Inua-Okot Gospel​—Ndi Mmọ Ẹtịn̄ Akpanikọ Ẹban̄a Jesus?

“AKWA n̄kpọ edi emi-o. Edi emi ayayat ediwak owo esịt.” “Se ẹkụtde emi oyokpụhọde se ẹkediọn̄ọde ẹban̄a Ido Ukpono Christ.” Ntaifiọk ẹketịn̄ ikọ emi ke ini ẹkekụtde “Gospel Judas” (oro odude ke enyọn̄ emi), emi ẹkekerede ke ama osop ke n̄kpọ nte isua 1,600 emi ẹkebede.

Mme owo ẹfiak ẹtọn̄ọ ndikot mme gospel emi. Ndusụk owo ẹdọhọ ke mmọ ẹdọn̄ọ ikpọ n̄kpọntịbe ye mme ukpepn̄kpọ Jesus oro mîsịneke ke Bible. Ewe gospel ededi emi? Ndi mmọ ẹkeme ndikpep nnyịn akpanikọ oro nnyịn mîkemeke ndikụt ke Bible mban̄a Jesus ye Ido Ukpono Christ?

Ata Gospel ye Mme Inua-Okot Gospel

Matthew, Mark, Luke, ye John ẹma ẹwet “mbụk ẹmana Jesus Christ” ke n̄kpọ nte tọsịn isua iba emi ẹkebede. (Matthew 1:1) Ẹkot mbụk emi Gospel, emi ọwọrọde “eti mbụk” emi aban̄ade Jesus Christ.—Mark 1:1.

Kpa ye oro ẹkesiwakde nditịn̄ ikọ ke inua nnọ mme owo ke eset, Gospel mbinan̄ emi ikpọn̄ ke ẹkediọn̄ọ nte mme n̄wed emi Abasi ọkọnọde spirit esie ẹda ẹwet, mmọ n̄ko ke ẹkekụt ke ẹdot se ẹsịnde ke Edisana N̄wed Abasi. Mmọ ẹnam itịm ifiọk nte Jesus okodude uwem ye se enye ekekpepde ke ini enye okodude ke isọn̄. (Luke 1:1-4; Utom 1:1, 2; 2 Timothy 3:16, 17) Ẹsiak Gospel mbinan̄ emi ke kpukpru n̄kani N̄wed Abasi Christian Usem Greek. N̄kpọ ndomokiet idụhe ndiwụt ke mmọ ikesịneke ke otu mme n̄wed oro Abasi ọkọnọde spirit ẹda ẹwet.

Nte ini akakade, mme owo ẹma ẹtọn̄ọ ndiwet mme gospel idemmọ. Gospel enye emi mi ke ẹkot inua-okot gospel.

Ke n̄kpọ nte isua 1,800 emi ẹkebede, Irenaeus eyen Lyon ekewet ete ke mbon oro ẹkekpọn̄de Ido Ukpono Christ ẹma “ẹwet ata ediwak gospel idemmọ ẹnyụn̄ ẹwet nsu ẹdọn̄, man ẹda ẹbian̄a mme ndisịme.” Ntak edi oro mbon oro ẹmade Abasi ẹkedade mme utọ gospel emi nte ata idiọk n̄wed emi mîkpanaha owo enyene m̀mê okot.

Mme mọn̄k ye mme ewet n̄wed eset oro ẹma ẹtịm mme inua-okot gospel emi ẹbon. Ndien ke n̄kpọ nte isua ikie iba emi ẹkebede, mme owo ẹma ẹfiak ẹtọn̄ọ ndikot mme gospel emi, ntre ẹma ẹfiak ẹsion̄o mme n̄wed emi. Ẹsion̄o mmọ mfịn ke ediwak usem.

Mme Inua-Okot Gospel Ibietke-Biet Mbụk Aban̄ade Jesus

Mme inua-okot gospel emi ẹsiwak ndinen̄ede ntịn̄ mban̄a mbon oro owo mîtịn̄ke ekese iban̄a ke mme ata Gospel. Mîdịghe mmọ ẹsitịn̄ ẹban̄a mme n̄kpọ emi ẹdọhọde ke ẹketịbe ke ini Jesus edide ekpri. Se ndusụk uwụtn̄kpọ mi.

◼ “Inua-okot Gospel James,” emi ẹnyụn̄ ẹkotde “Emana Mary” etịn̄ aban̄a emana Mary ye ini emi enye ekedide eyenọwọn̄ onyụn̄ etịn̄ aban̄a ndọ esie ye Joseph. Edi enyene se inamde ẹkot enye ikpîkpu mbụk ye n̄ke ido ukpono. Enye anam mme owo ẹkere ke Mary ikọfiọkke erenowo tutu enye akpa; ẹkenyụn̄ ẹwet n̄wed emi ndinọ Mary ubọn̄.—Matthew 1:24, 25; 13:55, 56.

◼ “Gospel Thomas” enen̄ede etịn̄ aban̄a ini Jesus ekedide ekpri—n̄kpọ nte isua 5 esịm 12—onyụn̄ ọdọhọ ke enye ama anam ediwak utịben̄kpọ emi mîbietke-biet akpanikọ. (Se John 2:11.) Mme gospel emi ẹnam etie nte ke Jesus ekedi idiọk eyenọwọn̄ emi esisọpde iyatesịt onyụn̄ osiode usiene ke se ededi oro mme andikpep, mbọhọidụn̄, ye nditọwọn̄ eken ẹnamde enye. Ndusụk ini enye anam mmọ ẹdọn̄ọ nnan, edi mbụn̄ọ, mîdịghe akam owowot mmọ.

