1 Pedro

Ãcõrẽba edaɗa ẽberãrã

2 Djãrã biẽ́ oɗira igaraɗadua. Djãrãra cũrũgarãnadua. Ʉ̃cʉrʉba ara ãdjia jarabada quĩrãca oɗacaa. Maʉ̃ ẽberãrã quĩrãca ɓearãnadua. Djãrãba eroɓʉ carea biẽ́ crĩcharãnadua. Djãrãra biẽ́ jararãnadua. 2 2:2-3 Dadjirã Boroba biaɗeba bãrãra carebabarida cawasiɗaa. Maʉ̃ bẽrã warra zaque djiwiɗi toɗaba ju do quĩrĩã ɓabari quĩrãca Ãcõrẽ beɗeara biara cawa quĩrĩãnadua.* Idji beɗeara juɓa idji awa quiru quĩrãca ɓʉa. Idji beɗeada cawa wãnibʉrʉ wariɗia aɓa idjia bãrã ẽdrʉ edabʉrʉɗaa. 3 –

4 Dadjirã Boro Jesucritomaa zeɗadua. Idjira zocai ɓʉa, de oi careabema mõgara quĩrãca ɓʉa.* Ẽberãrãba idjira igarasiɗaa, baribʉrʉ Ãcõrẽba edasia mõgara biya quiru nẽbʉa ɓʉ quĩrãca. 5 Bãrãra idjiɗeba zocai ɓea bẽrã de oi careabema mõgara quĩrãca ɓeaa. Bãrãneba Ãcõrẽba idji deda obʉrʉa. Idjaɓa bãrãra sacerdoterã idji itea ɓʉɗaa. Bãrãba Jesucritoɗeba Ãcõrẽ itea ne o panʉne idjía animarã babue diabʉda quĩrãca o panʉa. Mãwã o panʉra idjia bia unu ɓʉa. 6 Ãcõrẽ Beɗeaɗe Jesucritoɗebemada nãwã ɓʉ́ ɓʉa:

Ũrĩnadua, Sioʉ̃ puruɗe mʉ̃a de oi careabema mõgara dji biara ɓʉda ɓʉbʉrʉa.*

Maʉ̃ mõgara biya quiru nẽbʉa ɓʉda mʉ̃a edasia. Maʉ̃ bẽrã idji ĩjã ɓʉba idji quĩrĩãbe ĩjã ɓʉẽ́a.*

7 Bãrã dji Crito ĩjã ɓeamaarã idjira bio bia ɓʉa. Baribʉrʉ idji ĩjãẽ́ ɓeamaarã biẽ́ ɓʉa. Ãdjiɗebemada Ãcõrẽ Beɗeaɗe nãwã ɓʉ́ ɓʉa:

De obadaba mõgara igarapeɗaɗara dji biara ɓʉda ɓesia.*

8 Idjaɓa nãwã ɓʉ́ ɓʉa:

Maʉ̃ mõgaraɗe ẽberãrãra tenedrʉɗapeɗa ɓaeɗia.*

Ãdjirãba Ãcõrẽ beɗeara ĩjãnaẽ́ panʉ bẽrã mõgaraɗe tenedrʉbʉda quĩrãca panʉa. Ãcõrẽba ãdjirãra ɓʉsia mãwã ɓeaɗamãrẽã.

9 Baribʉrʉ bãrãra Ãcõrẽba edaɗarãa, jũmarã Boro Ãcõrẽ sacerdoterãa, idji itea ɓʉɗa ẽberãrãa, idji purua. Mãwã Ãcõrẽba bio biya oɗaɗebemada bãrãba beɗeabadaa. Ãcõrẽba bãrãra pãĩmanebemada trʉ̃sia idji ʉ̃naa bio biya quiruɗe ɓeaɗamãrẽã. 10 Naẽna bãrãra Ãcõrẽ puruẽ́ basía, baribʉrʉ iɗira Ãcõrẽ purua. Naẽna Ãcõrẽba bãrãra quĩrã djuburiaẽ́ ɓasia, baribʉrʉ iɗira quĩrã djuburia ɓʉa.

