Ẹka Iso ‘Ẹsan̄a ke Akpanikọ’

1. Nso ufọn ke isibọ ke ini itịn̄de iban̄a nte ikasan̄ade ididụk esop?

“AKASAN̄A didie edidụk esop?” Anaedi ẹbụp fi mbụme oro ediwak ini. Se nditọete ẹsiwakde ndibem iso mbụp edi oro ini mmọ ẹyomde ndinen̄ede ndiọn̄ọ eyenete emi mmọ ẹsobode. Esinem nnyịn ndikop nte nditọete nnyịn ẹkesan̄ade ẹdidiọn̄ọ Jehovah ẹnyụn̄ ẹmade enye, esinyụn̄ enem nnyịn ndinam mmọ ẹdiọn̄ọ ntak emi enemde nnyịn ndidi Ntiense Jehovah. (Rome 1:11) Utọ nneme oro isiyakke ifre ntak emi enemde-nem nnyịn ndidi Ntiense Jehovah, esinyụn̄ an̄wam nnyịn ibiere ndika iso ‘nsan̄a ke akpanikọ’ oro edi, ibiere ndidu uwem ke usụn̄ emi edinamde Jehovah ọdiọn̄ nnyịn onyụn̄ ama nnyịn.​—3 John 4.

2. Nso ke idineme ke ibuotikọ emi?

² Ke ibuotikọ emi, imọn̄ ineme ndusụk n̄kpọ emi ẹnamde enenem nnyịn ndidi Ntiense Jehovah. Ekem iyeneme nte ikpakade iso iwụt ke imama nte Jehovah ayakde idi Mme Ntiense esie. Imenịm ke se idinemede emi ayanam inen̄ede ikọm Jehovah nte enye akanamde nnyịn ididụk esop esie. (John 6:44) Se idinemede oyonyụn̄ anam enen̄ede ọdọn̄ nnyịn ndin̄wam mbon en̄wen ẹdiọn̄ọ akpanikọ emi Bible ekpepde.

SE INAMDE IMA “AKPANIKỌ”

3. Nso idi ata akpan ntak emi imade akpanikọ?

³ Ntak emi imade akpanikọ awak etieti. Edi ata akpan ntak edi ke imama Jehovah Abasi emi ekpepde nnyịn kpukpru akpanikọ emi idiọn̄ọde. Bible emi edide Ikọ esie anam ikụt ke enye edi okopodudu Abasi emi okobotde enyọn̄ ye isọn̄, afiak anam idiọn̄ọ ke enye edi edima Ete nnyịn emi odude ke heaven, ke enye onyụn̄ ekere aban̄a nnyịn. (1 Pet. 5:7) Imọdiọn̄ọ ke Abasi nnyịn edi “Abasi mbọm ye mfọn, isọpke iyatesịt edi awak ima-mfọnido ye akpanikọ.” (Ex. 34:6) Jehovah imaha ẹtụk, ẹfịk, m̀mê ẹfiomo owo. (Isa. 61:8) Esibiak enye ndikụt nte ibọde ufen onyụn̄ ọdọn̄ enye ndinam ufen nnyịn etre, enye oyonyụn̄ anam ntre ke nnennen ini. (Jer. 29:11) Ọdọn̄ nnyịn n̄ko ndikụt utọ ini oro. Ntak kiet emi imade Jehovah etieti edi oro.

4-5. Nso ikanam apostle Paul emen idotenyịn odomo ye ukwak ubom?

⁴ Ntak efen emi imade akpanikọ edi ke ufọn emi akpanikọ anamde ọnọ nnyịn idịghe ekpri. Se uwụtn̄kpọ kiet mi. Nti n̄kpọ emi idoride enyịn ndinyene ke ini iso ẹsịne ke otu mme akpanikọ emi Bible ekpepde. Enyene se apostle Paul eketịn̄de ndiwụt ufọn emi idotenyịn oro anamde ọnọ nnyịn. Enye ọkọdọhọ ete: “Idotenyịn emi ke nnyịn inyene nte ukwak ubom ukpọn̄ nnyịn, emi mîdikpụhu, emi onyụn̄ ọsọn̄ọde ada.” (Heb. 6:19) Kpa nte ukwak ubom mîsiyakke ubom edi ọfiọrọ aka mi, ọfiọrọ aka ko, idotenyịn emi Bible anamde inyene ekeme ndinam esịt ana nnyịn sụn̄ ini inyenede ikpọ mfịna.

