“Ẹkpep Mmọ Ẹnam Kpukpru N̄kpọ Eke N̄ketemede Mbufo”
‘Ẹka ẹkenam mme mbet: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.’—MATTHEW 28:19, 20.
1. Nso ke Philip ye eren Ethiopia kiet ẹkeneme?
OWO Ethiopia okoto ko ke edem mmọ aka Jerusalem. Do ke Jerusalem enye ama atuak ibuot ọnọ Abasi emi enye akamade, kpa Jehovah. Nte an̄wan̄ade, enye ama ama Ikọ Abasi eke odudu spirit n̄ko. Ke adan̄aemi enye akawatde ke chariot esie ọnyọn̄ ufọk, enye okokot ikpan̄wed prọfet Isaiah ke ini Philip, mbet Christ, okosobode ye enye. Philip ama obụp owo Ethiopia oro ete: “Nte ọmọfiọk se ikọ oro okotde ọwọrọde?” Enye ama ọbọrọ ete: “N̄keme didie ke owo mîtemeke mi?” Philip ama an̄wam eren emi ekenyenede esịt akpanikọ mi, emi akamade ndikpep N̄wed Abasi, akabade edi mbet Christ.—Utom 8:26-39.
2. (a) Ke nso usụn̄ ke ibọrọ oro owo Ethiopia ọkọnọde enyene se ọwọrọde? (b) Mme mbụme ewe oro ẹban̄ade utom oro Christ ọkọnọde nnyịn ete inam mme mbet ke nnyịn idineme?
2 Ibọrọ owo Ethiopia oro enen̄ede enyene se ọwọrọde. Enye ọkọdọhọ ete: ‘N̄kpasan̄a didie mfiọk ke owo mîtemeke mi?’ Ih, enye ama oyom anditeme, owo emi ekemede ndida imọ usụn̄. Ibọrọ emi ke idemesie owụt ufọn akpan item oro Jesus ekesịnde ke utom oro enye ọkọnọde ete ẹnam mme mbet. Nso ikedi item oro? Man ifiọk ibọrọ, ẹyak nnyịn ika iso ineme ikọ Jesus oro ikụtde ke Matthew ibuot 28. Akpa ibuotikọ ekeneme mbụme iba emi, ntak-a? ye ke m̀mọ̀n̄? Ke emi, nnyịn imọn̄ ineme mbụme iba en̄wen emi ẹnyenede ebuana ye ewụhọ oro Christ okowụkde nnyịn ete inam mme mbet—oro edi, nso? ye ini ewe?
“Ẹkpep Mmọ Ẹnam Kpukpru N̄kpọ”
3. (a) Owo esisan̄a didie akabade edi mbet Jesus Christ? (b) Ndinam mme mbet abuana edikpep mmọ nso?
3 Nso ke nnyịn inyene ndikpep mbon en̄wen man mmọ ẹkabade ẹdi mme mbet Christ? Jesus okowụk mme anditiene enye ete: “[“Mmọdo,” NW] mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Ntem, nnyịn inyene ndikpep mme n̄kpọ eke Christ eketemede.a Nte ededi, nso idin̄wam man ikụt ite ke owo oro ẹkpepde se Jesus eketemede iditreke ke ndikabade ndi mbet kpọt, edi ayaka iso ndidi mbet? Ẹkụt akpan n̄kpọ kiet ke nte Jesus eketịn̄de enyịn emek mme ikọ esie. Tịm fiọk ete ke enye ikakam idọhọke ite: ‘Ẹkpep mmọ kpukpru n̄kpọ eke n̄ketemede mbufo.’ Utu ke oro, enye ọkọdọhọ ete: ‘Ẹkpep mmọ ẹnam kpukpru n̄kpọ eke n̄ketemede mbufo.’ (Matthew 19:17) Nso ke oro ọwọrọ?
4. (a) Nso ke ndinam ewụhọ ọwọrọ? (b) Nọ uwụtn̄kpọ nte nnyịn ikemede ndikpep owo anam se Christ eketemede.
