Editọn̄ọ Ntak Mmana—Ndi Enye Edi Usụn̄ Edinyan̄a?

AFO ọkpọbọrọ mbụme emi didie, “Ndi ọmọtọn̄ọ ntak amana?” Ata ediwak mme aka ufọkabasi ke ofụri ererimbot ẹkpebọrọ ye nsọn̄uyo ẹte, “Ih!” Mmọ ẹnịm ke akpanikọ ke ẹda editọn̄ọ ntak mmana ẹdiọn̄ọ kpukpru ata mme Christian ye nte ke enye edi n̄kukụre usụn̄ edinyan̄a. Mmọ ẹnyene ukem ekikere utọ mme adaiso ido ukpono nte Robert C. Sproul, ekpep ukpepn̄kpọ ido ukpono, emi ekewetde ete: “Edieke owo mîtọn̄ọke ntak imana, . . . ọwọrọ ke enye idịghe Christian.”

Ndi afo edi kiet ke otu mbon oro ẹnịmde ke editọn̄ọ ntak mmana anam owo enyene idotenyịn edinyan̄a? Ke edide ntre, eyịghe idụhe ke afo oyom ndin̄wam iman ye mme ufan fo ẹtiene ẹkụt usụn̄ oro ẹnyụn̄ ẹdụk. Nte ededi, man mmọ ẹnam oro, oyom mmọ ẹfiọk ukpụhọde oro odude ke ufọt owo oro ọtọn̄ọde ntak amana ye owo emi mîtọn̄ọke ntak imana. Afo ọkpọdọhọ mmọ ke nso idi editọn̄ọ ntak mmana?

Ediwak owo ẹnịm ke ikọ oro “editọn̄ọ ntak mmana” aban̄a owo emi ọn̄wọn̄ọde ke ofụri esịt ndinam uduak Abasi ye eke Christ, ndien emi anam enye okpụhọde ọkpọn̄ idaha oro enye mîkenyeneke itie ebuana ye Abasi akabade enyene eti itie ebuana ye Enye.

Ndi idem akpakpa fi ndifiọk ke Bible inyịmeke ye ekikere oro? Ndi afo akpama ndifiọk se Ikọ Abasi enen̄erede ekpep aban̄a editọn̄ọ ntak mmana? Afo eyenen̄ede ọbọ ufọn edieke enen̄erede odụn̄ọde ibuotikọ emi. Ntak-a? Koro edieke afo enen̄erede ọfiọk se editọn̄ọ ntak mmana ọwọrọde, emi oyotụk uwem fo ye idotenyịn fo kaban̄a ini iso.

Nso ke Bible Ekpep?

N̄kukụre ebiet emi ikọ oro ‘editọn̄ọ ntak mmana’ odude ke ofụri Bible edi ke John 3:1-12, emi obụkde edinem nneme oro Jesus ekenyenede ye adaiso ido ukpono ke Jerusalem. Ẹkot ofụri itien̄wed oro ẹsịn ke ekebe oro asan̄ade ye ibuotikọ emi. Mbọk tịn̄ enyịn kot enye.

Jesus ama etịn̄ ediwak n̄kpọ aban̄a ‘edibon obufa,’ m̀mê edimana obufa, ke itien̄wed oro.a Ke nditịm ntịn̄, nneme Jesus an̄wam nnyịn ibọrọ mbụme mbition emi:

◼ Edimana obufa edi akpan n̄kpọ adan̄a didie?

◼ Ndi nnyịn ke idem nnyịn imekeme ndimek nditọn̄ọ ntak mmana?

◼ Nso idi uduak edimana obufa?

◼ Owo esisan̄a didie amana obufa?

◼ Didie ke emi okpụhọ itie ebuana owo?

Ẹyak ineme mbụme emi kiet kiet.