⁵ Ke itie Bible oro, Paul eketịn̄ aban̄a idotenyịn emi mme Christian oro ẹyetde aran ẹnyenede ndika n̄kodu ke heaven. Edi ikọ esie ebehe mme Christian emi ẹdoride enyịn ndidu uwem ke nsinsi ke Paradise ke isọn̄ emi. (John 3:16) Nnyịn ndidiọn̄ọ ke Abasi ọn̄wọn̄ọ ndinọ nnyịn nsinsi uwem anam uwem nnyịn enyene ibuot.

6-7. Didie ke Sista Yvonne ndidiọn̄ọ se Abasi aduakde ndinam nnọ nnyịn ke ini iso an̄wam enye?

⁶ Yak itịn̄ iban̄a Sista Yvonne. Ete ye eka esie ikedịghe Mme Ntiense Jehovah, ndien ini enye edide ekpri enye ekesifefehe n̄kpa. Enye eti n̄kpọ kiet emi enye okokotde emi mîkekemeke ndiwọrọ enye ke esịt. Se enye okokotde oro ekedi: “Usen kiet usen kiet, owo ayana edi idemekede.” Yvonne ọdọhọ ete: “Ikọ emi ama enyek mi idem tutu n̄kemeke ndide idap. Mma nna do n̄kere nte n̄kpọ editiede ye ami ke ini iso. Mma n̄kere ke anaedi enyene ntak emi Abasi okobotde owo, ke enyene ntak emi enye okobotde mi. N̄koyomke ndikpa!”

⁷ Aka ko, ini Yvonne edide n̄kaiferi, Mme Ntiense Jehovah ẹma ẹkwọrọ ikọ ẹnọ enye. Enye ọdọhọ ete: “Mma ntọn̄ọ ndikere ke mmekeme nditiene ndu uwem ke nsinsi ke Paradise ke isọn̄.” Didie ke Yvonne ndidiọn̄ọ akpanikọ an̄wam enye? Enye ọdọhọ ete: “Nnaha aba okoneyo ntịmede esịt mban̄a ini iso m̀mê n̄kpa.” Idịghe se ẹbobụp m̀mê Yvonne ada didie akpanikọ, enye enen̄ede ama akpanikọ onyụn̄ enem enye ndin̄wam mbon en̄wen ẹdiọn̄ọ se Abasi aduakde ndinam nnọ nnyịn ke ini iso.​—1 Tim. 4:16.

8-9. (a) Ke uwụtn̄kpọ Jesus kiet, didie ke ete kiet akada n̄kpọuto emi enye okokụtde? (b) Afo ada didie akpanikọ emi ekpepde ke Bible?

⁸ Eti mbụk emi aban̄ade Obio Ubọn̄ Abasi esịne ke otu akpanikọ emi Bible ekpepde. Jesus ekemen akpanikọ emi aban̄ade Obio Ubọn̄ Abasi odomo ye n̄kpọuto emi edịbede. Ke Matthew 13:44 enye ọkọdọhọ ete: “Obio ubọn̄ heaven ebiet n̄kpọuto eke edịbede ke in̄wan̄, emi owo kiet okokụtde ndien emen edịp; ndien ke ntak idatesịt emi enye enyenede enye aka akanyam se ededi eke enye enyenede onyụn̄ aka ekedep in̄wan̄ oro.” Omokụt ke ete oro ikasan̄ake-san̄a iyom n̄kpọuto. Edi ke ini enye okụtde n̄kpọuto oro, enye ama ayak ata ediwak n̄kpọ ẹtak enye man enyene n̄kpọuto oro. Bible ọdọhọ ke enye ama anyam kpukpru se enye ekenyenede edep n̄kpọuto oro. Se ikanamde ete oro anam ntre edi ke enye ama ọdiọn̄ọ ke n̄kpọuto oro ọsọn̄ urua akan se ededi emi imọ ikpayakde atak imọ.

⁹ Imenịm ke afo n̄ko ada akpanikọ nte ete oro akadade n̄kpọuto oro. Imọdiọn̄ọ ke idụhe n̄kpọ ndomokiet ke ererimbot emi ẹkemede ndimen ndomo ye idatesịt oro inyenede ndinam n̄kpọ Jehovah idahaemi, ye idotenyịn emi inyenede ndidu uwem ke nsinsi ini Abasi edikarade. Nnyịn ndinen̄ede n̄kpere Jehovah edi ata akamba n̄kpọ emi nnyịn iben̄ede idem ndiyak n̄kpọ ekededi atak man ika iso ikpere enye. Se inen̄erede inọ nnyịn idatesịt edi ndinam se inemde enye esịt.​—Col. 1:10.

10-11. Nso ikanam Michael okpụhọde?