Naʉ̃ ẽjũãnebema bororã beɗeara ĩjãnadua

11 Mʉ̃ djabarã, naʉ̃ ẽjũãne bãrãra drua ãĩbemarãa. Maʉ̃ bẽrã mʉ̃a bãrãa beɗea djuburiaya naʉ̃ cacuaba cadjirua o quĩrĩã ɓʉda igaraɗamãrẽã. Maʉ̃gʉra dadji jaure ume djõ ɓʉa. 12 Ãcõrẽ adua ɓea tãẽna jipa nĩbaɗadua. Ara nawena ãdjirãba bãrãra cadjirua obadarãana a panʉmĩna, bãrãba bia o panʉra unu panʉa. Maʉ̃be Ãcõrẽ zebʉrʉɗe bãrã carea idjía bia beɗeaɗia.

13 Dadjirã Boro Jesucrito carea jũma naʉ̃ ẽjũãnebema bororã beɗeara ĩjãnadua. Naʉ̃ druaɗebema boroba jarabʉrʉra ĩjãnadua idjira dji dromaara ɓʉ bẽrã. 14 Idjiarebemarãba jarabʉda siɗa ĩjãnadua. Dji boroba ãdjirãra ɓʉsia cadjirua obadarãda cawa oɗamãrẽã idjaɓa bia obadarãda bia jaraɗamãrẽã. 15 Ãcõrẽba quĩrĩã ɓʉa bãrãba biada o pananida. Mãwã bãrãba crĩcha neẽ́ ɓeada chupeabiɗia adua panʉneba bãrãra biẽ́ jarabada bẽrã.

16 Critoba bãrãra ẽdrʉ ɓʉɗa bẽrã, maʉ̃ ẽdrʉ ɓʉɗaɗe nĩbaɗadua. Baribʉrʉ ẽdrʉ ɓʉɗa bẽrã crĩcharãnadua cadjiruara oɗida panʉda. Ãtebʉrʉ Ãcõrẽ nezocarãda ɓeaɗadua. 17 Jũmarãda wayaɗadua. Djabarãra bio quĩrĩãnadua. Ãcõrẽra wayaɗadua. Naʉ̃ druaɗebema boro dji droma siɗa wayaɗadua.

18 Nezocarã, bãrã borora waya pananadua. Idji beɗeara ĩjã oɗadua. Aɓabe bãrã boro dji quĩrã djuburiabari ume mãwã ɓearãnadua, ãtebʉrʉ dji cadrʉa ume biɗa mãwã ɓeaɗadua. 19 Eɗauɗe bia o ɓʉ carea dadjira bia mĩgabaria. Baribʉrʉ Ãcõrẽba idu mĩgabi ɓʉda cawapeɗa jũma droaibʉrʉ, Ãcõrẽba bia unuya. 20 Bãrãba biẽ́ o panʉ carea dji boroba uibʉrʉ, bãrãba droaɗimĩna ¿caiba bãrãnebemada bia beɗeai? Baribʉrʉ bia o panʉ carea mĩga panʉne droaɗibʉrʉ, Ãcõrẽba bia unuya. 21 Critora bãrã carea bia mĩgaɗa bẽrã Ãcõrẽba bãrãra trʉ̃sia bia mĩgaɗamãrẽã. Crito bia mĩgasiɗe unubisia bãrã mĩgabʉdaɗe sãwã nĩbaɗida panʉda. 22 Critoba cadjiruara oca basía idjaɓa sewa oca basía.* 23 Ẽberãrãba idji biẽ́ jarasiɗaɗe ãdjirãra biẽ́ jaraẽ́ basía. Idji biẽ́ osiɗaɗe ãdjirãra waragaẽ́ basía. Ãtebʉrʉ Ãcõrẽba jipa cawa obari bẽrã idji biẽ́ o panʉra Ãcõrẽ jʉwaɗe ɓʉbadjia. 24 Critoba dadjirã cadjiruara idji ʉ̃rʉ̃ cruɗe edesia dadjirãra cadjiruaɗebemada beuɗapeɗa jipa ɓeaɗamãrẽã. Idji djara cõãdrʉcuapeɗaɗaɗeba bãrãra bia panesiɗaa. 25 Bãrãra naẽna oveja adua nĩna quĩrãca nĩbasiɗaa, baribʉrʉ iɗira Critomaa jẽda zesiɗaa. Idjia bãrãra waga ɓʉa oveja wagabariba idji oveja wagabari quĩrãca.