Idem enen̄ede akpa iban emi ndikụt ke udi Jesus ana ukpọk! Mary Magdalene efehe eketịn̄ ọnọ “Simon Peter ye mbet eken, emi Jesus amade,” oro edi apostle John. (John 20:2) Edi iban eken ke mben udi oro ẹkụt angel. Ndien angel efen do esịne ke esịt udi, enye oro “esịne afia ewụra.”—Mark 16:5.

Angel kiet ọdọhọ mmọ ete: “Ẹkûfehe ndịk, koro mmọfiọk nte mbufo ẹyom Jesus emi ẹkekọn̄de ke eto. Enye idụhe mi, koro ẹma ẹnam enye eset, kpa nte enye ọkọdọhọde. Ẹdi, ẹdise ebiet emi enye akanade. Ndien ẹwara ẹka ẹketịn̄ ẹnọ mme mbet esie ẹte ke ẹma ẹnam enye eset ke n̄kpa, ndien, sese! enye ke ebem mbufo iso aka Galilee.” (Matthew 28:5-7) ‘Idem enyek iban oro, idem onyụn̄ akpa mmọ etieti,’ mmọ ẹnyụn̄ ẹfehe ẹka nditịn̄ nnọ mme mbet.—Mark 16:8.

Etisịm ini emi, Mary okụt Peter ye John. Ibifịk ababa enye ke ntak itọk emi enye ekefehede, enye onyụn̄ ọdọhọ Peter ye John ete: “Mmọ ẹmen Ọbọn̄ ẹsio ke udi, nnyịn inyụn̄ ifiọkke ebiet eke mmọ ẹnịmde enye.” (John 20:2) Peter ye John ẹfehe ẹka udi. John ọsọp itọk akan Peter onyụn̄ ebem iso esịm udi. Enye ada ese esịt udi onyụn̄ okụt ọfọn̄ emi ẹkedade ẹwan̄ Jesus, edi enye ibehe idụk esịt udi.

Ke ini Peter edide edisịm, enye ebe odụk esịt udi. Enye okụt ọfọn̄ linen oro ẹkedade ẹbọp Jesus ke ibuot. Ekem John etiene odụk onyụn̄ enịm se Mary ọkọdọhọde mmọ. Kpa ye oro Jesus ọkọdọhọde mmọ ke ẹyewot imọ, ke imọ iyonyụn̄ iset ke ọyọhọ usen ita, se itịbede emi isụk in̄wan̄ake mmọ ke ẹnam Jesus eset. (Matthew 16:21) Idem enen̄ede akpa mmọ, mmọ ẹnyụn̄ ẹnyọn̄ ufọk. Edi Mary emi akafiakde edi udi itieneke mmọ inyọn̄.

Iban eken ke ẹka ndidọhọ mme mbet ke ẹnam Jesus eset. Ke adan̄aemi mmọ ẹsụk ẹfehede ẹka, Jesus osobo ye mmọ onyụn̄ ọdọhọ mmọ ete: “Mmọkọm-o!” Mmọ ẹduọ enye ke ukot ẹnyụn̄ “ẹnụhọ ẹnọ enye.” Ekem Jesus ọdọhọ mmọ ete: “Ẹkûfehe ndịk! Ẹka, ẹketịn̄ ẹnọ nditọete mi, ẹte mmọ ẹka Galilee; ndien mmọ ẹdikụt mi do.”—Matthew 28:9, 10.

Ke ini unyekisọn̄ etịbede, mbonekọn̄ oro ẹkekpemede udi Jesus ẹnyụn̄ ẹkụtde mme angel, mmọ ẹma “ẹnyek ẹnyụn̄ ẹkabade ẹtie nte mme akpan̄kpa.” Ke ini enyịn atarade mmọ, mmọ ẹdaha ẹdụk obio “ẹketịn̄ kpukpru se iketịbede ẹnọ mbọn̄ oku.” Mbọn̄ oku ndien ẹka ẹkedụk odu ye mbiowo mme Jew. Kpukpru mmọ ẹbiere ndinọ mbonekọn̄ oro ubọkedem ndọhọ mmọ ẹsu nsu ẹte: “Mme mbet esie ẹkedi ke okoneyo ẹdiyịp enye ke adan̄aemi nnyịn idede idap.”—Matthew 28:4, 11, 13.

