“Mbịghi-N̄kan Itien̄wed Bible Oro Ẹfiọkde”

ISUA 25 emi ẹkebede, mme ọdọkisọn̄ nyom n̄kpọeset ke Israel ẹma ẹfiọhọ n̄wọrọnda n̄kpọ. Mmọ ẹma ẹfiọhọ n̄kpri ikpan̄wed iba oro ẹdade sidibe ẹnam emi ẹwetde mme itien̄wed Bible, ke udi abaitiat ke Itịghede Hinnom ke Jerusalem. Ikpan̄wed oro ẹma ẹdu mbemiso mbon Babylon ẹkesobode Jerusalem ke isua 607 M.E.N. Mme itien̄wed oro ẹsịne ndusụk edidiọn̄ oro ẹwetde ke Numbers 6:24-26. Jehovah, kpa ọkpọkpọ enyịn̄ Abasi, odu ediwak itie ke ikpan̄wed mbiba. Ẹdọhọ ke mme ikpan̄wed oro ẹdi “mbịghi-n̄kan n̄wed eset oro ẹwetde mme itien̄wed Bible usem Hebrew.”

Nte ededi, ndusụk nditọ ukpepn̄kpọ ẹdọhọ ke mme ikpan̄wed oro ibịghike ntre, utu ke oro ke ẹkewet mmọ ke ọyọhọ isua ikie iba M.E.N. Ntak kiet oro anamde ẹnyene nsio nsio ekikere emi edi koro akpasarade ndise oro ẹkesiode ata n̄kpri ikpan̄wed emi ikọfọnke ikem ndinen̄ede nda ndụn̄ọde ofụri n̄kpatan̄a n̄kpọ. Man ẹbiere eneni aban̄ade isua oro ẹkewetde mme ikpan̄wed emi, otu nditọ ukpepn̄kpọ ẹma ẹnam obufa ndụn̄ọde. Mmọ ẹkeda ifiọk usio ndise ye kọmputa usio ndise eke ata ndondo emi ẹsio ndise ikpan̄wed oro ata ukem ukem nte enye etiede. Ẹma ẹmịn̄ ke ndondo emi se obufa ndụn̄ọde emi akayararede. Nso ikedi ubiere otu nditọ ukpepn̄kpọ emi?

Akpa kan̄a, nditọ ukpepn̄kpọ emi ẹsọn̄ọ ẹtịn̄ ke mme n̄kpọ ẹban̄ade ebiet oro ẹkefiọhọde mme ikpan̄wed emi ẹsọn̄ọ ke mmọ ẹma ẹdu mbemiso nditọ Israel ẹkekade ntan̄mfep ke Babylon. Ndụn̄ọde uwetn̄kpọ eset—edida mme abisi, nte ẹwetde n̄kpọ, ubọkn̄wed, udịm ikọ, ye ubọk n̄kan̄ oro ẹkewetde n̄kpọ ẹka, mbiere isua n̄wed—owụt n̄ko ke mme ikpan̄wed emi ẹma ẹdodu mbemiso nditọ Israel ẹkekade ntan̄mfep ke Babylon, oro edi, ke utịt utịt ọyọhọ isua ikie itiaba M.E.N. Ndien ke akpatre, ke ini ẹkerede ẹban̄a ido uwetn̄wed, nte ẹbọpde ikọ, otu nditọ ukpepn̄kpọ emi ẹberi ẹte: “Ido uwetn̄wed oro ẹdade ẹwet mme ikpan̄wed oro odu ke n̄kemuyo ye ebiet oro ẹkefiọhọde mmọ ye ido uwetn̄kpọ ini oro onyụn̄ ọsọn̄ọ ke ẹkewet mme ikpan̄wed oro mbemiso nditọ Israel ẹkekade ntan̄mfep.”

Magazine oro Bulletin of the American Schools of Oriental Research etịn̄ ibio ibio ntem aban̄a ndụn̄ọde oro ẹkenamde ẹban̄a mme ikpan̄wed sidibe oro, emi ẹkotde n̄ko uwetn̄kpọ Hinnom Ketef: “Ke ntem, nnyịn imekeme ndisọn̄ọ ubiere oro ata ediwak nditọ ukpepn̄kpọ ẹsịmde nte ke n̄kpọ oro ẹwetde ke mme ikpan̄wed oro ẹdi mbịghi-n̄kan itien̄wed Bible oro ẹfiọkde.”

[Mme ebiet ẹdade ndise ẹto ke page 32]

Abaitiat: Pictorial Archive (Near Eastern History) Est.; inscriptions: Photograph © Israel Museum, Jerusalem; courtesy of Israel Antiquities Authority