Exodo

Paca zaque quĩrãca opeɗaɗa

32 Moisera Sinai eyaɗeba eɗaa zeẽ́ ɓʉda dãrãbʉrʉ bẽrã israelerãra Aaroʉ̃maa wãnapeɗa nãwã jarasiɗaa:

–Jãʉ̃ Moiseba dairãra Egiptoɗeba ẽdrʉ enesia, baribʉrʉ idji sãwãnada dairãba cawaɗaẽ́a. Maʉ̃ bẽrã dairã nocoɗaa edemãrẽã ãcõrẽda odua.–

2 Aaroʉ̃ba panusia:

–Bia ɓʉa. Bãrã wẽrãrãba, bãrã warrarãba, bãrã caurã biɗa pĩrũ oro oɗada mʉ̃́a jũma ẽrã diaɗadua.–

3 Ara maʉ̃da ãdjirãba pĩrũ oro oɗara Aaroʉ̃a jũma ẽrã diacuasiɗaa. 4 Aaroʉ̃ba maʉ̃ pĩrũra edapeɗa tʉbʉɗe dorraɓaribisia. Maʉ̃ oro dorraɓariɗaba paca zaque quĩrãca osia. Maʉ̃ ununapeɗa israelerãba jarasiɗaa:

–Naʉ̃drʉ dadjirã Egiptoɗeba ẽdrʉ enena ãcõrẽa.–

5 Maʉ̃ ũrĩpeɗa Aaroʉ̃ba animarã babue diabadada osia paca zaque jʉwaba oɗa caita. Maʉ̃be israelerãa nãwã jarasia:

–Nu ewari dromada Ãcõrẽ itea oɗia.–

6 Nurẽma diapeɗeɗa israelerãra piraɓariɗapeɗa animarãda babue diacuasiɗaa idjaɓa Ãcõrẽ ume necai ɓai careabema animarãda beacuasiɗaa. Maʉ̃be chũpanenapeɗa ɓʉsriɗa ne co duanasiɗaa idjaɓa itua do duanasiɗaa. Mãwãnacarea piraɓariɗapeɗa ãdji cacuaba o quĩrĩã ɓʉda o duanesiɗaa. 7 Maʉ̃ne Ãcõrẽba Moisea jarasia:

–Isabe eɗaa wãdua bʉ ẽberãrã Egiptoɗeba enenaba cadjiruada o duanʉ bẽrã. 8 Ãdjirãba dãrãẽ́ne mʉ̃ leyra igaraɗapeɗa oroda dorraɓaribiɗapeɗa paca zaque quĩrãca osiɗaa. Maʉ̃gʉ́a ãdjirãba bia beɗea panʉa idjaɓa animarãda babue diacuaɗapeɗa jara panʉa: “Naʉ̃drʉ dadjirã Egiptoɗeba ẽdrʉ enena Ãcõrẽa.”–

9 Idjaɓa Ãcõrẽba Moisea jarasia:

–Mʉ̃a unu ɓʉa naʉ̃ ẽberãrãra cʉwʉrʉ zarea ɓeada. 10 Ãdjirã carea mʉ̃́a beɗea djuburiarãdua. Mʉ̃ quĩrũbiɗeba ãdjirãra jũma quinibiya. Baribʉrʉ bʉɗeba mʉ̃a puru waiɓʉada oya.–

