Luca
Parata cawa obariɗebema ne jara ɓʉ
16 Jesuba idji ume nĩbabadarãa nãwã jarasia:
–Ẽberã bio bara ɓʉba nezoca dji dromada eroɓasia. Maʉ̃ne ʉ̃cʉrʉba dji boroa jarasiɗaa maʉ̃ nezocaba idji paratara ãĩ o ɓʉda. 2 Maʉ̃ carea dji boroba idjira trʉ̃peɗa nãwã quẽãsia: “Bʉa mʉ̃ parata ãĩ o ɓʉra mʉ̃a ũrĩsia. Bʉa sãwã oɗara cartaɗe acʉbidua. Mʉ̃a bʉra ɓatabueya.”
3 Maʉ̃ ũrĩsiɗe nezocaba ara idjiduɓa jarasia: “Mʉ̃ boroba mʉ̃ra ɓatabuebʉrʉa. ¿Jãʉ̃be mʉ̃a sãwã oi? Mʉ̃ra traju zarea oi carea ʉɓʉaẽ́ ɓʉa; maʉ̃ awara bio pera ɓaya djãrãa ne iwiɗi carea. 4 Mʉ̃a cawa ɓʉa sãwã oida mʉ̃ wãi naẽna. Mãwãra dewararãba mʉ̃ra ãdji deɗe bia edaɗia.”
5 Ara maʉ̃da idji boroa diaɗi bara ɓeada aɓa aɓa trʉ̃cuasia. Dji naãrãbemaa iwiɗisia: “¿Bʉa jũmasãwã mʉ̃ boroa diaida ɓʉ?” 6 Maʉ̃ba panusia: “Mʉ̃a olivo dragada mil galoʉ̃ diaida ɓʉa.”* Maʉ̃ne nezocaba jarasia: “Mãẽteara isabe chũmepeɗa bʉ cartaɗe ɓʉ́ ɓʉra quĩrã awara odua. Ɓʉdua bʉa quinientobe diaida ɓʉda.”
7 Maʉ̃be dewaraa iwiɗisia: “¿Bʉa jũmasãwã diaida ɓʉ?” Maʉ̃ba panusia: “Mʉ̃a trigoda cien ẽ diaida ɓʉa.”* Nezocaba jarasia: “Bʉ cartaɗe ɓʉ́ ɓʉra quĩrã awara odua. Ɓʉdua bʉa ochentabe diaida ɓʉda.”
8 Nezoca cadjiruaba mãwã oɗa carea dji boroba jarasia idjira crĩcha cawa ɓʉda. Wãrãda Ãcõrẽ ẽberãrã cãyãbara naʉ̃ ẽjũãnebemarãba ne edaɗi carea ãdji aɓaricarã ume biara crĩcha cawaaɗeba obadaa.* 9 Ara maʉ̃ quĩrãca mʉ̃a bãrãa jaraya: naʉ̃ ẽjũãnebema parataba zocãrã ẽberãrãda carebaɗadua. Mãwã bãrã dji biarãda zocãrã eropanania. Maʉ̃be bãrã beubʉdaɗe bajãne bia edaɗia.*
10 Aɓaʉba maãrĩ eroɓʉda bia o cawa ɓʉbʉrʉ, waiɓʉa eroɓʉ siɗa bia o cawa ɓaya. Idjaɓa maãrĩ eroɓʉda bia ocabʉrʉ, waiɓʉa eroɓʉ siɗa bia oca baya. 11 Ara maʉ̃ quĩrãca bãrãba naʉ̃ ẽjũãnebema nebiada jipa oɗaẽ́bʉrʉ ¿Ãcõrẽba bajãnebema nebiada bãrãa diaica? 12 Idjaɓa Ãcõrẽba naʉ̃ ẽjũãne diaɗada bãrãba jipa oɗaẽ́bʉrʉ ¿idjia bãrã itea bajãne eroɓʉra diaica?*
13 Ni aɓaʉ nezocaba poya idji boroda umé eroɓaẽ́a. Umé eroɓʉbʉrʉ aɓa biara quĩrĩãya. Aɓa ẽpẽya maʉ̃ne dewarabemara igaraya. Ara maʉ̃ quĩrãca ne bara ɓai awua ɓʉba poya Ãcõrẽda ẽpẽẽ́a.–
14 Jesuba jara ɓʉra pariseorãba jũma ũrĩ duanasiɗaa. Ãdjirãra parata awua ɓea bẽrã isuɗapeɗa ipiɗasiɗaa. 15 Maʉ̃ne Jesuba ãdjirãa jarasia:
–Bãrãra dewararã quĩrãpita ẽberã bia quĩrãca panabadaa. Baribʉrʉ Ãcõrẽba cawa ɓʉa bãrãra wãrãda sãwã ɓeada. Ẽberãrãba bia unubadara Ãcõrẽba bia unucaa.
