Nso ke Bible Etịn̄ Aban̄a Ifụre Oro Owo Enyenede Ndimek Se Enye Amade? Ndi Abasi Ama Ebebiere Kpukpru Se Iditịbede Inọ Fi?
Se Bible ọdọhọde
Idịghe nte ke ẹma ẹbebiere se idinamde. Abasi ọnọ nnyịn ifụre ndimek se iyomde ndinam. Kere se Bible etịn̄de aban̄a emi.
Abasi okobot owo ke mbiet esiemmọ. (Genesis 1:26) Nnyịn itiehe nte unam, emi mîsibatke ibuot mbemiso ẹnamde n̄kpọ, edi ibiet Andibot nnyịn emi edide Abasi ima ye Abasi unenikpe. Nnyịn n̄ko imenyene ifụre ndimek se iyomde ndinam ukem nte Andibot nnyịn.
Se inamde idahaemi ekeme ndibiere se iditịbede inọ nnyịn ke ini iso. Bible esịn udọn̄ ọnọ nnyịn ete “[imek] uwem . . . ke ndikop uyo [Abasi],” oro edi, imek ndinam ewụhọ esie. (Deuteronomy 30:19, 20) Itien̄wed emi ikpenyeneke ufọn, akpakam edi ndinam nnyịn ibak, edieke nnyịn mîkpenyeneke ifụre ndimek se imade. Abasi isinyịkke-nyịk nnyịn inam se enye ọdọhọde, edi esikam ekpekpek nnyịn ete: “Afo akpakam akpan̄ utọn̄ ke mme ewụhọ mi! Do emem fo ekpetie nte akpa mmọn̄.”—Isaiah 48:18.
Idịghe nte ke ẹma ẹbebiere mbon oro ẹdikụtde unen ye mbon oro mîdikwe. Edieke iyomde ndikụt unen ke se ededi oro inamde, oyom isịn idem inam utom. Bible ọdọhọ ete: “Nam kpukpru se ubọk fo okụtde ndinam ke ofụri odudu fo.” (Ecclesiastes 9:10) Enye ọdọhọ n̄ko ete: “N̄kọkibuot owo nsịnifịk itreke ndinyene ufọn.”—Mme N̄ke 21:5.
Abasi ọnọ nnyịn ata eti enọ, oro edi, ifụre edimek se imade, oro anam nnyịn ima Abasi ke “ofụri esịt” nnyịn sia se imekde ndinam edi oro.—Matthew 22:37.
Ndi idịghe Abasi akara kpukpru n̄kpọ?
Bible ọdọhọ ke Abasi edi Ata Ọkpọsọn̄ Abasi, ke idụhe owo ndomokiet emi enyenede odudu akan enye. (Job 37:23; Isaiah 40:26) Edi, enye isidaha odudu esie ibiere kpukpru se iditịbede. Ke uwụtn̄kpọ, Bible ọdọhọ ke odu ini emi Abasi ‘okomụmde idem akama,’ oro edi, inamke mbon Babylon eset emi ẹkedide mme asua ikọt esie n̄kpọ. (Isaiah 42:14) Kpasụk ntre, kan̄a ke emi, enye ebiere ndiyọ mbon oro ẹmekde ndida ifụre emi enye ọnọde mmọ nnam mbon en̄wen ibak. Edi Abasi idikaha iso iyọ mmọ ke nsinsi.—Psalm 37:10, 11.