N̄wọrọnda mbụk emi odu ke Gospel inan̄ emi ẹdude ke N̄wed Abasi Usem Greek, oro ẹsikotde Obufa Testament. Ndi n̄kpọ emi ama etịbe? Ata akpan mbụme edi emi, sia edieke n̄kpọ emi mîketịbeke, ọwọrọ se mme Christian ẹkpepde edi nsu, ndien ndidori enyịn ke iyodu uwem ke nsinsi ke Paradise ekpetie nte owo ndidaba ndap. (1 Corinth 15:14) Edi edieke edide n̄kpọ emi ama etịbe, ọwọrọ idotenyịn odu ke n̄kpọ ọyọfọn ke ini iso, ndien afo emekeme nditiene ndia ufọn. Ntre, ndi se mme Gospel ẹtịn̄de edi akpanikọ m̀mê nsu?

SE NDỤN̄ỌDE OWỤTDE

Mme Gospel itiehe nte n̄wed n̄ke, mmọ ẹtịn̄ nnennen se iketịbede ẹnyụn̄ ẹtịn̄ mme n̄kpọ en̄wen oro anamde mbụk mmọ enen̄ede an̄wan̄a. Ke uwụtn̄kpọ, mmọ ẹsiak nsio nsio obio emi ẹkedude ini oro, ndien mme owo mfịn ẹsika ẹkese mme obio emi. Mmọ ẹtịn̄ n̄ko ẹban̄a mbon emi ẹkedude uwem ini oro, ndien mme ewetmbụk ererimbot ẹsiak mbon emi n̄ko.—Luke 3:1, 2, 23.

Mme ewetmbụk eset emi ẹkedude ke eyo Jesus ye mbon oro ẹkedude isua ifan̄ ke oro ebede ẹma ẹwet n̄kpọ n̄ko ẹban̄a Jesus.a Se mme Gospel ẹtịn̄de ẹban̄a nte ẹkewotde Jesus onyụn̄ edi ukem ye nte mbon Rome ẹkesiwotde owo ini oro. N̄ko, ẹwet nnennen se iketịbede, owo idịpke n̄kpọ, utọ nte ndusụk se mme mbet Jesus ẹkenamde emi mîfọnke. (Matthew 26:56; Luke 22:24-26; John 18:10, 11) Kpukpru emi owụt ke se mme andiwet Gospel ẹkewetde ẹban̄a Jesus enen onyụn̄ edi akpanikọ.

NDI EDI AKPANIKỌ KE JESUS AMA ESET?

Ndusụk owo ẹnịm ke Jesus ama odu uwem ke isọn̄ emi onyụn̄ akpa, edi mmọ inịmke ke enye ama eset. Mme apostle Jesus ikakam inịmke ke enye ama eset akpa ini emi mmọ ẹkekopde. (Luke 24:11) Edi mmọ ẹma ẹnịm ke ini mmọ ye mme mbet eken ẹkekụtde Jesus. Jesus ama owụt mmọ idem ke nsio nsio ini. Isan̄ kiet, se ibede owo 500 ẹma ẹkụt enye.—1 Corinth 15:6.

Kpa ye oro mme mbet Jesus ẹkediọn̄ọde ke ẹkeme ndimụm mmimọ n̄wot, mmọ ẹma ẹnen̄ede ẹsịn idem ẹkwọrọ ke Jesus ama eset. Mmọ ẹma ẹtịn̄ ẹnọ kpukpru owo, esịnede mbon oro ẹkewotde Jesus. (Utom 4:1-3, 10, 19, 20; 5:27-32) Ndi mmọ ẹkpekenyene uko ntre edieke mmọ mîkpekenịmke ke Jesus ama eset? Jesus ndikeset akakam anam mme Christian oro ẹkedude ke eyo esie ye mbon oro ẹdude idahaemi ẹnen̄ede ẹsịn idem ẹnam n̄kpọ Abasi.

Se ẹwetde ke mme Gospel ẹban̄a n̄kpa ye ediset ke n̄kpa Jesus edi ata ofụri akpanikọ. Edieke etịn̄de enyịn okot se ẹwetde do, oyokụt ke n̄kpọ emi ama etịbe. Ndien edieke ọdiọn̄ọde ntak emi Jesus akakpade, eyenen̄ede enịm se ẹwetde ke mme Gospel ẹban̄a enye. Ibuotikọ oro etienede eyetịn̄ ntak emi Jesus akakpade.

