“Ẹka Ẹkenam Mme Owo ke Kpukpru Idụt Ẹdi Mbet Mi”
“Ẹka ẹkenam mme owo ke kpukpru idụt ẹdi mbet mi, ẹnịm mmọ baptism . . . , ẹkpep mmọ ẹnam kpukpru n̄kpọ eke n̄ketemede mbufo.”—MATT. 28:19, 20.
1, 2. Se Jesus etịn̄de ke Matthew 24:14 akpanam ibụp idem nnyịn ewe mbụme?
ẸDIỌN̄Ọ nnyịn Mme Ntiense Jehovah ke ofụri ererimbot ke ntak utom ukwọrọikọ nnyịn. Ndusụk owo ẹnịm se nnyịn ikwọrọde, edi ndusụk inịmke. Edi, idem mbon oro mînịmke se nnyịn ikwọrọde ẹnen̄ede ẹma nte nnyịn isisịnde ifịk ikwọrọ ikọ. Nte ima ikọdọdiọn̄ọ, Jesus ama etetịn̄ ke ẹyekwọrọ eti mbụk Obio Ubọn̄ Abasi ke ofụri isọn̄. (Matt. 24:14) Edi nnyịn isan̄a didie ifiọk ke utom ukwọrọikọ oro Jesus eketịn̄de aban̄a ke nnyịn inam emi? Ndi ndidọhọ ke nnyịn ikpọn̄ inam utom emi edi n̄wọkinua?
2 Ediwak ido ukpono ẹdọhọ ke mmimọ imesikwọrọ ikọ. Edi n̄kukụre se mmọ ẹdiọn̄ọde edi ndida ke ufọkabasi nnọ ikọ ntiense, nnịm ederi, n̄kwọrọ ikọ ke radio ye Tv, m̀mê ke Intanet. Ndusụk ẹsitịn̄ nte mmimọ in̄wamde mme owo, ibọpde ufọkibọk ye ufọkn̄wed. Edi, ndi se Jesus okowụkde mme mbet esie ẹnam edi oro?
3. Matthew 28:19, 20 ọdọhọ ke ewe n̄kpọ inan̄ ke ana mbet Jesus ẹnam?
3 Ndi Jesus ọkọdọhọ mme mbet esie ẹtetie ẹbet mme owo ẹdi ẹbịne mmọ? Baba! Ke Jesus ama ekeset, enye ama enyene nneme ye ediwak mbet esie onyụn̄ ọdọhọ mmọ ete: “Mmọdo ẹka ẹkenam mme owo ke kpukpru idụt ẹdi mbet mi, ẹnịm mmọ baptism . . . , ẹkpep mmọ ẹnam kpukpru n̄kpọ eke n̄ketemede mbufo.” (Matt. 28:19, 20) Itien̄wed emi owụt n̄kpọ inan̄ oro anade inam. Ana inam mbet, inịm mmọ baptism, inyụn̄ ikpep mmọ Ikọ Abasi. Edi nso idi akpa n̄kpọ emi anade inam? Jesus ọkọdọhọ ete: “Ẹka”! Ataifiọk kiet emi anamde ndụn̄ọde aban̄a Bible ọkọdọhọ ke ikọ Jesus oro “‘ẹka’ ọwọrọ ke ana kpukpru Christian ẹka ẹkekwọrọ ikọ ẹnọ mme owo ke efak m̀mê ke obio en̄wen.”—Matt. 10:7; Luke 10:3.
4. Nso ke oyom ẹnam man ẹkeme ndikwọrọ ikọ ke kpukpru idụt?
4 Ndi Jesus ọkọdọhọ mbet esie kiet kiet ẹkwọrọ ikọ ke idemmọ, mîdịghe, ndi enye okoyom mmọ ẹdiana kiet ẹkwọrọ ikọ nte otu? Sia owo kiet mîkemeke ndikwọrọ ikọ “ke kpukpru idụt,” ọwọrọ oyom ẹnam ndutịm man mme owo ẹkeme ndidiana kiet nnam utom emi. Se Jesus eketịn̄de aban̄a edi emi ke ini enye ọkọdọhọde mbet esie ẹkabade ẹdi “mme ọkọ owo.” (Kot Matthew 4:18-22.) Jesus iketịn̄ke iban̄a owo kiet ndimen udia ntori ke uwam ntop nsịn ke mmọn̄ nnyụn̄ nsụhọde ntie mbet iyak edimen emen. Utu ke oro, enye eketịn̄ aban̄a ndida iyịre n̄kọ iyak. Utọ ukọiyak enye emi esikpon utom, isinyụn̄ idịghe n̄kpọ owo kiet.—Luke 5:1-11.
