄ọ oburobụt ido, ndikpono odudu emi Abasi enịmde, ndinyụn̄ mbọk idem nnyịn ke ima Abasi. Ẹyak nnyịn ise nte ikemede ndinam item emi.

Biọn̄ọ Oburobụt Ido

3. Nso mbabuat idaha ke esop Christian akasak iso ese ke eyo Jude?

³ Jude ama ekeme ndikụt nte ke idịghe kpukpru ekemmọ Christian ẹkekan ke en̄wan emi ye Satan. Otuerọn̄ ẹkesak iso ẹse ini oro okoyomde ẹnam n̄kpọ usọp usọp. Jude ewet ete ke ndiọi owo “ẹma ẹdọn̄ ikpat ndịbe ndịbe ẹdụk.” Mme owo ẹmi ẹma ẹsịn udọn̄ n̄kari n̄kari ẹnọ oburobụt ido. Ndien mmọ ke n̄kari ẹma ẹdomo ndiwụt ke mme edinam mmimọ ẹnen, “ẹwọn̄ọrede mfọn Abasi nnyịn ẹsịn ke obukpo ido.” (Jude 4) Ndusụk, ukem nte ndusụk mbon Gnostic eset, mmọ ẹkekere ẹte ke adan̄a nte owo anamde idiọkn̄kpọ, ntre ke owo ekeme ndibọ mfọn Abasi—ntre, ke nditịm ntịn̄, ama ọfọn ndinam idiọkn̄kpọ enen̄ede awak! Mîdịghe eyedi mmọ ẹkekere ẹte ke Abasi mfọnido idinọhọ mmimọ ufen tutu amama. Ke usụn̄ ekededi, mmọ ikenenke.—1 Corinth 3:19.

4. Ewe uwụtn̄kpọ ita ke N̄wed Abasi ẹban̄ade mme ubiereikpe Jehovah ke eset ke Jude asiak?

⁴ Jude owụt ete ke idiọk ekikere mmọ ikenenke ebe ke ndinọ uwụtn̄kpọ ita ẹban̄ade ubiereikpe Jehovah ke eset: eke nditọ Israel oro “mînịmke ke akpanikọ”; eke “mme angel . . . ẹmi mîkomụmke itie-odudu eke mmọ ikama” man otodo ẹnam idiọkn̄kpọ ye iban; ye eke mme andidụn̄ Sodom ye Gomorrah, ẹmi ‘ẹkesịnde idem ke use ye ido eke mîkemke.’ (Jude 5-7; Genesis 6:2-4; 19:4-25; Numbers 14:35) Ke idaha kiet kiet, Jehovah ama ada in̄wan̄în̄wan̄ ubiereikpe ọsọk mme anamidiọk oro.

5. Ewe prọfet eset ke Jude okot oto, ndien didie ke prọfesi oro okowụt nte enye mîditreke ndisu?

⁵ Ekem, Jude ama etịn̄ aban̄a ubiereikpe oro akam okponde akan. Enye ama okot oto prọfesi Enoch—kpa ubak udịmikọ oro owo mîkwe ke baba ebiet efen ke N̄wed Abasi eke odudu spirit.a (Jude 14, 15) Enoch ama ebem iso etịn̄ aban̄a ini emi Jehovah edikpede ikpe ọnọ kpukpru mbon oro mîbakke Abasi ye mme edinam unana uten̄e Abasi mmọ. Nte enemde, Enoch akada ikọ emi owụtde ini edem etịn̄ ikọ, koro mme ubiereikpe Abasi ẹkenyenede nsọn̄ọ nte n̄kpọ eke mmọ ẹma ẹkedada itie. Eyedi mme owo ẹma ẹsak Enoch nsahi ndien ke ukperedem ẹsak Noah, edi kpukpru utọ mbon nsahi oro ẹma ẹkpan̄a ke Ukwọ ofụri ererimbot.

6. (a) Okoyom ẹti mme Christian ke eyo Jude ẹban̄a nso? (b) Ntak emi akpanade nnyịn inyene ntọt Jude ke ekikere?