[Ikọ Idakisọn̄]

[Ekebe/Ndise ke page 4]

“Ana Mbufo Ẹtọn̄ọ Ntak Ẹmana”

“Owo Pharisee kiet okodu, emi ekerede Nicodemus, andikara mme Jew. Owo emi edi ebịne enye ke okoneyo onyụn̄ ọdọhọ enye ete: ‘Rabbi, nnyịn imọfiọk ite afo edi andikpep emi otode Abasi; koro baba owo kiet ikemeke ndinam mme idiọn̄ọ emi afo anamde ibọhọke Abasi odu ye enye.’ Jesus ọbọrọ enye ete: ‘Ke ata akpanikọ ke ndọhọ fi nte, Ibọhọke owo ekededi ọtọn̄ọ ntak amana, enye ikemeke ndikụt obio ubọn̄ Abasi.’ Nicodemus ọdọhọ enye ete: ‘Didie ke owo ekeme ndimana ke enye ama ọkọsọn̄? Ndi enye ekeme ndidụk ke idịbi eka esie ọyọhọ utịm ikaba nnyụn̄ mmana?’ Jesus ọbọrọ ete: ‘Ke ata akpanikọ ke ndọhọ fi nte, Ibọhọke owo ekededi amana oto ke mmọn̄ ye spirit, enye ikemeke ndidụk ke obio ubọn̄ Abasi. Se itode ke obụkidem imana edi obụkidem, se inyụn̄ itode ke spirit imana edi spirit. Kûyịk koro ndọhọde fi nte, Ana mbufo ẹtọn̄ọ ntak ẹmana. Ofụm efịme aka ebiet eke enye amama, afo onyụn̄ okop uyom esie, edi ufiọkke ebiet eke enye otode edi ye ebiet eke enye akade. Ntre ke edi ye kpukpru owo eke ẹtode ke spirit ẹmana.’ Nicodemus ọdọhọ enye ete: ‘Didie ke kpukpru n̄kpọ emi ẹkeme ndida itie?’ Jesus ọbọrọ enye ete: ‘Ndi afo edi andikpep ke Israel ndien afo ufiọkke mme n̄kpọ emi? Ke ata akpanikọ ke ndọhọ fi nte, Nnyịn itịn̄ se nnyịn ifiọkde inyụn̄ itie ntiense iban̄a se nnyịn ikụtde, edi mbufo ibọhọ ikọ ntiense oro nnyịn inọde. Edieke ntịn̄de mme n̄kpọ isọn̄ nnọ mbufo ndien mbufo inịmke ke akpanikọ, mbufo ẹdisan̄a didie ẹnịm ke akpanikọ edieke ntịn̄de mme n̄kpọ eke heaven nnọ mbufo?’”—John 3:1-12.

Edimana Obufa—Edi Akpan N̄kpọ Adan̄a Didie?

KE OFỤRI nneme esie ye Nicodemus, Jesus ama ọsọn̄ọ etịn̄ nte edimana obufa, m̀mê editọn̄ọ ntak mmana, enen̄erede edi akpan n̄kpọ. Didie ke enye akanam ẹfiọk emi?

Nen̄ede fiọk nte Jesus ọkọsọn̄ọde etịn̄ nte edimana obufa edide ata akpan n̄kpọ ke nneme esie ye Nicodemus. Enye ọkọdọhọ ete: “Ibọhọke owo ekededi ọtọn̄ọ ntak amana, enye ikemeke ndikụt obio ubọn̄ Abasi.” (John 3:3) Ikọ oro “ibọhọke” ye “ikemeke” ẹwụt nte edimana obufa edide akpan n̄kpọ. Yak inọ uwụtn̄kpọ: Edieke owo ọdọhọde ete, “Ibọhọke utịn asiaha, eyo ikemeke ndin̄wan̄a,” ikọ esie ọwọrọ ke ana utịn asiaha man eyo an̄wan̄a. Kpasụk ntre, Jesus ọkọdọhọ ke ana owo ọtọn̄ọ ntak amana man enye okụt Obio Ubọn̄ Abasi.

Ke akpatre, nte n̄kpọ eke ẹdọhọde ke Jesus oyom nditre eyịghe ekededi oro ẹnyenede ẹban̄a n̄kpọ emi, enye ama ọdọhọ ete: “Ana mbufo ẹtọn̄ọ ntak ẹmana.” (John 3:7) Ana in̄wan̄-in̄wan̄ ke Jesus ọdọhọ ke editọn̄ọ ntak mmana edi se ẹyomde—n̄kpọ oro anade owo anam—man enye ekeme “ndidụk obio ubọn̄ Abasi.”—John 3:5.

