Ediwak owo ẹtre ndidụk mme edinam ufọkabasi koro owo ibọrọke mme akpan mbụme oro ẹfịnade mmọ m̀mê ndinọ mmọ ndọn̄esịt. Edi, ntak emi afo okpodụkde mbono esop Christian oro Mme Ntiense Jehovah ẹtịmde? Nso ke afo edikụt do?

Oyokop idatesịt ndidu ye mbon oro ẹnyenede ima ye edikere mban̄a. Ke akpa isua ikie, ẹma ẹsibahade mme Christian ẹsịn ke mme esop, mmọ ẹma ẹsinịm mme mbono esop ndituak ibuot nnọ Abasi, n̄kpep N̄wed Abasi, nnyụn̄ nsịn udọn̄ nnọ kiet eken. (Mme Hebrew 10:24, 25) Ke ini mmọ ẹkesisopde idem ke mme inem inem mboho emi, mmọ ẹkesida nte ke mmimọ idu ye mme ufan akpanikọ, kpa nditọete mmọ eke spirit. (2 Thessalonica 1:3; 3 John 14) Nnyịn itiene ukem uwụtn̄kpọ emi ndien emi anam ikop idatesịt.

Eyekpep nte ekemede ndida mme edumbet Bible nsịn ke edinam. Kpa nte ẹkesinamde ke eyo Bible, kpukpru irenowo, iban, ye nditọwọn̄ ẹsisop idem ọtọkiet. Mme andikpep oro ẹdotde ẹsida Bible ẹn̄wam nnyịn ifiọk nte ikpadade mme edumbet Bible isịn ke edinam ke uwem nnyịn. (Deuteronomy 31:12; Nehemiah 8:8) Kpukpru owo ẹkeme nditiene mbuana ke nneme otuowo ye ke ikwọ, emi esinam nnyịn ikeme ndiwụt idotenyịn oro inyenede nte mme Christian.—Mme Hebrew 10:23.

Ọyọsọn̄ọ mbuọtidem oro enyenede ke Abasi. Apostle Paul ọkọdọhọ kiet ke otu mme esop oro ẹkedude ke eyo esie ete: ‘Ọdọn̄ mi ndikụt mbufo man nnyịn ikpada mbuọtidem nnyịn, eke mbufo ye okịm, isịn udọn̄ inọ kiet eken.’ (Rome 1:11, 12) Nnyịn ndisobo ye ekemmọ mme andinịm ke akpanikọ kpukpru ini ke mme mbono esop esisọn̄ọ mbuọtidem nnyịn onyụn̄ anam itetịm ibiere ndidu uwem nte mme Christian.

Imokot fi ite edidụk mbono esop efen oro idinyenede man okụt kpukpru emi ke idemfo. Ẹyenen̄ede ẹdara fi. Kpukpru mbono esop nnyịn edi ke mfọn, owo isikamake usan isan̄a ibọ okụk.

• Uwụtn̄kpọ mmanie ke nnyịn itiene ke nte inịmde mbono esop nnyịn?

• Nso ufọn ke ikeme ndibọ ke ini idụkde mme mbono esop Christian?

Ọkpọkọm ọwọrọ ndisan̄a mbe akai m̀mê ndisan̄a ke eyo m̀mê ke edịm, nnyịn isitreke ndidụk mbono esop Christian kpukpru ini. Kpa ye mme mfịna uwem ye mmemidem ke ẹma ẹkenyọn̄ utom, ntak emi Mme Ntiense Jehovah ẹsisịnde utọ ukeme oro man ẹkesop idem ye ekemmọ mme andinịm ke akpanikọ?

Ẹsisọn̄ọ nnyịn idem. Ke ini Paul eketịn̄de aban̄a mbon oro nnyịn isisopde idem ọtọkiet ke esop, enye ekewet ete, ‘ẹkere kiet eken.’ (Mme Hebrew 10:24) Ikọ emi ọwọrọ “nditịm n̄kere mban̄a,” oro edi, ndimehe ye kiet eken. Ntre ikọ apostle emi esịn udọn̄ ọnọ nnyịn ndikere mban̄a mbon en̄wen. Ke ini imehede ye mme ubon Christian eken, nnyịn iyokụt ke ndusụk mmọ ẹkan ukem mfịna oro nnyịn isobode uforo uforo ye nte ke mmọ ẹkeme ndin̄wam nnyịn ikan mme mfịna nnyịn n̄ko.