⁶ Ntak emi Jude ekewetde aban̄a mme ubiereikpe Abasi ẹmi? Koro enye ama ọfiọk ete ke ndusụk owo oro ẹkebuanade ye mme esop Christian ke eyo esie ke ẹkenam idiọkn̄kpọ oro ẹkedehede ẹma ẹnyụn̄ ẹnyene nduduọhọ ukem nte mbon oro ẹkedide ntak ubiereikpe eke eset oro. Ntem, Jude ewet ete ke oyom ẹti mme esop ẹban̄a ndusụk n̄wọrọnda akpanikọ eke spirit. (Jude 5) Nte an̄wan̄ade mmọ ẹma ẹfre ẹte ke Jehovah Abasi ama okụt se mmọ ẹkenamde. Ih, ke ini mme asan̄autom esie ẹkoide-koi ẹbiat mme ibet esie, ẹsabarede idemmọ ye mbon en̄wen, enye okụt. (Mme N̄ke 15:3) Mme utọ edinam oro ẹnen̄ede ẹyat enye esịt. (Genesis 6:6; Psalm 78:40) Edi ekikere enyenede ndịk nte ke mme ikpîkpu owo nte nnyịn ẹkeme nditụk ekikere Ọbọn̄ Andikara ekondo. Enye ke ese nnyịn kpukpru usen, ndien ke ini nnyịn inamde ofụri ukeme nnyịn nditiene nde ikpat Eyen esie, Jesus Christ, adan̄aoro edu uwem nnyịn anam enye okop idatesịt. Do, ẹyak nnyịn ikûdede isua mme utọ n̄kpọ editi oro Jude ọnọde do edi ẹyak inam mmọ.—Mme N̄ke 27:11; 1 Peter 2:21.

7. (a) Ntak emi edide akpan n̄kpọ mbon oro ẹbuanade ke akwa idiọkn̄kpọ ndiyom un̄wam usọp usọp? (b) Didie ke kpukpru nnyịn ikeme ndifep oburobụt ido?

⁷ Idịghe Jehovah ndikụt kpọt edi enye anam n̄kpọ. Nte Abasi unenikpe, enye ọnọ mme anamidiọk ufen—ebebịghi m̀mê awawara. (1 Timothy 5:24) Mbon oro ẹkerede ẹte ke mme ubiereikpe esie ẹdi sụk mbụk eset ye nte ke enye ikereke iban̄a idiọkn̄kpọ oro mmimọ inamde ẹbabian̄a idemmọ. Edi akpan n̄kpọ didie ntem owo ekededi emi abuanade ke oburobụt ido ndisọsọp nyom un̄wam nto mbiowo Christian! (James 5:14, 15) Kpukpru nnyịn imekeme ndikere ntotụn̄ọ ntotụn̄ọ mban̄a n̄kpọndịk oro oburobụt ido akamade ke ekọn̄ eke spirit nnyịn. Mbon unọmọ ẹdu kpukpru isua—mbon oro ẹbịnde ẹfep ke otu nnyịn, ata ediwak ke otu mmọ ke ntak unana edikabade esịt ke mme oburobụt edinam. Ana nnyịn inen̄ede ibiere ndibiọn̄ọ idomo ekededi oro akam ọtọn̄ọde-tọn̄ọ ndinụk nnyịn nsịn ke utọ afan̄ oro.—Men Matthew 26:41 domo.

Kpono Odudu Oro Abasi Enịmde

8. Mmanie ẹkedi “mme akama ikpọ itie” oro ẹsiakde ke Jude 8?

⁸ Mfịna efen oro Jude etịn̄de aban̄a edi unana ediwụt ukpono nnọ odudu oro Abasi enịmde. Ke uwụtn̄kpọ, ke Jude ufan̄ikọ 8 enye obiom mme ukem ndiọi owo oro ikpe nte ‘ẹsụn̄ide mme akama ikpọ itie.’ Mmanie ẹkedi mme “akama ikpọ itie” ẹmi? Mmọ ẹkedi mme anana mfọnmma owo, edi mmọ ẹma ẹnyene mbiomo oro edisana spirit Jehovah ọkọnọde mmọ. Ke uwụtn̄kpọ, mme esop ẹma ẹnyene mbiowo, oro ẹkenọde utom edibọk otuerọn̄ Abasi. (1 Peter 5:2) Mme esenyịn oro ẹsan̄ade-san̄a ẹma ẹdu n̄ko, utọ nte apostle Paul. Ndien otu mbiowo ke Jerusalem ẹma ẹnam n̄kpọ nte otu ukara, ẹnamde mme ubiere oro ẹketụkde esop Christian ofụri ofụri. (Utom 15:6) Jude ama enen̄ede ekere nte ke ndusụk owo ke mme esop ke ẹkesụn̄i utọ irenowo oro, m̀mê ndise mmọ ke ndek.

