“Usen Ọbọn̄”

“N̄KODU ke spirit ke usen Ọbọn̄.” (Ediyarade 1:10) Ntre ke akanieren apostle John eketịn̄, nte ẹwụtde ke enyọn̄ emi, ke akpa ibuot n̄wed Bible eke Ediyarade. Ikọ esie an̄wam nnyịn ndifiọk ini oro ubọn̄ ubọn̄ n̄kukụt oro enye akade iso ndinam an̄wan̄a osude.

Idịghe kpukpru owo, nte ededi, ẹnyịme ye edikabade eke Ediyarade 1:10 emi. Ke uwụtn̄kpọ, andikabade Bible usem Germany oro, Jörg Zink akabade enye ntem: “Ami n̄kọyọhọ ye edisana spirit—ekedi ke Sunday.” Ediwak edikabade Bible, nte ededi, ẹkabade ubak udịmikọ usem Greek oro, teiʹ ky·ri·a·keiʹ he·meʹrai nte “usen Ọbọn̄.” Edi ke ikọ idakisọn̄, ediwak mmọ ẹdọhọ ke enye etịn̄ aban̄a Sunday. Nte emi enen?

Herders Bibelkommentar eke usem Germany, kpa n̄wed ndụn̄ọde Catholic, anam an̄wan̄a ntak ekikere emi ke ini enye ọdọhọde ete: “Mi [ke Ediyarade 1:10] owo itịn̄ke iban̄a Usen Akpatre Ubiereikpe, emi ke usụn̄ efen ẹdiọn̄ọde nte ke ‘Usen Ọbọn̄’, edi ẹtịn̄ ẹban̄a akpan usen ke urua. Mme akpa Christian ẹma ẹbabak ẹtọn̄ọ ndinịm akpa usen urua nte usen akpan edinam ufọkederi mmọ ke ufọt ufọt akpa isua ikie. (Utom 20:7; 1 Cor. 16:2)” Nte ededi, itien̄wed Abasi iba oro ẹsiakde ke n̄wed ndụn̄ọde oro ke usụn̄ ekededi iwụtke nte ke mme Christian akpa isua ikie ẹkeda akpa usen urua nte “usen akpan edinam ufọkederi mmọ.”

Akpa itien̄wed oro, Utom Mme Apostle 20:7, n̄kukụre etịn̄ nte ke Paul, nsan̄a mbonisan̄ esie, ye mme Christian ẹtode Traos ẹma ẹsop idem ọtọkiet ke akpa usen urua ndidia udia. Sia Paul okoyomde ndisio ke ndan̄nsiere mîdinyụn̄ ikwe mmọ aba ke ndusụk ini, enye ama ada ifet oro nditịn̄ ikọ nnọ mmọ ke anyanini.

Ọyọhọ itien̄wed iba, 1 Corinth 16:2, ekesịn udọn̄ ọnọ mme Christian ke Corinth ndisio okụk nnịm “ke akpa usen urua” man ẹnyene n̄kpọ ndinọ mbon oro ẹdude ke unana ke Judea. Eyen ukpepn̄kpọ oro, Adolf Deissmann ọnọ ekikere ete ke usen emi ekeme ndidi ekedi usen ukpeokụk. Ke idaha ekededi, ekikere oro Paul ọkọnọde ama odot, sia okụk ekemede ndikụre ke ufọt urua.

Idụhe itie ndomokiet ke Bible oro ọdọhọde ke mme Christian ke eyo mme apostle ẹma ẹda akpa usen urua, oro ẹkotde idahaemi Sunday, nte orụk sabbath Christian, kpa usen oro ẹsiode ẹnịm san̄san̄a ẹnọ utuakibuot mbonoesop mmọ eke kpukpru ini. Ekedi n̄kukụre ke n̄kpa mme apostle ama ekebe ke ẹkedida Sunday ke usụn̄ emi ẹnyụn̄ ẹkabade ẹkot “usen Ọbọn̄.” Emi ekedi ubak nsọn̄ibuot oro Jesus ye mme apostle ke idemmọ ẹkebemde iso ẹtịn̄.—Matthew 13:36-43; Utom 20:29, 30; 1 John 2:18.

Nso, ndien, idi “usen Ọbọn̄”? Udọn̄ikọ Ediyarade 1:10 anyan ubọk owụt Jesus nte Ọbọn̄ emi usen oro edide eke esie. Ikọ Abasi anam ẹdiọn̄ọ mme utọ ikọ nte “usen Ọbọn̄ nnyịn Jesus Christ” ye ini ubiereikpe nnọ ubonowo ye edifiak n̄wụk Paradise.—1 Corinth 1:8; 15:24-26; Philippi 1:6, 10; 2:16.

Ntre, Hans Bruns, ke edikabade esie emi asan̄ade ye utatikọ, Das Neue Testament (Obufa Testament), enen ke ini enye ọdọhọde ete: “Ndusụk owo ẹdọhọ ke enye [John] mi etịn̄ aban̄a Sunday, edi otịm etie nte ke enye etịn̄ aban̄a akwa Usen Ọbọn̄, emi nte ededi kpukpru se enye etịn̄de ke oro ebede adade aban̄a.” W.E. Vine ọdọhọ ete: “‘Usen Ọbọn̄’ . . . edi Usen oro Enye ayararede ubiereikpe esie ọnọ ererimbot.” Lexikon zur Bibel (N̄wed Ukabadeikọ Bible) eke Fritz Rienecker ọdọhọ ete ke “usen Ọbọn̄” nte an̄wan̄ade etịn̄ aban̄a “usen ikpe.”

Nnennen ifiọk aban̄ade ikọ oro “usen Ọbọn̄,” an̄wam nnyịn ndidiọn̄ọ ofụri n̄wed Ediyarade. Akande oro, uyarade edi nte ke usen oro ama ọtọtọn̄ọ. Didie, ndien, ke edi akpan n̄kpọ ntem ete nnyịn ‘ikop ikọ prọfesi eke Ediyarade inyụn̄ inam mme n̄kpọ oro ẹwetde ke esịt’!—Ediyarade 1:3, 19.

[Ndise ke page 27]

Ẹnọ in̄wan̄în̄wan̄ edinam an̄wan̄a oro ekemde ye ifiọk idahaemi ke ufan̄ikọ kiet kiet ke n̄wed Ediyarade ke “Revelation—Its Grand Climax At Hand!” Omụm owo udọn̄ un̄wam ukpep Bible emi odu idahaemi ke usem 33