Didie ke Jehovah Editi Fi?

“O ABASI mi, . . . ti mi.” Nehemiah ama ada mme ikọ oro ekpe Abasi ubọk ediwak ini. (Nehemiah 5:19; 13:14, 31) Akam edi ndammana n̄kpọ nte ke ini mme owo ẹdude ke ọkpọsọn̄ nnanenyịn, mmọ ẹsida mme utọ ikọ n̄kpeubọk ntre ẹkpe Abasi ubọk.

Nte ededi, nso ke mme owo ẹsinyene ke ekikere ke ini mmọ ẹben̄ede Abasi ẹte eti mmimọ? Nte an̄wan̄ade, mmọ ẹsidori enyịn Abasi ndinam se ikande ikpîkpu editi enyịn̄ mmọ. Eyịghe idụhe nte ke mmọ ẹsinyene ukem idotenyịn emi kiet ke otu mme abiatibet emi ẹkewotde ye Jesus ekenyenede. Owo emi, ke mîbietke enye eken, ama ekpe Jesus ubọk ete: “Ti mi ke adan̄aemi Afo edide ndida ubọn̄.” Enye ikoyomke Jesus eti sụk owo emi enye ekedide edi okoyom enye n̄ko anam n̄kpọ ọnọ enye—anam enye eset.—Luke 23:42.

Nte ekemde, Bible owụt ete ke ye Abasi, “editi” ọwọrọ edinam n̄kpọ in̄wan̄în̄wan̄. Ke uwụtn̄kpọ, ke mmọn̄ukwọ ama okofụk isọn̄ ke usen 150, “Abasi eti Noah . . . Abasi onyụn̄ anam ofụm ebe ke isọn̄, ndien mmọn̄ osụhọde.” (Genesis 8:1, 2) Ediwak isua ikie ke ukperedem, ke mme Philistine ẹma ẹketịbi Samson enyịn ẹnyụn̄ ẹkọbi enye, enye ama ọbọn̄ akam ete: “Jehovah, ti mi, mbọk, nyụn̄ sọn̄ mi idem, ini kiet emi.” Jehovah ama eti Samson ebe ke ndinọ enye odudu oro akande eke owo man enye ekpekeme ndisio usiene ye mme asua Abasi. (Judges 16:28-30) Amaedi Nehemiah, Jehovah ama ọdiọn̄ mme ukeme esie, ndien ẹma ẹfiak ẹwụk utuakibuot akpanikọ ke Jerusalem.

Apostle Paul ekewet ete: “Se ededi eke ẹkewetde ke ini oko, ke ẹkewet ndida n̄kpep nnyịn n̄kpọ, man nnyịn inyene idotenyịn oto ke ime ye ndọn̄-esịt eke N̄wed Abasi ọnọde.” (Rome 15:4) Edieke nnyịn itide Jehovah ebe ke ndiyom ndinam uduak esie, nte mme anam-akpanikọ asan̄autom esie ẹkenamde ke ini edem, nnyịn imekeme ndinyene mbuọtidem nte ke Jehovah eyeti nnyịn ke ndin̄wam nnyịn inyene se iyomde ke usen ke usen, ke ndin̄wam nnyịn ke mme idomo nnyịn, ye ke ndinyan̄a nnyịn ke ini enye edibierede ikpe ọnọ mbon unana uten̄e Abasi.—Matthew 6:33; 2 Peter 2:9.