5. Ewe mbụme inan̄ ke oyom ibọrọ, ndien ntak-a?
5 Man idiọn̄ọ mbon oro ẹkwọrọde ikọ mfịn nte Jesus eketịn̄de, oyom ibọrọ mbụme inan̄ emi:
Ewe etop ke ẹkpekwọrọ?
Nso ikpedi akpan ntak emi ẹkwọrọde ikọ?
Ewe usụn̄ ke ẹkpeda ẹkwọrọ ikọ?
Ẹkpekwọrọ ikọ ẹsịm m̀mọ̀n̄, ẹkpenyụn̄ ẹkwọrọ ẹbịghi didie?
Ibọrọ mbụme emi ayan̄wam nnyịn idiọn̄ọ mbon oro ẹnamde utom emi ẹdidade inyan̄a mme owo mi, onyụn̄ anam nnyịn itetịm ibiere ndika iso nnam utom emi.—1 Tim. 4:16.
EWE ETOP KE ẸKPEKWỌRỌ?
6. Ntak emi afo enịmde ke Mme Ntiense Jehovah ẹkwọrọ nnennen etop?
6 Kot Luke 4:43. Jesus ọkọkwọrọ “eti mbụk obio ubọn̄,” se enye onyụn̄ oyomde mbet esie ẹkwọrọ edi oro. Mmanie ẹkwọrọ eti mbụk Obio Ubọn̄ ke “kpukpru idụt”? Kpukpru owo ẹdiọn̄ọ ke Mme Ntiense Jehovah ẹnam emi. Idem mbon oro mîmaha nnyịn ẹdiọn̄ọ emi. Ke uwụtn̄kpọ, oku kiet emi edide isụn̄utom ama ọdọhọ eyenete nnyịn kiet ke imọ ima ibụp Mme Ntiense Jehovah ke nsio nsio idụt oro imọ idụn̄de m̀mê ewe etop ke mmọ ẹsikwọrọ. Oku oro ọkọdọhọ ke ‘kpukpru mmọ ẹma ẹsịme etieti ndinọ imọ ukem ibọrọ: “Ikwọrọ eti mbụk Obio Ubọn̄.”’ Mme Ntiense oro ikesịmeke-sịme ndinyene ikọ inua kiet, koro Bible ọdọhọ ata mme Christian ẹnyene ikọ inua kiet. (1 Cor. 1:10) Obio Ubọn̄ oro mmọ ẹsikwọrọde ẹban̄a ke Enyọn̄-Ukpeme Ọnọ Ntọt Obio Ubọn̄ Jehovah esitịn̄ aban̄a n̄ko. Magazine emi odu ke usem 254, ẹsinyụn̄ ẹmịn̄ kpukpru nsiondi esie kiet kiet n̄kpọ nte idem 59,000,000, ndien idụhe magazine emi ẹkotde ke ofụri ererimbot nte Enyọn̄-Ukpeme.
7. Isan̄a didie idiọn̄ọ ke mme ọkwọrọ ederi Christendom ikwọrọke nnennen etop?
7 Mme ọkwọrọ ederi Christendom ikwọrọke iban̄a Obio Ubọn̄ Abasi. Ke ini mmọ ẹduede ẹtịn̄ ẹban̄a Obio Ubọn̄ Abasi, mmọ ẹsikam ẹdọhọ ke enye odu owo ke esịt. (Luke 17:21) Mmọ in̄wamke mme owo ẹdiọn̄ọ ke Obio Ubọn̄ Abasi edi ukara emi odude ke heaven, ke Jesus Christ edi Andikara, ke Obio Ubọn̄ emi edikọk kpukpru mfịna owo, ndien ke enye ọmọn̄ osio kpukpru idiọkn̄kpọ efep ke isọn̄ ke mîbịghike. (Edi. 19:11-21) Mmọ ẹsima nditi Jesus ke ini Christmas ye Easter. Mmọ ikam idiọn̄ọke se Jesus edinamde ke ini ukara esie edisịmde isọn̄. Sia mmọ mîdiọn̄ọke etop emi mmọ ẹkpekwọrọde, mmọ ẹkpesan̄a didie ndien ẹdiọn̄ọ ata akpan ntak emi akpanamde mmọ ẹkwọrọ ikọ?
NSO IKPEDI AKPAN NTAK EMI ẸKWỌRỌDE IKỌ?