4 Ndinam ewụhọ ọwọrọ “ndidu uwem” ekekem ye ewụhọ—oro edi ndinịm enye. Didie, ndien, ke nnyịn ikpep owo anam, m̀mê enịm, mme n̄kpọ oro Christ eketemede? Ọfọn, kere ban̄a nte andikpep owo uwat esikpepde nditọ ukpepn̄kpọ esie ndinịm mbet uwat. Andikpep ekeme ndikpep nditọ ukpepn̄kpọ esie mbet uwat ke adan̄aemi mmọ ẹdude ke ubet ukpepn̄kpọ. Nte ededi, man ekpep nditọ ukpepn̄kpọ esie nte ẹkpenịmde mbet oro, enye enyene ndida mmọ usụn̄ ke ini mmọ ẹwatde ubomisọn̄ ke ọkpọusụn̄ oro ubomisọn̄ ẹwakde ẹnyụn̄ ẹdomode ndida se mmọ ẹkekpepde nsịn ke edinam. Kpasụk ntre, ke ini nnyịn ikpepde mme owo Bible, nnyịn ikpep mmọ se Christ eketemede. Edi, oyom nnyịn n̄ko ida nditọ ukpepn̄kpọ nnyịn usụn̄ nte mmọ ẹdomode ndida ukpepn̄kpọ Christ nsịn ke edinam ke uwem mmọ eke usen ke usen ye ke utom ukwọrọikọ. (John 14:15; 1 John 2:3) Ke ntem, oyom nnyịn idi mme andikpep ye mme adausụn̄ man inam mme mbet ọyọhọ ọyọhọ nte Christ eketemede. Ke ndinam ntre, nnyịn ikpebe uwụtn̄kpọ oro Jesus ekenịmde ye eke Jehovah.—Psalm 48:14; Ediyarade 7:17.
5. Ntak emi owo oro nnyịn ikpepde Bible ekemede ndimen̄e ndinam ewụhọ Christ oro ọdọhọde inam mme mbet?
5 Ndikpep mbon en̄wen ẹnam se Jesus eketemede esịne ndin̄wam mmọ ẹnam ewụhọ oro ẹkenọde ẹte ẹnam mme mbet. Oro ekeme nditie ndusụk owo oro nnyịn ikpepde Bible nte ata ọkpọsọn̄ utom. Idem edieke mmọ ẹkedide ifịk ifịk mme aka ufọkabasi Christendom, itiehe nte ke n̄kani mme andikpep ido ukpono mmọ ẹma ẹkpep mmọ ndiwọrọ n̄kanam mme mbet. Ndusụk mme adaiso ufọkabasi ẹnyịme in̄wan̄-in̄wan̄ ẹte ke ama edi ndikpep ikọt mmimọ ndinam mme mbet, ke mme ufọkabasi Christendom ẹkpu idiọk idiọk. Ke etịn̄de n̄kpọ aban̄a ewụhọ oro Jesus ọkọnọde ete ẹwọrọ ẹka ererimbot ẹken̄wam kpukpru orụk owo ẹkabade ẹdi mme mbet, eyen ukpepn̄kpọ Bible oro John R. W. Stott ọkọdọhọ ete: “Nnyịn ndikpu ndinam se ewụhọ emi ọwọrọde edi akakan ndudue oro mme Christian ẹnamde ke utom edikwọrọ eti mbụk mfịn.” Enye ama adian do ete: “Nnyịn ima ndida nsannsan n̄kwọrọ etop nnyịn. Ndusụk ini, nnyịn isibiet mme owo emi ẹdade ke obot ẹnọ mbon oro mmọn̄ adade item. Nnyịn isinịmke idụk mmọn̄ man ikanyan̄a mmọ. Nnyịn isiyomke mmọn̄ otụk nnyịn.”
6. (a) Ke ini in̄wamde eyen ukpepn̄kpọ Bible, didie ke nnyịn ikeme ndikpebe uwụtn̄kpọ Philip? (b) Didie ke nnyịn ikeme ndiwụt ke imekere iban̄a ke ini eyen ukpepn̄kpọ Bible ọtọn̄ọde ndibuana ke utom ukwọrọikọ?
