Kpan̄ Utọn̄ Nnọ Ikọ Prọfesi Abasi!
Mme Akpan N̄kpọ Ẹtode Udiana Akpa N̄wed Peter
IKỌ prọfesi Jehovah, m̀mê etop, etie nte utuenikan̄ emi ayamade ke n̄kịm n̄kịm ebiet, ndien oyom mme ata Christian ẹwụk akpan ntịn̄enyịn ke enye. Oro idịghe mmemmem ke ini abian̄a abian̄a mme anditeme ẹdomode ndimenede nsọn̄ibuot ke enyọn̄. Edi ẹkeme ndinam enye ye un̄wam Abasi. Nnyịn ye unana ediyok inyụn̄ inyene ndisọn̄ọ nnyịre ye ikọ Abasi edieke anade nnyịn ibọhọ usen Jehovah oro ekperede usọp usọp mi.
Udiana akpa n̄wed apostle Peter eke odudu spirit ekeme ndin̄wam nnyịn nditịm n̄kpan̄utọn̄ nnọ ikọ prọfesi Abasi. Iso-ọfọn Peter ekewet n̄wed emi ke Babylon ke n̄kpọ nte 64 C.E. Ke n̄wed esie enye ada ọnọ akpanikọ Abasi, ọnọ ekemmọ mme andinịm ke akpanikọ ntọt aban̄a usen Jehovah oro edide nte inọ, onyụn̄ an̄wam mme andikot n̄wed esie ẹkûdi se idiọkido mme abiatibet ẹmende ẹfep. Sia usen Jehovah ekperede ndisịm nnyịn, nnyịn imekeme ndibọ ufọn akamba akamba nto ikọ Peter eke odudu spirit.
Buọt Idem ke Ikọ Prọfesi
Nte mme Christian, nnyịn inyene ndisịn̄ede idem man iwụt edu uten̄e Abasi onyụn̄ ana nnyịn ikpan̄ utọn̄ ke ikọ prọfesi. (2Pe 1:1-21) Man ikûkabade idi mmọemi mînamke utom aba m̀mê mbon oro mîsion̄oke mfri, oyom nnyịn ‘idian eti ido, ifiọk, mfara ke idem, ime, uten̄e Abasi, ima iman, ye ima ke mbuọtidem.’ Ẹma ẹtịm ẹsọn̄ọ ikọ prọfesi, ke ini Peter okokụtde Jesus okpụhọrede mbiet onyụn̄ okopde nte Abasi etịn̄de ikọ aban̄a Christ ke idaha oro. (Mark 9:1-8) Nnyịn inyene ndikpan̄ utọn̄ ke ikọ odudu spirit Abasi emi.
Kpeme Idem Mbak Mbon Nsọn̄ibuot
Ke nditịm n̄kpan̄uton̄ nnọ ikọ prọfesi Abasi, nnyịn imekeme ndikpeme idem mbak mbon nsọn̄ibuot ye mme oburobụt owo eken. (2:1-22) Peter ama ọtọt nte ke nsunsu mme anditeme ẹyesan̄a ndịbe ndịbe ẹdụk esop. Nte ededi, Jehovah eyeda ndot ndot ubiereikpe etiene mbon nsọn̄ibuot emi kpa nte enye okobiomde mme ọsọn̄ibuot angel, ererimbot unana uten̄e Abasi eke eyo Noah, ye mme obio Sodom ye Gomorrah ikpe. Nsunsu mme anditeme ẹsịn odudu emi Abasi ọnọde ke ndek ẹnyụn̄ ẹnyịk mbon mmemidem ndibuana ye mmọ ke idiọkido. Ọkpọfọn ye utọ mbon nsọn̄ibuot oro ndikpetre ndifiọk “usụn̄ edinen ido akan ndifiọk mma, ndien ndiwọn̄ọde n̄kpọn̄ edisana ibet eke ẹnọde mmọ.”
Usen Jehovah ke Edi!
Nte mbon oro ẹkpan̄de utọn̄ ẹnọ ikọ prọfesi ke utịt usen ẹmi, inaha nnyịn iyak idem inọ mme asak nsahi ẹmi ẹsakde ẹban̄a etop edidu Jesus. (3:1-18) Mmo ẹmefre ẹte ke Abasi emi aduakde ndisobo editịm n̄kpọ emi ama osobo ererimbot emi ekebemde ukwọ iso. Ikpanaha ẹse ime Jehovah nte ediduọn koro enye oyom mme owo ẹkabade esịt. Ẹyesobo editịm n̄kpọ emi ke “usen Ọbọn̄ [“Jehovah,” NW]” ndien ‘obufa enyọn̄ ye obufa isọn̄ emi edinen ido edidụn̄de’ eyeda itie esie. Ke ntre, akpana isịn ofụri ukeme nnyịn nditie ‘ke emem, nnana ntọi, nnyụn̄ nnana ndo.’ Utu ke edidi se nsunsu mme anditeme ẹtụnde usụn̄, ẹyak nnyịn ikọri ke ifiọk Jesus Christ.
Ẹyak ikọ Peter osụhọde odụk nnyịn esịt. Kûdedei ukpu ndidu ke ukpeme mbak nsunsu mme anditeme. Du ke edidemede nte ke usen Jehovah ke edi usọp usọp. Nnyụn̄ kpan̄ utọn̄ ke ikọ prọfesi Abasi kpukpru ini.
[Ekebe/Ndise ke page 31]
Ẹtop Ẹsịn ke Tartarus: Jehovah “[ikayakke] mme angel ẹmi ẹkeduede ẹbọhọ, edi [ama otop] mmọ ọduọk ke itie ufen [“Tartarus,” NW], onyụn̄ [esịn] mmọ ke n̄kịm n̄kịm ukpe, ete, ẹnịm mmọ ẹtie do ẹbet ikpe.” (2 Peter 2:4) Emi idịghe ukpepn̄kpọ n̄ke Tartarus emi ẹwụtde ke Iliad eke Homer nte itie ke idakisọn̄ emi ẹkọbide mme usụhọde nsunsu abasi, Cronus ye Ikpọ mme spirit eken. Tartarus eke Bible edi usụhọde, idaha mbiet-n̄kpọkọbi emi Abasi okotopde mme ọsọn̄ibuot angel ke eyo Noah ọdọn̄. (Genesis 6:1-8; 1 Peter 3:19, 20; Jude 6) “N̄kịm n̄kịm” osụn̄ọ oto edisịbe emi Abasi esịbede mmọ ọkpọn̄ un̄wana eke spirit nte mbon oro ẹbịnde ẹsio ke ubon esie. Nte mbon oro ẹnịmde ẹnọ ndot ndot ubiereikpe, mmọ ẹnyene n̄kịm n̄kịm ini iso kpọt. Tartarus edi ntọn̄ọ editụn̄ọ ukpe emi edisịnde Satan ye mme demon esie mbemiso ntọn̄ọ Tọsịn Isua Ukara Christ. Nsobo mmọ ẹyeda itie ke Ukara Tọsịn Isua Jesus okụrede.—Matthew 25:41; Ediyarade 20:1-3, 7-10, 14.
[Ndise]
Zeus ama otop mme usụhọde abasi esịn ke Tartarus mbụkeset
[Ebiet Ẹdade N̄kpọ Ẹto]
Natural Archaeological Museum, Athens, Greece