Romano

10 Djabarã, mʉ̃a soɗeba quĩrĩã ɓʉa Ãcõrẽba israelerãra ẽdrʉ edaida. Maʉ̃ carea mʉ̃a Ãcõrẽa iwiɗi ɓabaria. 2 Mʉ̃a jaraya ãdjirãba Ãcõrẽra wãrãda ẽpẽ quĩrĩã panʉda. Mãwãmĩna Ãcõrẽba quĩrĩã ɓʉɗebemada ãĩ crĩcha panʉa. 3 Ãcõrẽba sãwã ẽberãrã jipa unubarida ãdjirãba cawaɗacaa. Maʉ̃da igaraɗapeɗa ara ãdjia o panʉneba jʉrʉ panʉa Ãcõrẽ quĩrãpita jipa ɓeaɗi carea. 4 Baribʉrʉ Crito ĩjãbʉdara Ãcõrẽba jipa unubaria. Maʉ̃ bẽrã ley ĩjã o panʉneba jipa ɓeaɗi carea waa jʉrʉɗiẽ́ panʉa.

5 Moiseba ɓʉsia sãwã ẽberãrãra Ãcõrẽba diaɗa leyɗeba poya jipa ɓeaɗida. Nãwã ɓʉsia: “Ẽberãba naʉ̃ leyba jara ɓʉra ĩjã o ɓaibʉrʉ, zocai ɓaya.”* 6 Baribʉrʉ Crito ĩjãbʉrʉda Ãcõrẽba jipa unubaria. Maʉ̃ ẽberãba jarabaria: “Bʉ soɗe crĩcharãdua aɓaʉda bajãnaa wãida ɓʉda Crito naʉ̃ duɗaa zebi carea. 7 Crĩcharãdua aɓaʉda beuɗarã panabadamaa wãida ɓʉda Crito ʉ̃rẽbabi carea.” 8 Baribʉrʉ Ãcõrẽ Beɗeaɗe nãwã ɓʉ́ ɓʉa: “Bʉa Ãcõrẽ beɗeara cawaicha ɓʉa.* Bʉ iteba idji beɗeara jaraida ɓʉa idjaɓa bʉ soɗeba ĩjãida ɓʉa.”* Idji beɗeara daiba nãwã jaradia panʉa jũmarãba ĩjãnamãrẽã: 9 bʉ iteba Jesura jũmarã Boroaɗa aibʉrʉ, idjaɓa Ãcõrẽba idjira ʉ̃rẽbabisida bʉ soɗeba ĩjãibʉrʉ, Ãcõrẽba ẽdrʉ edaya. 10 Wãrãda aɓaʉba soɗeba ĩjãibʉrʉ, Ãcõrẽba jipa unuya. Iteba Jesura jũmarã Boroaɗa aibʉrʉ Ãcõrẽba ẽdrʉ edaya.

11 Ãcõrẽ Beɗeaɗe nãwã ɓʉ́ ɓʉa: “Idji ĩjã ɓʉba idji quĩrĩãbe ĩjã ɓaẽ́a.”* 12 Ãcõrẽra jũmarã Boro bẽrã judiorãra, judiorãẽ́ siɗa aɓarica obaria. Idjía quĩrã djuburia iwiɗibʉdara bio carebabaria. 13 Ãcõrẽ Beɗeaɗe nãwã ɓʉ́ ɓʉa: “Dadjirã Boro Ãcõrẽa quĩrã djuburia iwiɗibʉdara jũma ẽdrʉ edaya.”*

14 Baribʉrʉ ẽberãrãba waɗi dadjirã Boro Jesucrito ĩjãnaẽ́ panʉne ¿sãwã idjía quĩrã djuburiada iwiɗiɗi? Idjiɗebemada waɗi ũrĩnaẽ́ panʉne ¿sãwã ĩjãni? Idjaɓa ni aɓaʉba ãdjía jaradiaɗe wãẽ́bʉrʉ ¿sãwã idjiɗebemada ũrĩni? 15 Ãcõrẽba ni aɓaʉda diabueẽ́bʉrʉ, ¿sãwã jaradiaɗe wãni? Ãcõrẽ Beɗeaɗe nãwã ɓʉ́ ɓʉa: “Beɗea bia jaraɗe zebʉdara bio bia ɓeaa.”*

16 Baribʉrʉ jũma judiorãba beɗea bia Critoɗebemada ĩjãnaẽ́ basía. Isaía cartaɗe nãwã ɓʉ́ ɓʉa: “Mʉ̃ Boro, daiba jarapeɗaɗara ¿caiba ĩjãsi?”* 17 Wãrãda ẽberãrãba Critoɗebemada naãrã ũrĩnida panʉa poya ĩjãni carea.* 18 Baribʉrʉ mʉ̃a iwiɗiya: ¿Judiorãba maʉ̃ beɗeara ũrĩnaẽ́ basica? Wãrãda ũrĩsiɗaa. Ãcõrẽ Beɗeaɗe nãwã ɓʉ́ ɓʉa:

Idjiɗebemada jũma naʉ̃ ẽjũãne jarasiɗaa. Maʉ̃ beɗeara tʉmʉeɗa jara wãsiɗaa.*

19 Mʉ̃a wayacusa iwiɗiya: ¿judiorãba maʉ̃ beɗeara cawaɗaca basica? Mãẽ, cawasiɗaa judiorãẽ́ba cawapeɗaɗa quĩrãca. Maʉ̃ carea Moiseba Ãcõrẽneba judiorãa naãrã jarasia:

Mʉ̃a edaɗaẽ́ puru careba ɓʉɗeba mʉ̃a bãrãra jiwaiɗa ɓʉya mʉ̃da quĩrĩãnamãrẽã.

Mʉ̃ adua ɓaɗa puru careba ɓʉɗeba mʉ̃a bãrãra quĩrũbigaya mʉ̃da quĩrĩãnamãrẽã.*

20 Idjaɓa Isaíaba Ãcõrẽneba ne wayaa neẽ́ nãwã jarasia:

Mʉ̃ jʉrʉɗaẽ́ pananaba mʉ̃ra unusiɗaa. Mʉ̃nebema iwiɗiɗaẽ́ pananarãa ara mʉ̃djiɗebemada cawabisia.*

21 Baribʉrʉ israelerãnebemada Isaíaba Ãcõrẽneba nãwã jarasia:

Ewariza mʉ̃a jʉwa wabadjia ẽberãrã cʉwʉrʉ zarea ɓea, mʉ̃ ĩjãẽ́ ɓeara mʉ̃maa zeɗamãrẽã.*