Sia Jesus akadade edimana obufa nte ata akpan n̄kpọ, mme Christian ẹkpenyene ndikụt ẹte ke n̄kpọ emi enen̄ede an̄wan̄a mmimọ. Ke uwụtn̄kpọ, ndi afo ekere ke Christian ekeme ndimek ke idemesie nditọn̄ọ ntak mmana?

[Se ẹwetde ke ikpọ abisi ke page 5]

“Ibọhọke utịn asiaha, eyo ikemeke ndin̄wan̄a”

Edimana Obufa—Ndi Enyene-Idem Emek?

ANIE esinam owo amana obufa? Ke ini ndusụk mme ọkwọrọikọ ẹkpakde mme andikpan̄ utọn̄ nnọ mmọ ẹte ẹtọn̄ọ ntak ẹmana, mmọ ẹsikot ikọ Jesus emi: “Ana mbufo ẹtọn̄ọ ntak ẹmana.” (John 3:7) Utọ mme ọkwọrọikọ oro ẹsida ikọ oro nte ewụhọ, ndien ke nditịm ntịn̄, mmọ ẹsidọhọ ẹte, “Ẹtọn̄ọ ntak ẹmana!” Mmọdo, mmọ ẹsikwọrọ ke kpukpru mme aka ufọkabasi ẹnyene ndikop uyo Jesus nnyụn̄ nnam n̄kpọ man ẹmana obufa. Ikọ mmọ ọwọrọ ke enyene-idem emek ndimana obufa. Edi ndi se Jesus akasiande Nicodemus edi oro?

Edieke itịn̄de enyịn ikot ikọ Jesus, nnyịn iyokụt ke enye ikekpepke ke enyene-idem emek ndimana obufa m̀mê nditre ndimana. Ntak emi idọhọde ntre? Ikọ Greek oro ẹkabarede “ọtọn̄ọ ntak amana,” ẹkeme n̄ko ndiwọrọ “ekpenyene ndimana nto enyọn̄.”a Ntem, nte udiana edikabade oro owụtde, edimana obufa ‘oto enyọn̄’—oro edi, ‘oto heaven,’ m̀mê ‘oto Ete.’ (John 19:11; James 1:17) Ih, Abasi anam.—1 John 3:9.

Edieke itide ikọ oro ‘oto enyọn̄,’ isọn̄ke ndifiọk ntak emi mîdịghe enyene-idem amana obufa ke idemesie. Kere ban̄a ata emana fo. Ndi afo ekemek ndidi ndimana? Baba! Afo akamana sia ete fo okobon fi. Kpasụk ntre, nnyịn ikeme ndimana obufa edieke Abasi, kpa Ete nnyịn eke heaven, obonde nnyịn obufa. (John 1:13) Mmọdo, apostle Peter ama etịn̄ nte enende ete: “Itoro enyene Abasi ye Ete Ọbọn̄ nnyịn Jesus Christ, koro nte asan̄ade ekekem ye akwa mbọm esie enye okobon nnyịn obufa.”—1 Peter 1:3.

Ndi Edi Ewụhọ?

Nte ededi, ndusụk owo ẹkeme ndikere ẹte, ‘Edieke edide akpanikọ ke idụhe owo oro ekemede ndimek ke idemesie ndimana obufa, ntak emi Jesus ọkọnọde ewụhọ emi: “Ana mbufo ẹtọn̄ọ ntak ẹmana”?’ Eti mbụme edi oro. Edieke ikọ Jesus ekpenen̄erede edi ewụhọ, ọkpọwọrọ ke enye owụk nnyịn inam n̄kpọ oro nnyịn mîkemeke ndinam. Oro isịneke ifiọk. Do, nso ke ikọ oro ana mbufo “ẹtọn̄ọ ntak ẹmana” ọwọrọ?

Edieke itịn̄de enyịn ise nte ẹkewetde ikọ oro ke usem Greek, iyokụt ke owo ikewetke enye nte ewụhọ. Edi ẹkewet enye nte owo onyụn̄ etịn̄ ikọ. Ke ikọ en̄wen, ke ini Jesus ọkọdọhọde ke ana mbufo “ẹtọn̄ọ ntak ẹmana,” enye eketịn̄ se idude, ikọnọhọ ewụhọ. Enye ọkọdọhọ ete: “Oyom mbufo ẹmana ẹto enyọn̄.”—John 3:7, Modern Young’s Literal Translation.

