Adam ye Eve Ẹsọn̄ Ibuot ye Abasi

Usen kiet ke ini Eve okodude ikpọn̄, urụkikọt ama edibụp enye ete: ‘Ndi edi akpanikọ ke Abasi iyakke mbufo ẹdia mfri eto ndomokiet?’ Eve ọbọrọ ete: ‘Ihih, sụk kiet kpọt ke nnyịn mîsidiaha. Edieke idiade enye oro, iyakpa.’ Urụkikọt oro ama ọdọhọ enye ete: ‘Mbufo idikpaha. Edieke ẹdiade mfri eto oro, mbufo ẹditie nte Abasi.’ Ndi urụkikọt oro eketịn̄ akpanikọ? Ihih, okososu. Edi Eve ama enịm ikọ esie. Eve ama ese mfri eto oro tutu ọdọn̄ enye ndidia. Enye ama ekịbi mfri oro adia, ekem ọnọ Adam etiene adia. Adam ama ọdiọn̄ọ ke mmimọ iyakpa edieke isọn̄de ibuot ye Abasi. Edi enye ama osụk ọsọn̄ esịt ọbọ adia.

Jehovah ama editịn̄ ikọ ye Adam ye Eve kpa usen oro onyụn̄ obụp mmọ ntak emi mmọ ẹkesọn̄de ibuot ye imọ. Eve ama ọdọhọ ke urụkikọt akanam, Adam ete ke Eve akanam. Jehovah ama ebịn mmọ ke In̄wan̄ Eden sia mmọ ẹma ẹsọn̄ ibuot ye enye. Enye ama enịm mme angel ye akan̄kan̄ emi asakde ikan̄ ke usụn̄ emi ẹsisan̄ade ẹdụk in̄wan̄ oro mbak mmọ idifiak idụk in̄wan̄ oro.

Jehovah ama ebiere ndinọ owo emi akabian̄ade Eve ufen n̄ko. Idịghe urụkikọt oro ke idemesie eketịn̄ ikọ ye Eve. Jehovah ikobotke urụkikọt esitịn̄ ikọ. Idiọk angel kiet akanam urụkikọt oro etịn̄ ikọ man abian̄a Eve. Angel oro ekere Satan, afiak ekere Devil. Jehovah oyosobo enye mbak enye idika iso inam mme owo ẹnam idiọkn̄kpọ.