9. Ewe mme uwụtn̄kpọ ẹban̄ade unana ediwụt ukpono nnọ mme akama ikpọ itie ke Jude asiak?

⁹ Man obiom utọ utịn̄ikọ unana ukpono oro ikpe, ke Jude ufan̄ikọ 11, Jude asiak uwụtn̄kpọ ita efen nte n̄kpọ editi: Cain, Balaam, ye Korah. Cain ama ofụmi ima ima item Jehovah onyụn̄ okokoi aka iso ke edu usua uwotowo esie. (Genesis 4:4-8) Balaam ama ọbọ mme n̄kaiso ntọt oro nte eyịghe mîdụhe ẹketode ebiet oro okon̄de akan ukeme owo—uman ass esie ama akam etịn̄ ikọ ọnọ enye! Edi Balaam ke ibụk ama aka iso ndidụk ediomi mban̄a ikọt Abasi. (Numbers 22:28, 32-34; Deuteronomy 23:5) Korah ama enyene ifetutom esie, edi oro ikekemke enye. Enye ama esịn udọn̄ ọnọ nsọn̄ibuot ye owo oro ekedide sụn̄sụn̄ akan ke isọn̄, kpa Moses.—Numbers 12:3; 16:1-3, 32.

10. Didie ke ndusụk owo mfịn ẹkeme ndiduọ ndụk afia ‘edisụn̄i mme akama ikpọ itie,’ ndien ntak emi ẹkpenyenede ndifep utọ utịn̄ikọ oro?

¹⁰ Mme uwụtn̄kpọ ẹmi ẹkpep nnyịn ke in̄wan̄în̄wan̄ usụn̄ didie ntem ndikpan̄ utọn̄ nnọ item nnyụn̄ n̄kpono mbon oro Jehovah adade anam n̄kpọ ke mme ifetutom! (Mme Hebrew 13:17) Edi ata mmemmem n̄kpọ ndikụt ndudue nnọ mbiowo oro ẹmekde, koro mmọ ẹdide mme anana mfọnmma, kpa nte kpukpru nnyịn idide mme anana mfọnmma. Edi edieke nnyịn iwụkde ntịn̄enyịn ke mme ndudue mmọ inyụn̄ itrede ndikpono mmọ, nte ekeme ndidi nnyịn ke ‘isụn̄i mme akama ikpọ itie’? Ke Jude ufan̄ikọ 10, Jude etịn̄ aban̄a mbon oro ‘ẹsụn̄ide se ededi eke mmọ mîfiọkke.’ Ndusụk ini, ndusụk owo ẹsikụt ndudue ẹnọ ubiere oro otu mbiowo m̀mê kọmiti ukpeikpe ẹnamde. Kpa ye oro, mmọ ifiọkke ofụri ntọt oro mbiowo ẹkenyenede ndikere mban̄a man ẹsịm ubiere. Ntre ntak editịn̄ ikọ isụn̄i ndian mme n̄kpọ oro mmọ mîtịmke ifiọk? (Mme N̄ke 18:13) Mmọ oro ẹyịrede ke utọ etikwo etikwo utịn̄ikọ oro ẹkeme ndisịn ubahade ke esop ndien ẹkam ẹkeme ndimen mmọ ndomo ye “ndịbe-ndịbe itiat” ke idak mmọn̄ ẹdide n̄kpọndịk ke itie mboho mme ekemmọ andinịm ke akpanikọ. (Jude 12, 16, 19) Tutu amama nnyịn idiyomke ndidi n̄kpọndịk eke spirit nnọ mbon en̄wen. Utu ke oro, ẹyak nnyịn owo kiet kiet ibiere ndiwụt esịtekọm nnọ irenowo oro ẹkamade ikpọ itie kaban̄a ọkpọsọn̄ utom ye nsịnifịk mmọ ke ndinam n̄kpọ nnọ otuerọn̄ Abasi.—1 Timothy 5:17.

