Mme Andikụre Ukpep Gilead Ẹbọ Item Oro Otụkde Mmọ Esịt
KE SEPTEMBER 9, 2006, ẹma ẹnam edinam ukụre ukpep ọyọhọ otu 121 eke Ufọkn̄wed Enyọn̄-Ukpeme Ukpep Bible eke Gilead ke Itie Unọ Ukpep Enyọn̄-Ukpeme ke Patterson ke New York. Ekedi ata inem inem edinam.
Geoffrey Jackson, emi edide owo Otu Ukara Mme Ntiense Jehovah ekeberede edinam emi ke ndikọm owo 56 oro ẹkekụrede ukpep ye owo 6,399 oro ẹketode nsio nsio itie ke ererimbot ẹdi, ete, ẹmedi-o! Enye ekeneme Psalm 86:11, emi ọdọhọde ete: “Teme mi usụn̄ fo, O Jehovah; nyasan̄a ke akpanikọ fo: kọt esịt mi abak enyịn̄ fo.” Brọda Jackson ama osio akpan n̄kpọ ita emi ẹsọn̄ọde ẹtịn̄ ke ufan̄ikọ oro owụt. Enye ọkọdọhọ ete: “Akpa edi item; udiana edi edida item oro nsịn ke edinam; ọyọhọ ita edi udọn̄ ndinam item oro. N̄kpọ mbita emi ẹnen̄ede ẹdi akpan n̄kpọ ẹnọ mbufo mme isụn̄utom ke emi mbufo ẹdikade efakutom mbufo mi.” Ekem enye ama asiak mme utịn̄ikọ ye mme nnamn̄wụt oro ẹdisiode n̄kpọ mbita emi iwụt.
Item Oro Otụkde Owo Esịt
William Malenfant, emi anamde utom ke ibuot itieutom, ekeneme ibuotikọ emi, “Mfọnn̄kan Uwem.” Enye ama etịn̄ aban̄a uwụtn̄kpọ Mary eyeneka Martha. Isan̄ kiet ke ini Jesus akakade ekese mmọ, Mary ama emek ndisụhọde ntie ke isọn̄ ke ukot Esie n̄kpan̄ utọn̄ nnọ enye onyụn̄ ada oro nte ebeiso n̄kpọ. Jesus ama asian Martha ete: “[Mary] ememek eti udeme, eke owo mîdibọhọ enye.” (Luke 10:38-42) Brọda Malenfant ama ọdọhọ ete: “Kam kere ban̄a oro. Tutu amama Mary idifreke ke imọ ima isụhọde itie ke isọn̄ ke ukot Jesus ikpan̄ utọn̄ ikop utịbe utịbe akpanikọ Abasi—ndien kpukpru emi edi ke ntak emi enye ekemekde eti udeme.” Ke ama okotoro mme andikụre ukpep oro aban̄a n̄kpọ eke spirit oro mmọ ẹmekde, enye ama aka iso ọdọhọ ete: “Se mbufo ẹkemekde amanam mbufo ẹdu mfọnn̄kan uwem.”
Ekem Anthony Morris, emi edide owo Otu Ukara, ama eneme ibuotikọ emi, “Ẹmen Ọbọn̄ Jesus Christ Ẹsịne,” emi adade oto Rome 13:14. Didie ke nnyịn ikeme ndimen Christ nsịne? Brọda Morris ama ọdọhọ ke ikọ idakisọn̄ itien̄wed oro ke Reference Bible ọdọhọ ete: “Ẹkpebe ido Christ.” Ntem, emi ọwọrọ ndikpebe uwụtn̄kpọ ye edu ukere n̄kpọ esie. Brọda Morris ọkọdọhọ ete: “Jesus ama anam mme owo ẹma ndikpere enye idem, sia enye ama enen̄ede enyene udọn̄ ke idem mmọ, mmọ ẹnyụn̄ ẹnen̄ede ẹfiọk oro.” Ekem etịn̄ikọ ama eneme aban̄a nte nditọ ufọkn̄wed oro ẹkekọde ekese ifiọk ke ini oro mmọ ẹkebọde ukpep ke Gilead, kpa nte Ephesus 3:18 ọdọhọde, ‘man ẹkpekeme ndifiọk se idide ubom ye uniọn̄ ye ukon̄ ye utụn̄ọ’ akpanikọ. Edi enye ama eti mmọ n̄ko ufan̄ikọ 19, emi adiande ete: “Nnyụn̄ mfiọk ima Christ emi akande ifiọk.” Brọda Morris ama ọdọhọ nditọ ufọkn̄wed oro ete: “Nte mbufo ẹkade iso ke ọkpọkpọ ukpepn̄kpọ, ẹkere nte mbufo ẹkemede ndikpebe nte Christ akamade onyụn̄ ekerede aban̄a mme owo, ẹnyụn̄ ẹnen̄ede ‘ẹmen Ọbọn̄ Jesus Christ ẹsịne.’”
