Ima Nditọete Enyene Odudu

Mme Akpan N̄kpọ Ẹtode Philemon

JESUS CHRIST ama ọnọ mme anditiene enye “obufa ibet” ete mmọ ẹma kiet eken kpa nte enye akamade mmọ. (John 13:34, 35) Ke ntak ima oro, mmọ ẹkeme ndikam n̄kpa kaban̄a kiet eken. Ih, ima nditọete otịm ọsọn̄ onyụn̄ enyene odudu.

Apostle Paul ama onịm ete ke ima nditọete eyedemede Philemon, Christian oro akabuanade ke esop ke Colossae, akwa obio kiet ke Asia Minor. Ima ama ononụk Philemon ndiyak ufọk esie nnọ ẹda ẹnam n̄kpọ nte itie unịm mbonoesop Christian. Onesimus, ofụn Philemon ama efehe ọnyọn̄, iso-ọfọn oyịpde okụk man ada ekpe usụn̄ osịm Rome, emi enye ke ukperedem okosobode ye Paul onyụn̄ onyịmede Ido Ukpono Christ.

Ke adan̄aemi odude ke ufọk-n̄kpọkọbi ke Rome ke n̄kpọ nte 60-61 C.E., Paul ama ewet n̄wed san̄asan̄a ọnọ ẹsọk Philemon. N̄wed emi ama ekpe Philemon ubọk ndifiak nda Onesimus oro ẹkenọde ọnyọn̄ nsịn ke ufọk ke edu ima nditọete. Kot n̄wed emi, afo eyenyụn̄ okụt ete ke emi edi eti uwụtn̄kpọ ima ye usọ—kiet oro ikọt Jehovah ẹkemede ndikpebe nte ọfọnde.

Itoro Kaban̄a Ima ye Mbuọtidem

Ke etịn̄de ikọ ọnọ Philemon ye mmọ eken, Paul ekebemiso ọnọ itoro. (Ufan̄ikọ 1-7) Apostle emi ama akaiso ndikop mban̄a ima oro Philemon ekenyenede ọnọ Christ ye kpukpru ndisana ikọt Abasi onyụn̄ okop aban̄a mbuọtidem esie. Emi ama anam Paul ọkọm Jehovah ama onyụn̄ ọnọ enye idatesịt ye ndọn̄esịt. Nte nnyịn imesitoro ekemmọ mme andinịm ke akpanikọ ẹmi ẹnịmde eti uwụtn̄kpọ ke ima ye mbuọtidem? Nnyịn ikpenyene ndinam ntre.

Item ẹnọde ke ntak ima esidi se ẹyomde kpukpru ini ke ndinam n̄kpọ ye ekemmọ mme Christian, nte ikọ Paul ẹwụtde. (Ufan̄ikọ 8-14) Ke ama okokụre ye usọ usọ usụn̄ unyene nneme esie, apostle Paul ama ọdọhọ ke okposụkedi nte imọ ikemede ndidọhọ Philemon “anam se idotde,” edi imọ utu ke oro ikabade imek ndikpe ye enye. Ndinam nso? Kamse, ndifiak nda ofụn oro, Onesimus ye mfọnido! Paul akpakama ndimụm Onesimus nnịm kaban̄a nti utom esie edi ikpanamke emi ke Philemon mînyịmeke.

Mme n̄kpọntịbe oro ẹtiede nte ifọnke ẹsiwak ndinyene ufọn, nte Paul akade iso ndiwụt. (Ufan̄ikọ 15-21) Ke akpanikọ, eti n̄kpọ ama osụn̄ọ ke Onesimus ndikefehe. Ntak-a? Koro Philemon eyefiak enyene enye idahaemi nte unyịme unyịme anam-akpanikọ eyenete Christian, idịghe nte mmen̄e mmen̄e, ofụn oro iso-ọfọn mînamke akpanikọ. Paul ọkọdọhọ Philemon afiak adara Onesimus idem nte akpadarade imọ. Edieke Onesimus ekeduede Philemon ke usụn̄ ekededi, apostle oro okposio isọn oro. Man osụk anam Philemon ama ndinyịme, Paul ama eti enye ete ke enye ke idemesie ama akama imọ isọn ke enye ndikabade ndi Christian. Ntre, Paul ama onịm ete ke Philemon eyenam ebe idem nte ikọdọhọde enye anam. Nso usọ usọ ye ima ima eben̄e ke emi edi ntem! Ke akpanikọ, emi edi usụn̄ nte nnyịn ikpanamde n̄kpọ ye ekemmọ mme Christian.

Paul ama ada n̄wed esie osịm utịt ye idotenyịn, ekọm, ye nti uduak. (Ufan̄ikọ 22-25) Enye ama odori enyịn ẹte ke ebede ke akam oro mmọ en̄wen ẹbọn̄de kaban̄a imọ, ẹyesọp ẹsio imọ ke ufọk-n̄kpọkọbi. (Nte udiana n̄wed oro Paul ekewetde ọnọ ẹsọk Timothy owụtde, ẹma ẹbọrọ akam oro.) Ke etrede n̄wed esie, Paul ama ọnọ ekọm onyụn̄ eben̄e ete mfọnido Jesus Christ oro owo mîdotke akpakam odu ye spirit oro Philemon ye ekemmọ mme andituak ibuot nnọ Jehovah ẹwụtde.

[Ekebe/Ndise ke page 23]

Se Ikande Ofụn: Kaban̄a edifiak nnyọn̄ Onesimus, kpa ofụn Philemon, Paul ọkọdọhọ ete: “Ndusụk ẹkedianade enye ye afo ke ekpri ini, man afo ekpenyene enye ke nsinsi; idịghe aba nte ofụn, edi nte se ikande oro, nte edima eyenete: mmama enye etieti; adan̄a didie ke afo edima enye akan, ke idemesie, ye eke Ọbọn̄.” (Philemon 15, 16) Ke Obio Ukara Rome, ukara obio okonịm mbet ofụn, ndien Paul ama ọdiọn̄ọ utọ “mme enyene-odudu ẹmi ẹkarade” mi. (Rome 13:1-7) Enye ikọkwọrọke iban̄a en̄wan uwọrọ ufụn edi akan̄wam mme utọ owo oro ndinyene ubọhọ ufụn eke spirit nte mme Christian. Ke n̄kemuyo ye item esie ọkọnọde ete ifụn ẹsụk ibuot ẹnọ mme eteufọk mmọ, Paul ama ọnọ Onesimus ọnyọn̄ ebịne Philemon. (Colossae 3:22-24; Titus 2:9, 10) Onesimus idahaemi ama ọfọn akan ofụn eke ererimbot. Enye ekedi edima ekemmọ andinịm ke akpanikọ emi edisụk ibuot ke udomo oro enyenede adan̄a ọnọ Philemon nte eti ofụn, kpa enyeemi edumbet Abasi akarade onyụn̄ owụtde ima nditọete.