6 Edieke owo emi nnyịn ikpepde Bible ekesibuanade ye ido ukpono emi mme andibuana ‘mîsiyomke mmọn̄ otụk mmimọ,’ m̀mê ẹsikopde ndịk ndikwọrọ ikọ, ekeme ndisọn̄ enye ndikan ndịk oro enye enyenede aban̄a ukwọrọikọ nnyụn̄ nnam ewụhọ Christ oro ọdọhọde inam mme mbet. Enye oyoyom un̄wam. Ke ntem, oyom nnyịn inyene ime ke adan̄aemi inọde enye orụk ukpep ye ndausụn̄ oro edinamde ifiọk esie okpon onyụn̄ esịn udọn̄ ọnọ enye anam n̄kpọ, kpa nte ukpep oro Philip ọkọnọde akanamde enyịn an̄wan̄a owo Ethiopia onyụn̄ esịnde udọn̄ ọnọ enye ndina baptism. (John 16:13; Utom 8:35-38) Ke adianade do, udọn̄ oro nnyịn inyenede ndikpep nditọ ukpepn̄kpọ Bible ẹnam ewụhọ oro ọdọhọde ẹnam mme mbet anam nnyịn isan̄a ye mmọ man inọ mmọ ndausụn̄ ke ini mmọ ẹyomde ndikwọrọ Obio Ubọn̄ ke akpa ini.—Ecclesiastes 4:9, 10; Luke 6:40.
“Kpukpru N̄kpọ”
7. Ndikpep mbon en̄wen “ẹnam kpukpru n̄kpọ” esịne ndikpep mmọ mme ewụhọ ewe?
7 Utom nnyịn ikụreke ke ndikpep mbufa mbet ite mmọ ẹnam mme mbet. Jesus eketeme nnyịn ete ikpep mbon en̄wen ‘ẹnam kpukpru n̄kpọ’ eke imọ iketemede. Ke akpanikọ, oro abuana n̄kponn̄kan item iba—ndima Abasi nnyụn̄ mma mbọhọidụn̄. (Matthew 22:37-39) Didie ke ẹkpekpep obufa mbet ndinam mme ewụhọ oro?
8. Nọ uwụtn̄kpọ ban̄a nte ẹkemede ndikpep obufa mbet ewụhọ oro ọdọhọde ẹwụt ima.
8 Fiak kere ban̄a uwụtn̄kpọ owo oro ekpepde ndiwat uwat. Nte eyen ukpepn̄kpọ oro awatde ubomisọn̄ ke usụn̄ oro ubomisọn̄ awakde ke adan̄aemi andikpep etiede ye enye, eyen ukpepn̄kpọ emi ikpepke n̄kpọ ke ndikpakpan̄ utọn̄ kpọt nnọ andikpep esie edi esese n̄ko nte mbon en̄wen ẹwatde. Ke uwụtn̄kpọ, andikpep ekeme ndidụri ntịn̄enyịn esie n̄wụt awat-ubomisọn̄ oro enyịmede owo en̄wen awat odụk iso esie ada; m̀mê awat-ubomisọn̄ en̄wen emi osụhọrede ikan̄ iso esie mbak edidụk owo en̄wen enyịn; m̀mê awat-ubomisọn̄ emi an̄wamde ọdiọn̄ọ emi ubomisọn̄ esie abiarade. Mme utọ uwụtn̄kpọ oro ẹkpep eyen ukpepn̄kpọ oro nti n̄kpọ emi enye ekemede ndida nsịn ke edinam ke ini enye awatde uwat. Kpasụk ntre, obufa mbet emi asan̄ade ke usụn̄ emi adade esịm uwem ikpepke n̄kpọ ito ada ukpepn̄kpọ esie kpọt edi ekpep n̄ko oto eti uwụtn̄kpọ oro enye okụtde ke esop.—Matthew 7:13, 14.