8. Mme ọkwọrọ ederi Christendom ẹda ukwọrọikọ ẹnam nso?
8 Nso ikpedi akpan ntak emi ẹkwọrọde ikọ? Ikpedịghe man ẹbọ okụk ẹda ẹbọp ikpọ ọwọrọetop ufọk. Jesus ọkọdọhọ mbet esie ete: “Mbufo ẹkebọ ke mfọn, ẹnọ ke mfọn.” (Matt. 10:8) Owo ikpadaha ikọ Abasi ida in̄wana okụk. (2 Cor. 2:17) Ikponyụn̄ inaha mbon oro ẹkwọrọde ikọ ẹda utom emi ẹyom ufọn idemmọ. (Kot Utom 20:33-35.) Kpa ye ofụri se Bible etịn̄de, ata ediwak ufọkabasi ke ẹsụk ẹsịn ibuot ẹsịn itọn̄ ẹyom okụk man ẹda ẹse ẹban̄a ufọkabasi, ẹkpe mme ọkwọrọ ederi ye ediwak mbon eken emi ẹnamde utom ke ufọkabasi. Emi anam ediwak mme ọkwọrọ ederi ẹforo etieti.—Edi. 17:4, 5.
9. Nso iwụt ke Mme Ntiense Jehovah idaha utom ukwọrọikọ iyom ufọn idemmọ?
9 Mme Ntiense Jehovah ẹsida okụk ke m̀mọ̀n̄ ẹnam utom mmọ? Mmọ ẹsida enọ imaesịt ẹnam utom mmọ. (2 Cor. 9:7) Mmọ isinyịkke mme owo ẹsịn okụk ke Ufọkmbono Obio Ubọn̄ m̀mê ke Itiembono mmọ. Kpa ye oro, isua oko, Mme Ntiense Jehovah ẹma ẹbiat n̄kpọ nte biliọn hour iba ẹkwọrọ eti mbụk ẹnyụn̄ ẹnịm se ibede ukpepn̄kpọ Bible miliọn usụkkiet ke mfọn kpukpru ọfiọn̄. Se ikam ikpade owo idem edi ke owo ikpehe mmọ okụk ndinam utom emi, edi mmọ ẹkam ẹda okụk mmọ ẹsịn ẹnam utom emi. Ete kiet emi esinamde ndụn̄ọde ọkọdọhọ ntem aban̄a Mme Ntiense Jehovah: “Akpan utom mmọ edi ndikwọrọ ikọ nnyụn̄ n̄kpep mme owo n̄kpọ. . . . Mmọ inyeneke mme ọkwọrọ ederi emi ẹkpede okụk, ndien emi anam okụk enye oro odụk mmọ ekpat.” Nso ndien idi akpan ntak emi isikwọrọde ikọ? Nnyịn inyịme ndikwọrọ ikọ ke ntak emi imade Jehovah ye mbọhọidụn̄ nnyịn. Emi osu se idude ke Psalm 110:3. (Kot.)
EWE USỤN̄ KE ẸKPEDA ẸKWỌRỌ IKỌ?
Nnyịn imesika ebiet ekededi emi mme owo ẹdude ikọkwọrọ ikọ (Se ikpehe 10)
10. Ewe usụn̄ ke Jesus ye mme mbet esie ẹkesida ẹkwọrọ ikọ?
10 Ewe usụn̄ ke Jesus ye mme mbet esie ẹkesida ẹkwọrọ eti mbụk? Mmọ ẹma ẹsika ufọk mme owo ye ebiet en̄wen ekededi emi mme owo ẹdude ẹkekwọrọ ikọ. Ukwọrọikọ mmọ ama esịne ndisan̄a ke ufọk ke ufọk nyom mbon oro ẹdotde. (Matt. 10:11; Luke 8:1; Utom 5:42; 20:20) Emi ama anam mmọ ẹkeme ndikwọrọ ikọ nnọ kpukpru owo.
11, 12. Didie ke Christendom ẹda ukwọrọikọ, edi Mme Ntiense Jehovah ẹda ukwọrọikọ didie?