¹⁰ Ediwak nnyịn imayak ikpọ n̄kpọ ẹtak nnyịn man inam se inemde Jehovah esịt. Ndusụk nnyịn ima ikpọn̄ utom emi ekesinamde iwọrọ etop ke ererimbot. Mbon en̄wen emi ẹkesisịnde ibuot ẹsịn itọn̄ ẹyom ndiforo ẹma ẹsion̄o idem ẹkpọn̄ utọ n̄kpọ oro. Enyene mbon en̄wen emi ẹkekpụhọrede ata etieti ini mmọ ẹdidiọn̄ọde Jehovah. Se Michael akanamde edi oro. Enye ikedịghe Ntiense Jehovah toto ke ekpri. Enye ekesin̄wana karet ini enye edide akparawa. Enye ọdọhọ ete: “Mma mma ndisịn̄ede idem man n̄kop idem. Ndusụk ini, eketie nte owo ikemeke ndikan mi.” Edi ke Michael ama ọkọtọn̄ọ ndikpep Bible, enye ama edikụt ke Jehovah imaha afai. (Ps. 11:5) Kop se enye eketịn̄de aban̄a ebe ye n̄wan emi ẹkekpepde enye Bible: “Mmọ ikọdọhọke mi ntre en̄wan karet; edi ẹma ẹka iso ndikpep mi akpanikọ Bible.”

¹¹ Nte Michael ekenen̄erede ọdiọn̄ọ Jehovah, ntre ke enye ekenen̄ede ama enye. Se ikenemde enye ikan edi nte mbọm mme asan̄autom Jehovah esinamde Jehovah. Nte ini akakade, Michael ama edikụt ke edi se imọ inen̄erede ikpụhọde nte imọ idude uwem. Enye ọdọhọ ete: “Mma mfiọk ke idụhe se idisọn̄de mi ndinam nte nditre en̄wan karet. Mma nnyụn̄ ndiọn̄ọ ke emi eyenem Jehovah esịt, ndien ke se ededi emi ntrede ndinam ke ntak esie idiọkke.” Michael ama enen̄ede ama akpanikọ emi enye okokụtde ndien oro akanam enye enen̄ede okpụhọde.​—Jas. 1:25.

12-13. Didie ke Bible akan̄wam Mayli?

¹² Man inen̄ede ikụt nte akpanikọ enyenede ufọn, Bible emen akpanikọ odomo ye utuenikan̄ emi ayamade ke ekịm. (Ps. 119:105; Eph. 5:8) Mayli emi otode Azerbaijan enen̄ede ama nte Ikọ Abasi akan̄wamde enye. Enye oto ufọk emi ẹkade nsio nsio ido ukpono. Ete esie ekedi owo Muslim, eka esie ekesika ufọkabasi mme Jew. Enye ọdọhọ ete: “Okposụkedi emi n̄kenịmde ke Abasi do, enyene mme n̄kpọ oro ẹkesifịnade mi. Mma nsikere ntak emi Abasi okobotde owo nnyụn̄ n̄kere m̀mê nso ikpedi ufọn uwem emi edieke owo ọkpọbọde ufen ofụri eyouwem esie ndien afiak ọkọbọ ke hell ke nsinsi. Sia ẹdọhọde ke kpukpru se itịbede ẹdi uduak Abasi, mma nsikere m̀mê esinenem Abasi nditie nse nte mme owo ẹbọde ufen.”

¹³ Mayli ama aka iso ndidụn̄ọde nyom akpanikọ emi aban̄ade mme n̄kpọ emi ẹkesifịnade enye do. Nte ini akakade, enye ama enyịme ekpep imọ Bible onyụn̄ akabade Ntiense Jehovah. Enye ọdọhọ ete: “Se n̄kekpepde ke Bible ama okpụhọde uwem mi. Nte Bible anamde ata ediwak n̄kpọ an̄wan̄a mi anam esịt ana mi sụn̄.” Kpukpru nnyịn imotoro Jehovah “emi okokotde [nnyịn] osio ke ekịm esịn ke utịbe un̄wana esie” ukem nte Mayli akanamde.​—1 Pet. 2:9.

14. Ikpanam nso man inen̄ede ima akpanikọ? (Se n̄ko ekebe emi “Mme Uwụtn̄kpọ En̄wen.”)

¹⁴ N̄kpọ ifan̄ emi ẹwụtde nte akpanikọ ọfọnde ke ineme oro. Imenịm ke ọmọdiọn̄ọ ediwak uwụtn̄kpọ en̄wen. Emekeme ndida ini emi esikpepde n̄kpọ ke idemfo nyom mme ntak en̄wen emi ẹnamde ima akpanikọ. Oro ayanam enen̄ede ama akpanikọ. Nte imade akpanikọ ika, ntre ke idiyom nsio nsio usụn̄ ndiwụt adan̄a nte imade akpanikọ.

