Hecho

Paulo Pesto quĩrãpita ɓaɗa

25 Dji boro ɓeɗacarea Pestora Cesarea puruɗe jũẽsia. Ewari ũbea ɓapeɗa Jerusaleʉ̃naa wãsia.* 2 25:2-3 Mama sacerdote bororãba, judiorã dji dromarã biɗa Pestoa Pauloda biẽ́ jarasiɗaa. Ãdjirãba Pestoa beɗea djuburiasiɗaa Paulora Jerusaleʉ̃naa enebimãrẽã. Mãwã jarasiɗaa Paulora ota cawaẽ́ne beaɗida crĩcha panʉ bẽrã. 3 – 4 Baribʉrʉ Pestoba panusia:

–Paulora Cesareaɗe preso ɓʉa. Mʉ̃ra dãrãẽ́ne mamaa wãya. 5 Maʉ̃ bẽrã bãrã dji dromaara ɓeara mʉ̃ ume Cesareaɗaa wãnida panʉa. Maʉ̃ ẽberãba baridua cadjiruada osibʉrʉ, mamabʉrʉ bãrãba jaraɗida panʉa.–

6 Pestora Jerusaleʉ̃ne ocho wa die ewari ɓasica ɓʉa. Maʉ̃bebʉrʉ Cesareaɗaa wãsia. Nurẽma cawa obada deɗe chũmepeɗa Paulora enebisia. 7 Paulo enesiɗaɗe judiorã Jerusaleʉ̃neba zepeɗaɗaba idjira jũrã edasiɗaa. Maʉ̃ne jarasiɗaa idjia cadjirua dromada zocãrã osida, baribʉrʉ poya cawabiɗaẽ́ basía ãdjia jara panʉra wãrãda. 8 Maʉ̃ne Paulora ara idjiare beɗeasia:

–Mʉ̃a ni aɓaʉ cadjiruada oẽ́ ɓʉa. Judiorã leyra igaraẽ́ ɓʉa, Ãcõrẽ de dromara biẽ́ ɓʉẽ́ basía idjaɓa Romanebema boro siɗa igaraẽ́ ɓʉa.–

9 Baribʉrʉ Pestora judiorã ume bia ɓe quĩrĩã ɓʉ bẽrã Pauloa iwiɗisia:

–¿Bʉra Jerusaleʉ̃naa wã quĩrĩã ɓʉca mʉ̃a jãma cawa omãrẽã?–

10 Maʉ̃ne Pauloba panusia:

–Mʉ̃ra nama Romanebema boroba ɓʉɗa cawa obari quĩrãpita ɓʉa. Namabʉrʉ bʉa mʉ̃ra cawa oida ɓʉa. Bʉa bio cawa ɓʉa mʉ̃a judiorãra biẽ́ oẽ́ ɓʉda. 11 Mʉ̃a cadjiruada osibʉrʉ, bʉa mʉ̃ra beaida ɓʉa. Mʉ̃ra beacara ɓʉaɗa aẽ́a. Baribʉrʉ naʉ̃ ẽberãrãba mʉ̃ biẽ́ jara panʉra wãrãẽ́ bẽrã ni aɓaʉba mʉ̃ra ãdji jʉwaɗe ɓʉcara ɓʉa. Maʉ̃ bẽrã mʉ̃a quĩrĩã ɓʉa Romanebema borobʉrʉ mʉ̃ra cawa oida.–

12 Maʉ̃ne Pestora idjía crĩcha diabadarã ume beɗeapeɗa Pauloa jarasia:

–Bʉa quĩrĩã ɓʉa Romanebema boroba bʉra cawa oida. Mãwã baibʉrʉ, idjimaa diabueya.–

Pesto Agripa ume beɗeaɗa

13 Mãwãnacarea judiorã boro Agripada idji djabawẽrã Berenice ume Cesareaɗaa Pesto acʉɗe wãsiɗaa.* 14 Ãdjira mama dãrã panʉ bẽrã Pestoba Agripaa Pauloɗebemada nãwã jarasia:

