Adam ye Eve ẹma ẹnyene ediwak nditọ ke ẹma ẹkebịn mmọ ke In̄wan̄ Eden. Akpan mmọ ekekere Cain, udọ ekere Abel. Cain ekedi ọtọin̄wan̄, Abel edi ekpemerọn̄.

Usen kiet, Cain ye Abel ẹma ẹwa uwa ẹnọ Jehovah. Ndi ọmọdiọn̄ọ se ẹkotde uwa? Uwa edi ata san̄asan̄a enọ emi owo ọnọde Jehovah. Jehovah ama ama uwa Abel edi ikamaha eke Cain. Esịt ama ayat Cain tutu. Jehovah ama ọdọhọ Cain ke iyatesịt oro ekeme ndinam enye anam idiọkn̄kpọ. Edi Cain ikamaha ndikop se Jehovah eketịn̄de.

Utu ke oro, Cain ama ọdọhọ Abel ete: ‘Di yak ika in̄wan̄.’ Ke ini mmọ mbiba kpọt ẹkedude ke in̄wan̄, Cain ama amia Abel eyeneka esie owot. Nso ke Jehovah akanam enye? Jehovah ama ebịn enye aka okodụn̄ ke itie emi mîkpereke ubon mmọ. Jehovah ikayakke enye afiak ọnyọn̄ edi. Ufen esie ekedi oro.

Nso ke mbụk emi ekpep nnyịn? Esịt ekeme ndiyat nnyịn edieke n̄kpọ mîdịghe nte nnyịn ikekerede. Edieke ikụtde ke esịt ọtọn̄ọ ndiyat nnyịn—mîdịghe edieke owo ọnọde nnyịn item ke ini enye okụtde ke n̄kpọ ayat nnyịn—akpana isọsọp ikpụhọde inyụn̄ isụhọde esịt mbak nnyịn idinam idiọkn̄kpọ.

Jehovah idifreke Abel tutu amama, sia Abel ama ama Jehovah onyụn̄ anam se ifọnde. Abasi ayanam Abel eset ke ini Enye edinamde isọn̄ edi Paradise.

Mme owo ẹma ẹtọn̄ọ ndiwak ke isọn̄, edi ediwak mmọ ẹkedi ndiọi owo. Ndusụk angel ke heaven ẹma ẹtiene ẹdiọk ẹnyụn̄ ẹkpọn̄ heaven ẹdi isọn̄. Nso ke mmọ ẹkedi ẹdinam? Mmọ ẹma ẹdiforo owo ẹnyụn̄ ẹdọ iban.

Iban emi mmọ ẹkedọde ẹma ẹman nditọ ẹnọ mmọ. Nditọ mmọ ẹma ẹnyene odudu etieti, ẹfiomo mme owo, ẹnyụn̄ ẹbak ibak. Jehovah ikekemeke ndiyak utọ n̄kpọ oro aka iso. Ntre enye ama ebiere ndida mmọn̄ ukwọ nsobo ndiọi owo oro.

Edi enyene ete kiet emi akamade Jehovah etieti. Enye ekekere Noah. Enye ama ọdọ n̄wan onyụn̄ enyene nditọ ita, Shem, Ham, ye Japheth. Kpukpru mmọ ẹma ẹdọ iban. Jehovah ama ọdọhọ Noah ọkọn̄ ata akamba ubom mbak mmọn̄ ukwọ oro idiwot enye ye ubon esie. Ubom oro ekedi ata akamba ekebe emi ekemede ndifiọrọ ke enyọn̄ mmọn̄. Jehovah ama ọdọhọ Noah atan̄ ediwak unam ọdọn̄ ke ubom oro n̄ko mbak mmọ idikpan̄a.

Noah ama ọtọn̄ọ ndikọn̄ ubom oro inikiet inikiet. Akada Noah ye ubon esie n̄kpọ nte isua 50 ndikọn̄ ubom oro mma, mmọ ẹkenyụn̄ ẹkọn̄ enye nte Jehovah ọkọdọhọde. Ini oro n̄ko, Noah ama asan̄a ọkwọrọ ọnọ mme owo ete ke Ukwọ ke edi. Edi owo ndomokiet ikakpan̄ke utọn̄.

Ini ama edikem mmọ ndidụk ubom oro. Yak ise se iketịbede ke mmọ ẹma ẹkedụk ubom oro.