11. Ntak emi Michael eketrede ndida ikọ isụn̄i mbiere ikpe nnọ Satan?

¹¹ Jude asiak uwụtn̄kpọ kiet kaban̄a owo oro okowụtde ukpono ọnọ odudu ukara oro ẹnịmde. Enye ewet ete: “Michael, akwa angel oro, ke edin̄wana emi enye an̄wanade ye Satan, ke adan̄aemi enye enenide aban̄a okpo Moses, ikedehede isụn̄i enye ke ikpe, edi ọdọhọ ete, Ọbọn̄ akpakam asua ọnọ fi.” (Jude 9) Ndyọ ndyọ mbụk emi, emi edide Jude ikpọn̄ ewet ke N̄wed Abasi eke odudu spirit, ekpep nnyịn n̄wọrọnda ukpepn̄kpọ iba. Ke n̄kan̄ kiet, enye ekpep nnyịn ndiyak ubiereikpe nsịn Jehovah ke ubọk. Satan nte an̄wan̄ade okoyom ndida okpo Moses anam-akpanikọ eren oro nnam n̄kpọ ke idiọk usụn̄ man esịn udọn̄ ọnọ nsunsu utuakibuot. Emi ọkọdiọk didie ntem! Edi, Michael ke nsụhọdeidem ama etre ndibiere ikpe nnọ enye, koro Jehovah ikpọn̄ ekenyene odudu oro. Adan̄a didie, ndien, ke nnyịn ikpetre ndikpe ikpe nnọ mme anam-akpanikọ irenowo ẹmi ẹdomode ndinam n̄kpọ Jehovah.

12. Nso ke mbon oro ẹkamade ifetutom ke esop Christian ẹkeme ndikpep nto uwụtn̄kpọ Michael?

¹² Ke n̄kan̄ eken, mbon oro ẹnọde ndusụk udomo odudu ke esop ẹkeme n̄ko ndikpep n̄kpọ nto Michael. Kamse, kpa ye oro Michael ekedide “akwa angel,” etubom kpukpru angel, enye ikadaha itie ukara esie inam n̄kpọ ke idiọk usụn̄, idem ke ini iyatesịt. Mme anam-akpanikọ mbiowo ẹtiene uwụtn̄kpọ oro ket ket, ẹfiọkde ẹte ke ndida odudu mmọ nnam n̄kpọ ke idiọk usụn̄ edi ndiwụt unana ukpono nnọ itie edikara Jehovah. Leta Jude ama enyene ekese nditịn̄ mban̄a irenowo oro ẹkenyenede itie ukpono ke mme esop edi oro ẹkedade odudu mmọ ẹnam n̄kpọ ke idiọk usụn̄. Ke uwụtn̄kpọ, ke Jude ufan̄ikọ 12 esịm 14, Jude ewet ọkpọsọn̄ ubiereikpe aban̄a ‘mme ekpemerọn̄ ẹmi mînamke mmọ ndịk ndibọk idem mmọ.’ (Men Ezekiel 34:7-10 domo.) Ke mme ikọ efen, akpa udọn̄ mmọ ekedi ndinọ idemmọ ufọn, idịghe otuerọn̄ Jehovah. Mbiowo mfịn ẹkeme ndikpep ekese nto mme utọ etikwo etikwo uwụtn̄kpọ oro. Ke akpanikọ, mme ikọ Jude mi ẹwụt in̄wan̄în̄wan̄ ndise aban̄ade se nnyịn mîyomke ndikabade ndi. Ke ini nnyịn iyakde idem inọ ibụk, nnyịn ikemeke ndidi mbonekọn̄ Christ; nnyịn iyesịn idem ikaha ke ndin̄wana nnọ idem nnyịn. Utu ke oro, ẹyak kpukpru nnyịn ida mme ikọ Jesus idu uwem: “Ọfọn ndinọ akan ndibọ.”—Utom 20:35.

‘Ẹmụm Idem Ẹnịm ke Ima Abasi’