NTE ISIWỤTDE KE IMAMA AKPANIKỌ

15. Nso idi usụn̄ kiet emi ikemede ndiwụt ke imama akpanikọ?

¹⁵ Nnyịn ndisikpep Bible ye mme n̄wed Ikọ Abasi kpukpru ini oyowụt ke imama akpanikọ. Inamke n̄kpọ m̀mê ibịghi didie ke esop, se idikpepde osụk awawak. Ata akpa nsiondi Enyọn̄-Ukpeme ọkọdọhọ ke nsu awak ke ererimbot emi tutu ekeme ndisọn̄ ndidiọn̄ọ se idide akpanikọ, ke edieke ọdọn̄de fi ndidiọn̄ọ akpanikọ ke ana oyoyom. Magazine oro ama ọdọhọ n̄ko ke ana esịn idem anam n̄kpọ man ekeme ndikụt akpanikọ, ndien ama ọtọn̄ọ ndikụt yak okûtre do, yak aka iso odomo ndiyom mme akpanikọ efen emi Bible ekpepde. Ndikpep n̄kpọ esịne utom edi esinyene ufọn etieti.

16. Esikpep didie n̄kpọ yak enen̄ede enyene ufọn ọnọ fi? (Mme N̄ke 2:​4-6)

¹⁶ Idịghe kpukpru nnyịn isima ndikot n̄wed nnyụn̄ n̄kpep n̄kpọ. Edi Jehovah ọdọhọ yak ‘ika iso iyom’ inyụn̄ ‘ika iso idụn̄ọde’ man akpanikọ enen̄ede an̄wan̄a nnyịn. (Kot Mme N̄ke 2:​4-6.) Idụhe nte idinamde oro yak ikûbọ ufọn. Brọda Corey ọdọhọ ke ini imọ ikotde Bible ke idem imọ ke imesitịm idụn̄ọde ufan̄ikọ kiet mbemiso ibede ika en̄wen. Enye ọdọhọ ete: “Mmesikot kpukpru ikọ idakisọn̄, n̄kot kpukpru mme itie Bible emi ẹtịn̄de ukem n̄kpọ emi ẹtịn̄de ke itie emi n̄kotde nnyụn̄ nnam ndụn̄ọde ke mme n̄wed efen. . . . Ndikot Bible ntem anam n̄kpep ediwak n̄kpọ!” Edide inam nte Brọda Corey anamde mîdịghe imenyene nte isinamde eke nnyịn, nnyịn ndinen̄ede nda ini nsịn idem n̄kpep Bible owụt ke imama akpanikọ.​—Ps. 1:​1-3.

17. Ndidu uwem ntiene akpanikọ emi ikpepde ọwọrọ nso? (James 1:25)

¹⁷ Imọdiọn̄ọ ke ima ikpep akpanikọ idiọn̄ọ ke ikụreke ke oro. Edieke iyomde ndinen̄ede mbọ ufọn n̄kpọ oro ikpepde, ana idu uwem itiene akpanikọ emi ikpepde, oro ọwọrọ ke ana inanam se nnyịn ikpepde. N̄kukụre ini emi idikopde ata inemesịt edi oro. (Kot James 1:25.) Ikpanam nso man iwụt ke imanam se ikpepde? Brọda kiet ọdọhọ ke ọkpọfọn isidụn̄ọde idem nnyịn ise m̀mê m̀mọ̀n̄ ke inam ọfọn, m̀mê m̀mọ̀n̄ ke ikpokpụhọde. Apostle Paul ọkọdọhọ ete: “Ke udomo oro nnyịn ima ikanam n̄kọri, ẹyak nnyịn ika iso itịm isan̄a kpa ke ido emi.”​—Phil. 3:16.

18. Ntak emi isinamde ofụri se ikemede man ika iso ‘isan̄a ke akpanikọ’?

¹⁸ Kere adan̄a ediwak ufọn emi isibọde ke ini inamde ofụri se ikemede man ika iso ‘isan̄a ke akpanikọ’! Uwem nnyịn esinyene ibuot, imesinyụn̄ inam esịt adat Jehovah ye nditọete nnyịn. (N̄ke 27:11; 3 John 4) Mme n̄kpọ oro ẹnen̄ede ẹnam ima akpanikọ inyụn̄ idu uwem itiene akpanikọ emi ikpepde.