Idịghe Christopher, Hannah, ye Gina kpọt ẹnịm ke mmimọ idi ufan Abasi. Ediwak owo ke ofụri ererimbot ẹnịm ke Abasi ada mmimọ nte ufan. Nso kaban̄a fi? Ndi etie fi nte emekpere Abasi? Mîdịghe ndi akpama ndikpere Abasi m̀mê ndinen̄ede n̄kpere enye? Omosụk ekeme ndikere ete, ‘Ndi owo ke isọn̄ emi ekeme ndidi ufan Ata Ọkpọsọn̄ Abasi? Edieke edide ntre, nso ke ẹkpenam?’

AFO EMEKEME NDIKPERE ABASI

Bible ọdọhọ ke mme owo ẹkeme ndidi ufan Abasi. Ke uwụtn̄kpọ, Isaiah 41:8 ọdọhọ ke Abasi okokot Abraham, emi ekedide ete ete nditọ Israel, “ufan mi.” Se n̄ko se James 4:8 ọdọhọde nnyịn inam mi: “Ẹsan̄a ẹkpere Abasi, ndien enye ayasan̄a ekpere mbufo.” Itien̄wed emi owụt ke owo ekeme ndikpere Abasi nnyụn̄ ndi ufan esie. Sia owo mîkemeke ndikụt Abasi, didie ke afo ekeme ‘ndisan̄a n̄kpere’ enye nnyụn̄ ndi ufan esie?

Man ibọrọ mbụme emi, yak ise nte owo iba ẹsisan̄ade ẹdi ufan. Mmọ ẹsibem iso ẹsiak enyịn̄ mmọ ẹnọ kiet eken. Ekem, nte mmọ ẹnemede nneme kpukpru ini, ẹtịn̄de se mmọ ẹkerede ye nte etiede mmọ ke idem, mmọ ẹsinen̄ede ẹkpere kiet eken. Ndien nte mmọ ẹnamde n̄kpọ ẹnọ kiet eken, ntre ke mmọ ẹdidọdiọn̄ ikpere. Ukem oro n̄ko ke edi ye owo emi oyomde ndidi ufan Abasi. Ẹyak ise nte emi edide ntre.

Ndi enyene ufan fo emi mûdiọn̄ọke enyịn̄ esie? Itiehe nte odu. Mma kiet ke Bulgaria emi ekerede Irina ọkọdọhọ ke “owo ikemeke ndikpere Abasi edieke enye mîdiọn̄ọke enyịn̄ esie.” Se enye etịn̄de emi edi akpanikọ. Nte ima iketetịn̄ ke akpa ibuotikọ, Abasi oyom fi asan̄a ekpere imọ. Ntre, enye ada Bible anam fi ọdiọn̄ọ owo emi imọ idide. Se se enye ọdọhọde mi: “Ami ndi Jehovah. Enyịn̄ mi edi oro.”—Isaiah 42:8.

Ndi Jehovah enen̄ede oyom ọdiọn̄ọ enyịn̄ imọ esinyụn̄ okot imọ ke enyịn̄? Kere ise: Enyịn̄ Abasi (emi edide abisi inan̄ ke akpasarade usem Hebrew) odu n̄kpọ nte itie 7,000 ke N̄wed Abasi Usem Hebrew. Idụhe enyịn̄ en̄wen emi ẹsiakde awak ntem ke Bible. Emi owụt ke Jehovah oyom nnyịn idiọn̄ọ enyịn̄ imọ isinyụn̄ ikot imọ ke enyịn̄.a

Edi ndusụk owo ẹkeme ndikere ke sia Jehovah edide edisana ye Ata Ọkpọsọn̄ Abasi, ke edi usọn̄enyịn ndikot enye ke enyịn̄. Edi akpanikọ ke ifọnke ndida enyịn̄ Abasi nnam ndisịme, kpa nte mûkpadaha enyịn̄ ufan fo unam ebiọ. Edi Jehovah oyom mbon oro ẹmade enye ẹkpono enyịn̄ esie ẹnyụn̄ ẹnam mme owo ẹfiọk enyịn̄ emi. (Psalm 69:30, 31; 96:2, 8) N̄kọ emeti ke Jesus ekekpep mbet esie ndibọn̄ akam ntem: “Ete nnyịn emi odude ke heaven, yak ẹnam enyịn̄ fo asana.” Nnyịn imekeme nditiene nnam enyịn̄ Abasi asana edieke inamde mme owo ẹdiọn̄ọ enyịn̄ emi. Emi ayanam inen̄ede ikpere Abasi.—Matthew 6:9.