13. Ntak emi kpukpru nnyịn ikpenyenede ọkpọsọn̄ udọn̄ ndidu ke ima Abasi?

¹³ Ke utịt utịt leta esie, Jude ọnọ inem inem item emi: “[Ẹmụm] idem mbufo ẹnịm ke ima Abasi.” (Jude 21) Idụhe n̄kpọ oro edin̄wamde nnyịn ndin̄wana ekọn̄ Christian akan n̄kpọ kiet emi, ndika iso ndi mbon oro Jehovah Abasi amade. Idem n̄kpọ, ima edi n̄wọrọnda edu Jehovah. (1 John 4:8) Paul ekewet ọnọ mme Christian ke Rome ete: “Mmetịm mbụre mfiọk nte, n̄kpa ye uwem, ye mme angel ye mbọn̄, ye n̄kpọ eke ẹdude ke emi, ye n̄kpọ eke ẹdidide, ye mme odudu, ye ukon̄ ye utụn̄ọ, ye n̄kpọ efen ekededi eke ẹbotde, idikemeke ndidianade nnyịn ke ima Abasi, emi odude ke Christ Jesus Ọbọn̄ nnyịn.” (Rome 8:38, 39) Didie, ndien, ke nnyịn ikeme ndika iso ndu ke ima oro? Tịm fiọk n̄kpọ ita oro nnyịn ikemede ndinam, nte Jude ọdọhọde.

14, 15. (a) Nso ke ọwọrọ ndibọp idem ke enyọn̄ “edisana mbuọtidem”? (b) Didie ke nnyịn ikeme ndidụn̄ọde idaha n̄kpọekọn̄ eke spirit nnyịn?

¹⁴ Akpa, Jude ọdọhọ nnyịn ika iso ibọp idem nnyịn ke enyọn̄ “edisana mbuọtidem.” (Jude 20) Nte nnyịn ikokụtde ke ibuotikọ oro ekebemde iso, emi edi edinam oro akade-ka iso. Nnyịn itie nte mme ufọk oro ẹyomde ẹdọdiọn̄ ẹnam ẹsọn̄ idem mbak mme n̄kpọ oro ẹkemede ndiwụri enye. (Men Matthew 7:24, 25 domo.) Ntre ẹyak nnyịn ikûdede inyene mbuọtidem ke idem nnyịn ikaha. Utu ke oro, ẹyak nnyịn iyom ebiet oro nnyịn ikemede ndibọp idem nnyịn ke enyọn̄ itiat idakisọn̄ mbuọtidem, ikabade idi mme ata okopidem mbonekọn̄ Christ oro ẹnen̄erede ẹnam akpanikọ. Ke uwụtn̄kpọ, nnyịn imekeme ndikere mban̄a mme n̄kpọ oro ẹnamde n̄kpọekọn̄ eke spirit oro ẹtịn̄de ẹban̄a ke Ephesus 6:11-18.

¹⁵ Nso idi idaha n̄kpọekọn̄ eke spirit nnyịn? Ndi “otu-ekọn̄” nnyịn ọsọn̄ idem nte oyomde enye ọsọn̄? Nte nnyịn ifiakde ise mme isua ndondo ẹmi ẹbede, nte nnyịn imokụt idiọn̄ọ editek ke ifịk, utọ nte editre ndidụk mbono esop, editek ke ifịk ke utom ukwọrọikọ, m̀mê nduaidem kaban̄a ọkpọkpọ ukpepn̄kpọ ndisụhọde? Mme utọ idiọn̄ọ oro idịghe n̄kpọ mbubru! Oyom nnyịn inam n̄kpọ idahaemi man ikọri inyụn̄ isọn̄ idem ke akpanikọ.—1 Timothy 4:15; 2 Timothy 4:2; Mme Hebrew 10:24, 25.

16. Nso ke ndibọn̄ akam ke edisana spirit ọwọrọ, ndien nso idi n̄kpọ kiet emi nnyịn ikpeben̄ede Jehovah kpukpru ini?

¹⁶ Ọyọhọ usụn̄ iba ndika iso ndu ke ima Abasi edi ndika iso ‘mbọn̄ akam ke edisana spirit.’ (Jude 20) Oro ọwọrọ ndibọn̄ akam ke idak odudu spirit Jehovah ye ke n̄kemuyo ye Ikọ esie eke odudu spirit. Akam edi akpan usụn̄ ndisan̄a n̄kpere Jehovah ọkpọkpọ nnyụn̄ n̄wụt utuakibuot nnyịn nnọ enye. Nnyịn ikpedehede ifụmi utịbe utịbe ifet emi! Ndien ke ini nnyịn ibọn̄de akam, nnyịn imekeme ndiben̄e—ke akpanikọ, ika iso iben̄e—edisana spirit. (Luke 11:13) Enye edi akakan odudu emi odude ọnọ nnyịn. Ye utọ un̄wam oro, nnyịn kpukpru ini imekeme ndidu ke ima Abasi nnyụn̄ nyọ nte mbonekọn̄ Christ.

