Mme Mbụme Ẹtode Mme Andikot

◼ Nte ndusụk Christian oro ẹyetde aran ẹyebọhọ “akwa ukụt” ẹkaiso ẹdu ke isọn̄ ke obufa ererimbot mbemiso ẹdade mmọ ẹka heaven?

Nte enende, Bible itịn̄ke emi.

Mme Christian ke anyanini ẹma ẹnyene udọn̄ ẹban̄a mme ifet oro Abasi ekemede ndinọ mmọ. (Utom 1:6) Oro edi ntre akpan akpan ke eyo nnyịn tọn̄ọ nte ẹkewụk Obio Ubọn̄. (Matthew 24:3, 24, 34) Ye idiọk editịm n̄kpọ emi ndisịm utịt ke eyo mmọ, mme Christian ẹma ẹyịk m̀mê ndusụk mbon oro ẹyetde aran ke spirit ẹyedu uwem ẹbe “ekọn̄ akwa usen Abasi” ẹnyụn̄ ẹnam utom esisịt ini ke isọn mbemiso ẹbọde n̄kpọ eyenutom mmọ eke heaven. (Ediyarade 16:14) Bible idọhọke ite ke emi eyetịbe, kpa ye oro ẹma ẹda ndusụk uwụtn̄kpọ ye mme prọfesi ndiwụt nte ke emi ekeme ndidi ntre. Utu ke ndibiere n̄kpọ nnịm, nnyịn imekeme ndiwụk enyịn nse nte Abasi edinamde mme n̄kpọ.

Ndusụk n̄kpọntịbe Bible ẹsinyene mme mbiet n̄kpọ eke ukperedem ke otu ikọt Abasi. Ke uwụtn̄kpọ, nnyịn imọfiọk ite ke Jonah okodu ke idịbi akamba iyak ke usen ita ye okoneyo ita. Ndusụk owo ẹkeme ndise oro nte sụk uwụtn̄kpọ edinyan̄a otode Abasi, edi Jesus ọkọdọhọ ete ke emi ekedi ntịn̄nnịm uwụtn̄kpọ ke nte imọ ididude ke udi ke udomo ini ntre mbemiso imọ isetde ke n̄kpa. (Jonah 1:17; Matthew 12:40) Ih, se ikotibede inọ Jonah ekedi ntịn̄nnịm n̄kpọntịbe. Nte an̄wan̄ade, mme asan̄autom Abasi ẹma ẹdụn̄ọde mme prọfesi ye san̄asan̄a mbụk Bible ndikụt m̀mê mmọemi ẹkpewụt nte Jehovah edinamde n̄kpọ kan̄a ye mmọ.

Nte uwụtn̄kpọ kiet abuanade prọfesi Bible, Enyọn̄-Ukpeme (Ikọmbakara) eke December 15, 1928, ama eneme n̄kpọ aban̄a Micah 5:2-15. N̄wed Micah eneme aban̄a nte ‘mbon Assyria’ ẹkesobode Samaria ye nte mme Jew ẹkenyọn̄de ntan̄mfep ke Babylon. (Micah 1:1, 5-7; 4:10) Edi enye n̄ko anyan ubọk owụt mme n̄kpọntịbe eke ukperedem ini, utọ nte emana Messiah ke Bethlehem. (Micah 5:2) Micah ama etịn̄ prọfesi ete ke ẹma ẹkenyan̄a mmọ ẹsio ke ubọk “[mbon] Assyria,” “nditọ Jacob eke ẹsụkde ẹyedu” ẹnyụn̄ ẹkabade ẹtie “nte mbara eke otode Jehovah” ye nte “n̄kparawa lion ke otu mme udịm n̄kpri ufene.” (Micah 5:6-8) Enyọn̄-Ukpeme (Ikọmbakara) oro ọkọdọhọ ete: “Ẹkeme ndida ke emi edi idiọn̄ọ nte ke ndusụk nsụhọ ẹyedu ke isọn̄ idem ke ẹma ẹken̄wana ekọn̄ Armageddon ẹkụre ndien adan̄aoro ẹyenyene ndusụk utom efen efen ndinam ke enyịn̄ Ọbọn̄ man ẹnyụn̄ ẹnọ enye itoro ye ubọn̄.” Tịmfiọk ikọ nsụhọdeidem oro owụtde ifiọk, emi ẹkedade ke nditọn̄ọ ntịn̄ se ikemede nditịbe mi: “Ẹkeme ndida ke emi edi idiọn̄ọ.”