Item Unyọn̄ Oro Mme Andikpep ke Gilead Ẹnọde
Brọda Wallace Liverance, emi edide andikpep ke Gilead, ọkọnọ utịn̄ikọ oro eketienede, ndien enye akade ibuotikọ esie oto Mme N̄ke 4:7. Enye ama ọdọhọ ke eti ibuot oro otode Abasi edi ata akpan n̄kpọ, edi ke ana nnyịn ‘inyene asian’ n̄ko, oro edi ukeme ndida nsio nsio ikpehe ibuot nneme n̄keyịri ye kiet eken, nnyụn̄ n̄kụt ebuana oro mmọ ẹnyenede ye kiet eken, man se ẹnemede ekeme ndinen̄ede n̄n̄wan̄a nnyịn. Etịn̄ikọ ama owụt ke emi ada idatesịt ọsọk nnyịn. Ke uwụtn̄kpọ, ke eyo Nehemiah, mme Levite ‘ẹma ẹsian mme owo n̄wed ibet.’ Ke oro ebede, mme owo oro ẹma ẹnam ‘akamba idara: koro mmọ ẹtịmde ẹfiọk ikọ emi ẹsiakde ẹnọ mmọ.’ (Nehemiah 8:7, 8, 12) Brọda Liverance akada ikọ esie ekeberi ntem: “Idatesịt edi udiana utịp edifiọk Ikọ Abasi eke odudu spirit.”
Mark Noumair, emi edide andikpep n̄ko ke Gilead, ekeneme ibuotikọ emi, “Anie Enen̄ede Edi Asua Fo?” Ediwak mbonekọn̄ ẹsikpan̄a ke ini ekọn̄ ke ntak emi mbon udịmekọn̄ mmọ ẹduede ẹtop mmọ. Brọda Noumair ama obụp ete: “Nso kaban̄a ekọn̄ eke spirit oro nnyịn in̄wanade? Edieke nnyịn mîkpemeke idem, ekeme ndisọn̄ nnyịn ndifiọk owo emi enen̄erede edi asua nnyịn, ndien ke ntem inọ mbon udịmekọn̄ nnyịn unan.” Isịnenyịn ekeme ndinam ọsọn̄ ndusụk owo ndifiọk owo emi edide asua nnyịn. Emi ama anam Edidem Saul odomo ndiwot David, emi eketienede atuak ibuot ọnọ ata Abasi, ke adan̄aemi edide mbon Philistine ẹkenen̄ede ẹdi mme asua. (1 Samuel 18:7-9; 23:27, 28) Ekem etịn̄ikọ ama aka iso ọdọhọ ete: “Nso ke edinam edieke anamde utom ye isụn̄utom oro ekemede ndinam nsio nsio n̄kpọ? Ndi ayada ndiọi ikọ abiat owoekọn̄ mbufo, mîdịghe ndi eyetie emem emem onyụn̄ enyịme ke edi ndammana n̄kpọ mbon en̄wen ndikan fi ke nsio nsio usụn̄? Ndiwụk enyịn ke unana mfọnmma mbon en̄wen ekeme ndinam ọsọn̄ nnyịn ndifiọk enye emi enen̄erede edi asua nnyịn. Ẹn̄wana ye Satan emi edide ata asua.”
Ndinem Ifiọkutom ye Mme Ndụn̄ọde Oro Ẹsịnede Ifiọk
Brọda Lawrence Bowen, emi edide andikpep ke Gilead, ekeneme ibuotikọ emi ọdọhọde, “Nam Utom Ọkwọrọ Eti Mbụk,” ndien enye ama esịne mme ndụn̄ọde ye mme ifiọkutom. Enye ama anam an̄wan̄a ke ikọ idakisọn̄ ke 2 Timothy 4:5 ke Reference Bible ọdọhọ ete, nam utom “isụn̄utom.” Enye ama adian do ete: “Emi enen̄ede odot koro akpan utom isụn̄utom emi ọbọde ukpep ke Gilead edi ndisuan eti mbụk, ndien otu nditọ ufọkn̄wed emi ẹmenam emi ke ebiet ekededi oro mmọ ẹkụtde mme owo.” Ẹma ẹfiak ẹnam ndusụk ndinem ifiọkutom ẹwụt.