17. (a) Ntak emi uwụtn̄kpọ Jude ke ediwụt mbọm edide n̄wọrọnda ntre? (b) Didie ke nnyịn owo kiet kiet ikeme ndika iso n̄wụt mbọm?

¹⁷ Ọyọhọ ita, Jude akpak nnyịn ete ika iso ndiwụt mbọm. (Jude 22) Uwụtn̄kpọ esie ke afan̄ emi edi n̄wọrọnda. Kamse, enye nte enende ama okop editịmede esịt aban̄a mbiara edinam, oburobụt ido, ye nsọn̄ibuot ndinyọni ndụk esop Christian. Kpa ye oro, enye ikayakke idem inọ ndịk, enyenede ekikere nte ke etie nte eyo oro ama ọdiọk akaha ndiwụt utọ “mmemmem” edu nte mbọm. Baba, enye ama akpak nditọete esie ndika iso ndiwụt mbọm ke ini ekededi oro ẹkemede, ọkọkde ibuot ke mfọnido ye mbon oro ẹnyenede eyịghe ndien akam ‘adabade’ mbon oro ẹkperede ndinam akwa idiọkn̄kpọ ‘osio ke ikan̄.’ (Jude 23; Galatia 6:1) Nso eti item ke emi edi ntem ọnọ mbiowo ke ntịme ntịme ini emi! Mmọ n̄ko ẹdomo ndiwụt mbọm ke ebiet ekededi oro isọn̄ odude kaban̄a emi, ke adan̄aemi ẹsụk ẹnyenede iwụk ke ini oyomde. Oyom kpukpru nnyịn ukem ntre iwụt kiet eken mbọm. Ke uwụtn̄kpọ, utu ke ndisịn n̄kpri udu ke esịt, nnyịn imekeme ndifen nnọ ke ntatubọk.—Colossae 3:13.

18. Didie ke nnyịn ikeme ndidori enyịn ndinyene edikan ke ekọn̄ eke spirit nnyịn?

¹⁸ Ekọn̄ emi nnyịn in̄wanade idịghe mmemmem. Nte Jude etịn̄de, enye edi ‘ọkpọsọn̄ en̄wan.’ (Jude 3) Mme asua nnyịn ẹkop odudu. Idịghe Satan ikpọn̄ edi idiọk ererimbot esie ye mme unana mfọnmma nnyịn kpukpru ẹdu ke mben̄eidem ndin̄wana ye nnyịn. Kpa ye oro, nnyịn imekeme ndinyene ọyọhọ mbuọtidem ndikan! Ntak-a? Koro nnyịn idade ke n̄kan̄ Jehovah. Jude eberi leta esie ye n̄kpọ editi nte odotde nte ke “ubọn̄, ye ubom, ye edikara, ye odudu ẹnyene [Jehovah], toto ke editọn̄ọ, ye ke emi, ye ke nsinsi.” (Jude 25) Nte oro idịghe ekikere oro enyenede uten̄e? Nte mbụme ekededi ekeme ndidu, ndien, nte m̀mê ukem Abasi emi “ekeme ndikpeme mbufo, ete, ẹkûduọ”? (Jude 24) Ke akpanikọ idụhe! Ẹyak nnyịn owo kiet kiet ibiere ndika iso mbiọn̄ọ oburobụt ido, ndiwụt ukpono nnọ odudu emi Abasi enịmde, nnyụn̄ nnịm idem nnyịn ke ima Abasi. Ke usụn̄ oro, nnyịn iyadara ubọn̄ ubọn̄ edikan ọtọkiet.

[Mme Ikọ idakisọn̄]

Mme Mbụme Ndụn̄ọde

◻ Didie ke leta Jude ekpep nnyịn ndifep oburobụt ido?

◻ Ntak emi edide akpan n̄kpọ ntre ndikpono odudu emi Abasi enịmde?

◻ Nso inen̄ede idiọk ye edida odudu nnam n̄kpọ ke ukwan̄ usụn̄ ke esop?

◻ Didie ke nnyịn ikeme ndinam utom ndimụm idem nnịm ke ima Abasi?

[Ndise ke page 15]

Ke mîbietke mbonekọn̄ Rome, mme Christian ẹn̄wana ekọn̄ eke spirit

[Ndise ke page 18]

Mme ekpemerọn̄ Christian inamke utom ke ntak ibụk, edi ke ntak ima