Nso ke ọkpọdọhọ edieke ẹbụpde fi m̀mê akpama ndidu uwem ke nsinsi? Ata ediwak owo ẹdidọhọ ke ikpama, edi ke utọ n̄kpọ oro ikemeke nditịbe. Mmọ ẹdidọhọ ke idụhe owo emi odude uwem ke nsinsi akanam, ke ini ama ekem, kpukpru nnyịn iyakpa.

Edi nso ke ọkpọdọhọ edieke ẹkpebụpde fi m̀mê akpama ndikpa? Ata ediwak owo ẹdidọhọ ke mmimọ iyomke ndikpa. Emi owụt ke nnyịn imaha n̄kpa. Nnyịn imesiyom ndika iso ndu uwem kpa ye se iwọrọde nnyịn. Bible owụt ke nte Abasi okobotde nnyịn anam esidọn̄ nnyịn ndika iso ndu uwem. Ke nditịm ntịn̄, Bible ọdọhọ ke Abasi “esịn [owo] nsinsi ini ke esịt.”—Ecclesiastes 3:11.

Edi idụhe owo emi odude uwem ke nsinsi mfịn. Nso iketịbe? N̄ko, ndi Abasi anam n̄kpọ ndomokiet man anyan̄a nnyịn? Nte Bible ọbọrọde mme mbụme emi enen̄ede ọdọn̄ nnyịn esịt onyụn̄ anam ifiọk se ikanamde Jesus ọbọ ufen onyụn̄ akpa.

NSO IKETỊBE?

Genesis ibuot kiet ye iba anam nnyịn ifiọk ke Abasi okoyom Adam ye Eve ẹdu uwem ke nsinsi, ke enye ama onyụn̄ etịn̄ se mmọ ẹkpenamde man ẹka iso ẹdu uwem. Ibuot ita etịn̄ nte mmọ ẹkesọn̄de ibuot ye Abasi. Nte ini akakade, mmọ ẹma ẹkpan̄a. Ndusụk owo ẹkere ke mbụk emi edi ekọn̄ n̄ke. Edi, ukem nte mme Gospel, odu ediwak n̄kpọ emi ẹwụtde ke se Genesis etịn̄de ama etịbe.a

Nso idi utịp nsọn̄ibuot Adam? Bible ọdọhọ ete: “Nte idiọkn̄kpọ okotode owo kiet [Adam] odụk ererimbot, n̄kpa onyụn̄ otode ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.” (Rome 5:12) Adam ndiketre ndikop uyo Abasi ekedi idiọkn̄kpọ. Enye ikekemeke aba ndidu uwem ke nsinsi, ndien nte ini akakade, enye ama akpa. Eyen emi amanade esida ndusụk n̄kpọ oto ete ye eka esie, kpasụk ntre ke nnyịn ikada idiọkn̄kpọ ito akpa ete ye eka nnyịn. Emi anam nnyịn isidọn̄ọ, isọn̄, inyụn̄ ikpa. Edi ndi Abasi anam n̄kpọ ndomokiet man anyan̄a nnyịn?

SE ABASI ANAMDE

Ih, Abasi ama anam ndutịm man ifiak inyene se Adam akpakanamde atak nnyịn nditọ esie, oro edi, idotenyịn edidu uwem ke nsinsi. Didie ke Abasi akanam emi?

Rome 6:23 ọdọhọ ke “n̄kpọ eyenutom idiọkn̄kpọ edi n̄kpa.” Emi ọwọrọ ke utịp idiọkn̄kpọ edi n̄kpa. Adam ama anam idiọkn̄kpọ, ntak edi oro enye akakpade. Kpasụk ntre, nnyịn imesinam idiọkn̄kpọ, ndien akpana nnyịn n̄ko ikpa. Edi nnyịn ikadada idiọkn̄kpọ emi imana. Ntre Abasi ama ọdọn̄ Jesus Eyen esie edikpa ọnọ nnyịn. Didie ke n̄kpa owo kiet ekeme ndinyan̄a nnyịn?

Owo kiet, Adam emi ekedide mfọnmma owo, ọkọsọn̄ ibuot ye Abasi ndien emi ama esịn nnyịn ke ufụn idiọkn̄kpọ ye n̄kpa. Ntre, ama oyom mfọnmma owo kiet n̄ko akpa man nnyịn iwọrọ ke ufụn oro. Kop se Bible ọdọhọde mi: “Kpa nte okotode ke ntụtutọn̄ owo kiet ẹnam ediwak owo ẹdi mme anamidiọk, kpasụk ntre n̄ko otode ke n̄kopitem owo kiet ẹyenam ediwak owo ẹdi ndinen owo.” (Rome 5:19) Jesus ekedi “owo kiet” oro. Enye ama ọkpọn̄ heaven, akabade edi mfọnmma owo,b onyụn̄ akpa ọnọ nnyịn. Oro anam nnyịn ikeme ndidi ufan Abasi inyụn̄ inyene idotenyịn ndidu ke uwem ke nsinsi.