11 Mãwãmĩna Moiseba idji Ãcõrẽa beɗea djuburiasia. Nãwã jarasia:

–Ay, Ãcõrẽ, bʉ quĩrũbiɗeba bʉ puru Egiptoɗeba enenara mãwã orãdua. ¿Bʉ ʉɓʉa waiɓʉa ɓʉɗeba maʉ̃ purura Egiptoɗeba ẽdrʉ enesiẽ́ca? 12 Ãdjirãda mãwã quinibibʉrʉ egiptorãba jaraɗia bʉa israelerãra ẽdrʉ enesida biẽ́ oi carea. Jaraɗia naʉ̃ eyaɗaa enesida quenai carea ni aɓaʉ ãdjiɗebemada naʉ̃ ẽjũãne ɓerãmãrẽã. ¿Bʉa quĩrĩã ɓʉca egiptorãba mãwã jaraɗida? Maʉ̃ bẽrã bʉ quĩrũbira tumadua. Bʉ puru quinibi crĩcha eroɓʉra quĩrãdoadua. 13 Quĩrãnebadua bʉ nezocarã Abrahaʉ̃ ume, Isa ume, idjaɓa Jacobo ume biɗa beɗea ɓʉɗada. Bʉa ara bʉdji trʉ̃neba ãdjirãa wãrãneba nãwã jarasia: “Mʉ̃a bãrãneba ẽberãrã zocãrã yõbiya chĩdau zocãrã bajãne panʉ quĩrãca.* Idjaɓa jũma mʉ̃a diai jaraɗa druara mʉ̃a bãrãneba yõbʉdarãa diaya ãdjirãne bamãrẽã.”–*

14 Moiseba jara ɓʉ carea Ãcõrẽba idji puru quinibi crĩcha eroɓaɗara idu ɓʉsia.

15 Maʉ̃be Moisera Sinai eyaɗeba eɗaa zesia. Idji jʉwaɗe mõgara peweɗea ɓʉda umé enesia. Maʉ̃ mõgaraɗe Ãcõrẽba ĩjã obi ɓʉ beɗeada quĩrã umena ɓʉ́ ɓasia. 16 Ãcõrẽbʉrʉ maʉ̃ umébema mõgara peweɗea ɓʉda osia; idjiabʉrʉ maʉ̃ mõgaraɗe jaya ɓʉsia.

17 Maʉ̃ zebʉdaɗe Josueba israelerãra ɓʉga nũmʉda ũrĩsia. Maʉ̃ne idjia Moisea jarasia:

–Mʉ̃a israelerã duanʉma djõ panʉ quĩrãca ũrĩ ɓʉa.–

18 Moiseba panusia:

–Mʉ̃a ũrĩ ɓʉra dji quĩrũ poyabʉdaɗe ɓiabada quĩrãca ɓʉẽ́a, ni dji quĩrũba poyabʉdaɗe ɓiabada quĩrãca ɓʉẽ́a. Mʉ̃a ũrĩ ɓʉ quĩrãca ãdjirãra ɓʉsriɗa trʉ̃ã duanʉa.–

19 Moise israelerã duanʉ caita jũẽsiɗe unusia ãdjirãra cari duanʉda idjaɓa paca zaque ãdji jʉwaba opeɗaɗada. Maʉ̃ carea bio quĩrũpeɗa Ãcõrẽba diaɗa mõgara peweɗeada Sinai eya carraɗaa jĩãwẽsia. Maʉ̃ mõgarara jũma toɗozoasia. 20 Ara maʉ̃da ãdji jʉwaba opeɗaɗa paca zaquera edapeɗa tʉbʉɗe dorraɓaripeɗa ʉraɓasia. Maʉ̃ porara doeɗa jĩãposia ãdjirãa dobi carea.

21 Maʉ̃be Moiseba Aaroʉ̃a jarasia:

–¿Naʉ̃ ẽberãrãba bʉra sãwã osiɗa bʉa naʉ̃ cadjirua waiɓʉada ãdjirãa obi carea?–

22 Aaroʉ̃ba idji djabaa nãwã panusia:

–Ay, mʉ̃ boro, mʉ̃ ume quĩrũrãdua. Bʉa bio cawa ɓʉa naʉ̃ ẽberãrãba cadjiruadrʉ o quĩrĩãbadada. 23 Ãdjirãba mʉ̃́a jarasiɗaa: “Jãʉ̃ Moiseba dairãra Egiptoɗeba ẽdrʉ enesia, baribʉrʉ idji sãwãnada dairãba cawaɗaẽ́a. Maʉ̃ bẽrã dairã nocoɗaa edemãrẽã ãcõrẽda odua.” 24 Maʉ̃ carea mʉ̃a panusia: “Oro oɗa pĩrũ eroɓeaba mʉ̃́a ẽrã diaɗadua.” Ara maʉ̃da ãdjirãba ẽrã diacuasiɗaa. Maʉ̃da mʉ̃a tʉbʉɗe ɓatabuepeɗa cawaẽ́ne paca zaque quĩrãca ɓʉda odjasia.–