Ke oro ebede, mbonubon Bethel iba, Brọda Michael Burnett, ndien ekem Brọda Scott Shoffner, ẹma ẹnam n̄kpọ. Mmọ ẹma ẹnam ndụn̄ọde ye mme andibuana ke Kọmiti N̄kọk Itieutom ke Australia, Barbados, Korea, ye Uganda. Ikọ mbon kọmiti emi ẹma ẹwụt adan̄a ukeme oro ẹsịnde man ẹse ẹban̄a mme isụn̄utom, esịnede edinọ mmọ eti ufọkidụn̄ ye ibọkusọbọ. Mbon kọmiti emi ẹma ẹsọn̄ọ ẹtịn̄ ke mme isụn̄utom emi ẹkụtde unen ẹdi mbon emi ẹkpụhọrede ẹkekem ye mme idaha n̄kann̄kụk.
Ndida N̄keberi ke Usụn̄ Oro Aduaide Owo Idem
Ibuotikọ akpan utịn̄ikọ ndutịm oro ekedi, “Ẹbak Abasi Ẹnyụn̄ Ẹnọ Enye Ubọn̄,” ndien Brọda John E. Barr, owo Otu Ukara emi ama akanam utom ke anyan ini, ọkọnọ utịn̄ikọ emi. Enye ekeneme Ediyarade 14:6, 7, emi ọdọhọde ete: “Ndien n̄kụt angel efen efede ke ufọt enyọn̄, enye onyụn̄ enyene nsinsi eti mbụk ete itan̄a nte etop idatesịt inọ mbon emi ẹdụn̄de ke isọn̄, ye kpukpru idụt ye esien ye usem ye obio, ọdọhọde ke ọkpọsọn̄ uyo ete: ‘Ẹbak Abasi ẹnyụn̄ ẹnọ enye ubọn̄, koro ini ikpe esie edisịm.’”
Brọda Barr ama esịn udọn̄ ọnọ nditọ ufọkn̄wed oro ete ẹti n̄kpọ ita emi ẹban̄ade angel oro. Akpa, enye ekenyene nditan̄a nsinsi eti mbụk nte ke Christ ke akara idahaemi ọyọhọ ọyọhọ ke Obio Ubọn̄. Brọda Barr ọkọdọhọ ete: “Nnyịn imenen̄ede ifiọk ke enye ama ada ubọn̄ ke 1914. Ntem, ẹnyene nditan̄a eti mbụk emi ke ofụri isọn̄.” Udiana, angel oro ọkọdọhọ ete: “Ẹbak Abasi.” Brọda Barr ama ọdọhọ ke mme andikụre ukpep oro ẹnyene ndin̄wam nditọ ukpepn̄kpọ mmọ ẹnen̄ede ẹten̄e Abasi mbak mmọ ẹdinam se enye mîmaha. Ọyọhọ ita, angel oro eketeme ete: ‘Ẹnọ Abasi ubọn̄.’ Ẹma ẹsịn udọn̄ ẹnọ nditọ ufọkn̄wed oro ẹte: “Ẹkûdedei ẹfre ke uduak nnyịn edi ndinọ Abasi ubọn̄, idịghe ndinọ idem nnyịn.” Ekem ke ini Brọda Barr ekenemede “ini ikpe,” enye ama ọdọhọ ete: “Ata esisịt ini osụhọ ndibiere akpatre ikpe. Odu ediwak owo ke mme efakutom nnyịn oro osụk anade ẹkop eti mbụk mbemiso ini ebede akaha.”
Nte mmọ ẹkesụk ẹkerede ikọ emi, ẹma ẹnọ mmọ owo 56 emi ẹkụrede ukpep n̄weditoro mmọ, ẹnyụn̄ ẹnọ mmọ ẹka ofụri ikpehe isọn̄. Aduai-owo-idem item oro mmọ ẹkebọde ke ediye usen oro ama enen̄ede otụk mme andikụre ukpep oro ye mbon eken oro ẹkedụkde edinam oro.
[Ekebe ke page 17]
IDAHA OTU
Ibat idụt oro ẹtode: 6
Ibat idụt oro ẹnọde ẹka: 25
Ibat nditọ ufọkn̄wed: 56
Isua emana ke ẹbaharede ukem ukem: 35.1
Isua oro ẹdude ke akpanikọ ke ẹbaharede ukem ukem: 18.3
Isua oro ẹdude ke utom uyọhọ ini ke ẹbaharede ukem ukem: 13.9
[Ndise ke page 18]
Ọyọhọ Otu 121 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead
Ke udịm enyịn̄ oro ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.