9. Obufa mbet asan̄a didie ekpep se ọwọrọde ndinam ewụhọ oro ọdọhọde iwụt ima?
9 Ke uwụtn̄kpọ, eyen ukpepn̄kpọ Bible ekeme ndikụt nte eka emi ọbọkde nditọ ikpọn̄ esịnde ọkpọsọn̄ ukeme man esisan̄a ye n̄kpri nditọ esie edi Ufọkmbono Obio Ubọn̄. Enye ekeme ndikụt owo emi okopde iduọesịt, emi esidụkde mme mbono esop kpukpru ini kpa ye oro enye ofụhọde, akanian̄wan ebeakpa emi esiwatde n̄kani owo en̄wen edi mbono esop, m̀mê uyen emi esitienede anam Ufọkmbono Obio Ubọn̄ asana. Eyen ukpepn̄kpọ Bible oro ekeme ndikụt ebiowo emi esidade usụn̄ ke an̄wautom kpa ye ekese mbiomo esop oro enye enyenede. Enye ekeme ndisobo ye Ntiense emi obiomode ndo emi mîsiwọrọke ikpọn̄ ufọk, edi esinọde kpukpru owo oro ẹkade ẹkese enye nsịnudọn̄. Eyen ukpepn̄kpọ oro ekeme ndikụt ebe ye n̄wan oro ẹnamde ikpọ ukpụhọde ke uwem mmọ man ẹse ẹban̄a ete ye eka mmọ oro ẹsọn̄de. Ke ndikụt mme Christian oro ẹfọnde ido ntem, ẹnọde un̄wam, ẹnyụn̄ ẹdide se ẹberide edem, obufa mbet emi ekpep n̄kpọ oto uwụtn̄kpọ mmọ se ndinam ewụhọ Christ oro ọdọhọde ima Abasi ye mbọhọidụn̄ ọwọrọde, akpan akpan ekemmọ mme andinịm ke akpanikọ. (Mme N̄ke 24:32; John 13:35; Galatia 6:10; 1 Timothy 5:4, 8; 1 Peter 5:2, 3) Ke usụn̄ emi, owo kiet kiet ke esop Christian ekeme—ndien okponyụn̄ enyene—ndidi andikpep ye adausụn̄.—Matthew 5:16.
“Tutu Esịm Utịt Ererimbot”
10. (a) Nnyịn idinam mme mbet ibịghi adan̄a didie? (b) Nso uwụtn̄kpọ ke Jesus ekenịm kaban̄a edinam utom?
10 Nnyịn idika iso ndinam mme mbet tutu esịm ini ewe? Tutu esịm utịt ererimbot. (Matthew 28:20) Ndi nnyịn iyekeme ndinam ikpehe enye emi ke utom oro Jesus ọkọnọde? Nte esop ofụri ererimbot, nnyịn imebiere ndinam ntre. Ke ini edem, nnyịn ima idat esịt ndinọ ini, odudu, ye inyene nnyịn man iyom mmọ emi “ẹkenịmde ẹnọ nsinsi uwem.” (Utom 13:48) Idahaemi, ke ẹbaharede ukem ukem, Mme Ntiense Jehovah ẹsisịn se ibede hour miliọn ita ke usen kiet kiet ke utom edikwọrọ Obio Ubọn̄ ye edinam mme mbet ke ofụri ererimbot. Nnyịn isinam ntre koro ikpebede uwụtn̄kpọ Jesus. Enye ọkọdọhọ ete: ‘Udia Mi edi ndinam uduak Andidọn̄ Mi, nnyụn̄ mma utom Esie.’ (John 4:34) Udọn̄ ofụri esịt nnyịn edi oro n̄ko. (John 20:21) Nnyịn iyom ndinam se ikande nditọn̄ọ utom oro ẹkeyakde ẹsịn nnyịn ke ubọk; nnyịn iyom ndinam enye mma.—Matthew 24:13; John 17:4.