Ãcõrẽ puruɗebema
16 Juaʉ̃ zei naẽna Ãcõrẽba Moisea diaɗa leyda, Ãcõrẽneba beɗeabadarãba ɓʉpeɗaɗa siɗa dadjirãba eropanasiɗaa. Mamaʉba ʉ̃taa daiba beɗea bia Ãcõrẽ puruɗebemada jaradia panʉa. Wãrãda ẽberãrãba ne jũmada o panʉa Ãcõrẽ puruɗebemarãda ɓeaɗi carea. 17 Baribʉrʉ Ãcõrẽba diaɗa leyra ni maãrĩ biɗa jõẽ́a. Bajãda idjaɓa naʉ̃ ẽjũã siɗa jõichaara ɓʉa.
Jesuba mĩã amaira biẽ́ ɓʉaɗa aɗa
18 Ẽberãba idji quimada amapeɗa dewara wẽrãda edaibʉrʉ daunema ɓʉa. Idjia amana wẽrãda dewara umaquĩrãba edaibʉrʉ maʉ̃ umaquĩrã siɗa daunema ɓʉa.
Lazaro idjaɓa ẽberã bio bara ɓaɗa
19 Ẽberãda ɓasia bio bara ɓʉda. Idjira ewariza wua pursupursuaba idjaɓa dji biara ɓʉ lino caɗaba djiobadjia. Maʉ̃ awara ne cobada dromada ewariza obadjia. Maʉ̃ ẽberãra naʉ̃ ẽjũãne bio bia ɓasia. 20 Maʉ̃ne ẽberã ne neẽ́ quiru Lazaro abadada ɓasia. Lazarora ne bara ɓʉ deɗe eɗa wãbadama egode ɓabadjia. Idjira bio chãdaiɗa ɓasia. 21 Idjia ne bara ɓʉ ne cobadaɗeba jurruɗada co quĩrĩã ɓabadjia. Maʉ̃ne usaba zeɗapeɗa idji chãdara senebadjiɗaa.
22 Mãwã panʉne dji ne neẽ́ queraɗara jaiɗasia. Ara maʉ̃da bajãnebema nezocarãba idjira Abrahaʉ̃ ɓʉmaa edesiɗaa. Mãwãnacarea dji ne bara ɓʉ siɗa jaiɗasia. Maʉ̃be idjira tʉɓarisiɗaa.
23 Tʉbʉ uruaɗe bia mĩga ɓʉɗe ne bara ɓaɗaba Abrahaʉ̃da, Lazaro ume ãbaa panʉda tʉmʉba unusia.* 24 Maʉ̃ carea jĩgua jarasia: “Zeza Abrahaʉ̃, mʉ̃ quĩrã djuburia Lazarora diabuedua. Idji jʉwa jĩwĩnĩra baidoba begueapeɗa mʉ̃ quĩrãme begueaɗe zebidua. Naʉ̃ tʉbʉ uruaɗe mʉ̃ra bio bia mĩga ɓʉa.” 25 Baribʉrʉ Abrahaʉ̃ba panusia: “Poya diabueẽ́a. Warra, quĩrãnebadua bʉ zocai ɓasiɗe ne jũmane bia ɓasida, baribʉrʉ Lazarora biẽ́ ɓasia. Iɗira Lazarora necai ɓʉa, maʉ̃ne bʉra bio bia mĩga ɓʉa. 26 Maʉ̃ awara uria dau cʉre ɓʉda dadjirã ẽsi ɓʉa. Maʉ̃ bẽrã bʉmaa wã quĩrĩã ɓea siɗa poya wãnaẽ́a. Idjaɓa jãmaʉba ni aɓaʉda poya daimaa zeɗaẽ́a.”
27 16:27-28 Maʉ̃ne ne bara ɓaɗaba jarasia: “Zeza Abrahaʉ̃, mãẽteara mʉ̃ quĩrã djuburia Lazarora mʉ̃ zeza diguiɗaa diabuedua mʉ̃ djabarã juesuma panʉ́a jaramãrẽã nama sãwã ɓʉda. Mʉ̃a quĩrĩãẽ́ ɓʉa ãdjirã siɗa nama bia mĩgaɗe zeɗida.” 29 Baribʉrʉ Abrahaʉ̃ba idjía jarasia: “Ãcõrẽba Moisea diaɗa leyda, Ãcõrẽneba beɗeabadarãba ɓʉpeɗaɗa siɗa ãdjirãba eropanʉa. Maʉ̃drʉ ĩjãnida panʉa.” 30 Maʉ̃ne dji ẽberãba panusia: “Zeza Abrahaʉ̃, maʉ̃gʉ carea ĩjãnaẽ́a. Baribʉrʉ aɓaʉ beuɗada ʉ̃rẽbapeɗa ãdjimaa jaraɗe wãibʉrʉ, ãdjia cadjiruara igaraɗapeɗa ĩjãnia.” 31 Baribʉrʉ Abrahaʉ̃ba jarasia: “Ãcõrẽba Moisea diaɗa leyra, Ãcõrẽneba beɗeabadarãba ɓʉpeɗaɗa siɗa ĩjãnaẽ́bʉrʉ, beuɗa ʉ̃rẽbaɗaba jarabʉrʉ siɗa ĩjãnaẽ́a.”–