Bible ọdọhọ ke Abasi esikpan̄ utọn̄ ọnọ “mbon oro ẹkerede ẹban̄a enyịn̄ esie.” (Malachi 3:16) Kop se Jehovah ọdọhọde mi aban̄a utọ owo oro: “Ami nyekpeme enye koro enye ọfiọkde enyịn̄ mi. Enye eyeseme okot mi, ndien ami nyeyere enye. Nyodu ye enye ke ini nnanenyịn.” (Psalm 91:14, 15) Edieke iyomde ndidi ufan Abasi, ana ifiọk enyịn̄ esie isinyụn̄ ikot enye.

Owo iba emi ẹdide ata ufan ẹsineme nneme kpukpru ini ye kiet eken, edide iso ye iso, ke fon, ke kọmputa, m̀mê ke leta. Ntre, edieke iyomde ndikpere Abasi, ana isineme nneme ye enye kpukpru ini. Edi didie ke ikpanam emi?

Imekeme ndineme nneme ye Jehovah ke ini ibọn̄de akam. Edi ndibọn̄ akam nnọ Abasi itiehe nte ndinyụn̄ ntie ye ubọkn̄ka nnyịn nneme nneme. Ana idiọn̄ọ ke ini kiet ekededi emi ibọn̄de akam, ke ineme nneme ye Andibot nnyịn, kpa Enye emi okponde akan ke ofụri ekondo. Akpana emi anam isibọn̄ akam inọ Abasi ata ukpono ukpono. Enyene ndusụk n̄kpọ emi Abasi ọdọhọde inam man imọ ikop akam nnyịn. Yak ineme ita ke otu emi.

Akpa, ana isibọn̄ akam inọ Jehovah Abasi ikpọn̄-ikpọn̄, ikûbọn̄ unọ Jesus, “ndisana owo,” m̀mê edisọi mbiet. (Exodus 20:4, 5) Bible ọdọhọ ete: “Ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde.” (Philippi 4:6) Ọyọhọ iba, ana isibọn̄ akam ke enyịn̄ Jesus Christ Eyen Abasi. Jesus ke idemesie ọkọdọhọ ete: “Baba owo kiet itieneke Ete ibọhọke ebe ke ami.” (John 14:6) Ọyọhọ ita, ana akam nnyịn ekem ye uduak Abasi. Bible ọdọhọ ete: “Se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.”a—1 John 5:14.

Edi owo iba ikemeke ndika iso ndi ufan edieke owo kiet mîsiyakke owo enye eken etiene etịn̄ ikọ ke ini mmọ ẹnemede nneme. Kpasụk ntre, edieke iyomde ndika iso ndi ufan Abasi, ana isiyak enye etịn̄ ikọ ọnọ nnyịn isinyụn̄ ikpan̄ utọn̄ ke ini enye etịn̄de ikọ. Ndi ọmọfiọk nte Abasi etịn̄de ikọ ọnọ nnyịn?

Jehovah Abasi ada Bible etịn̄ ikọ ọnọ nnyịn mfịn. (2 Timothy 3:16, 17) Ntak idọhọde ntre? Da nte ke edima ufan fo ewet fi leta. Ke ama okokot leta oro, emekeme ndidọhọ owo ke ufan fo ọkọdọhọ ntem ye ntem. Edi ufan fo iketịn̄ke ikọ ndomokiet, ekewewet. Kpasụk ntre, ke ini okotde Bible, ọwọrọ amayak Jehovah etịn̄ ikọ ọnọ fi. Emi anam Gina, oro iketịn̄de iban̄a ke akpa ibuotikọ, ọdọhọ ete: “N̄kere ke edieke nyomde Abasi ada mi nte ufan esie, ana ndụn̄ọde ‘leta’ oro enye ewetde ọnọ nnyịn, oro edi Bible.” Enye adian do ete: “Ndikot Bible ke usen ke usen anam nnen̄ede n̄kpere Abasi.” Ndi afo emesiyak Jehovah etịn̄ ikọ ọnọ fi kpukpru usen ke ndikot Ikọ Esie, oro edi, Bible, ke usen ke usen? Ndinam emi ayanam enen̄ede ekpere Abasi.

Ndi emekeme ndidọhọ owo emi akanam mûdiọn̄ọke m̀mê owo emi mûtịmke umehe ete: “Nyanam se ededi oro ọdọhọde nnam nnọ fi”? Edi emekeme nditịn̄ emi ye edima ufan fo. Ufan esinam se ufan ọdọhọde.