Nso kaban̄a mbụk a-Bible oro ekpebietde uto edibọhọ ndu ntre ke isọn̄? Uwụtn̄kpọ kiet oro ẹkewụtde aban̄a Noah ye ubon esie, Esise Noah nte owo oro akadade aban̄a Jesus ke utịt ini emi. (Genesis 6:8-10; Matthew 24:37) Nte Noah akadade n̄wan esie ye nditọiren esie ita ye iban nditọ esie ebe utịt editịm n̄kpọ eset oro, Christ eyeda nsụhọ otu an̄wanndọ esie usụn̄ ye mbon oro ẹkabarede edi nditọ ẹnọ “Nsinsi Ete,” kpa Jesus. N̄wan Noah ama ọbọhọ Ukwọ oro onyụn̄ abuana ke ndinam utuakibuot akpanikọ edi obufa ke isọn̄ oro ẹkenamde asana. Mbiet n̄kpọ kiet ekeme ndidi edibọhọ eke nsụhọ otu an̄wanndọ ndụk obufa ererimbot.​—Isaiah 9:6, 7; 2 Corinth 11:2; Ediyarade 21:2, 9.a

Ẹma ẹse n̄ko mme mbụk Bible eken nte se inọde ekikere nte ke ndusụk mbon oro ẹyetde aran ẹkeme ndidu uwem mbe ndụk obufa ererimbot. Ke uwụtn̄kpọ, Jeremiah ama ọbọhọ nsobo Jerusalem; “owo oro” ọkọn̄ọde ekpeme ewetn̄wed ama akaiso odu ndikụt utom uwotowo oro mbemiso afiakde edem ọkọnọ ntọt esie.​—Ezekiel 9:4, 8, 11.

Mme ikọ ẹban̄ade se ikemede nditịbe mi nte ke ndusụk mbon oro eyetde aran ẹkeme ndidu uwem mbe ndụk obufa ererimbot edi se etin̄de ye nti uduak ye ke un̄wam otode mme n̄kpọntịbe Bible eke ini edem ke ndin̄wana ndifiọk mme prọfesi m̀mê mme uwụtn̄kpọ oro ẹnyenede mbiet n̄kpọ ke ukperedem. Edieke otịbede nte ke baba kiet ke otu mbon oro eyetde aran isụhọke ke isọn̄, ntak unana edikop uyụhọ ididụhe. Nnyịn ima inyenyịme ite ke mme n̄kpọ eke Bible ẹsinen̄ede an̄wan̄a owo akan nte ini ebede. Ke uwụtn̄kpọ, Enyọn̄-Ukpeme (Ikọmbakara) eke July 15, 1981, ama afiak eneme n̄kpọ aban̄a Micah 5:6-9 onyụn̄ anam an̄wan̄a ete ke “nsụhọ nditọ Israel eke spirit inyeneke ndibet tutu . . . Har-Magedon ebe man ẹkpekabade ẹtie nte ‘mbara’ oro edemerede ukpọn̄ mme owo.” Nneme emi ama afiak etịn̄ se ikemede nditịbe mi ete ke nsụhọ ẹkeme ndibọhọ ekọn̄ akwa usen Abasi ndien ke esisịt ini “ẹkaiso ndidu nte ‘mbara’ oro edemerede ukpọn̄ ‘akwa otuowo’ eke ‘mme erọn̄ en̄wen.’“ Nte ededi, nnyịn imekeme ndikụt nte ke ini ndibe ye n̄kọri ke un̄wana eke spirit ekeme nditat ifiọk nnyụn̄ n̄kpụhọde usụn̄ nte prọfesi m̀mê mme n̄kpọntịbe Bible an̄wan̄ade nnyịn,​—Mme N̄ke 4:18,

