Ibuot 17

Nso ke N̄kpọfiọk Mban̄a Edinam Ufan ke Ufọkn̄wed?

“Ndusụk ini mmesikụt mme ufan ẹsan̄ade kiet nnyụn̄ n̄kere nte, ‘Omokụt, ata nti ufan ẹdi emi! N̄kpama ndinyene mme utọ ufan oro.’”​—Joe.

“Ikesisọn̄ke mi ndinam ufan ke ufọkn̄wed. Ekesidi ata mmemmem n̄kpọ. Mfịna mi ekedi oro.”​—Maria.

KPUKPRU owo ẹyom ufan, oro edi, mbon emi mmọ ẹkemede ndidu kiet ke ini n̄kpọ ọfọnde, ye mbon emi ẹkemede ndin̄wam mmọ ke ini n̄kpọ ọdiọkde. Jesus ama esinyene mme ufan, ama esinyụn̄ ama ndidu ye mmọ. (John 15:15) Ndien ke ini emi ẹkeyomde ndiwot enye ke eto ndutụhọ, John emi ekedide ata akpan ufan esie, kpa “mbet emi enye amade” ama odu ekpere enye. (John 19:25-27; 21:20) Utọ ufan oro ke afo oyom, owo emi ekemede ndidu n̄kpere fi ke ini n̄kpọ ọfọnde m̀mê ke ini n̄kpọ ọdiọkde!

Ekeme ndidi emekere ke omokokụt mme orụk ufan oro ke ufọkn̄wed—eyedi owo kiet m̀mê iba ke otu nditọ ufọkn̄wed mbufo emi ẹnen̄erede ẹma fi. Enyene mme n̄kpọ oro mbufo ẹsimade ndinam ẹsinyụn̄ ẹnemede ẹban̄a. Ndien emekeme ndikere ke mmọ idịghe ‘ndiọi nsan̄a.’ (1 Corinth 15:33) Anne ọdọhọ ete: “Ekpere ndidi kpukpru usen ke ẹsikụt mme uyen emi. Ndien esinenem owo ndidu ye mmọ. Ndidu ye mmọ itiehe nte ndidu ye ekemmọ mme andinịm ke akpanikọ emi owo ekemede ndikere ndusụk ini ke ana ikpekpeme nte inamde n̄kpọ. Owo ekeme ndinam n̄kpọ nte amama ke ufọkn̄wed.” Akan oro, emekeme nditọn̄ọ ndikere n̄kpọ nte Lois emi ọkọdọhọde ete: “N̄koyom mme ufan mi ke ufọkn̄wed ẹkụt ke Mme Ntiense Jehovah inen̄ekede ikpụhọde ye mbon eken nte mme owo ẹkerede, ke mmọ ẹnyụn̄ ẹtie nte kpukpru owo eken.” Ndi se ikpanamde fi anam ufan ye nditọ ufọkn̄wed mbufo edi emi?

Ntak Emi Oyomde Ekpeme Idem?

Kere se iketịbede inọ Maria emi iketịn̄de iban̄a ke ntọn̄ọ ntọn̄ọ. Ikọsọn̄ke enye ndinam ufan ye mme owo sia enye ekedide owo ofụri owo, edi enye ikọfiọkke mbon oro enye mîkpadaha nte mme ufan esie. Enye ọdọhọ ete: “Ekesinenem mi ke ini iren ye iban ẹmade mi. Oro ama anam ntọn̄ọ ndinen̄ede nnam n̄kpọ nte mbon ererimbot.” Lois n̄ko ama esinam ukem n̄kpọ emi. Enye ọdọhọ ete: “Mma ntọn̄ọ ndikpebe mme uyen eken nnyụn̄ ntọn̄ọ ndidu uwem nte mmọ.”

Utọ n̄kpọ emi ikpaha owo idem. Kamse, man aka iso anam ufan ye owo, ana ama se owo oro amade! Edieke anamde ufan ye mbon oro mîdụhe uwem nte N̄wed Abasi etemede, utọ nsan̄a oro ayabiat fi. (Mme N̄ke 13:20) Ntak edi oro apostle Paul ekewetde ete: “Ẹkûdian idem utịn̄e utịn̄e ye mmọ eke mînịmke ke akpanikọ.”—2 Corinth 6:14.

Se Akpanamde

Ndi item Paul ọwọrọ ke akpana ọsọn nditọ ufọkn̄wed mbufo onyụn̄ etie ke idemfo? Baba! Man mme Christian ẹnam ewụhọ oro ẹnọde mmọ ẹte ẹka “ẹkenam mme owo ke kpukpru idụt ẹdi mbet,” ana mmọ ẹfiọk nte ẹkpenamde n̄kpọ ye mme owo emi ẹtode kpukpru orụk, ido ukpono, ye obio.—Matthew 28:19.