11 Ndi ufọkabasi Christendom ẹsisan̄a ke ufọk ke ufọk ẹkwọrọ ikọ nte Jesus ọkọkwọrọde? Baba, mme ọkwọrọ ederi mmọ emi mmọ ẹkpede okụk ẹsikwọrọ ikọ ẹnọ mbon ufọkabasi mmọ ikpọn̄. Mmọ isikereke iban̄a ndinam mbufa mbet, edi ẹsikam ẹkere ẹban̄a nte ikpanamde mbon oro ẹdude ye mmimọ ẹkûkpọn̄ ufọkabasi mmimọ. Ndusụk ini, ndusụk mmọ ẹsidomo ndinam mbon mmọ ẹkwọrọ ikọ. Ke uwụtn̄kpọ, ke 2001, Pope John Paul ll ama ọdọhọ ke leta emi enye ekewetde ọnọ ufọkabasi ete: “Ebịghi n̄kọtọn̄ọ ndidọhọ mbufo ẹtọn̄ọ ndikwọrọ ikọ. Se nsụk mfiakde ndọhọ mbufo edi oro . . . Ana inyene ukem ifịk emi Paul ekenyenede, emi akanamde enye ọdọhọ ete: ‘Mbọm mi edieke mmentan̄ake eti mbụk!’” Pope ama ọdọhọ n̄ko ke “idịghe mbon oro ‘ẹkebọde ukpep’ kpọt ẹnyene ndikwọrọ ikọ, edi ke ana kpukpru ikọt Abasi ẹnam utom emi.” Mbon ufọkabasi ifan̄ ẹnam se Pope eketịn̄de emi?
12 Nso kaban̄a Mme Ntiense Jehovah? Mmọ ikpọn̄ ẹkwọrọ ke Jesus ama ọtọn̄ọ ndikara ke heaven toto ke 1914. Mmọ ẹda ukwọrọikọ nte ata akpan n̄kpọ kpa nte Jesus ọkọdọhọde ẹda. (Mark 13:10) N̄wed oro Pillars of Faith—American Congregations and Their Partners ọdọhọ ete: “Utom ukwọrọikọ edi ata akpan n̄kpọ ọnọ Mme Ntiense Jehovah akan n̄kpọ efen ekededi.” N̄wed oro ama etịn̄ se Ntiense kiet ọkọdọhọde ete: ‘Ke ini nnyịn isobode mbon oro ẹkopde biọn̄, ẹkopde ndobo, ẹnyụn̄ ẹdọn̄ọde, nnyịn imesidomo ndin̄wam mmọ, edi nnyịn isidehedei ifre ke akpan utom nnyịn edi ndikwọrọ ke utịt ererimbot emi ekpere, ndinyụn̄ n̄kpep mme owo se ẹkpenamde man ẹnyan̄a mmọ.’ Mme Ntiense Jehovah ẹka iso ndikwọrọ eti mbụk ke ukem usụn̄ oro Jesus ye mme mbet esie ẹkekwọrọde.
ẸKPEKWỌRỌ IKỌ ẸSỊM M̀MỌN̄ ẸKPENYỤN̄ ẸKWỌRỌ ẸBỊGHI DIDIE?
13. Ẹdikwọrọ ikọ ẹkesịm m̀mọ̀n̄?
13 Jesus ama etịn̄ adan̄a nte ẹdikwọrọde ikọ. Enye ọkọdọhọ ke ẹyekwọrọ eti mbụk emi “ke ofụri isọn̄.” (Matt. 24:14) Ana ẹnam mme owo “ke kpukpru idụt” ẹdi mbet. (Matt. 28:19, 20) Emi owụt ke ẹdinam utom emi ke ofụri ererimbot.
14, 15. Nso iwụt ke Mme Ntiense Jehovah ẹkwọrọ ikọ ke ofụri isọn̄ nte Jesus eketịn̄de? (Se akpa ndise ibuotikọ emi.)
14 Ẹyak ineme ndusụk n̄kpọ oro ẹwụtde ke Mme Ntiense Jehovah ẹkwọrọ ikọ ke ofụri isọn̄ kpa nte Jesus eketịn̄de. N̄kpọ nte mme ọkwọrọ ederi 600,000 ẹdu ke nsio nsio ufọkabasi ke United States, edi Mme Ntiense Jehovah emi ẹkwọrọde ikọ do ẹdi n̄kpọ nte 1,200,000. Mme oku Ufọkabasi Roman Catholic ẹbe 400,000 ke ofụri ererimbot. Edi ekere ke Mme Ntiense Jehovah ifan̄ ẹsisan̄a ẹkwọrọ ikọ ẹnyụn̄ ẹkpep mme owo Bible ke ofụri ererimbot? N̄kpọ nte Mme Ntiense Jehovah miliọn itiaita ẹkwọrọ ikọ ke idụt 240 ke ofụri ererimbot ke mfọn. Ke akpanikọ, Mme Ntiense Jehovah ẹkwọrọ ikọ ke ofụri ererimbot, ndien emi anam ẹtoro ẹnyụn̄ ẹkpono Jehovah.—Ps. 34:1; 51:15.
