15. Nso idi akpan n̄kpọ esịnede ke mme ikọ Jesus oro nte ke imọ idi “Anditịn̄ ikọ ẹmi” ye nte ke imọ ‘imọn̄ idi iwiwa’?

¹⁵ Idahaemi Jesus adian akpatre ikọ nsịnudọn̄ ete: “Anditịn̄ ikọ ẹmi ete, Ke akpanikọ, mmọn̄ ndedi iwiwa.” (Ediyarade 22:20a) Jesus edi “ata ntiense akpanikọ.” (Ediyarade 3:14) Edieke enye etiede ntiense aban̄a mme n̄kukụt eke Ediyarade, ana mmọ ẹdi akpanikọ. Enye ye Jehovah Abasi ke idemesie ẹsọn̄ọ ẹtịn̄ akpanikọ oro ndien ndien ẹte ke mmimọ ke idi “iwiwa,” m̀mê usọp usọp, mi Jesus etịn̄ ntre ọyọhọ utịm ikotion. (Ediyarade 2:16, NW; 3:11; 22:7, 12, 20, NW) ‘Edidi’ oro edi ndibiere ikpe nnọ akwa akpara oro, “ndidem” ukaraidem ye kpukpru mbon eken oro ẹbiọn̄ọde “Obio Ubọn̄ Ọbọn̄ [Jehovah] nnyịn ye Christ Esie.”—Ediyarade 11:15; 16:14, 16; 17:1, 12-14.

16. Ke ọfiọkde ete ke Jehovah Abasi ye Jesus ke ẹdi iwiwa, nso ubiere ke akpana afo anam?

¹⁶ Afo ndifiọk nte ke Jehovah Abasi ye Jesus ke ẹdi iwiwa ekpenyene ndisịn udọn̄ nnọ fi “ndinyene edidu eke usen Jehovah ke ekikere kpukpru ini.” (2 Peter 3:12, NW) N̄kpọ ekededi oro ekpetiede nte ọsọn̄ọ ada ke editịm n̄kpọ ererimbot Satan edi abian̄a. N̄kpọ ekededi oro ekpetiede nte edikụt unen oro enyọn̄ eke mme andikara ererimbot ke idak Satan ẹkpekụtde edi ke ibio ibio ini. Mme n̄kpọ ẹmi ke ẹbebe ẹfep. (Ediyarade 21:1) Ke Jehovah ke ẹkụt n̄kukụre n̄kpọ oro ebịghide, kpa Obio Ubọn̄ esie ke ubọk Jesus Christ, ye obufa ererimbot oro enye ọn̄wọn̄ọde. Kûdedei ufre enyịn uban̄a oro!—1 John 2:15-17.

19. Nso idi akpatre ikọ apostle John oro ọsọn̄de ke emana mi, ndien afo anam n̄kpọ didie aban̄a mmọ?

¹⁹ Ntem, ye John, nnyịn ibọn̄ akam ufiop ufiop ite: “Amen. Di, Ọbọn̄ Jesus.” Ndien John, apostle oro ọsọn̄de ke emana, adian do ete: “Mfọn Ọbọn̄ Jesus [Christ] akpakam odu ye kpukpru ikọt Abasi.” (Ediyarade 22:20b, 21) Enye n̄ko akpakam odu ye kpukpru mbufo oro ẹkotde n̄wed emi. Afo akpakam enyene mbuọtidem ete ke ubọn̄ ubọn̄ ata-utịt Ediyarade emekpere, man afo n̄ko ekeme ndibuana ye nnyịn ke ufiop ufiop “Amen”!