EDI EYO ESIERE URUA N̄KPỌ ỌDỌK NSO KE IKPANAM?

Nịm ke N̄kpọ Ọyọfọn

Ndi urua n̄kpọ ọdọk ke idụt mbufo tutu okụk emi an̄wanade ikemke fi n̄kpọ ndomokiet aba? Ndi esịt esitịmede fi aban̄a nte edisan̄ade ise iban̄a idemfo ye ubon fo? Ekpedi ntre, ekeme ndidi ke ekere m̀mê n̄kpọn̄ editetie didie. Edi, edieke enịmde ke n̄kpọ ọyọfọn ọkpọkọm n̄kpọ ọsọn̄ se ọsọsọn̄, oro eyenen̄ede an̄wam fi.

NTAK EDIDE AKPAN N̄KPỌ

Mbon emi ẹsinịmde ke n̄kpọ ọyọfọn isitiehe-tie ikere kpọt nte n̄kpọ ọkpọfọnde. Idotenyịn esinọ mmọ odudu ndidaha nda nnam n̄kpọ emi edin̄wamde mmọ ẹyọ se iwọrọde mmọ. Ke uwụtn̄kpọ, ndụn̄ọde oro ẹnamde owụt ke mbon oro ẹsinịmde ke n̄kpọ ọyọfọn . . .

ẹsiwak ndisọn̄ọ nda nyọ se iwọrọde mmọ
ẹsinen̄ede ẹkeme ndikpụhọde ntiene nte n̄kpọ etiede
ẹsikeme ndibiere nti n̄kpọ emi ẹdinamde idem ọsọn̄ mmọ ẹdinyụn̄ anamde mmọ ẹkop inem uwem

SE EKEMEDE NDINAM

Akpa, kere nte Bible ekemede ndin̄wam fi idaha-emi. Bible etịn̄ nsio nsio n̄kpọ emi ẹkemede ndin̄wam fi ọyọ nte urua n̄kpọ osụk ọdọkde. Mme n̄kpọ emi ye mme n̄kpọ en̄wen en̄wen ẹkeme ndin̄wam fi okûnen̄ede ukere ke okwo okụre, edi anam ọdiọn̄ọ se akpanamde idaha-emi onyụn̄ an̄wam fi eben̄e idem ndiyọ se ikemede nditịbe ke ini iso.

‘Ifiọk ye mbufiọk ẹyekpeme fi.’—Mme N̄ke 2:11, New Century Version.

Ọyọhọ iba, kere se Bible etịn̄de aban̄a ini iso. Ke ini okụtde nte item Bible ọfọnde, oro ayanam ọdọdọn̄ fi ndikpep n̄kpọ en̄wen en̄wen mban̄a se Bible etịn̄de aban̄a ini iso. Ke uwụtn̄kpọ, eyedikụt ke Abasi itịn̄ke-tịn̄ kpọt ke n̄kpọ ọyọfọn ye afo ke ini iso, edi enye ọnọ ata eti ntak emi anamde inịm se enye etịn̄de oro. (Jeremiah 29:11) Se enye ọnọde nnyịn edi Obio Ubọn̄ Abasi.

NSO IDI OBIO UBỌN̄ ABASI NDIEN NSO KE ENYE EDINAM?

Obio Ubọn̄ Abasi edi ukara emi edikarade ofụri isọn̄. (Daniel 2:44; Matthew 6:10) Obio Ubọn̄ oro odu ke heaven. Do ke ẹditie inam ufen ye ubuene ẹtre ke isọn̄ emi, ẹnyụn̄ ẹnam emem ye udia odu barasuene. Se mme itie Bible oro ẹtienede mi ẹwụtde edi oro.

“Afo oyokop inemesịt, oyonyụn̄ ọfọn ye afo.”—Psalm 128:2.

“Mmọ [mbon emi ẹdidude ke Obio Ubọn̄ Abasi] idikpaha utom ke ikpîkpu.”—Isaiah 65:23.

“Uwak n̄kpasịp ẹyedu ke isọn̄.”—Psalm 72:16.

Ediwak miliọn owo ẹnịm ke Abasi ayanam mme n̄kpọ oro enye ọn̄wọn̄ọde mi sia mmọ ẹnen̄ede ẹdiọn̄ọ ke Abasi ‘ikemeke ndisu nsu.’ (Titus 1:2) Ntre, ọkpọfọn okot Bible man okụt mme n̄kpọ emi ke idemfo. Idotenyịn oro Bible ọnọde ekeme ndin̄wam fi ọyọ nsọn̄ọn̄kpọ onyụn̄ enịm ke n̄kpọ ọyọfọn ke ini iso.