11. Nso itịbe inọ ndusụk nditọete Christian nnyịn, ndien nso ke nnyịn ikpobụp idem nnyịn?
11 Nte ededi, edi n̄kpọ mfụhọ ndifiọk nte ke ndusụk ekemmọ mme andinịm ke akpanikọ ẹmem ke n̄kan̄ eke spirit, ndien nte utịp, ẹmekpọt mîdịghe ẹtre ndinam ewụhọ Christ oro ọdọhọde ẹnam mme mbet. Ndi odu usụn̄ ekededi oro ikemede ndin̄wam mmọ ẹfiak ẹdibuana ye esop ẹnyụn̄ ẹfiak ẹtọn̄ọ ndibuana ke utom edinam mme mbet? (Rome 15:1; Mme Hebrew 12:12) Usụn̄ oro Jesus akan̄wamde mme apostle esie ke ini mmọ ẹkekopde mmemidem ke esisịt ini owụt se nnyịn ikemede ndinam mfịn.
Wụt ke Imekere Iban̄a
12. (a) Esisịt ini mbemiso Jesus akakpade, nso ke mme apostle esie ẹkenam? (b) Didie ke Jesus akanam n̄kpọ ye mme apostle esie kpa ye oro idem ekenen̄erede emem mmọ?
12 Ke utịt ukwọrọikọ Jesus ke isọn̄, ke ini n̄kpa esie akasan̄ade ekpere, mme apostle ẹma “ẹkpọn̄ Enye ẹfen̄e.” Nte Jesus ekebemde iso etịn̄, ‘mmọ ẹma ẹsuana, kpukpru mmọ ẹnyụn̄ ẹnyọn̄ọ ke ebiet mmọ.’ (Mark 14:50; John 16:32) Jesus akanam n̄kpọ didie ye mme nsan̄a esie emi ẹkememde ke n̄kan̄ eke spirit mi? Esisịt ini ke enye ama ekeset, Jesus ama ọdọhọ ndusụk mme anditiene enye ete: “Ẹkûfehe ndịk: ẹka ẹkedọhọ nditọ-ete Mi, ẹte, mmọ ẹnyọn̄ọ ẹka ke Galilee; mmọ ẹdinyụn̄ ẹkụt Mi do.” (Matthew 28:10) Okposụkedi idem ekenen̄erede emem mme apostle, Jesus okosụk okot mmọ “nditọ-eka Mi.” (Matthew 12:49) Enye ikọduọkke idotenyịn ke idem mmọ. Ke ntem, Jesus ama owụt edu mbọm ye edifen nnọ kpa nte Jehovah esiwụtde. (2 Ndidem 13:23) Didie ke nnyịn ikeme ndikpebe Jesus?
13. Didie ke nnyịn ikpese mbon oro ẹmemde ke n̄kan̄ eke spirit?
13 Akpana nnyịn inen̄ede ikere iban̄a mbon oro ẹkpọtde m̀mê oro ẹtrede ndibuana ke an̄wautom. Nnyịn isụk iteti mme utom ima oro ekemmọ mme andinịm ke akpanikọ oro ẹkenamde ke ini edem—emi ndusụk mmọ ẹkenamde ke ediwak isua. (Mme Hebrew 6:10) Enen̄ede ọdọn̄ nnyịn nte mmọ ẹkpedude ye nnyịn. (Luke 15:4-7; 1 Thessalonica 2:17) Didie, ndien, ke nnyịn ikeme ndiwụt ke imekere iban̄a mmọ?
14. Ke ndikpebe Jesus, didie ke nnyịn ikeme ndin̄wam owo mmemidem?
14 Jesus ọkọdọhọ mme apostle oro esịt ọkọduọde ete ẹka Galilee ke mmọ ẹyekụt imọ do. Ke nditịm ntịn̄, Jesus ọkọnọ mmọ ikot ẹdi ẹdidụk akpan mbono. (Matthew 28:10) Kpasụk ntre mfịn, nnyịn isịn udọn̄ inọ mbon oro ẹmemde ke n̄kan̄ eke spirit ite ẹdụk mme mbono esop Christian, ndien ekeme ndiyom nnyịn isịn udọn̄ inọ mmọ ediwak ini man mmọ ẹnam ntre. Ikot oro ama enyene ufọn ọnọ mme apostle, koro “mbet duopekiet [oro ẹma ] ẹka ke Galilee ke obot oro Jesus ekenịmde ọnọ mmọ.” (Matthew 28:16) Nnyịn isidat esịt didie ntem ke ini mbon mmemidem ẹyerede ufiop ufiop ikot oro inọde mmọ ẹnyụn̄ ẹfiakde ẹtọn̄ọ ndidụk mme mbono esop Christian!—Luke 15:16.