Yak ida n̄kpọ iba idomo kiet ye eken man inam n̄kpọ oro aban̄ade ewụhọ ye nditịn̄ se idude an̄wan̄a. Kere ban̄a obio emi enyenede ediwak ufọkn̄wed. Kiet ke otu ufọkn̄wed emi enyene nditọ ufọkn̄wed emi ẹdide mme amanaisọn̄ m̀mê nditọisọn̄ kpọt, emi ẹdụn̄de ẹyom usụn̄ ẹkpọn̄ obio oro. Usen kiet, akparawa emi mîdịghe amanaisọn̄ ọdọhọ etubom ufọkn̄wed oro ete, “Nyom ndika n̄wed ke ufọkn̄wed mbufo.” Etubom ọdọhọ enye ete, “Ana edi amanaisọn̄ mbemiso akade n̄wed mi.” Edi akpanikọ, ikọ etubom oro idịghe ewụhọ. Enye iwụkke eyen ufọkn̄wed oro ite, “Di amanaisọn̄!” Etubom oro etịn̄ se idude—oro edi, se ẹyomde man owo aka n̄wed ke ufọkn̄wed oro. Kpasụk ntre, ke ini Jesus ọkọdọhọde ete: “Ana mbufo ẹtọn̄ọ ntak ẹmana,” enye eketịn̄ se idude—oro edi, se ẹyomde man owo ‘odụk obio ubọn̄ Abasi.’

Akpatre ikọ oro—Obio Ubọn̄ Abasi—enyene ebuana ye ikpehe en̄wen ke edimana obufa. Enye enyene ebuana ye mbụme oro, Nso idi uduak edimana obufa? Ndifiọk ibọrọ mbụme oro ayanam inen̄ede ifiọk se editọn̄ọ ntak mmana ọwọrọde.

[Ikọ Idakisọn̄]

[Ndise ke page 6]

Didie ke edimana obufa ebiet ata emana?

Edimana Obufa—Nso Idi Uduak Esie?

EDIWAK owo ẹnịm ke oyom owo ọtọn̄ọ ntak amana mbemiso enyenede nsinsi edinyan̄a. Edi kop se Jesus ke idem esiemmọ eketịn̄de aban̄a uduak edifiak mmana. Enye ọkọdọhọ ete: “Ibọhọke owo ekededi ọtọn̄ọ ntak amana, enye ikemeke ndikụt obio ubọn̄ Abasi.” (John 3:3) Ntem, oyom owo ọtọn̄ọ ntak amana man odụk Obio Ubọn̄ Abasi, idịghe man enyene edinyan̄a. Ndusụk owo ẹkeme ndidọhọ ẹte, ‘Edi ndi n̄kpọ mbiba oro—edidụk Obio Ubọn̄ ye edinyene edinyan̄a—idịghe ukem n̄kpọ?’ Baba, idịghe. Man ifiọk ukpụhọde oro odude, ẹyak ibem iso ineme se ikọ oro “obio ubọn̄ Abasi” ọwọrọde.

Obio ubọn̄ edi ukara. Ke ntre, ikọ oro “obio ubọn̄ Abasi” ọwọrọ “ukara Abasi.” Bible ekpep ke Jesus Christ, kpa “eyen owo,” edi Edidem Obio Ubọn̄ Abasi ye nte ke Christ enyene mbon oro ẹditienede enye ikara. (Daniel 7:1, 13, 14; Matthew 26:63, 64) N̄ko-n̄ko, n̄kukụt oro apostle John okokụtde ama owụt ke ẹmek mbon oro ẹditienede Christ ikara ẹsio “ke kpukpru esien ye usem ye obio ye idụt” ndien ke mmọ “ẹyekara isọn̄ nte ndidem.” (Ediyarade 5:9, 10; 20:6) Ikọ Abasi aka iso anam ifiọk ke mbon oro ẹdikarade ẹnam “ekpri otuerọn̄” emi ẹdide 144,000, “emi ẹkedepde ẹsio ke isọn̄.”—Luke 12:32; Ediyarade 14:1, 3.

