IBUOTIKỌ MAGAZINE EMI | NDI MME AKPAN̄KPA ẸKEME NDIFIAK NDU UWEM?
Nso Isitịbe Inọ Mbon Emi Ẹkpade?
“N̄kesikere ke itie ita ke mme akpan̄kpa ẹsika: heaven, hell, m̀mê purgatory. Mma ndiọn̄ọ ke ndotke ndika heaven nnyụn̄ ndiọkke nsịm ndika hell. Edi n̄kọdiọn̄ọke se isitịbede ke purgatory. Akanam n̄kwe utọ ikọ emi ke Bible. N̄kesinyụn̄ n̄kop mme owo ẹtịn̄de.”—Lionel.
“Ẹkekpep mi ke kpukpru owo ẹsika heaven ke mmọ ẹma ẹkpa, edi n̄kenịmke. N̄kekere ke owo ama akpa, esie okụre.”—Fernando.
Ndi emesikere m̀mê nso isitịbe inọ mbon emi ẹkpade? Ndi enyene ebiet emi mbon nnyịn emi ẹkpade ẹkade ẹkebọ ufen? Ndi nnyịn iyafiak ikụt mmọ? Nso inam inịm ke imekeme ndifiak n̄kụt mmọ? Bible ọbọrọ mme mbụme emi. Edi mbemiso inemede ibọrọ emi, yak ineme se Bible emende n̄kpa odomo. Ekem iyeneme idotenyịn emi Bible ọnọde nnyịn.
Nso isitịbe inọ mme akpan̄kpa?
SE BIBLE ỌDỌHỌDE: “Mme odu-uwem [ẹfiọk] ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet, mmọ inyụn̄ inyeneke aba utịp, koro ẹfrede se ẹkpedade ẹti mmọ. Nam kpukpru se ubọk fo okụtde ndinam ke ofụri odudu fo, koro baba utom, baba uduak, baba ifiọk, baba ọniọn̄ mîdụhe ke Udi, kpa ebiet emi afo akade.”a—Ecclesiastes 9:5, 10.
Ke nditịn̄ ibio ibio, owo ama akpa isikaha ebiet ndomokiet ikan Udi. Udi oro ẹtịn̄de ẹban̄a mi edi ndamban̄a itie emi owo mîfiọkke mînyụn̄ inamke n̄kpọ ndomokiet. Didie ke edinen owo oro Job ekese Udi? N̄kọ emeti ke kpukpru inyene esie ẹketak usen kiet, kpukpru nditọ esie ẹnyụn̄ ẹkpan̄a kpa usen oro. Idiọk mbufụt ama onyụn̄ ọyọhọ enye idem, ọtọn̄ọde ke ekaikpat esịm etịn̄ibuot. Ndien, enye ama ọbọn̄ akam ọnọ Abasi ete: “Afo akpakam edịp mi ke Udi, [“ke hell,” Douay Version mbon Catholic] onyụn̄ enịm mi ke ndịbe ebiet.” (Job 1:13-19; 2:7; 14:13) Emi owụt ke Job ikadaha Udi nte ikan̄ hell, sia edieke hell ekpedide itie ndutụhọ, enye ikpọkọbọn̄ke akam iyom ndika do. Enye akakam ada Udi nte ebiet nduọkodudu.
Usụn̄ en̄wen emi ikemede ndifiọk se isitịbede inọ mme akpan̄kpa edi ndikot se Bible etịn̄de aban̄a owo itiaita oro ẹkenamde ẹset.—Se ekebe emi ““Owo Itiaita Emi Ẹkenamde Ẹset ke Bible.”
Ndomo owo kiet ke otu owo itiaita oro ikọdọhọke ke ima ika heaven m̀mê ikan̄ hell. Edieke mmọ ẹkpekekade utọ itie oro, mmọ ẹkpeketịn̄ ẹnọ mme owo ke ini mmọ ẹkesetde ẹdi. Owo ikponyụn̄ itreke ndiwet nsịn ke Bible man kpukpru owo ẹkụt. Edi nnyịn ikwe utọ n̄kpọ emi ke Bible. Ọwọrọ mmọ ndomokiet ikenyeneke se ẹtịn̄de. Ntak-a? Koro mmọ ikọfiọkke baba n̄kpọ kiet; eketie nte mmọ ẹde ọkpọsọn̄ idap. Ndusụk ini, Bible esimen n̄kpa odomo ye idap. Ke uwụtn̄kpọ, Bible ọdọhọ ke David ye Stephen ẹma “ede ke n̄kpa.”—Utom 7:60; 13:36.
Edi ndi owo ama akpa, esie okụre? Mîdịghe ndi mme akpan̄kpa ẹkeme ndiset?
a Ke Edisana N̄wed Abasi—Edikabade Eke Obufa Ererimbot, ikọ oro “Udi” ke ẹda ẹkabade ikọ Hebrew emi “Sheol” ye ikọ Greek emi “Hades.” Ndusụk Bible ẹkabade mme ikọ emi nte “hell,” edi N̄wed Abasi idọhọke ke ẹsitụhọde mme akpan̄kpa ke ikan̄.