Luca
Oveja aduaɗaɗebema ne jara ɓʉ
15 Ewari aɓa Romanebema boro itea parata jʉrʉ pebadarãda, cadjirua obadarã siɗa Jesuba jaradia ɓʉ ũrĩni carea zesiɗaa. 2 Maʉ̃ carea pariseorãba, judiorã ley jaradiabadarã biɗa idjira nãwã biẽ́ jarasiɗaa:
–Idjia cadjirua obadarãda bia edapeɗa ãdji ume ne cobaria.–
3 Maʉ̃ carea Jesuba ãdjía ne jara ɓʉɗeba nãwã jarasia:
4 –Aɓaʉba cien oveja eroɓʉɗebemada aɓa aduaibʉrʉ ¿sãwã oi? ¿Dji 99 panʉra ẽjũã ewaraga ɓʉɗe amepeɗa dji aduaɗada jʉrʉɗe wãẽ́ca aɓa unubʉrʉɗaa? 5 15:5-6 Unusira idji equiaɗe edapeɗa bio ɓʉsriɗaa diguiɗaa edeya. Maʉ̃be idji dji biarãra, idji caita panabadarã siɗa trʉ̃cuapeɗa jaraya: “Bãrãra mʉ̃ ume ɓʉsriɗaɗadua. Mʉ̃ oveja aduaɗara unusia.” 6 –
7 Ara maʉ̃ quĩrãca mʉ̃a bãrãa jaraya: 99 jipa ɓea carea bajãnebemarãra ɓʉsriɗabadamĩna, biara ɓʉsriɗabadaa ẽberã aɓa cadjirua obarida Ãcõrẽmaa zebʉrʉɗe.–
Parata torro aduaɗa
8 Wẽrãba parata torro die eroɓʉɗebemada aɓa aduaibʉrʉ, ¿ĩbĩrã coapeɗa idji dera bio imaẽ́ca aɓa dji parata unubʉrʉɗaa? 9 Unusira idji dji biarãra, idji caita panabadarã siɗa trʉ̃cuapeɗa jaraya: “Zeɗadua, mʉ̃ ume ɓʉsriɗaɗadua. Mʉ̃ parata aduaɗara unusia.” 10 Mʉ̃a jaraya ara maʉ̃ quĩrãca cadjirua obarida aɓa Ãcõrẽmaa zebʉrʉɗe Ãcõrẽra bajãnebema nezocarã ume bio ɓʉsriɗabadaa.
Warra cadjiruaɗe nĩbaɗaɗebema ne jara ɓʉ
11 Maʉ̃ awara Jesuba jarasia:
–Ẽberãda ɓasia. Maʉ̃ ẽberãba warrada umé eroɓasia. 12 Ewari aɓa dji tẽãbemaba dji zezaa jarasia: “Zeza, bʉa eroɓʉɗebema mʉ̃a edaida ɓʉra mʉ̃́a diadua.” Maʉ̃ carea dji zezaba eroɓʉra ãdjiza diasia. 13 Dãrãẽ́ne dji tẽãbemaba edaɗara jũma nẽdobuepeɗa tʉmʉ dewara druaɗaa wãsia. Mama ne jũma cadjiruada o ɓesia aɓa dji parata jõbʉrʉɗaa.
14 Ni cãrẽ siɗa neẽ́ ɓeɗacarea maʉ̃ druaɗe jarraba waiɓʉada zesia. Maʉ̃ bẽrã warrara bio jarra ɓabadjia. 15 Maʉ̃ carea idjira maʉ̃ druaɗebema ne bara ɓʉ ẽberãmaa traju jʉrʉɗe wãsia. Maʉ̃gʉba chinada idjía wagabisia. 16 Bio jarra ɓaɗa bẽrã chinaba co panʉnebemada idjia biɗa co quĩrĩã ɓabadjia. Mãwãmĩna ni aɓaʉba idjía diaɗaca basía ne comãrẽã.