Obio Ubọn̄ Abasi odu m̀mọ̀n̄? Ẹkot “obio ubọn̄ Abasi” n̄ko “obio ubọn̄ heaven,” emi owụtde ke Jesus ye ndidem oro ẹditienede enye ikara ẹditie ke heaven ikara. (Luke 8:10; Matthew 13:11) Mmọdo, Obio Ubọn̄ Abasi edi ukara eke heaven emi Jesus Christ ye otu mme anditiene enye n̄kara emi ẹmekde ẹsio ke otu ubonowo ẹnamde.

Do, nso ke ikọ Jesus ọkọwọrọ ke ini enye ọkọdọhọde ke ana owo ọtọn̄ọ ntak amana man ‘odụk obio ubọn̄ Abasi’? Ikọ esie ọkọwọrọ ke owo enyene nditọn̄ọ ntak mmana man enye ekeme nditiene Christ n̄kara ke heaven. Ke nditịn̄ ibio ibio, uduak edimana obufa edi man ẹtịm esisịt ibat owo idem ẹnọ ukara eke heaven.

Se inemede owụt ke edimana obufa edi ata akpan n̄kpọ, ke Abasi anam owo amana obufa, ndien ke enye ke etịm ndusụk owo idem ọnọ ukara ke heaven. Edi didie ke owo esinen̄ede amana obufa?

[Se ẹwetde ke ikpọ abisi ke page 7]

Uduak edimana obufa edi man ẹtịm esisịt ibat owo idem ẹnọ ukara eke heaven

[Ndise ke page 7]

Jesus Christ ye otu mme anditiene enye n̄kara emi ẹmekde ẹsio ke otu ubonowo ẹnam Obio Ubọn̄ Abasi

Owo Esisan̄a Didie Amana Obufa?

JESUS ama asian Nicodemus nte edimana obufa edide akpan n̄kpọ, se isinamde owo amana obufa, uduak edimana obufa ye nte owo esisan̄ade amana obufa. Jesus ọkọdọhọ ete: “Ibọhọke owo ekededi amana oto ke mmọn̄ ye spirit, enye ikemeke ndidụk ke obio ubọn̄ Abasi.” (John 3:5) Ntem, owo esimana obufa ke mmọn̄ ye spirit. Edi nso ke ikọ oro “mmọn̄ ye spirit” ọwọrọ?

Nso ke “Mmọn̄ ye Spirit” Ẹdi?

Sia Nicodemus ekedide eyen ukpepn̄kpọ ido ukpono, enye ama ọfiọk nte N̄wed Abasi Usem Hebrew ekesidade ikọ oro “spirit Abasi”—kpa anamutom odudu Abasi emi ekemede ndinam mme owo ẹnam n̄wọrọnda utom. (Genesis 41:38; Exodus 31:3; 1 Samuel 10:6) Ntre, ke ini Jesus eketịn̄de ikọ aban̄a “spirit,” anaedi Nicodemus ama ọfiọk ke edi edisana spirit, kpa anamutom odudu Abasi.

Nso kaban̄a emi Jesus eketịn̄de aban̄a mmọn̄? Kere ban̄a mme edinam oro ẹwetde esisịt ini mbemiso ye ke nneme Jesus ye Nicodemus ama okokụre. Emi owụt ke John Andinịm Owo Baptism ye mme mbet Jesus ẹma ẹsinịm owo baptism mmọn̄. (John 1:19, 31; 3:22; 4:1-3) Mme owo ẹma ẹnen̄ede ẹfiọk emi ke Jerusalem. Ke ntre, ke ini Jesus eketịn̄de aban̄a mmọn̄, anaedi Nicodemus ama ọfiọk ke Jesus iketịn̄ke iban̄a ikpîkpu mmọn̄, edi ke eketịn̄ aban̄a mmọn̄ baptism.

