Ndi Emesikop Idatesịt Aban̄a “Ifet Ndinọ N̄kpọ ke Mfọnido”?
ẸKEDIỌN̄Ọ akpa mme Christian ke Philippi nte mbon emi ẹsitatde ubọk ẹnọ utuakibuot akpanikọ ibetedem. Apostle Paul ekewet ntem ke leta eke odudu spirit oro enye ekewetde mmọ ete: “Mmesikọm Abasi mi kpukpru ini eke ntide mbufo ke kpukpru n̄kpeubọk mi kaban̄a kpukpru mbufo, nte nnamde n̄kpeubọk mi ye idatesịt, ke se mbufo ẹketịpde ẹsịn ke ndisuan eti mbụk toto ke akpa usen tutu esịm emi.” (Phil. 1:3-5) Paul ama enen̄ede eti ini emi Lydia ye ikọtufọk esie ẹkenade baptism, ye nte enye ekeyịrede imọ ye mbon emi ẹkesan̄ade ye imọ ẹkwọrọ ikọ ete ẹdidu ke ufọk esie.—Utom 16:14, 15.
Ikebịghike ke oro ama ekebe, obufa esop oro ẹkesiakde ke Philippi do ẹma ẹnọ n̄kpọ ẹsọk Paul utịm ikaba ke ini enye okodude ediwak urua ye nditọete eken ke Thessalonica, emi oyomde usụn̄ ke n̄kpọ nte kilomita 160. (Phil. 4:15, 16) Isua ifan̄ ke ukperedem, ke ini ukụt ekesịmde nditọete ke Philippi ye ke Macedonia mmọ ẹnyụn̄ ẹdu ke “ọkpọsọn̄ unana,” mmọ ẹma ẹkop ke mme Christian oro ẹkekọbọde ke Jerusalem ẹdu ke unana ẹnyụn̄ ẹyom ndin̄wam mme Christian oro. Paul ama etie ntiense aban̄a mmọ ete ke ẹma ẹnam “ẹbe ukeme mmọ.” Kpa ye oro, enye ekewet ete: “Mmọ [ẹma ẹka] iso ẹben̄e nnyịn ye ọkpọsọn̄ n̄kpeubọk ẹyom ifet ndinọ n̄kpọ ke mfọnido.”—2 Cor. 8:1-4; Rome 15:26.
Ke n̄kpọ nte isua duop ẹma ẹkebe tọn̄ọ mbon Philippi ẹkedụk Ido Ukpono Christ, mmọ ẹkesụk ẹnyenyene edu ntatubọk oro. Ke ẹma ẹkekop ke ẹma ẹkọbi Paul ke Rome, mmọ ẹma ẹdọn̄ Epaphroditus ada n̄kpọ asan̄a kilomita 1,287 ke obot ye mmọn̄ ọsọk Paul. Nte an̄wan̄ade, mbon Philippi ẹkeyom ndinọ Paul se inanade enye man enye akpaka iso ọsọn̄ọ nditọete idem onyụn̄ ọkwọrọ ikọ, idem ke adan̄aemi odude ke ufọk-n̄kpọkọbi.—Phil. 1:12-14; 2:25-30; 4:18.
Mfịn, ata mme Christian ẹda ke edi akwa ifet ndinọ utom edikwọrọ Obio Ubọn̄ ye edinam mbet ibetedem. (Matt. 28:19, 20) Mmọ ẹnam mme n̄kpọ Obio Ubọn̄ ẹkọri ke ndinọ ini, ukeme, ye okụk. Ekebe oro etienede mi owụt ndusụk usụn̄ oro afo ekemede nditiene mbuana ke ndinọ utom Abasi emi ibetedem.
[Ekebe ke page 22]
Usụn̄ Emi Ndusụk Owo Ẹmekde Ndinọ Enọ
MME ETỊBE KABAN̄A UTOM OFỤRI ERERIMBOT
Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke ekebe etịbe oro ẹdiande idiọn̄ọ emi: “Worldwide Work.”
Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi esede aban̄a idụt mmọ. Emekeme n̄ko ndinọ okụk imaesịt nnennen ẹsọk n̄kọk itieutom Mme Ntiense Jehovah oro esede aban̄a idụt mbufo. (Emekeme n̄ko ndinọ enọ imaesịt oro ẹwụtde ke ikpehe oro odude mi ke idak ẹsọk n̄kọk itieutom Mme Ntiense Jehovah oro esede aban̄a idụt mbufo.) Ẹkpenyene ndiwet “Watch Tower,” nte ikọ iba, ke babru okụk ban̄k oro ẹnọde. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.
ENỌ EMI ẸDIOMIDE-DIOMI
Ke adianade ye edinọ okụk nte enọ, mme usụn̄ enọ efen ẹdu oro ẹkemede ndida nnam utom Obio Ubọn̄ ke ofụri ererimbot. Emi ẹsịne:
Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.
Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.
Inyene ye Mbubehe: Ẹkeme ndinọ Watch Tower inyene ye mbubehe nte enọ, mîdịghe ẹnam ẹkpe enye ẹnọ Watch Tower ke ini andinyene akpade.
Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie. Tọt n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower.
Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia-ufọn ke n̄wed ebuọt.
Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.
Edieke oyomde ntọt efen efen, emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi, mîdịghe emekeme ndinyene nneme ye n̄kọk itieutom emi esede aban̄a idụt mbufo.
Jehovah’s Witnesses
P.M.B. 1090,
Benin City 300001,
Edo State, Nigeria.
Telefon: 07080662020