15. Didie ke nnyịn ikeme ndikpebe uwụtn̄kpọ Jesus ke ndidara mbon mmemidem oro ẹdide itie usopidem nnyịn?
15 Nnyịn ikpanam n̄kpọ didie ke ini Christian oro idem ememde edide Ufọkmbono Obio Ubọn̄? Ọfọn, Jesus akanam n̄kpọ didie ke ini enye okokụtde mme apostle esie, oro mbuọtidem ekememde ke esisịt ini, ke ebiet oro enye ọkọdọhọde mmọ ẹsop idem? ‘Jesus ama asan̄a ekpere mmọ, onyụn̄ etịn̄ ikọ ọnọ mmọ.’ (Matthew 28:18) Enye ikadaha nsannsan imọnọde enyịn ise mmọ edi ama asan̄a ekpere mmọ. Kere nte ekenemde mme apostle ke idem ke ini Jesus akasan̄ade ebịne mmọ! Ẹyak nnyịn n̄ko isan̄a ibịne mbon oro ẹmemde ke n̄kan̄ eke spirit emi ẹsịnde ukeme ndifiak nnyọn̄ ndi esop Christian inyụn̄ ikọm mmọ ufiop ufiop.
16. (a) Nso ke nnyịn ikeme ndikpep nto usụn̄ oro Jesus akanamde n̄kpọ ye mme anditiene enye? (b) Didie ke nnyịn ikeme ndiwụt ke ise mbon mmemidem nte Jesus ekesede? (Se ikọ idakisọn̄.)
16 Nso en̄wen ke Jesus akanam? Akpa, enye ama ọtọt ete: “Ẹnọ Mi ofụri odudu.” Udiana, enye ama ọnọ mmọ utom emi: ‘Ẹka ẹkenam mme mbet.’ Ọyọhọ ita, enye ama ọn̄wọn̄ọ ete: “Ami ndodu ye mbufo kpukpru ini.” Edi, ndi afo omokụt se Jesus mîkanamke? Enye ikasuaha inọ mme mbet ke ntak oro mmọ ẹkekpude ndinam utom oro enye ọkọnọde mmọ ẹnyụn̄ ẹnyenede eyịghe. (Matthew 28:17) Ndi nte enye akanamde n̄kpọ ama enyene uforo? Ih. Ikebịghike mme apostle ẹma ẹfiak ẹtọn̄ọ “ndikpep nnyụn̄ n̄kwọrọ” eti mbụk. (Utom 5:42) Ke nditiene uwụtn̄kpọ Jesus ke nte ẹkpesede ye nte ẹkpenamde n̄kpọ ye mbon mmemidem, nnyịn imekeme ndinyene orụk nti utịp oro ke esop nnyịn.b—Utom 20:35.
“Ami Ndodu ye Mbufo Kpukpru Ini”
17, 18. Nso ikọ nsịnudọn̄ idu ke ikọ Jesus oro, “Ami ndodu ye mbufo kpukpru ini”?
17 Akpatre ikọ ewụhọ Jesus, ‘Ami ndodu ye mbufo kpukpru ini,’ esịne ikọ nsịnudọn̄ ọnọ kpukpru mbon oro ẹsịnde ifịk ẹnam ewụhọ oro Christ ọkọnọde ete ẹnam mme mbet. Se ededi ubiọn̄ọ oro mme asua ẹdidade ndibiọn̄ọ utom edikwọrọ Obio Ubọn̄ ye se ededi orụk edidọk oro mmọ ẹkemede ndidọk nnyịn, ufọn idụhe nnyịn ndikop ndịk. Ntak-a? Koro Jesus, Adausụn̄ nnyịn, emi enyenede “ofụri odudu ke heaven ye ke isọn̄,” odu ye nnyịn ndinọ nnyịn ibetedem!