“Baptism ke Edisana Spirit”

Edieke ‘edimana nto ke mmọn̄’ enyenede ebuana ye edina baptism mmọn̄, nso ke ‘edimana nto ke spirit’ ọwọrọ? Mbemiso nneme Nicodemus ye Jesus, John Andinịm Owo Baptism ama ọtọt ke idịghe mmọn̄ ikpọn̄ edinyene ebuana ye baptism edi ke spirit eyenyene n̄ko. Enye ọkọdọhọ ete: “Ami n̄kenịm mbufo baptism ke mmọn̄, edi enye [Jesus] eyenịm mbufo baptism ke edisana spirit.” (Mark 1:7, 8) Mark emi eketienede ewet Gospel etịn̄ akpa ini emi ẹkenịmde owo orụk baptism oro. Enye ewet ete: “Ke mme usen oro, Jesus oto Nazareth eke Galilee edi ndien John enịm enye baptism ke Jordan. Ndien kpa idaha oro enye ọwọrọde ke mmọn̄ ọdọk enye okụt nte enyọn̄ abaharede ye nte spirit osụhọrede, nte ibiom, edidoro enye ke idem.” (Mark 1:9, 10) Ke ini ẹkebụkde Jesus ke Jordan, ẹkenịm enye baptism ke mmọn̄. Ke ebe oro enye ọkọbọde edisana spirit, ẹkenịm enye baptism ke edisana spirit.

Ke n̄kpọ nte isua ita ẹma ẹkebe tọn̄ọ Jesus akana baptism, enye ama ọn̄wọn̄ọ ọnọ mme mbet esie ete: “Ẹdinịm mbufo baptism ke edisana spirit ke usen ifan̄ ẹbede.” (Utom 1:5) Ini efe ke oro eketịbe?

Ke usen Pentecost ke isua 33 E.N., n̄kpọ nte mbet Jesus 120 ẹkesop idem ke ufọk kiet do ke Jerusalem. “Kpa idaha oro uyom oto ke heaven ọwọrọ emi ebietde uyom ata ọkpọsọn̄ ofụm, ndien enye ọyọhọ ofụri ufọk emi mmọ ẹketiede. Ndien mmọ ẹkụt mme edeme eke ẹbietde edemeikan̄ . . . , ndien kpukpru mmọ ẹyọhọ ye edisana spirit.” (Utom 2:1-4) Kpasụk usen oro, ẹma ẹdọhọ mbon en̄wen ke Jerusalem ẹte ẹna baptism mmọn̄. Apostle Peter ama asian otuowo kiet ete: “Ẹkabade esịt, kpukpru mbufo ẹnyụn̄ ẹna baptism ke enyịn̄ Jesus Christ man ẹfen mme idiọkn̄kpọ mbufo, ndien mbufo ẹyebọ edisana spirit emi edide enọ mfọn.” Nso iketịbe? “Mbon emi ẹkenyịmede ikọ esie ke ofụri esịt ẹna baptism, ndien ke usen oro n̄kpọ nte ukpọn̄ tọsịn ita ẹdiana ye mmọ.”—Utom 2:38, 41.

Edinam Ikpehe Iba

Nso ke baptism mbiba emi ẹyararede ẹban̄a edimana obufa? Mmọ ẹwụt ke edimana obufa edi ikpehe iba. N̄kọ emeti ke Jesus ekebem iso ana baptism ke mmọn̄. Ekem enye ọbọ edisana spirit. Kpasụk ntre, akpa mme mbet ẹkebem iso ẹna baptism ke mmọn̄ (John Andinịm Owo Baptism ekenịm ndusụk mmọ), ndien ekem mmọ ẹbọ edisana spirit. (John 1:26-36) Ukem oro n̄ko, mbufa mbet 3,000 oro ẹkebem iso ẹna baptism ke mmọn̄, ndien ekem ẹbọ edisana spirit.