25 Moiseba unusia israelerãba baridua quĩrã perada o duanʉda Aaroʉ̃ba iduaribiɗa bẽrã. Idjia cawasia maʉ̃gʉ carea dji quĩrũba ãdjida ipiɗa jara duananida. 26 Maʉ̃ carea Moisera ãdji duanʉma eɗa wãbada oɗe ʉ̃ta nũmepeɗa jarasia:

–Ãcõrẽare panʉra mʉ̃maa zeɗadua.–

Ara maʉ̃da jũma Leviɗeba yõpeɗaɗadrʉ idjimaa wãsiɗaa. 27 Maʉ̃ne Moiseba ãdjirãa jarasia:

–Dadji israelerã Ãcõrẽba nãwã jara ɓʉa: “Bãdjiza bãrã djõbada necora edaɗapeɗa jẽda wãnadua israelerã duanʉmaa. Deza mʉ̃ igara panʉra beaɗe wãnadua. Bãrã djabarã siɗa, bãrã ume dji biarã siɗa, bãrã de caitabemarã siɗa beaɗadua.”–

28 Ara maʉ̃da Leviɗeba yõpeɗaɗarãba Moiseba jaraɗa quĩrãca osiɗaa. Maʉ̃ ewariɗe ãdjirãba israelerãda mil ũbea beasiɗaa.

29 Maʉ̃be Moiseba jarasia:

–Bãrã warrarãra, bãrã djabarã siɗa beasiɗa bẽrã iɗira Ãcõrẽ itea panesiɗaa. Ãcõrẽba obiɗara ĩjãsiɗa bẽrã iɗira idjia bãrãra bia carebaya.–

30 Nurẽma Moiseba israelerãa jarasia:

–Bãrãba cadjirua waiɓʉada osiɗaa. Maʉ̃ bẽrã mʉ̃ra Sinai eyaɗe ʉ̃taa Ãcõrẽmaa wãya. Ãĩbẽrã mʉ̃a Ãcõrẽa bãrãba cadjirua opeɗaɗara quĩrãdoabisicada.–

31 Ara maʉ̃da Moisera wayacusa Sinai eyaɗe ʉ̃taa wãpeɗa Ãcõrẽa nãwã beɗea djuburiasia:

–Wãrãda jãʉ̃ ẽberãrãba cadjirua waiɓʉada osiɗaa. Paca zaque oroɗeda osiɗaa ãdji ãcõrẽ bamãrẽã. 32 Mãwãmĩna mʉ̃ quĩrã djuburia ãdjirãba cadjirua opeɗaɗara quĩrãdoadua. Baribʉrʉ poya quĩrãdoaẽ́bʉrʉ, mʉ̃ trʉ̃ siɗa ãyã ɓʉdua bʉ ẽberãrã trʉ̃ ɓʉ́ eroɓʉɗebemada.–

33 Ãcõrẽba Moisea panusia:

–Mʉ̃a aɓabe cadjirua oɗa ẽberã trʉ̃da ãyã ɓʉya. 34 Jãʉ̃be wãdua. Jãʉ̃ ẽberãrãra ededua mʉ̃a bʉ́a jaraɗa druaɗaa. Mʉ̃ nezoca bajãnebemara bãrã na wãya. Baribʉrʉ mʉ̃a cawa oi ewariɗe ãdjirãra cawa oya cadjirua opeɗaɗa carea.–

35 Maʉ̃be Ãcõrẽba israelerãra zocãrã quinibisia Aaroʉ̃ba jʉwaba oɗa paca zaquea bia beɗea duanana carea.