Ẹkeme ndiwot owoekọn̄ Rome edieke enye edede idap ke ini utom. Emi anam mme oku ẹdọhọ mmọ ẹte: “Edieke emi [nsu emi mmọ ẹsude ẹte ke ima ide idap] odụkde andikara utọn̄, nnyịn iyekpe ye enye inyụn̄ isio mbufo ifep ke mfịna.” (Matthew 28:14) Mbonekọn̄ oro ẹbọ ubọkedem oro ẹnyụn̄ ẹnam se mme oku ẹdọhọde mmọ ẹnam. Nsu emi asuana ke otu mme Jew nte ke mme mbet ẹkedi ẹdiyịp okpo Jesus.

Mary Magdalene ke osụk ada ke mben udi atua. Ekem enye onyụn̄ọ ese onyụn̄ okụt angel iba ẹsịnede mfia ọfọn̄idem ke esịt udi. Kiet etie ke itie emi ibuot Jesus akanade ndien enye eken etie ke ebiet emi ukot esie akanade. Mmọ ẹbụp enye ẹte: “N̄wan owo, nso inam fi atuade?” Mary ọbọrọ mmọ ete: “Mmọ ẹmen Ọbọn̄ mi ẹfep, ndien mfiọkke ebiet eke ẹnịmde enye.” Ke ini Mary ọwọn̄ọrede enyịn ke edem, enye okụt owo en̄wen. Owo oro obụp enye se angel oro okobụpde enye onyụn̄ adian do ete: “Afo oyom anie?” Mary ekere ke ete oro edi ekpeme in̄wan̄ onyụn̄ ọdọhọ enye ete: “Ete, edieke edide afo ekemen enye efep, sian mi ebiet emi afo enịmde enye, ndien nyemen enye nnyọn̄.”—John 20:13-15.

Jesus emi ẹnamde eset ke Mary ada etịn̄ ikọ oro, edi Mary idiọn̄ọke enye kan̄a. Edi ke ini Jesus okotde enye nte esikotde ete, “Mary!” do ke enye ọdiọn̄ọ ke Jesus ke edi. Esịt enem Mary, enye onyụn̄ okot Jesus ete: “Rabboni!” (emi ọwọrọde “Andikpep!”) Mary ekere ke Jesus ọmọn̄ adaha heaven, enye eyịre Jesus omụm. Edi Jesus ọdọhọ enye ete: “Kûyịre mi ke idem. Koro ndọkke kan̄a mbịne Ete. Edi bịne nditọete mi kọdọhọ mmọ ete: ‘Mmọn̄ ndọk mbịne Ete mi ye Ete mbufo, Abasi mi ye Abasi mbufo.’”—John 20:16, 17.

Mary efehe aka ebiet emi mme apostle ye mme mbet eken ẹdude. Enye ọdọhọ mmọ ete: “Mmokụt Ọbọn̄!” ndien mmọ ẹda se enye etịn̄de ẹdian ye se iban eken ẹketịn̄de. (John 20:18) Edi se mmọ ẹkopde emi “ẹtie mmọ ke utọn̄ nte ndisịme ikọ.”—Luke 24:11.

Mbet Jesus ke ẹsụk ẹfofụhọ ke Sunday, Nisan 16. Udi oro mmọ ẹkekụtde nte anade ukpọk isụk in̄wan̄ake mmọ. (Matthew 28:9, 10; Luke 24:11) Kpasụk usen oro, Cleopas ye mbet en̄wen ẹto Jerusalem ẹka Emmaus, emi edide n̄kpọ nte itiat itiaba.

Nte mmọ ẹsan̄ade ke usụn̄, mmọ ke ẹneme se isụk itịbede. Esenowo kiet asan̄a ekpere mmọ. Enye obụp mmọ ete: “Nso n̄kpọ ke mbufo ẹneneni ntem ke otu idem mbufo nte mbufo ẹsan̄ade ke usụn̄?” Cleopas ọbọrọ enye ete: “Nte afo odụn̄ ikpọn̄ ke Jerusalem nte esenowo, ndien ke ntre ufiọkke se itịbede do ke usen ifan̄ emi?” Enye obụp mmọ ete: “Nso n̄kpọ?”—Luke 24:17-19.