Ke ini itide mme baptism oro ke Pentecost isua 33 E.N., nnyịn ikpekere ke ẹdimana obufa didie mfịn? Ke ukem usụn̄ oro mme apostle ye akpa mme mbet Jesus ẹkemanade obufa. Akpa kan̄a, owo enyene nditua n̄kpọfiọk mban̄a mme idiọkn̄kpọ esie, ọwọn̄ọrede ọkpọn̄ ndiọi edinam esie, ayak idem esie ọnọ Jehovah ebe ke ndituak ibuot nnọ enye nnyụn̄ nnam n̄kpọ esie, onyụn̄ ayararede uyakidem esie an̄wan̄wa ke ndina baptism mmọn̄. Ekem, enye ọyọbọ edisana spirit edieke Abasi emekde enye nditiene n̄kara ke Obio Ubọn̄ Esie. Enyene-idem anam akpa ikpehe, oro edi, (baptism mmọn̄) ke edinam ikpehe iba emi; Abasi anam udiana ikpehe, oro edi, (baptism ke spirit). Ke ini owo anade baptism mbiba emi, enye amamana obufa.

Edi ntak emi Jesus ọkọdọhọde “amana oto ke mmọn̄ ye spirit” ke ini enye ekenemede nneme ye Nicodemus? Man owụt ke mbon oro ẹnade baptism ke mmọn̄ ye spirit ẹyenam ikpọ ukpụhọde. Ibuotikọ oro etienede edineme ikpehe enye oro ke edimana obufa.

[Ndise ke page 9]

John ekenịm nditọ Israel oro ẹkekabarede esịt baptism ke mmọn̄

Edimana Obufa Nso ke Enye Anam?

NTAK emi Jesus ọkọdọhọde “amana oto . . . spirit” ke ini enye eketịn̄de aban̄a edina baptism ke edisana spirit? (John 3:5) Ke ini ẹdade ikọ oro “emana” ẹtịn̄ ikọ ke ndamban̄a usụn̄, enye esiwọrọ “ntọn̄ọ.” Ntem, ikọ oro ‘edimana obufa’ owụt “editọn̄ọ obufa.” Ke ntre, ndamban̄a ikọ oro ‘mana’ ye ‘edimana obufa’ owụt ke itie ebuana ọyọtọn̄ọ obufa ke ufọt Abasi ye mbon oro ẹnade baptism ke edisana spirit. Edikpụhọ itie ebuana ntre ofụri ofụri asan̄a didie ada itie?

Ke ini apostle Paul eketịn̄de nte Abasi etịmde mme owo idem ọnọ ukara eke heaven, enye akada uwụtn̄kpọ oro aban̄ade uwem ubon. Enye ekewet mme Christian ke eyo esie ete ke mmọ ẹyebọ ‘itie nditọ ẹnyene’ ndien ke ntre ke Abasi ekenyene ndinam n̄kpọ ye mmọ “nte nditọ.” (Galatia 4:5; Mme Hebrew 12:7) Man okụt nte uwụtn̄kpọ edida itie nditọ nnyene anamde ẹfiọk orụk ukpụhọde oro adade itie ke ini owo anade baptism ke edisana spirit, fiak kere ban̄a akparawa oro okoyomde ndika n̄wed ke ufọkn̄wed oro enyenede nditọ ufọkn̄wed oro ẹdide mme amanaisọn̄ kpọt.

Ukpụhọde Oro Otode Edida Nnyene nte Nditọ

Ke uwụtn̄kpọ oro, akparawa oro ikemeke ndika n̄wed ke ufọkn̄wed oro sia enye mîdịghe amanaisọn̄. Idahaemi, kere nte ẹnamde akamba ukpụhọde usen kiet. Ete kiet emi edide amanaisọn̄ ada enye enyene nte eyen. Didie ke emi otụk akparawa oro? Ke ntak emi ẹdade enye ẹnyene nte eyen, idahaemi enye ekeme ndinyene unen oro mme amanaisọn̄ n̄kparawa eken ẹnyenede—emi onyụn̄ esịne unen edika n̄wed ke ufọkn̄wed oro. Edida enye nnyene omokpụhọde kpukpru se enye ekemede ndinam.

Emi owụt se itịbede ke ata akamba udomo inọ mbon oro ẹmanade obufa. Kere ban̄a ndusụk n̄kpọ oro ẹdide ukem. Ẹdida akparawa oro ke ufọkn̄wed oro edieke enye esịmde se ẹyomde man ẹda owo—oro edi, edieke enye edide amanaisọn̄. Edi enye ikemeke ndidot ke idem esiemmọ. Kpasụk ntre, ẹyenọ ndusụk owo ifet ndikara ke Obio Ubọn̄ Abasi, m̀mê ke ukara eke heaven edieke mmọ ẹsịmde mme n̄kpọ oro ẹyomde—oro edi, ‘nditọn̄ọ ntak mmana.’ Edi mmọ ikemeke ndisịm se ẹyomde oro ke idemmọ sia edi Abasi esinam owo amana obufa.