17 Maʉ̃be cawasia biẽ́ oɗa bẽrã mãwã ɓʉda. Maʉ̃ne ara idjiduɓa jarasia: “Mʉ̃ zeza itea trajabadarãra bio ne cobadaa maʉ̃ne mʉ̃ra nama jarrababa beuboɗoa. 18 Biara ɓʉa ara nawena idjimaa wãida. Jũẽnacarea mʉ̃a idjía jaraya: Zeza, wãrãda mʉ̃a Ãcõrẽ quĩrãpita, bʉ quĩrãpita biɗa cadjiruada osia. 19 Maʉ̃ bẽrã biara ɓʉa mʉ̃ra waa bʉ warraaɗa aẽ́da. Ãtebʉrʉ mʉ̃ra bʉ nezocada ɓʉdua.” 20 Ara maʉ̃da dji zezamaa wãsia.
Dji zezaba idjira tʉmʉ zebʉrʉda unusia. Mĩã djuburi unupeɗa idjimaa pira wãsia. Idjira bʉrʉpeɗa uridarraɗe isõsia. 21 Maʉ̃ne dji warraba jarasia: “Zeza, wãrãda mʉ̃a Ãcõrẽ quĩrãpita, bʉ quĩrãpita biɗa cadjiruada osia. Maʉ̃ bẽrã biara ɓʉa mʉ̃ra waa bʉ warraaɗa aẽ́da.” 22 Baribʉrʉ dji zezaba idji nezocarãa jarasia:
“Djio biyaara quiruda edaɗapeɗa idjía jʉ̃biɗadua. Idji jʉwaɗe sortijada jʉ̃biɗadua. Maʉ̃ awara jĩrũne jʉ̃bada siɗa jʉ̃biɗadua. 23 15:23-24 Maʉ̃be paca zaque boreguea ɓʉda beaɗadua ne coɗi carea. ¡Ɓʉsriɗada oɗia! Mʉ̃ warrara beu ɓaɗada ʉ̃rẽbasia; adua ɓaɗada dadjirãba waya unusiɗaa.” Maʉ̃be bio ɓʉsriɗa duanesiɗaa.
25 Maʉ̃ne dji djaba nabemara traja ɓaɗada diguiɗaa zebʉrʉ basía. De caita jũẽbʉrʉɗe ũrĩsia chiru zá panʉda idjaɓa cari duanʉda. 26 Maʉ̃ carea nezoca aɓa trʉ̃peɗa iwiɗisia cãrẽ cãrẽã mãwã o panʉ cawaya. 27 Dji nezocaba jarasia: “Bʉ zezaba paca zaque boreguea ɓʉda beabisia bʉ djabada jẽda bia zeɗa bẽrã.”
28 Maʉ̃ ũrĩsiɗe quĩrũpeɗa dji deɗe eɗa wã quĩrĩãẽ́ basía. Mãwã ɓʉɗe dji zezara idjimaa wãpeɗa beɗea djuburiasia eɗa wãmãrẽã. 29 Maʉ̃ne dji warra nabemaba dji zezaa jarasia: “Ewari ze nũmʉza mʉ̃ra bʉ itea bio trajabaria. Bʉa jarabʉrʉra jũma o ɓabaria. Mãwãmĩna waɗibiɗa bʉa chiwatu zaqueda aɓa biɗa mʉ̃́a diacaa mʉ̃ dji biarã ume ãbaa ɓʉsriɗa ne coɗi carea. 30 Baribʉrʉ bʉdji warraba bʉ paratara wẽrãrã auɗua ɓea ume jũma cosia. Maʉ̃be bʉmaa zebʉrʉɗe bʉa idji itea paca zaque boreguea ɓʉda beabisia ãbaa ɓʉsriɗa ne coɗi carea.”
31 Maʉ̃ne dji zezaba jarasia: “Warra, bʉra ewariza mʉ̃ ume ɓabaria. Jũma mʉ̃a eroɓʉra bʉrea. 32 Baribʉrʉ bia ɓʉa bʉ djaba waya dadjimaa zebʉrʉ carea ɓʉsriɗada oɗida. Idjira beu ɓaɗada ʉ̃rẽbasia; adua ɓaɗada dadjirãba waya unusiɗaa.”–