Ẹda Zoom Ẹnịm Mbono Esop

Ke ediwak itie, ukara iyakke mme owo ẹsop idem ọtọkiet m̀mê ẹda ẹkpere kiet eken. Mme Ntiense Jehovah ẹsụk ibuot ẹnọ ukara, edi ẹka iso ẹda usụn̄ en̄wen emi mîdiyakke n̄kpọ anam owo ẹnịm mbono esop mmọ. Mmọ ẹsida Zoom m̀mê n̄kpọ ntre ẹnam emi.

Otu Emi Ẹsede Ẹban̄a Utom Mme Ntiense Jehovah ẹnyịme yak ẹsio okụk emi mme owo ẹsinọde ẹte ẹda ẹnam utom Abasi ẹdep Zoom ẹnọ mme esop man ẹsikeme ndinịm mbono esop kpukpru ini. Emi enen̄ede an̄wam mme esop emi mînyeneke okụk idep Zoom emi edide n̄kpọ nte ₦7,000 m̀mê akande oro. Mme esop emi ẹkesida Zoom mfọn ẹnịm mbono esop, edi enye oro ikesimenke ediwak owo ikonyụn̄ inen̄ekede ifọn. Idahaemi kpukpru esop emi ẹdade Zoom emi esop Abasi ẹdepde ẹnịm mbono esop ẹnen̄ede ẹdia ufọn Zoom emi sia enye ọdọn̄ọ n̄kpọ emi eke mfọn mîdọn̄ọke, onyụn̄ ekeme ndimen ediwak owo. Kan̄a ke emi, mme esop emi ẹdade Zoom emi esop Abasi ẹdepde ẹnịm mbono esop ebe 65,000. Mme esop emi ẹdu ke se ibede idụt 170.

Esop Kairagi ke Manado emi odude ke North Sulawesi ke Indonesia ẹma ẹtre ndida Zoom mfọn nnịm mbono esop, ẹkabade ẹda enye emi esop Abasi ẹdepde ẹnịm mbono esop. Brọda Hadi Santoso etịn̄ nte Zoom enye emi enemde ete: “Mbono esop enem kpukpru owo idahaemi idem ye mbon oro mîtịmke idiọn̄ọ n̄kpọ iban̄a fon ye kọmputa sia Zoom idịghe aba anam anam enye enịme tutu edidi se ẹfiakde ẹfịk emi ye oko mbemiso owo ekeme ndifiak ndụk nte ekesidide akpa.”

Lester Jijón, Jr. emi edide ebiowo ke esop Guayacanes Oeste ke Guayaquil ke Ecuador ọdọhọ ete: “Ọkpọsọn̄ ndusụk esop ndidep Zoom emi edimende kpukpru owo ke esop sia nditọete ke n̄kan̄ emi mînen̄ekede inyene okụk. Edi imọkọm esop Abasi nte mmọ ẹdepde Zoom ẹnọ nnyịn. Idahaemi imekeme ndikot ediwak owo ẹtiene nnyịn ẹdụk mbono esop.”

Johnson Mwanza emi edide ebiowo ke esop Ngwerere North ke Lusaka ke Zambia ewet ete: “Ediwak nditọete ẹtịn̄ ẹfiak ẹtịn̄ ẹte, ‘Zoom emi esop Abasi ẹdepde mi anam inen̄ede ikpere nditọete ikan akpa onyụn̄ anam inen̄ede ikụt ke Jehovah ama nnyịn ata ima.’ ”

Okụk emi mme owo ẹsitịpde ẹte ẹda ẹnam utom Abasi ke ofụri ererimbot, ke ẹsisio ẹn̄wam mme owo ke ini afanikọn̄; kpa enye ke ẹsio ẹdep Zoom emi. Ẹsisio okụk emi ke otu okụk emi mme owo ẹnọde. Ndusụk owo ẹsinọ eke mmọ ke donate.jw.org. Ẹsọsọn̄ọ etieti ke okụk oro mbufo ẹsitịpde sia enye esin̄wam ke ini n̄kpọ etịbede ke ebiet ekededi ke ofụri ererimbot.—2 Corinth 8:14.