–Peliba aɓa preso amenada nama ɓʉa. 15 Mʉ̃ Jerusaleʉ̃naa wã ɓasiɗe sacerdote bororãba, judiorã dji dromarã biɗa maʉ̃ ẽberãnebemada biẽ́ beɗeaɗapeɗa jarasiɗaa idjira beamãrẽã. 16 Mʉ̃a ãdjirãa jarasia aɓaʉda idji biẽ́ jara ɓea quĩrãpita ara idjiare poya beɗeaẽ́bʉrʉ, romanorãba beaɗacada. 17 Maʉ̃ carea judiorãra namaa zesiɗaa. Ãdji jũẽpeɗaɗa nurẽma mʉ̃ra cawa obada deɗe chũmepeɗa maʉ̃ ẽberãra enebisia. 18 Baribʉrʉ idji biẽ́ jara panʉba jaraɗaẽ́ basía idjia cadjiruara osida mʉ̃a crĩcha ɓaɗa quĩrãca. 19 Ãtebʉrʉ idjira biẽ́ jara panasiɗaa ãdjia ĩjã panʉ awara jaradia ɓʉ carea idjaɓa ẽberã Jesu abada carea. Maʉ̃gʉra beuɗamĩna Pauloba jara ɓʉa zocai ɓʉda. 20 Mʉ̃a cawaẽ́ ɓesia sãwã oida. Maʉ̃ carea mʉ̃a Pauloa iwiɗisia Jerusaleʉ̃naa wã quĩrĩã ɓʉ cawaya mama cawa oi carea. 21 Baribʉrʉ idjia quĩrĩã ɓasia Romanebema borobʉrʉ idjira cawa oida. Maʉ̃ bẽrã mʉ̃a idjira nama preso ɓʉbisia aɓa dji boromaa diabuebʉrʉɗaa.–

22 Maʉ̃ne Agripaba Pestoa jarasia:

–Mʉ̃a maʉ̃ ẽberã beɗeada ũrĩ quĩrĩã ɓʉa.–

Pestoba jarasia:

–Nubʉrʉ bʉa ũrĩya.–

Paulo Agripa quĩrãpita beɗeaɗa

23 Nurẽma Agripara Berenice ume eɗa wãsiɗaɗe ebuɗa ɓasia ãdjira dji dromarãda. Maʉ̃ne sordaorã bororãda, puruɗebema dji dromarã siɗa eɗa errubusibasiɗaa. Maʉ̃be Pestoba Paulora enebisia. 24 Pestoba jarasia:

–Judiorã boro Agripa idjaɓa jũma ẽberãrã nama dai ume ãbaa dji jʉre duanʉ, za ɓʉ ẽberã bãrã quĩrãpita ɓʉra jũma judiorãba Jerusaleʉ̃ne, naʉ̃ Cesareaɗe biɗa biẽ́ jara panʉa. Ãdjirãba mʉ̃́a ɓia jara panasiɗaa idjira beamãrẽã. 25 Baribʉrʉ mʉ̃maarã ni cãrẽ cadjiruara oẽ́ ɓʉa idji beaɗi carea. Maʉ̃ne idjia iwiɗisia Romanebema boroba cawa omãrẽã. Maʉ̃ bẽrã mʉ̃a idjira Romanaa diabuei carea ɓʉa. 26 25:26-27 Idjia cadjirua oɗara dadjirã boroba cawamãrẽã mʉ̃a cartaɗe ebuɗa ɓʉida ɓʉa. Baribʉrʉ cãrẽda ɓʉida neẽ́ ɓʉa. Mʉ̃maarã ni cãrẽ siɗa ɓʉẽ́bʉrʉ crĩcha neẽ́ ɓʉ quĩrãca diabueya. Maʉ̃ carea idjira bãrã quĩrãpita enebisia. Judiorã boro Agripa, mʉ̃a quĩrĩã ɓʉa bʉabʉrʉ biara ũrĩda. Mãwã bãrãba idjía bio iwiɗipeɗaɗacarea mʉ̃a dadjirã boro itea idjia cadjirua oɗada poya cawa ɓʉisicada.–