Anam inyene itie ufan oro ebịghide. Ke mme mbono esop nnyịn, nnyịn isisop idem ọtọkiet ye mme ufan oro nnyịn itịmde imehe, idịghe sụk mme ọdiọn̄ọ. Ke mme ini efen, nnyịn imesibuana ke mme edinam unọ idem inemesịt oro ọfọnde. Nso ufọn ke isibọ ito utọ mboho oro? Emi esinam ikpep ndida kiet eken ke ọsọn̄urua onyụn̄ ọsọn̄ọ ima oro inyenede inọ kiet eken. Ndien ke ini nditọete nnyịn ẹsobode mfịna, nnyịn isọsọp in̄wam mmọ koro imededi ata nti ufan. (Mme N̄ke 17:17) Nnyịn ndimehe ye kpukpru nditọete nnyịn ke esop owụt ke ‘imekere iban̄a kiet eken ukem ukem.’—1 Corinth 12:25, 26.

Imesịn udọn̄ inọ fi ite emek mme ufan ke otu mbon oro ẹnamde uduak Abasi. Afo oyokụt utọ ufan emi ke otu Mme Ntiense Jehovah. Mbọk kûyak n̄kpọ ndomokiet anam fi etre ndisop idem ọtọkiet ye nnyịn.

• Ntak emi ọfọnde nnyịn ndisisop idem ọtọkiet ke mme mbono esop?

• Ini ewe ke afo akpama ndidi ndidiọn̄ọ mbon esop nnyịn?

Akpan n̄kpọ oro ẹkesinamde ke mbono esop akpa mme Christian ekesidi ndikwọ ikwọ, mbọn̄ akam, n̄kot nnyụn̄ nneme N̄wed Abasi. (1 Corinth 14:26) Ukem oro ke afo edikụt ke mbono esop nnyịn.

Se ẹkpepde do oto Bible onyụn̄ enyene ufọn. Ke utịturua, esop kiet kiet ẹsisop idem man ẹkop utịn̄ikọ Bible emi edide minit 30 oro aban̄ade nte N̄wed Abasi oyomde nnyịn idu uwem ye se enye etịn̄de aban̄a ini oro nnyịn idude mi. Ke ini ẹkotde Bible, ẹsisịn udọn̄ ẹnọ kpukpru nnyịn nditiene nse ke Bible nnyịn. Ke ẹma ẹkekụre utịn̄ikọ emi, ẹsinịm Ukpepn̄kpọ “Enyọn̄-Ukpeme” ke hour kiet, emi kpukpru owo ẹkemede nditiene mbuana ke nneme ibuotikọ Enyọn̄-Ukpeme nsiondi eke ukpepn̄kpọ. Nneme emi esin̄wam nnyịn ida se Bible ekpepde isịn ke edinam ke uwem nnyịn. Ukem ibuotikọ oro ke ẹsikpep ke kpukpru se iwakde ibe esop 110,000 ke ofụri ererimbot.

Se isikpepde esinam inen̄ede idiọn̄ọ ndikpep owo n̄kpọ. Imesinyụn̄ isop idem mbubreyo kiet ke ufọturua idụk mbono esop Uwem ye Utom Nnyịn Mme Christian. Mbono esop emi enyene ikpehe ita. Kpukpru ọfiọn̄, ẹsiwet se ẹdinamde ye mme n̄kpọ oro ẹdidade ẹnịm mbono esop emi ke N̄wed Mbono Esop Uwem ye Utom Nnyịn. Ẹkot akpa ikpehe mbono esop emi Mme Akpan N̄kpọ ke Ikọ Abasi. Ikpehe emi esin̄wam nnyịn inen̄ede idiọn̄ọ se isịnede ke itie Bible emi ofụri esop ẹma ẹketetie ke idemmọ ẹkot. Ẹkot ọyọhọ ikpehe iba Kpep Ndikwọrọ Ikọ Ọfọn. Ẹsinanam ẹwụt nte ẹkpekwọrọde ikọ. Etieibuot okpokoro esitịn̄ n̄kpọ emi an̄wamde nnyịn ikeme ndikot n̄wed nnyụn̄ ntịn̄ ikọ ọfọn. (1 Timothy 4:13) Ẹkot ọyọhọ ikpehe ita Nte Christian Okpodude Uwem, ndien ikpehe emi esin̄wam nnyịn ida se ikpepde ke Bible idu uwem ke usen ke usen. Kiet ke otu n̄kpọ emi ẹsinamde edi ndibụp nnyụn̄ mbọrọ mbụme emi anamde nnyịn itịm idiọn̄ọ se Bible ekpepde.

Ke ini odụkde mme mbono esop nnyịn, afo udutreke ndidara mban̄a orụk ukpepn̄kpọ Bible oro edibọde.—Isaiah 54:13.

• Nso ke afo odori enyịn ndikop ke mbono esop Mme Ntiense Jehovah?

• Ewe mbono esop nnyịn eke urua ke urua ke afo akpama ndidụk?