Nso ikanam idaha akparawa oro okpụhọde? Edida enye nnyene nte odotde. Edi emi ikpụhọkede obot akparawa oro. Ke ẹma ẹkeda enye ẹnyene, enye osụk edi owo oro enye ekedide. Kpa ye oro, ke ẹma ẹkeda enye ẹnyene nte odotde, akparawa oro enyene obufa idaha. Ke nditịm ntịn̄, enye enyene obufa ntọn̄ọ—amana obufa, yak idọhọ ntre. Enye akabade eyen owo emi ọnọde enye unen ndika n̄wed ke ufọkn̄wed oro onyụn̄ akabade owo ubon oro.

Kpasụk ntre, Jehovah okpụhọde idaha otu mme anana-mfọnmma owo ebe ke ndinam mme n̄kpọ oro ẹdotde man ada mmọ enyene nte nditọ. Apostle Paul, emi esịnede ke otu oro, ekewet ntem ọnọ mme Christian eken: “Mbufo ẹkebọ spirit emi anamde nnyịn idi nditọ, onyụn̄ oto ke spirit emi nnyịn ifiori ite: ‘Abba, Ete!’ Spirit ke idemesie etiene spirit nnyịn etie ntiense ete nnyịn idi nditọ Abasi.” (Rome 8:15, 16) Ih, ke ntak emi ẹdade mme Christian oro ẹnyene nte nditọ, mmọ ẹmekabade ẹdi mbonubon Abasi, m̀mê “nditọ Abasi.”—1 John 3:1; 2 Corinth 6:18.

Edi Abasi ndida mmọ nnyene nte nditọ ikokpụhọke obot mmọ, koro mmọ ẹsụk ẹdi mme anana-mfọnmma owo. (1 John 1:8) Edi, nte Paul akakade iso etịn̄, ke ẹma ẹkenam kpukpru n̄kpọ oro ẹyomde man ẹda mmọ ẹnyene nte odotde, mmọ ẹnyene obufa idaha. Ke ukem ini oro, spirit Abasi anam mbon oro ẹdade ẹnyene nte nditọ do ẹnen̄ede ẹnịm ke mmimọ ididu ye Christ ke heaven. (1 John 3:2) Ọkpọsọn̄ mbuọtidem oro edisana spirit anamde mmọ ẹnyene do anam mmọ ẹnyene isio isio idotenyịn kaban̄a uwem. (2 Corinth 1:21, 22) Ih, mmọ ẹnyene obufa ntọn̄ọ—ẹmana obufa, yak idọhọ ntre.

Bible etịn̄ ntem aban̄a nditọ oro Abasi adade enyene: “Mmọ ẹyedi mme oku Abasi ye Christ, ẹyenyụn̄ ẹkara nte ndidem ye enye ke isua tọsịn kiet.” (Ediyarade 20:6) Ẹyenam nditọ oro Abasi adade enyene ẹtiene Christ ẹdi ndidem ke Obio Ubọn̄ Abasi, m̀mê ukara eke heaven. Apostle Peter ama asian mme Christian eken ete ke mmọ ẹyebọ “inyene udeme eke mîkemeke ndibiara mînyụn̄ isabakede mînyụn̄ ikemeke ndibe mfep” oro ‘ẹnịmde ke heaven’ ẹnọ mmọ. (1 Peter 1:3, 4) Nso ọsọn̄urua inyene ke emi edi ntem!

Edi n̄kpọ emi aban̄ade ukara mi edemerede mbụme n̄ko. Edieke mbon oro ẹtọn̄ọde ntak ẹmana ẹdikarade nte ndidem ke heaven, mmọ ẹdikara mmanie? Ẹyebọrọ mbụme oro ke ibuotikọ oro etienede.

[Ndise ke page 10]

Nso ke Paul eketịn̄ aban̄a edida owo nnyene nte eyen?