Sinọ Owo N̄kpọ

NTAK EDIDE AKPAN N̄KPỌ

Ndisinọ owo n̄kpọ​—ekpededi ata ekpri n̄kpọ ntem​—esinam ikop inemesịt inyụn̄ ikop idem inem. Ndusụk mme dọktọ ẹdọhọ ke ndisinọ owo n̄kpọ esinen̄ede ọfọn owo ke idem onyụn̄ anam esịt ana owo sụn̄. Ke uwụtn̄kpọ, ndisinọ owo n̄kpọ isiyakke esịt enen̄ede etịmede owo, isiyakke owo enen̄ede ọdọn̄ọ n̄kon̄n̄kon̄ iyịp, isiyakke ibuot enen̄ede ọkọn̄ owo isinyụn̄ iyakke owo enen̄ede okop ọkpọsọn̄ mbiakidem. Ndisinọ owo n̄kpọ ekeme n̄ko ndinam owo ede idap ọfọn.

Edieke isinọde mme owo n̄kpọ, edide okụk m̀mê n̄kpọ en̄wen, oro ekeme ndinam emem nnyịn utom ndinyịme ẹn̄wam nnyịn ke ini iyomde un̄wam. Howard, emi odụn̄de ke England, ọdọhọ ete: “Ami ye n̄wan mi imesiyom nsio nsio usụn̄ ndinọ mme owo n̄kpọ nnyụn̄ n̄n̄wam mmọ ndien emi esinam nnyịn ikereke ke idi mbiomo inọ mme owo ke ini mmọ ẹn̄wamde nnyịn ini iyomde un̄wam.” Imọdiọn̄ọ ke mbon emi ẹsinọde owo n̄kpọ ke ofụri esịt isinamke oro man ẹnọ mmọ usiene. Edi emi ekeme ndinam mmọ ẹnyene nti ufan, emi ẹdinyịmede ndin̄wam mmọ ke ini mmọ ẹnyenede mfịna.

SE EKEMEDE NDINAM

Sibuana se enyenede ye mbon en̄wen. Idem edieke mûnen̄ekede unyene n̄kpọ, omosụk ekeme ndibuana se enyenede ye mbon en̄wen, ekpededi ekpri n̄kpọ nte mbansan̄ ye mme n̄kpọ ntre. Duncan ye ubon esie ẹdụn̄ ke Uganda. Kpa ye oro mmọ mînen̄ekede inyene n̄kpọ, mmọ ẹsima ndinọ owo n̄kpọ. Duncan ọdọhọ ete: “Kpukpru Sunday, ami ye n̄wan mi imesikot mme owo ufọk inyụn̄ ibuana ekpri se inyenede ye mmọ. Esinenem nnyịn ndidu ye mmọ.”

Edi, ama oyom ndinọ owo n̄kpọ, nam oro ye eti ibuot sia ndinọ owo n̄kpọ iwọrọke ke ana anam oro tutu ubon fo inyeneke aba se mmọ ẹyomde.​—Job 17:5.

Nam emi ise: Buana ekpri se enyenede ye owo, ekpededi ekpri udia, m̀mê mbansan̄ ye mme n̄kpọ ntre. Edieke enyenede mme n̄kpọ oro mûyomke aba, emekeme ndinọ mme ufan fo m̀mê mme mbọhọidụn̄ fo emi ekemede ndidi ẹyoyom mme n̄kpọ oro.

Mme n̄kpọ en̄wen emi ekemede ndinọ owo. Ndusụk ata nti enọ emi ikemede ndinọ mme owo idịghe se ẹdepde ke okụk. Ke uwụtn̄kpọ, imekeme ndida ini ye odudu nnyịn inam nsio nsio n̄kpọ in̄wam mme owo. Idem ndinem ikọ oro itịn̄de ye mme owo edi ata eti enọ! Ntre, sisosio dọhọ mme owo ke emenen̄ede ama mmọ m̀mê ke udaha mmọ ubre mbre.

Nam emi ise: Sikan̄wam mbon en̄wen nam n̄kpọ ifan̄ ke ufọk nọ mmọ, n̄wam diọn̄ n̄kpọ emi abiarade mîdịghe afo an̄wam aka n̄kpọ ọnọ mmọ. Wet n̄kpọ ke kad nọ ufan fo mîdịghe afo ọnọ etop ke fon ẹsọk ufan fo, ekpededi edi sụk ndidọhọ enye ke emekere aban̄a enye.

Edieke esiyomde nsio nsio usụn̄ ọnọ owo n̄kpọ, ayadia ediwak ufọn.