3 “Gehenna”—Ada Aban̄a Nsinsi Nsobo

“Gehenna” ọwọrọ “itịghede Hinnom,” koro enye edi ikọ Greek emi ọwọrọde ukem n̄kpọ ye ikọ Hebrew oro geh hin·nomʹ. Ke Jos 18:16, emi “itịghede Hinnom” odude, Septuagint usem Greek okot enye “Gehenna.” Enye odu utịm ike 12 ke N̄wed Abasi Christian Usem Greek, ebem iso odu ke Mt 5:22. Edikabade eke Obufa Ererimbot okot enye “Gehenna” ke kpukpru itie emi enye odude, oro edi, ke Mt 5:22, 29, 30; 10:28; 18:9; 23:15, 33; Mr 9:43, 45, 47; Lu 12:5; Jas 3:6.

Itịghede Hinnom ama akabade edi ifụm ye itie ufọp mbio Jerusalem. Ẹma ẹsitomo mme okpo unam ẹdọn̄ do man ikan̄ ata, ẹnyụn̄ ẹsịn sulphur m̀mê brimstone ndinam ikan̄ oro asak. N̄ko, ẹma ẹsitomo okpo mme abiatibet emi ẹwotde, oro ẹkebatde ke idotke se ẹbụkde ukpono ukpono ke udi, ẹdọn̄ do. Edieke mme okpo oro ẹduọn̄ọde ẹdụk ikan̄, ikan̄ ayata mmọ, edi edieke mme okpo oro ẹduọn̄ọde ke mben ntotụn̄ọ ebeden̄ oro, utụn̄ m̀mê ndọn̄ ẹyedụk obụkidem mmọ oro ẹtọn̄ọde ndidiahade, inyụn̄ ikpan̄ake tutu mmọ ẹta obụk ẹkụre, ẹsụhọde mme ọkpọ kpọt.

Owo ikesitopke odu-uwem unam m̀mê owo isịn ke Gehenna man ikan̄ ata ye uwem m̀mê man ẹtụhọde. Ntem, ebiet emi ikpekemeke-keme ndida mban̄a itie oro enyịn mîkwe emi ẹtụhọrede ukpọn̄ mme owo ke nsinsi ke ata ata ikan̄ m̀mê ebiet emi mme utụn̄ oro mîkpan̄ake ẹtade owo ke nsinsi. Sia ẹkesitomode mme abiatibet oro ẹkpan̄ade ẹdọn̄ do, mînyụn̄ ibụkke mmọ ukpono ukpono ke udi, emi adade aban̄a idotenyịn ediset ke n̄kpa, Jesus ye mme mbet esie ẹkeda Gehenna ẹtịn̄ ẹban̄a nsinsi nsobo, edisobo mfep ke ekondo Abasi, m̀mê “udiana n̄kpa,” nsinsi ufen.