◼ Ndusụk inua-okot gospel, utọ nte “Gospel Peter,” etịn̄ aban̄a ikpe, n̄kpa, ye ediset ke n̄kpa Jesus. Mbon eken, utọ nte “Utom Pilate,” emi esịnede ke “Gospel Nicodemus,” etịn̄ aban̄a Pilate, Nicodemus, ye mme owo ntre. Mme n̄kpọ en̄wen emi ẹdide ẹdifiọk, idem ye mme owo n̄ko, ẹwụt ke mme gospel emi inenke. “Gospel Peter” anam etie nte ke Pontius Pilate ikenyeneke nduduọhọ, onyụn̄ etịn̄ aban̄a ediset ke n̄kpa Jesus nte n̄kpọ ndyọ.

Mme Inua-Okot Gospel ye Mfiakedem Ido Ukpono Christ

Ke December 1945, ke ebiet emi ekperede Nag Hammadi ke Edem Edere Egypt, mme ọtọin̄wan̄ ẹma ẹkụt ikpan̄wed n̄kukịp 13. Mme ikpan̄wed emi ẹma ẹdọn̄ọ n̄kani uwetn̄kpọ 52. Ẹdọhọ ke mbon ndedịbe ukpepn̄kpọ ido ukpono ye akwaifiọk ẹkewet n̄kpọ ke mme ikpan̄wed emi, oro ẹkesiode ke n̄kpọ nte isua 1,700 emi ẹkebede. Mmọ ẹma ẹbuak ndedịbe odudu, ukpono ndem, ukpepn̄kpọ akwaifiọk Greece, Ido Ukpono Mme Jew, ye Ido Ukpono Christ ke ukpepn̄kpọ mmọ, ndien emi ama abiat ndusụk mbon oro ẹkedọhọde ke idi mme Christian.—1 Timothy 6:20, 21.

“Gospel Thomas,” “Gospel Philip,” ye “Gospel Akpanikọ” oro ẹdude ke “Itie Ubonn̄wed Nag Hammadi” ẹdọn̄ọ nsio nsio ndedịbe ukpepn̄kpọ ido ukpono ye akwaifiọk emi ẹnamde ẹtie nte Jesus ekekpep. Ẹbat n̄ko “Gospel Judas” oro ẹkesụk ẹfiọhọde ndondo emi ẹsịn ke otu ndedịbe ukpepn̄kpọ ido ukpono ye akwaifiọk. Enye ọdọhọ ke Judas ekedi ata eti owo ye n̄kukụre apostle emi eketịmde ọfiọk owo emi Jesus edide. Ataifiọk kiet emi etịmde ọdiọn̄ọ “Gospel Judas” ọdọhọ ke enye ọdọhọ ke Jesus ekedi “andikpep ye andiyarade ọniọn̄ ye ifiọk, idịghe andinyan̄a oro akakpade man emen idiọkn̄kpọ ererimbot efep.” Edi mme Gospel oro ẹkedade odudu spirit Abasi ẹwet ẹkpep ke Jesus akakpa man ẹmen idiọkn̄kpọ ererimbot efep. (Matthew 20:28; 26:28; 1 John 2:1, 2) Imenen̄ede ikụt mi ke owo ikewetke mme inua-okot gospel emi man ẹnam mme owo ẹbuọt idem ke Bible.—Utom 20:30.

Mme Ata Gospel Inyeneke Mbiet

Kpukpru se inemede emi iban̄a mme inua-okot gospel ẹwụt ke mmọ ẹdi mme abian̄a abian̄a gospel, ke idịghe Abasi ọkọnọ odudu spirit esie ẹda ẹwet mmọ. (2 Timothy 1:13) Sia edide mbon emi mîfiọkke Jesus m̀mê mme apostle esie ẹkewet mme inua-okot gospel emi, inyeneke se mmọ ẹkemede ndikpep nnyịn mban̄a Jesus m̀mê Ido Ukpono Christ. Utu ke oro, mmọ ẹdi abian̄a abian̄a gospel emi ẹdọn̄ọde ikpîkpu mbụk, kpa mbụk emi mîkemeke ndin̄wam nnyịn ifiọk Jesus ye mme ukpepn̄kpọ esie.—1 Timothy 4:1, 2.

Edi mme ata Gospel itiehe ntem. Matthew ye John emi ẹketienede ẹwet mme ata Gospel ẹkedu ke otu mme apostle 12; Mark ama onyụn̄ enen̄ede ekpere Peter, Luke onyụn̄ enen̄ede ekpere Paul. Abasi ọkọnọ mmọ spirit esie ndiwet mme Gospel emi. (2 Timothy 3:14-17) Ntre, mme Gospel emi ẹdọn̄ọ kpukpru se ikemede ndinam owo enịm ke “Jesus edi Christ, Eyen Abasi.”—John 20:31.

[Ebiet ẹdade ndise ẹto ke page 18]

Kenneth Garrett/National Geographic Stock