Ndi Ọdiọk Ndibụp Abasi Mbụme?

NDUSỤK owo ẹdọhọ ke ifọnke owo obụp Abasi mbụme. Mmọ ẹkeme ndikere ke edi usọn̄enyịn ndibụp Abasi ntak emi enye ayakde ndusụk n̄kpọ ẹtịbe. Ndi afo nde emesikere ntre?

Edieke edide emesikere, ekeme ndikpa fi idem ndifiọk ke ediwak nti owo ẹma ẹsibụp Abasi mbụme. Kere ban̄a se ndusụk mmọ ẹkebụpde Abasi:

Job okobụp ete: “Ntak emi afo edịpde iso fo onyụn̄ adade mi nte asua fo?”—Job 13:24.

Prọfet Habakkuk okobụp ete: “Ntak emi afo esede mbon abian̄a, onyụn̄ odopde uyo ke ini idiọkowo osobode owo emi enende akan enye?”—Habakkuk 1:13.

Jesus Christ okobụp ete: “Abasi mi, Abasi mi, ntak emi afo ọkpọn̄de mi?”—Matthew 27:46.

Ke ini okotde mme ufan̄ikọ oro ẹtienede mbon oro ẹkotde ẹsịn mi, udukwe n̄kpọ ndomokiet oro owụtde ke Jehovaha Abasi ama ayat esịt ke ini ẹkebụpde enye mme mbụme emi. Ikpaha nnyịn idem ndifiọk ke Abasi esinyịme ẹbụp imọ mbụme. Ke uwụtn̄kpọ, ke ini ibụpde m̀mê idọhọde Abasi ọnọ nnyịn n̄kpọ udu uwem, enye isidaha emi nte usọn̄enyịn. Esikam enenem enye ndinọ nnyịn se iyomde. (Matthew 6:11, 33) Enye enyịme n̄ko ndinọ nnyịn item oro ekemede ndinam esịt ye ekikere nnyịn ẹna sụn̄. (Philippi 4:6, 7) Jesus ọkọdọhọ mme mbet esie ete: “Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt.” (Matthew 7:7) Ana in̄wan̄-in̄wan̄ ke ikọ Jesus ikọwọrọke ke Abasi edinọ nnyịn n̄kpọ udu uwem kpọt, edi ọwọrọ n̄ko ke enye ọyọbọrọ nnyịn mme akpan mbụme oro ẹfịnade nnyịn.

Edieke ekpenyenede ifet ndibụp Abasi mbụme, ewe ke otu mme mbụme emi ke afo okpobụp enye?

● Ntak emi afo okobotde mi-e?

● Nso iditịbe mma n̄kpa?

● Ntak emi afo ayakde mbọ ufen-e?

Sia edide “Abasi ọkọnọ odudu spirit ẹda ẹwet ofụri N̄wed Abasi,” afo oyokụt nte enye ọbọrọde mme mbụme emi ke Bible. (2 Timothy 3:16) Kere ban̄a ntak emi ndusụk owo ẹsibụpde Abasi mbụme ye nte Enye ọbọrọde mme mbụme emi ke Bible.

[Ikọ Idakisọn̄]