Nnyịn imọfiọk ite ke Bible emen ‘edidi Eyen owo’ ekeyịri ye ‘editan̄ ndimek ikọt Esie ke ikpehe ofụm mbinan̄ mbon ọtọkiet.’ (Matthew 24:29-31) N̄ko, ke ini “edid[u] Ọbọn̄” ke ukara Obio Ubọn̄, ẹnam mbon oro ẹyetde aran ẹmi ẹdede ke n̄kpa ẹset ẹnyene uwem ke heaven. (1 Thessalonica 4:15, 16) Mbon oro ẹfịkde idiọn̄ọ mi ẹdu do ndikabade ndi ubak an̄wanndọ Eyenerọn̄, Oro otịbe ini ewe?

Ke n̄wed Ediyarade, ndondo oro John okụrede editịn̄ mban̄a ubiomikpe oro Abasi ọnọde akpara ido ukpono oro, Akwa Babylon, enye etịn̄ aban̄a “ndọ Eyenerọn̄.” Ẹmen ndedehe, oburobụt “an̄wan” kiet ẹfep ke itie, ndien nnyịn imokụt “n̄wanndọ, n̄wan Eyenerọn̄” ‘esịnede ediye linen eke asanade onyụn̄ esemde; emi ediye linen oro adade aban̄a edinen ido nti ikọt Abasi.’ (Ediyarade 18:10; 19:2, 7, 8; 21:9) Nsobo Akwa Babylon edi ubak akwa ukụt. (Matthew 24:21; Ediyarade 7:14) Ntre ẹkeme ndikere nte ke ndusụk ke otu an̄wanndọ oro ẹyebọhọ akwa ukụt nte uyarade unyịme ye ukpeme Jehovah. (Zephaniah 2:3; men Matthew 24:22 domo.) Edieke ẹnịmde mmọ uwem ntem ke isọn̄, mmọ ẹkeme ndikaiso ndu tutu Abasi emek ndida mmọ n̄ka heaven.

Nte ededi, nte ẹwụtde n̄kpọ emi ke n̄wed Ediyarade idịghe se ẹtienede ketket ke adiana ke adiana, Inyụn̄ idịghe nte ke ẹyeyom nsụhọ oro ẹyetde aran man ẹnam obufa ererimbot akaiso, koro mmọ ẹma ẹkpekpep ediwak million mme anam-akpanikọ Christian oro ẹdidude uwem nsinsi ke isọn̄. Nte ekemde, Abasi ekeme ndida ikọt esie oro ẹyetde aran n̄ka heaven ndondo oro nsobo Akwa Babylon okụrede, anamde ufan̄ odu ọnọ “ndọ Eyenerọn̄” ndida itie. Kpukpru ndisana ikọt Abasi ke ntem ẹkeme ndibuana ye Christ ke ‘ndida esan̄ ukwak n̄kpeme mme idụt’ ke akwa ukụt oro osụhọde. (Ediyarade 2:26, 27; 19:11-21) Edieke oro edide usụn̄ nte Abasi anamde mme n̄kpọ, kpukpru owo 144,000 ẹyedu ye Jesus ‘ndikara ye Christ nte ndidem ke ofụri tọsịn isua kiet oro.’​—Ediyarade 20:4.

Ke akpanikọ ọfọn nte ikọt Abasi ẹnyenede ọkpọsọn̄ udọn̄ ndidụn̄ọde nte enye edinọde mme asan̄autom esie ndausụn̄ ye utịp. (Men 1 Peter 1:12 domo.) Emi owụt mbuọtidem oro mmọ ẹnyenede nte ke uduak esie ọmọn̄ osu. Okposụkedi nnyịn mîkemeke, mîkponyụn̄ ibiereke mme n̄kpọ inịm, nnyịn ye ọkpọsọn̄ udọn̄ imekeme ndisak iso nse se iditịbede.

[Mme Ikọ Idakisọn̄]