Nso Idi Obio Ubọn̄ Abasi?

Se Bible ọdọhọde

Obio Ubọn̄ Abasi edi ata ukara emi Jehovah Abasi owụkde. “Obio ubọn̄ Abasi” ke Bible onyụn̄ okot “obio ubọn̄ heaven” sia ẹditiede ke heaven ẹkara ke Obio Ubọn̄ oro. (Mark 1:14, 15; Matthew 4:17) Odu ediwak n̄kpọ emi enye adade ebiet ukara owo, edi enye akan ukara owo ke kpukpru usụn̄.

• Mme Andikara. Abasi emek Jesus Christ nte Edidem Obio Ubọn̄ oro onyụn̄ ọnọ enye odudu emi andikara ndomokiet mînyeneke. (Matthew 28:18) Jesus ada odudu emi anam eti n̄kpọ, sia enye ama owowụt ke imọ idi Andikara oro ẹkemede ndiberi edem onyụn̄ atuade owo mbọm. (Matthew 4:23; Mark 1:40, 41; 6:31-34; Luke 7:11-17) Abasi ada Jesus emek mme owo ke kpukpru idụt emi ‘ẹditienede enye ẹtie ke heaven ẹkara isọn̄ nte ndidem.’—Ediyarade 5:9, 10.

• Ini ukara. Obio Ubọn̄ Abasi itiehe nte ukara owo emi ẹsikpụhọde andikara, ‘owo idisoboke enye ifep tutu amama.’—Daniel 2:44.

• Mbon emi ẹdidude. Owo emi anamde se Abasi oyomde ekeme ndidu ke Obio Ubọn̄ Abasi, inamke n̄kpọ m̀mê enye oto m̀mọ̀n̄.—Utom 10:34, 35.

• Ibet. Ibet (m̀mê ewụhọ) Obio Ubọn̄ Abasi ẹkpan owo ndinam ndiọi n̄kpọ ẹnyụn̄ ẹnam mmọ ẹnyene nti edu. Ke uwụtn̄kpọ, Bible ọdọhọ ete: “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ. Udiana, eke ebietde enye, edi emi, ‘Afo enyene ndima mbọhọidụn̄ fo nte idemfo.’” (Matthew 22:37-39) Ima Abasi ye ima mbọhọidụn̄ anam mbon oro ẹdidude ke Obio Ubọn̄ ẹnam nti n̄kpọ ẹnọ mbon efen.

• Ukpep. Ẹtịn̄ nte mbon oro ẹdidude ke Obio Ubọn̄ Abasi nte ẹkpedude uwem, ẹnyụn̄ ẹkpep mmọ ndinam emi.—Isaiah 48:17, 18.

• Se Obio Ubọn̄ edinamde. Mbon oro ẹdikarade inamke idemmọ ẹforo ke adan̄aemi ẹnamde mbon eken ẹbuene. Utu ke oro, enye ayanam se Abasi aduakde, esịnede ndinam mbon oro ẹmade Abasi ẹdu ke nsinsi ke Paradise isọn̄.—Isaiah 35:1, 5, 6; Matthew 6:10; Ediyarade 21:1-4.