N̄kpri-N̄kan Abisi Hebrew Etiene Owụt ke Un̄wọn̄ọ Abasi Oyosu

Ndi emenen̄ede enịm ke kpukpru se Abasi ọn̄wọn̄ọde oyosu? Jesus ama enịm, ndien se enye ekekpepde mme owo ama anam mmọ n̄ko ẹnịm ke kpukpru se Abasi ọn̄wọn̄ọde oyosu. Kere ban̄a uwụtn̄kpọ emi enye ọkọnọde ke ini enye ọkọkwọrọde ikọ ke obot. Ẹwet uwụtn̄kpọ emi ke Matthew 5:18. Itie oro ọdọhọ ete: “Ndọhọ mbufo ke akpanikọ nte edi mmemmem n̄kpọ enyọn̄ ye isọn̄ ndibe mfep akan n̄kpri-n̄kan abisi m̀mê ubak abisi ke Ibet ndidedei mbe mfep ndien kpukpru n̄kpọ idaha itie.”

N̄kpri-n̄kan abisi Hebrew edi י (yod), emi edide akpa abisi ke abisi Hebrew inan̄ oro adade ọnọ edisana enyịn̄ Abasi, Jehovah.a Idịghe mme abisi kiet kiet ke ibet ye ikọ Ibet Abasi kpọt ke mme scribe ye mme Pharisee ẹkeda ke akpan n̄kpọ, mmọ ẹma ẹda “ubak abisi” kiet kiet n̄ko ke akpan n̄kpọ.

Jesus ọkọdọhọ ke edi mmemmem n̄kpọ enyọn̄ ye isọn̄ ndibe mfep akan n̄kpri-n̄kan n̄kpọ ke Ibet nditre ndisu. Edi Bible ọdọhọ ke ata enyọn̄ ye isọn̄ idibehe ifep, ke ẹdidu ke nsinsi. (Psalm 78:69) Ntre, ikọ Jesus emi ọwọrọ ke idụhe n̄kpọ ndomokiet ke Ibet, ọkpọkọm ekpri nte nso, emi mîdisụhu.

Ndi n̄kpri n̄kpri n̄kpọ ntre ẹsibehe Jehovah Abasi? Ih, ẹsibehe. Yak inọ uwụtn̄kpọ kiet: Abasi ọkọdọhọ nditọ Israel ete ẹkûbụn̄ ọkpọ eyenerọn̄ Passover. (Exodus 12:46) Emi ekeme nditie nte ata ekpri n̄kpọ. Ndi mmọ ẹma ẹdiọn̄ọ ntak emi ẹkedọhọde mmọ ẹkûbụn̄ ọkpọ ndomokiet? Etie nte mmọ ikọdiọn̄ọke. Edi Jehovah Abasi ama ọdiọn̄ọ ke n̄kpọ emi ada aban̄a se iditịbede inọ Messiah, ke owo idibụn̄ke ọkpọ esie ke ini ẹdikọn̄de enye ke eto iwot.​—Psalm 34:20; John 19:​31-33, 36.

Nso ke ikọ Jesus emi ekpep nnyịn? Nnyịn n̄ko imekeme ndinen̄ede nnịm ke kpukpru se Jehovah Abasi ọn̄wọn̄ọde oyosu, ọkpọkọm ekpri nte nso. Ke akpanikọ, n̄kpri-n̄kan abisi Hebrew etiene owụt ke un̄wọn̄ọ Abasi oyosu!