Bible ọdọhọ ke Jehovah esinam se enye ọfiọkde ke ayanam mme asan̄autom imọ ẹkop inemesịt. Ke uwụtn̄kpọ, Edidem David emi ekedide ufan Abasi, ama ọdọhọ ete: “Afo amanam ediwak n̄kpọ, O Jehovah Abasi mi, idem mme utịbe utom fo ye ekikere fo kaban̄a nnyịn. . . . Mmọ ẹwak ẹkan nte n̄kemede ndibụk.” (Psalm 40:5) Akan oro, Jehovah esikam anam se inemde mbon oro mîfiọkke enye kan̄a, ‘ọnọ mmọ udia barasuene onyụn̄ anam esịt mmọ ọyọhọ ye idatesịt.’—Utom 14:17.

Sia Jehovah esinamde nti n̄kpọ ọnọ mme owo ntem, ndi ukereke ke ọkpọfọn mbon emi ẹyomde ndidi ufan esie ẹnam se ‘ididatde enye esịt’? (Mme N̄ke 27:11) Edi nso ke afo akpanam man enem Abasi esịt? Bible ọdọhọ ete: “Ẹkûfre ndinam eti n̄kpọ ndinyụn̄ mbuana n̄kpọ ye mbon en̄wen, koro orụk uwa emi enen̄erede enem Abasi esịt.” (Mme Hebrew 13:16) Ndi ndinam eti n̄kpọ nnyụn̄ mbuana n̄kpọ ye mbon en̄wen edi n̄kukụre se anade inam man inem Abasi esịt?

Bible ọdọhọ “ke mbuọtidem mîdụhe owo ikemeke nditịm nnem [Abasi] esịt.” (Mme Hebrew 11:6) Ti ete ke “Abraham [ama] ọbuọt idem ye Jehovah” mbemiso ẹkotde enye “ufan Jehovah.” (James 2:23) Jesus Christ n̄ko ama ọdọhọ ke edieke iyomde Abasi ọdiọn̄ nnyịn ke ana ‘ibuọt idem ye Abasi.’ (John 14:1) Ntre, nso ke akpanam man enyene utọ mbuọtidem emi Abasi oyomde mme owo ẹnyene man enye asan̄a ekpere mmọ? Tọn̄ọ ke ndisikpep Bible. Emi ayanam enyene “nnennen ifiọk” aban̄a uduak Abasi. Nte edisan̄ade ikpep ‘ndinem Abasi esịt ọyọhọ ọyọhọ’ edi emi. Ndien nte afo akade iso ekpep Bible man etịm ọfiọk Jehovah onyụn̄ anam se enye ọdọhọde inam, eyenen̄ede ọbuọt idem ye enye ndien enye eyenen̄ede asan̄a ekpere fi.—Colossae 1:9, 10.

Nso ke akpanam man ekpere Abasi? Imeneme n̄kpọ ifan̄ emi akpanamde man ọtọn̄ọ ndikpere Abasi. Mmọ ẹdi:

1. Diọn̄ọ ke Abasi ekere Jehovah sinyụn̄ kot enye ke enyịn̄.

2. Sineme nneme ye enye kpukpru ini ke ndibọn̄ akam nnyụn̄ n̄kpep Ikọ Esie, oro edi, Bible.

3. Ka iso nam se inemde Jehovah esịt.

Fiak se n̄kpọ ita emi ise. Ndi emekere ke amanam ofụri se akpanade anam man ekpere Abasi? Ndi enyene ebiet emi ekerede ke imọ inamke ọfọn? Imọdiọn̄ọ ke owo mîsịnke ukeme enye idikemeke ndikpere Abasi, edi kere ban̄a ufọn emi edidiade.

Jennifer emi odụn̄de ke United States ọdọhọ ete: “Idụhe se owo anamde man edi ufan Abasi emi editakde-tak. Owo ndidi ufan Abasi asan̄a ye ediwak edidiọn̄: esinam owo etetịm ọbuọt idem ye Abasi, anam owo etetịm ọdiọn̄ọ Abasi, onyụn̄ anam owo etetịm ama Abasi. Idụhe se inemde ntem!”

Edieke akpamade ndidi ufan Abasi, Mme Ntiense Jehovah ẹyema ndin̄wam fi. Mmọ ẹkeme ndikpep fi Bible ke mfọn. Emekeme n̄ko ndika Ufọkmbono Obio Ubọn̄ ke edem mbufo n̄ketiene mmọ n̄kpep Bible. Do ke afo edisobo ye mbon emi ẹkperede Abasi ẹnyụn̄ ẹmade ndidi ufan esie.a Edieke anamde emi, editie fi ke idem nte eketiede andiwet psalm emi ọkọdọhọde ete: “Amaedi ami, ọfọn mi ndisan̄a n̄kpere Abasi.”—Psalm 73:28.