15 Ọdọn̄ nnyịn Mme Ntiense Jehovah ndikwọrọ eti mbụk nnọ ata ediwak owo nte ikekeme mbemiso utịt edide. Ntak edi oro mîdụhe mbon emi ẹkabarede ẹnyụn̄ ẹmịn̄de mme n̄wed Ikọ Abasi nte nnyịn. Nnyịn imọnọ mme owo ata ediwak miliọn n̄wed, magazine, tract, n̄wedikot mbono ye eke Editi ke mfọn. Nnyịn imosio n̄wed ke se ibede usem 700. Imemịn̄ Edisana N̄wed Abasi—Edikabade Eke Obufa Ererimbot ibe miliọn 200 ke se ibede usem 130. Isua oko ikpọn̄, ima imịn̄ n̄wed Ikọ Abasi n̄kpọ nte biliọn inan̄ ye ubak. Ikpehe Intanet nnyịn jw.org, odu ke se ibede usem 750. Mmanie en̄wen ẹnam utọ utom emi?
16. Isan̄a didie idiọn̄ọ ke Mme Ntiense Jehovah ẹnyene edisana spirit?
16 Nnyịn idikwọrọ ikọ ebịghi adan̄a didie? Jesus ọkọdọhọ ke ẹyenam utom emi ke ofụri isọn̄ ‘tutu utịt edi.’ (Matt. 24:14) Ewe ido ukpono en̄wen ẹka iso ẹkwọrọ eti mbụk ke mme akpatre usen emi? Ndusụk mbon oro isisobode ke an̄wautom ẹkeme ndidọhọ ke “nnyịn ikwọrọ ikọ kpọt, ke mmimọ ikam inyene edisana spirit.” Edi, ndi nnyịn ndika iso n̄kwọrọ ikọ ke ofụri isua emi iwụtke ke nnyịn imenyene edisana spirit Abasi? (Utom 1:8; 1 Pet. 4:14) Ndusụk ini, ndusụk ufọkabasi ẹsidomo ndisan̄a ke ufọk ke ufọk n̄kwọrọ ikọ nte Mme Ntiense Jehovah, edi isikemeke. Mbon eken ẹsidọhọ ke inam utom isụn̄utom, edi ẹma ẹnam usen ifan̄, enye akak mmọ. Mbon eken ẹkeme ndisan̄a ke ufọk ke ufọk n̄kwọrọ ikọ, edi nso ke mmọ ẹsikwọrọ? Nnyịn imọdiọn̄ọ ke mmọ ikwọrọke se Jesus ọkọdọhọde ẹkwọrọ.
MMANIE ẸKWỌRỌ ETI MBỤK MFỊN?
17, 18. (a) Ntak emi idọhọde ke nnyịn Mme Ntiense Jehovah ikwọrọ eti mbụk Obio Ubọn̄ Abasi mfịn? (b) Nnyịn ida m̀mọ̀n̄ odudu ika iso inam utom nnyịn?
17 Ntre, mmanie ẹkwọrọ eti mbụk Obio Ubọn̄ mfịn? Nnyịn imekeme nditịn̄ uko uko ite: “Mme Ntiense Jehovah!” Ntak emi idọhọde ntre? Koro nnyịn ikwọrọ nnennen etop oro akpanade ẹkwọrọ, oro edi, eti mbụk Obio Ubọn̄ Abasi. Nnyịn ikwọrọ ikọ ke nnennen usụn̄, sia isikaka ibịne mme owo. Ima edi akpan ntak oro ikwọrọde ikọ, idịghe okụk. Nnyịn imọkwọrọ ikọ ke ofụri isọn̄ inọ mme owo ke kpukpru idụt ye usem. Ndien nnyịn idikpaha mba ndika iso nnam utom emi tutu utịt edi.
18 Enen̄ede enem nnyịn ndikụt akwa utom oro ikọt Abasi ẹnamde ke mme akpatre usen emi. Edi nnyịn ida m̀mọ̀n̄ odudu inam kpukpru utom emi? Apostle Paul ọbọrọ mbụme emi ke leta oro enye ekewetde mbon Philippi. Enye ọkọdọhọ ete: “Abasi anam utom ke esịt mbufo, nte enemde enye, man mbufo ẹnyịme ẹnyụn̄ ẹnam.” (Phil. 2:13) Nnyịn iben̄e edima Ete nnyịn Jehovah ite ọnọ nnyịn odudu inam utom nnyịn ọyọhọ ọyọhọ ima.—2 Tim. 4:5.