NTAK EMI JESUS ỌKỌBỌDE UFEN ONYỤN̄ AKPADE

Ntak emi akanade Jesus akpa mbemiso ẹnyan̄ade nnyịn? Ndi Ata Ọkpọsọn̄ Abasi ikenyeneke odudu ikem ndidọhọ nditọ Adam ẹdu uwem ke nsinsi? Enye ama enyene odudu ndikpanam emi. Edi ndinam emi akpakabiat ibet oro enye ekenịmde ete ke n̄kpọ eyenutom idiọkn̄kpọ edi n̄kpa. Ibet oro idịghe n̄kpọ emi owo ekemede ndibiat mfep ini ekededi emi enye amade, sia enye enyene n̄kpọ ndinam ye unenikpe.—Psalm 37:28.

Edieke Abasi ekpekefrede aban̄a unenikpe ke n̄kpọ emi, ekeme ndidi mme owo ẹkpekekere m̀mê enye idinyụn̄ inamke ntre ke mme n̄kpọ en̄wen. Ke uwụtn̄kpọ, ke ini enye edibierede nditọ Adam emi ẹdotde ndidu uwem ke nsinsi, ndi se enye edibierede eyenen? Ndi ẹkeme ndinịm ke enye ayanam se enye ọn̄wọn̄ọde? Abasi ndikanam se inende ke ini enye akanamde ndutịm man anyan̄a nnyịn anam inịm ke enye esinam se inende kpukpru ini.

Abasi ndikọdọhọ Jesus edikpa ọnọ nnyịn anam nnyịn ikeme ndinyene idotenyịn ndidu uwem ke nsinsi ke Paradise ke isọn̄. Kop se Jesus eketịn̄de mi ke John 3:16: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” N̄kpa Jesus owụt ke Abasi esinam se inende kpukpru ini onyụn̄ enen̄ede ama nnyịn.

Edi ntak emi Jesus ọkọbọde ufen onyụn̄ akpade utọ n̄kpa oro ẹwetde do ke mme Gospel? Jesus ndikenyịme ndisobo n̄kponn̄kan idomo nnyụn̄ n̄ka iso nsọn̄ọ nda ye Abasi owụt ke Devil okosu nsu ke ini enye ọkọdọhọde ke mme owo idisọn̄ọke ida ye Abasi ke ini ẹsobode idomo. (Job 2:4, 5) Ke ini Satan akanamde Adam emi ekedide mfọnmma owo anam idiọkn̄kpọ, ekpeketie nte ke enye eyekeme ndinam mme owo ẹtre ndisọn̄ọ nda ye Abasi. Edi Jesus emi okonyụn̄ edide mfọnmma owo nte Adam ama ọsọn̄ọ ada ye Abasi kpa ye oro ẹkenen̄erede ẹtụhọde enye. (1 Corinth 15:45) Ntre, enye ama owụt ke Adam n̄ko ekpekekeme ndikop uyo Abasi edieke enye okpokoyomde ndikop. Jesus ama enịm uwụtn̄kpọ ọnọ nnyịn ke ini enye ọkọsọn̄ọde ada ọyọ idomo. (1 Peter 2:21) Ke ntak emi Jesus okokopde uyo Abasi ke kpukpru n̄kpọ, Abasi ama anam enye eset aka heaven okodu uwem emi enye mîdikemeke ndikpa.

SE AKPANAMDE MAN ỌBỌ UFỌN

Jesus ama akpa, ndien emi anam nnyịn inyene idotenyịn ndidu uwem ke nsinsi. Ndi akpama ndidu uwem ke nsinsi? Jesus ama etịn̄ se nnyịn ikpanamde. Enye ọkọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

Mme andisio magazine emi ẹyom fi ekpep ekese n̄kpọ aban̄a Jehovah emi edide ata Abasi ye Jesus Christ Eyen esie. Mme Ntiense Jehovah emi ẹdude ke edem mbufo ẹkpema ndin̄wam fi. Emekeme n̄ko ndikot ediwak n̄kpọ ke ikpehe Intanet nnyịn, www.pr2711.com/efi.