Mmọ ẹbọrọ enye ẹte: “Mme n̄kpọ emi ẹban̄ade Jesus eyen Nazareth.” Mmọ ẹnyụn̄ ẹdian do ẹte: “Nnyịn ikodori enyịn ite edi owo emi edinyan̄a Israel.”—Luke 24:19-21.

Cleopas ye mbet oro asan̄ade ye enye ẹtịn̄ se itịbede usen oro. Mmọ ẹdọhọ ke ndusụk iban emi ẹkekade udi oro ẹkebụkde Jesus ikwe enye ke udi ye nte ke iban emi ẹma ẹkụt esen esen n̄kpọ. Mmọ ẹkekụt mme angel, ndien mme angel oro ẹdọhọ mmọ ke Jesus eset. Mmọ ẹtịn̄ n̄ko ke mbon en̄wen ẹma ẹtiene ẹka udi “ẹkekụt ke edi ntre, kpa nte iban oro ẹkedọhọde.”—Luke 24:24.

Idem akpa mbet iba emi aban̄a se mme n̄kpọ emi ẹwọrọde. Esenowo oro ndien asua ọnọ mmọ ke mmọ ndiyak utọ ekikere emi anam mmọ ẹtre ndinịm se ẹkewetde ẹban̄a n̄kpọntịbe emi. Enye ọdọhọ mmọ ete: “O mbon unana ibuot oro mîsọpke ndinịm kpukpru n̄kpọ emi mme prọfet ẹketịn̄de! Nte ikanaha Christ osobo mme n̄kpọ emi onyụn̄ ebe odụk ke ubọn̄ esie?” (Luke 24:25, 26) Enye aka iso ndinam ediwak itie N̄wed Abasi emi aban̄ade Christ an̄wan̄a mmọ.

Ekem mmọ mbita ẹkpere ndisịm Emmaus. Mbet iba oro ẹyom ndikop mme n̄kpọ efen mban̄a Christ, ntem mmọ ẹyịre enye ẹte: “Dan̄ ye nnyịn, koro ekpere mbubreyo ndien eyo ọmọn̄ okụt.” Enye enyịme ndidu ye mmọ nnyụn̄ ndia udia ye mmọ. Ke esenowo oro ama ọkọbọn̄ akam, obụn̄ uyo ayak ọnọ mmọ, mmọ ẹdiọn̄ọ enye, ndien enye osop mmọ ke enyịn. (Luke 24:29-31) Idahaemi ndien ke mmọ ẹnịm ke Jesus eset ke akpanikọ!

Esịt enem mbet iba emi etieti ndien mmọ ẹtọn̄ọ ndineme mban̄a se isụk itịbede oro ẹte: “Nte esịt ikofiopke nnyịn ke ini enye ekenemede nneme ye nnyịn ke usụn̄, nte enye akatatde N̄wed Abasi ọnọ nnyịn ọyọhọ ọyọhọ?” (Luke 24:32) Mmọ ẹsọsọp ẹtọn̄ọ isan̄ ẹfiak ẹnyọn̄ Jerusalem ẹkesobo mme apostle ye mbon eken emi ẹdude ye mmọ. Mbemiso Cleopas ye owo oro akasan̄ade ye enye ẹsioro uyo, mmọ ẹkop mbon en̄wen ẹdọhọde ẹte: “Ke akpanikọ, Ọbọn̄ ama eset, ama onyụn̄ owụt Simon idem!” (Luke 24:34) Ekem owo iba emi ẹtịn̄ nte Jesus okowụtde mmọ idem. Mmọ n̄ko ẹtiene ẹdi ntiense ke Jesus eset.

Jesus owụt mmọ idem ke ubet oro idahaemi ndien emi anam idem akpa kpukpru mmọ! Se inamde n̄kpọ emi etetịm akpa mmọ idem edi nte ke mmọ ẹkekọkọbi usụn̄ ẹsịne sia ndịk mme Jew akanamde mmọ. Edi Jesus edida ke ufọt mmọ onyụn̄ etịn̄ sụn̄sụn̄ ete: “Emem akpakam odu ye mbufo.” Edi ndịk anam mmọ. Mmọ ‘ẹkere ẹte mmimọ ikụt spirit.’ Idịghe akpa ini emi mmọ ẹkerede ke ikụt spirit edi oro.—Luke 24:36, 37; Matthew 14:25-27.

