Mme Andikot N̄wed Nnyịn Ẹbụp Ẹte . . .

Ndi Mme Ọdọ Ndọ Ikpọn̄ Ẹsikop Inemesịt?

▪ Ndi Bible ọdọhọ ke owo mîdọhọ ndọ ikopke inemesịt? Ekeme nditie ntre edieke owo mîtịmke ise. Ntak idọhọde ntre?

Genesis ọdọhọ ke Abasi ama okụt ke “ifọnke” owo, oro edi, Adam ndidu ikpọn̄. Ntre enye ama obot Eve, “nsan̄a eke ekemde,” ọnọ Adam. (Genesis 2:18) Ikọ oro “eke ekemde” ọwọrọ ke enyene se mîkekemke, ndien ke enye anam n̄kpọ oro ekem m̀mê ọyọhọ. Emi ekeme ndinam nnyịn ikere ke owo emi mîdọhọ ndọ iyọhọke owo kan̄a. Ke adianade do, ediwak itie ke Bible ẹwụt ke ndọ esinam owo okop inemesịt onyụn̄ asan̄a ye edidiọn̄. Uwụtn̄kpọ kiet edi mbụk Ruth.

Edi ndi utọ mbụk oro ẹkpep nnyịn nte ke mme Christian ikemeke ndikop inemesịt ibọhọke mmọ ẹdọ ndọ ẹnyụn̄ ẹnyene nditọ? Idịghe ntre. Idụhe owo emi okokopde inemesịt nte Jesus Christ. Edi enye ikọdọhọ ndọ. Jesus ekenyene ọniọn̄ akan kpukpru owo, enye okonyụn̄ enen̄ede ebiet Ete esie, Jehovah, emi edide “Abasi inemesịt.” (1 Timothy 1:11; John 14:9) Jesus ama etịn̄ se isinamde owo okop inemesịt ke ererimbot emi. (Matthew 5:1-12) Edi enye ikasiakke ndọ isịn ke otu n̄kpọ oro enye akabatde.

Ntre ndi Bible edi etetịn̄ esịn etetịn̄ osio ke n̄kpọ ndọ emi? Ihih, idịghe ntre. Man n̄kpọ emi an̄wan̄a nnyịn, ana iti se ikanamde Jehovah ọtọn̄ọ ndọ. Kpa ye oro enye akanamde ndọ man ọnọ owo inemesịt, anam n̄wan ye ebe ẹnen̄ede ẹdiana kiet, ẹnyụn̄ ẹdọn̄ kiet eken esịt, ndọ n̄ko esinam uduak Abasi osu ndusụk ini. Ke uwụtn̄kpọ, Abasi ọkọdọhọ Adam ye Eve “ẹtọt ẹnyụn̄ ẹwak ẹnyụn̄ ẹyọhọ ke isọn̄.” (Genesis 1:28) Adam m̀mê Eve ikpekekemeke nditie ke idemesie nsu uduak Abasi emi. Edi akana mmọ mbiba ẹdọ ndọ mbemiso ẹkemede ndinam emi.

Jehovah ama onyụn̄ ada ndọ ye ubon anam uduak esie ke ini Israel ẹkedide ikọt esie. Enye okoyom nditọ Israel ẹnen̄ede ẹwak mbak mme asua idikan mmọ. Enye n̄ko okoyom Messiah oto ubon Judah edinyan̄a mbon emi ẹmade imọ osio ke idiọkn̄kpọ ye n̄kpa. (Genesis 49:10) Nti iban ke Israel ẹkeda ndọ ye uman nditọ nte ata akpan n̄kpọ, ẹnyụn̄ ẹda unana ebe ye nditọ nte n̄kpọ o-bụt ye esuene.

Nso kaban̄a mfịn? Ndi Abasi ke oyoyom mme Christian ẹka iso “ẹyọhọ ke isọn̄” emi mme owo ẹma ẹkeyọyọhọ mi? Ihih. (Matthew 19:10-12) Sia Messiah ama ekededi edimana, ufọn idụhe Abasi ndisio akpan idụt kiet n̄kpeme nte n̄kpọ eke ẹdọhọde ke Andinyan̄a ọmọn̄ afiak edimana. Didie ndien ke mme Christian ẹkpese ndọ ye editie ikpọn̄?

Ke nditịm ntịn̄, mbiba ẹdi enọ Abasi. Ekeme ndinen̄ede ndọn̄ owo kiet ndidọ ndọ, ke ini owo en̄wen amade nditie ntre ke idemesie. Ndọ edi ndutịm Abasi emi ekemede ndinam ima ye edidianakiet ẹdu ke ubon. Edi Bible ọdọhọ n̄ko ete ke mbon oro ẹdọde ndọ ke idiọk ererimbot emi ẹyesobo mfịna, m̀mê ẹkụt “ukụt ke obụkidem.” Jehovah idaha owo nditre ndidọ ndọ nte n̄kpọ esuene m̀mê n̄kpọ o-bụt. Utu ke oro, Bible ọdọhọ ke onyụn̄ enyene n̄kpọ emi owo emi mîdọhọ ndọ adade ọfọn akan owo emi ọdọde.—1 Corinth 7:28, 32-35.

Se inemede emi owụt ke Abasi ada mme ọdọ ndọ ye mbon emi mîdọhọ ndọ ukem ukem. Jehovah emi ọkọtọn̄ọde ndọ oyom kpukpru mme asan̄autom esie ẹkop inemesịt edide mmọ ẹdọ ndọ m̀mê idọhọ.