Hecho

Paulo Peli quĩrãpita beɗeaɗa

24 Ewari juesuma baɗacarea sacerdote dji droma Ananíara ʉ̃cʉrʉ judiorã dji dromarã ume Cesareaɗe jũẽsiɗaa. Ãdjiare beɗeabari Tertuloda edesiɗaa. Maʉ̃ne Peli quĩrãpita Pauloɗebemada biẽ́ jarasiɗaa. 2 Peliba Paulo enebisiɗe maʉ̃ Tertuloba Pauloɗebemada biẽ́ jara nũmesia. Nãwã jarasia:

–Dji droma Peli, bʉ dai boro ɓeɗa ewariɗeba naʉ̃ druaɗe dãrã necai panʉa. Idjaɓa bʉ crĩcha cawaaɗeba ne zocãrãda o ɓʉa dairãra biara duananamãrẽã. 3 Bʉa o ɓʉ carea dai ɓeaza ne jũmane bia ɓʉaɗa abadaa. 4 Baribʉrʉ dãrã mĩã sẽ amaaba mʉ̃a bʉ́a beɗea djuburiaya bʉ biaɗeba dai beɗeara ũrĩmãrẽã.

5 Dairãba cawa panʉa naʉ̃ ẽberãba nẽbʉrada o ɓabarida. Idjia jũma naʉ̃ ẽjũãne judiorãra quĩrũbiga ɓabaria. Idjira dji nazareno ĩjã ɓearã boroa. 6 Maʉ̃ awara idjia Ãcõrẽ de dromara biẽ́ ɓʉ́ quĩrĩãsia. Maʉ̃ carea daiba idjira jidasiɗaa. [Dai leyɗeba cawa oɗi basía. 7 Mãwãmĩna sordaorã boro Lisiaba idjira dai jʉwaeɗabemada jãrĩsia. 8 Maʉ̃ awara jarasia naʉ̃ ẽberã biẽ́ jara panʉra bʉmaa zeɗida panʉda.]* Bʉa idjía bio iwiɗibʉrʉ cawaya jũma daiba jara panʉra wãrãda.–

9 Judiorã mama duanʉ biɗa jũma maʉ̃ beɗeara wãrãana asiɗaa.

10 Maʉ̃be dji boroba jʉwaba Pauloa jarasia beɗeamãrẽã. Ara maʉ̃da Pauloba jarasia:

–Mʉ̃a cawa ɓʉa bʉa poa zocãrã naʉ̃ druaɗebemada cawa obarida. Maʉ̃ bẽrã mʉ̃ra ara mʉ̃djiɗebemada ɓʉsriɗa beɗeaya. 11 Doce ewari ɓʉa mʉ̃ra Ãcõrẽa bia beɗeai carea Jerusaleʉ̃ne jũẽnada. Bʉa bariduaa iwiɗibʉrʉ cawaya maʉ̃ra wãrãda. 12 Za mʉ̃ biẽ́ jara panʉba mʉ̃ra ununaẽ́ basía djãrã ume caicaya nũmʉda wa ẽberãrã quĩrũbiga ɓʉda. Ãcõrẽ de dromane, judiorã dji jʉrebada deɗe, ni puruɗe biɗa mʉ̃a mãwã o ɓʉda ununaẽ́ basía. 13 Naʉ̃ ẽberãrãba poya cawabiɗaẽ́a ãdjia jara panʉra wãrãda. 14 Baribʉrʉ ebuɗa jaraya mʉ̃a dai drõã naẽnabemarã Ãcõrẽda ĩjã ɓʉda. Mʉ̃ra O Djiwiɗi abadaɗebemaa. Ãdjirãba jarabadaa maʉ̃ O Djiwiɗira aɓeɗa ãĩ ɓʉda baribʉrʉ mʉ̃a Ãcõrẽ leyra, Ãcõrẽneba beɗeabadaba ɓʉpeɗaɗa siɗa jũma ĩjã ɓʉa. 15 Mʉ̃a cawa ɓʉa beuɗarãra Ãcõrẽba jũma ʉ̃rẽbabida: dji jipa ɓeada, dji cadjiruarã siɗa.* Za mʉ̃ biẽ́ jara panʉ biɗa maʉ̃ra cawa panʉa. 16 Maʉ̃ carea mʉ̃a ne jũmada obaria Ãcõrẽ quĩrãpita, ẽberãrã quĩrãpita biɗa jipa nĩbai carea.