18 Un̄wọn̄ọ Jesus oro, ‘Ami ndodu ye mbufo kpukpru ini,’ ọnọ akwa ndọn̄esịt n̄ko. Nte nnyịn isịnde ifịk ndinam ewụhọ oro Christ okowụkde nnyịn ete inam mme mbet, ndusụk usen nnyịn iyokop idatesịt ndien ndusụk usen iyokop mfụhọ. (2 Chronicles 6:29) Ndusụk nnyịn imesifụhọ ke ini owo ima nnyịn akpade. (Genesis 23:2; John 11:33-36) Mbon en̄wen ke ẹyọ usọn̄, emi odudu ye nsọn̄idem mîdụhe aba. (Ecclesiastes 12:1-6) Mbon en̄wen n̄ko ẹsisobo ọkpọsọn̄ mfịghe. (1 Thessalonica 5:14) Ndien ediwak nnyịn ke in̄wana ye nsọn̄ọn̄kpọ. Nte ededi, kpa ye mme utọ n̄kpọ-ata oro, nnyịn imokụt unen ke utom ukwọrọikọ nnyịn koro Jesus odude ye nnyịn ‘kpukpru ini,’ esịnede ndiọkn̄kan ini ke uwem nnyịn.—Matthew 11:28-30.
19. (a) Utom oro Jesus ọkọnọde ete inam mme mbet esịne mme item ewe? (b) Nso in̄wam nnyịn ndinam utom emi?
19 Nte nnyịn ima ikokụt ke ibuotikọ emi ye enye oro ekebemde iso, ewụhọ oro Jesus ọkọnọde ete inam mme mbet abuana ediwak n̄kpọ. Jesus ama asian nnyịn ntak ye ebiet emi ikpanamde ewụhọ oro. Enye ama asian nnyịn n̄ko se ikpekpepde mme owo ye ini emi ikpetrede utom oro. Edi akpanikọ, ndinam akwa utom emi edi n̄kpọ-ata. Edi sia odudu Christ ọnọde nnyịn ibetedem, enye ke idemesie onyụn̄ odude ye nnyịn, nnyịn imekeme ndinam utom emi! Nte afo unyịmeke ntre?
[Mme Ikọ idakisọn̄]
a N̄wed ndụn̄ọde kiet ọdọhọ ke Jesus ọkọdọhọ ete, “ẹnịm mmọ baptism . . . ẹkpep mmọ,” edi ke ikọdọhọke ‘ẹnịm mmọ baptism ẹnyụn̄ ẹkpep mmọ.’ Ntem, ewụhọ oro ọdọhọde ẹnịm baptism ẹnyụn̄ ẹkpep idịghe “ata ata . . . edinam iba emi kiet etienede eken.” Utu ke oro, “ẹkpep edi edinam oro akade-ka iso, emi akpa ikpehe ebemde baptism iso . . . ikpehe eken onyụn̄ etienede baptism.”
b Ẹkụt ntọt efen efen ke nte ẹkpesede ẹnyụn̄ ẹn̄wamde mbon mmemidem ke Enyọn̄-Ukpeme eke February 1, 2003, page 15-18.
Didie ke Afo Ọkpọbọrọ?
• Didie ke nnyịn ikpep mbon en̄wen ndinam se Jesus eketemede?
• Mme n̄kpọ ewe ke obufa mbet ekeme ndikpep nto mbon en̄wen ke esop?
• Nso ke nnyịn ikeme ndinam man in̄wam mbon oro ẹmemde ke n̄kan̄ eke spirit?
• Nso odudu ye ndọn̄esịt ke nnyịn ibọ ito un̄wọn̄ọ Jesus oro, “Ami ndodu ye mbufo kpukpru ini”?
[Mme ndise ke page 15]
Oyom nnyịn idi mme andikpep ye mme adausụn̄
[Mme ndise ke page 17]
Obufa mbet esikpep nti n̄kpọ oto uwụtn̄kpọ mbon en̄wen