Kyrgyzstan

KYRGYZSTAN odu ke Central Asia, ndien enye odu ekpere Kazakhstan, Uzbekistan, Tajikistan, ye China. Obot ọyọyọhọ idụt emi. N̄kponn̄kan obot ke Central Asia odu ke Kyrgyzstan. Akai ikponke ke idụt emi. Edi Kyrgyzstan esịne ke otu idụt emi ikọt ekpọrọ okponde akan.

Mbon Kyrgyzstan ẹsima ndikama isenowo ẹnyụn̄ ẹkpono owo. Mmọ ẹsitịn̄ ikọ ukpono ukpono ye akwa owo, ẹdaha ẹda ke moto ẹnọ akwa owo itie, ẹnyụn̄ ẹyak akwa owo etie ke ibuot okpokoro.

Mmọ ẹsiwak ndinyene nditọ ita m̀mê akande oro. Ekperedem eyen esidụn̄ ye ete ye eka esie, idem ke enye ama ọkọdọ ndọ, man ese aban̄a mmọ ke ini mmọ ẹsọn̄de.

Ekpri eyenan̄wan ama ọtọtọn̄ọ ndidiọn̄ọ idem, ẹsikpep enye nte ẹkpekamade ufọk man enye ekpedi eti n̄wanndọ. Enye etisịm n̄kpọ nte isua 17, enye esikeme ndinam ata ediwak n̄kpọ ke ufọk. Ete ye eka ẹsitọ eyenan̄wan mmọ ndụn̄ufọk ke ini ẹdọde enye. Emi esisịne nsio nsio n̄kpọ-nna, nsio nsio ọfọn̄, ye n̄kpọ emi ẹdọkde man ẹbri ke isọn̄ufọk. Ke ini erenowo oyomde ndidọ n̄wan, enye esinọ okụk ye ufene nte n̄kpọ ndọ.

Ke ini ẹnamde usọrọ m̀mê ẹbụkde owo, ẹsiwot erọn̄ m̀mê enan̄-mbakara. Ẹsibak unam oro ẹnyụn̄ ẹnọ owo kiet kiet nsio nsio ndido. Ẹsinọ mmọ ẹtiene isua emana mmọ ye utọ owo oro mmọ ẹdide ke obio. Se ẹsinọde akwa owo isidịghe ukem ye se ẹnọde eyenọwọn̄. Ekem ẹsinọ mmọ akpan udia idụt oro, emi ẹkotde beshbarmak. Ẹsida ubọk ẹdia udia emi.