17 Mʉ̃ Jerusaleʉ̃neba ãyã wãnara poa zocãrã ɓʉa. Mama nĩbapeɗa mʉ̃ puruɗebemarã dji ne neẽ́ queɗea itea paratada diaɗe zesia. Idjaɓa Ãcõrẽa animarãda babue diaɗe zesia. 18 24:18-19 Maʉ̃da Ãcõrẽ de dromane o ɓasia. Mamaa wãsiɗe idji quĩrãpita bia ɓasia. Maʉ̃ne ʉ̃cʉrʉ judiorã Asiaɗebemaba mʉ̃ra unusiɗaa, baribʉrʉ ẽberã powua nĩbaẽ́ basía idjaɓa ẽberãrãra quĩrũbigaẽ́ basía. Mʉ̃ unupeɗaɗaba mʉ̃da biẽ́ jara quĩrĩã panʉbʉrʉ, ãdjidrʉ bʉ quĩrãpita zeɗida panʉa. 20 Mãwãẽ́bʉrʉ za duanʉba jaraɗida panʉa cãrẽ cadjiruada unusiɗada dji dromarã quĩrãpita mʉ̃ edesiɗaɗe. 21 Aɓabe poya jaraɗia mʉ̃a nãwã jĩgua jarasida: iɗi bãrãba mʉ̃ra biẽ́ jara panʉa beuɗarãra ʉ̃rẽbaɗida ĩjã ɓʉ carea.–*

22 Peliba O Djiwiɗiɗebemada bio cawa ɓasia. Baribʉrʉ ara maʉ̃da Paulora cawa oẽ́ basía. Ãtebʉrʉ jarasia:

–Sordaorã boro Lisia zebʉrʉɗe mʉ̃a bãrã nẽbʉrara cawa oya.–

23 Maʉ̃be idjia sordaorã boroa Paulora wagabisia, baribʉrʉ jarasia Pauloba o quĩrĩã ɓʉra idu obimãrẽã. Idjaɓa iduaribisia Paulo ume dji biarãba idjira carebaɗe zeɗamãrẽã.

24 Mãwãnacarea Pelira dji quima Drusila ume wayacusa zesia. Maʉ̃ wẽrãra judio basía.* Maʉ̃ne Peliba Paulora trʉ̃sia idjia Jesucrito ĩjãninebema beɗea ɓʉda ũrĩ carea. 25 Mãwã ɓʉɗe Pauloba dadji jipa nĩbaiɗebemada, cacua jipa eroɓaiɗebemada, Ãcõrẽba cawa oi ewari zeiɗebema siɗa beɗeasia. Peliba maʉ̃gʉɗebema ũrĩsiɗe ne wayapeɗa nãwã jarasia:

–Jãʉ̃be wãdua. Mʉ̃ bari ɓʉɗe wayacusa bʉra trʉ̃ya.–

26 Peliba crĩcha ɓasia Pauloba idjía paratada diaida ẽdrʉ ɓʉmãrẽã. Maʉ̃ carea ara cadrʉa Paulora trʉ̃badjia idji ume beɗeai carea. 27 Poa umé baɗacarea Pelira dji boro ɓaɗada ẽdrʉsia. Maʉ̃be Porcio Pestoda dji boroda ɓesia. Baribʉrʉ Peli ẽdrʉsiɗe judiorã ume bia ɓe quĩrĩã ɓasia. Maʉ̃ carea Paulora preso ɓeesia.