Tịm Esịt Fo Mbemiso Ọtọn̄ọde Ndikpep Ikọ Abasi

Ima ikpep Bible, iyom se ikpepde iban̄a Jehovah enen̄ede odụk nnyịn esịt man se ikerede ye se idọn̄de nnyịn ẹdi se enye oyomde. Ezra “ama etịm esịt esie ndidụn̄ọde ibet Jehovah.” Eti uwụtn̄kpọ ekedi oro. (Ezra 7:10) Didie ke ikpetịm esịt nnyịn?

Bọn̄ akam. Ini ekededi emi oyomde ndikpep Bible, tọn̄ọ ke akam. Dọhọ Jehovah an̄wam fi yak se ekpepde an̄wan̄a fi, onyụn̄ ekeme ndinanam se ekpepde.​—Ps. 119:18, 34.

Sụhọde idem. Mbon emi ẹtan̄de idem ẹnyụn̄ ẹkerede ke ifiọk idem mmimọ ke idida idiọn̄ọ se idude ke Bible isidiọn̄ọke akpanikọ koro Jehovah isitatke mmọ enyịn yak ẹdiọn̄ọ. (Luke 10:21) Yak okûdi ke afo ekpep Ikọ Abasi man anam mbon en̄wen ẹkụt ke ọmọdiọn̄ọ n̄kpọ eti-eti. Ekpekpep Ikọ Abasi okokụt se anade okpụhọde, sụhọde idem kpụhọde.

Domo ndikpan̄ utọn̄ n̄kop ikwọ esop Abasi. Ikwọ enyene odudu eti-eti, esidụk nnyịn esịt, onyụn̄ anam isịn ekikere ke se iyomde ndikpep. Ama akpan̄ utọn̄ okop ikwọ esop Abasi mbemiso ọtọn̄ọde ndikpep Bible, oro ekeme ndinam se ekpepde enen̄ede odụk fi esịt.