Joseph ye Mary ẹkedụn̄ ke Nazareth ye Jesus ye kpukpru nditọ mmọ irenowo ye iban. Utom kapenta ke Joseph ekesinam ada ese aban̄a ubon esie, enye ama esinyụn̄ ekpep mmọ n̄kpọ aban̄a Jehovah ye Ibet esie. Mmọ ẹma ẹsika synagogue kpukpru ini ẹkekpono Abasi, ẹnyụn̄ ẹsika usọrọ Passover ke Jerusalem kpukpru isua.

Ke ini Jesus ekedide isua 12, mmọ ẹma ẹka Jerusalem nte ẹsisụk ẹkade. Mme owo ẹma ẹdiyọhọ Jerusalem ke ntak usọrọ oro. Ke usọrọ ama okokụre, Joseph ye Mary ẹma ẹtọn̄ọ isan̄ unyọn̄. Mmọ ẹkekere ke Jesus etiene asan̄a ke udịm owo emi ẹnyọn̄de usọrọ oro. Edi ke ini mmọ ẹkeyomde enye ke otu mbon mmọ, mmọ ikekwe enye.

Mmọ ẹma ẹfiak ẹka Jerusalem ẹkesan̄a ẹyom Jesus ofụri usen ita. Ke akpatre, mmọ ẹma ẹkekụt enye ke temple. Enye eketie ke ufọt mme andikpep akpan̄ utọn̄ okop se mmọ etịn̄de, onyụn̄ obụp mmọ ata nti mbụme. Idem ama akpa mme andikpep oro tutu, mmọ ẹma ẹnyụn̄ ẹbụp enye nsio nsio mbụme. Ibọrọ esie ama akpa mmọ idem. Mmọ ẹma ẹkụt ke enye enen̄ede ọdiọn̄ọ Ibet Jehovah.

Esịt ama ọduọ Joseph ye Mary etieti ke ntak Jesus. Ntre Mary ama ọdọhọ enye ete: ‘Eyen, imasan̄a iyom fi ke kpukpru ebiet! Okodu ke m̀mọ̀n̄?’ Jesus ama ọdọhọ ete: ‘Ndi mbufo ikọfiọkke ite ke ndidu ke ufọk Ete mi?’

Jesus ama etiene mmọ ọnyọn̄ Nazareth. Joseph ama ekpep Jesus utom kapenta. Ekere ke nso utọ eyen ke Jesus ekedi? Nte Jesus okosụk okponde, enye ama etetịm ọdiọn̄ọ n̄kpọ. Abasi ama enen̄ede ama enye, mme owo n̄ko ẹma ẹma enye.

John eyen Zechariah ye Elizabeth ama okpon akabade prọfet. Jehovah ama ọdọn̄ enye ọdọhọ mme owo ke Messiah ke edi. John ikakaha synagogue m̀mê ikpọ obio ikekpep mme owo n̄kpọ, edi ọkọkwọrọ ikọ ke wilderness. Mme owo ẹma ẹto Jerusalem ye ofụri Judea ẹdikop ukwọrọikọ esie. Enye ama ekpep mmọ ke ana mmọ ẹtre ndiọi n̄kpọ man Abasi ama mmọ. Ediwak mmọ ẹma ẹkabade esịt, enye onyụn̄ enịm mmọ baptism ke Akpa Jordan.

John ikoyomke ikpọ n̄kpọ. Enye ekesisịne ọfọn̄ emi ẹdade idet camel ẹnam, esita n̄kukun̄kpọyọriyọ, esinyụn̄ adia aranọkwọk ikọt. Mme owo ẹma ẹnen̄ede ẹyom ndidiọn̄ọ owo emi John edide. Idem mme Pharisee ye mme Sadducee emi ẹkesitan̄de idem ẹma ẹdi ndikụt enye. John ama ọdọhọ mmọ ete: ‘Ana mbufo ẹkabade esịt ẹnyụn̄ ẹtre ndiọi n̄kpọ. Ẹkûkere ke mbufo ndidọhọ ke idi nditọ Abraham anam mbufo ẹfọn ẹkan mbon en̄wen onyụn̄ anam mbufo ẹdi nditọ Abasi.’

Ediwak owo ẹma ẹdibụp John ẹte: ‘Nso ke ikpanam man Abasi enem esịt ye nnyịn?’ Enye ama ọdọhọ mmọ ete: ‘Edieke mbufo ẹnyenede ọfọn̄idem iba, ẹkpọn̄ kiet ẹnọ owo emi mînyeneke.’ Nso ikanam enye etịn̄ ntre? Enye okoyom mmọ ẹdiọn̄ọ ke mmọ ndima mbon en̄wen edinam Abasi enem esịt ye mmọ.

John ama ọdọhọ mme ọbọ a-tax ete: ‘Ẹsitịn̄ akpanikọ, ẹkûnyụn̄ udia inọ.’ Enye ama ọdọhọ mbonekọn̄ ete: ‘Ẹkûbọ owo ubọkedem, ẹkûnyụn̄ ẹsu nsu.’

Mme oku ye nditọ Levi ẹma ẹdi ẹdibụp John ẹte: ‘Afo edi anie? Kpukpru owo ẹyom ndidiọn̄ọ m̀mê afo edi anie.’ John ama ọdọhọ mmọ ẹte: ‘Ami ndi uyo emi ofioride ke wilderness, emi anamde mme owo ẹfiak ẹtiene Jehovah kpa nte Isaiah ọkọdọhọde.’

Mme owo ẹma ẹma ukpepn̄kpọ John. Ediwak mmọ ẹkekere ke ekeme ndidi enye edi Messiah. Edi enye ama ọdọhọ mmọ ete: ‘Owo emi akande mi ke edi. Ami ke idemmi ndotke nditat urụk ikpaukot esie. Ami nnịm mme owo baptism ke mmọn̄, edi enye edida edisana spirit inịm mme owo baptism.’