Apostle Paul ama enịm ata eti uwụtn̄kpọ ke n̄kpọ emi. Enye ama ọfiọk ndineme nneme ye “kpukpru orụk owo,” kpa ye oro enye mîketieneke inịm se mmọ ẹnịmde ke akpanikọ. (1 Corinth 9:22, 23) Afo emekeme ndikpebe uwụtn̄kpọ Paul. Tie ufan ufan ye mme uke fo. Kpep ndineme nti nneme ye mmọ. Edi kûkpebe nte nditọ ufọkn̄wed mbufo ẹtịn̄de ikọ ẹnyụn̄ ẹdude uwem. Utu ke oro, sọsọp nam mmọ ẹdiọn̄ọ ntak emi afo emekde ndida mme edumbet Bible ndu uwem; tịn̄ emi ukpono ukpono.—2 Timothy 2:25.

Imọfiọk ke emi ayanam fi okpụhọde ye mbon en̄wen, edi emi idimemke utom. (John 15:19) Edi ntak emi mûsehe n̄kpọ emi ke usụn̄ emi? Edieke afo ekpesịnede ke ubom okụt mbon oro mmọn̄ oyomde ndida, ndien ubom oro enyene n̄kpọ emi ẹkemede ndida nnyan̄a owo, nso ke akpanam man anyan̄a mmọ? Ndi ọkpọfrọ ọwọrọ ke ubom odụk mmọn̄ oro etiene mmọ? Ikpọfọnke ọfrọ odụk!

Kpasụk ntre, mme owo emi mînyeneke ukpeme emi mme ufan Jehovah ẹnyenede ẹyọyọhọ ufọkn̄wed mbufo. (Psalm 121:2-8) Edieke etrede ndidu uwem nte Jehovah etemede n̄kukụre man nditọ ufọkn̄wed mbufo ẹma fi, udûtreke ndibiat itie ufan fo ye Jehovah udûnyụn̄ ukopke aba inemesịt. (Ephesus 4:14, 15; James 4:4) Edi ekpenen̄ede ọfọn edieke okpodomode ndin̄wam nditọ ufọkn̄wed mbufo ẹtiene fi ẹnam n̄kpọ Jehovah, nte emi akpanyan̄ade owo emi mmọn̄ oyomde ndida. Ke ẹsiode emi ẹfep, ewe usụn̄ en̄wen ọkpọfọn akan emi ndiwụt ke imọ idi eti ufan?

AKPAN ITIE N̄WED ABASI

“Nnanam kpukpru n̄kpọ kaban̄a eti mbụk, man n̄kpabuana enye ye mbon en̄wen.”​—1 Corinth 9:23.

ITEM

Edieke ndusụk nditọ ufọkn̄wed mbufo ẹyomde ndifiọk se afo enịmde ke akpanikọ, yak mmọ ẹtịn̄ ekikere mmọ. Nen̄ede kpan̄ utọn̄. Ke ini etịn̄de ikọ, tịn̄ “ke ifụre ifụre ido ye ntotụn̄ọ ukpono.”—1 Peter 3:15.

NDI AMA ỌFIỌK . . . ?

Ediwak mbon oro ẹnamde n̄kpọ Abasi mfịn ẹkekpep Bible ẹto ekemmọ eyen ufọkn̄wed emi ekenyenede uko nditịn̄ se enye enịmde ke akpanikọ.

SE NDINAMDE

Edieke etiede nte ke mmekpere eyen ufọkn̄wed nnyịn idem n̄kaha, se ndinamde edi ․․․․․

Edieke eyen ufọkn̄wed nnyịn asakde mi ke ntak se nnịmde ke akpanikọ, se ndinamde edi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Ntak emi afo ekemede ndikere ke emem utom ndinam ufan ye mme owo ke ufọkn̄wed akan ndinam ye nditọete ke esịt esop?

● Ke n̄wed ama akasuana, nso mfịna ikeme ndidu edieke owo awakde ndidu ye nditọ ufọkn̄wed mmọ emi mînịmke ke akpanikọ?

● Mme ufọn ewe ke edibọ edieke asiande nditọ ufọkn̄wed mbufo ke afo edi kiet ke otu Mme Ntiense Jehovah?

[Se ẹwetde ke ikpọ abisi ke page 143]

“N̄kesinam n̄kpọ nte mme uke mi ke ufọkn̄wed, ntre ikọsọn̄ke mi ndinyene mme ufan. Edi mma n̄kpep n̄kpọ nto ndudue mi. Idahaemi, mmenyene mme ufan ke esịt esop, kpa mme ufan emi n̄kemede ndibuọt idem.”​—Daniel

[Ndise ke page 146]

Nso idi mfọnn̄kan usụn̄ ndin̄wam owo emi mmọn̄ oyomde ndida​—ndifrọ ndụk mmọn̄ oro m̀mê ndinọ enye n̄kpọ emi ekemede ndinyan̄a enye?