Jesus anam n̄kpọ ndiwụt mmọ nte ke imọ idịghe spirit m̀mê n̄kpọ emi mmọ ẹkerede-kere. Enye owụt mmọ ubọk ye ukot esie onyụn̄ ọdọhọ mmọ ete: “Ntak emi esịt etịmerede mbufo, ntak emi ẹnyụn̄ ẹyịkde ke esịt mbufo? Ẹse ubọk mi ye ukot mi, ẹfiọk ẹte ke ami ke edi; ẹfiọn̄ọ mi ẹse, koro spirit inyeneke obụk ye ọkpọ nte mbufo ẹkụtde mi nnyenede.” (Luke 24:36-39) Esịt enen̄ede enem mmọ, idem onyụn̄ akpa mmọ, edi mmọ isọpke inịm kpukpru emi.

Enye anam ndien n̄kpọ en̄wen man mmọ ẹnịm ke enye edi oro. Enye obụp mmọ ete: “Nte mbufo ẹmenyene se owo adiade mi?” Enye ọbọ mmọ ibio ọfọp iyak ata ke iso mmọ. Ndien enye ọdọhọ mmọ ete: “Emi edi ikọ mi eke n̄ketịn̄de nnọ mbufo ke adan̄aemi n̄kosụk ndude ye mbufo [mbemiso n̄kpa], nte ke ana kpukpru se ẹkewetde ẹban̄a mi ke ibet Moses ye ke uwetn̄kpọ mme Prọfet ye mme Psalm ẹsu.”—Luke 24:41-44.

Jesus ama anam se N̄wed Abasi etịn̄de an̄wan̄a Cleopas ye owo emi akasan̄ade ye enye, se enye onyụn̄ anamde ọnọ kpukpru mbet oro ẹdude mi edi oro. Enye ọdọhọ mmọ ete: “Ntem ke ẹwet ẹte Christ enyene ndikụt ukụt nnyụn̄ nset ke n̄kpa ke ọyọhọ usen ita, ẹnyụn̄ ẹnyene ndikwọrọ edikabade esịt ye edifen mme idiọkn̄kpọ ke enyịn̄ esie ke kpukpru mme idụt—ọtọn̄ọde ke Jerusalem, mbufo ẹnyene ndidi mme ntiense n̄kpọ emi.”—Luke 24:46-48.

Apostle Thomas idụhe mi idahaemi n̄kpọ emi etịbede. Ke mme usen oro ẹtienede, mbet eken ẹdọhọ enye ẹte: “Nnyịn imokụt Ọbọn̄!” Edi Thomas ọdọhọ mmọ ete: “Ibọhọke ami n̄kụt mme nde okpukwak ke ubọk esie nnyụn̄ nsịn nnuenubọk mi ke nde okpukwak oro nnyụn̄ nsịn ubọk mi ke n̄kan̄ esie, ndinịmke ke akpanikọ.”—John 20:25.

Usen itiaita ke ukperedem, mme mbet ẹnyụn̄ ẹkọbi usụn̄ ẹsịne ke esịt ubet kiet, enye Thomas do ye mmọ. Jesus ada ke ufọt mmọ onyụn̄ ọkọm mmọ ete: “Emem akpakam odu ye mbufo.” Ekem enye ọdọhọ Thomas ete: “Sịn nnuenubọk fo mi, nyụn̄ se ubọk mi, ndien sịn ubọk fo ke n̄kan̄ mi, nyụn̄ tre ndiyịk edi nịm ke akpanikọ.” Thomas ofiori ete: “Ọbọn̄ mi ye Abasi mi!” (John 20:26-28) Idahaemi ke Thomas enịm ke Jesus eset edidu uwem, ke enye okop odudu etieti ye nte ke enye ada ke ibuot Jehovah Abasi.

Jesus ọdọhọ enye ete: “Sia ama okokụt mi nte afo emenịm ke akpanikọ? Mmọ emi mîkwe edi ẹnịm ke akpanikọ ẹkop inemesịt.”—John 20:29.