Romano

Djabarã biẽ́ jaraɗiẽ́ panʉ

14 Djaba aɓaʉba dadjia Jesucrito ĩjã panʉnebemada waɗi bio adua ɓʉbʉrʉ, idjira bia edaɗadua. Baribʉrʉ idjia adua ɓʉɗebema carea idji ume caicayarãnadua. 2 Mʉ̃a naʉ̃da jara ɓʉa: ʉ̃cʉrʉ djabarãba cawa panʉa ne jũmada coɗida panʉda. Baribʉrʉ ʉ̃cʉrʉ djabarãba dadjia Jesucrito ĩjã panʉnebemada waɗi bio adua panʉ bẽrã crĩcha panʉa aɓabe néuɗebemada coɗida panʉda. 3 Baribʉrʉ ne jũma cobariba ne jũma cocada igaraiẽ́ ɓʉa. Idjaɓa ne jũma cocaba ne jũma cobarida biẽ́ jaraiẽ́ ɓʉa, umena Ãcõrẽba edaɗa bẽrã. 4 ¿Bʉra cai mãwã djãrã nezocada biẽ́ jarai carea? Idji borobʉrʉ jaraya bia o ɓʉda wa biẽ́ o ɓʉda. Baribʉrʉ dadjirã Boro Ãcõrẽba jaraya jũma idji nezocarãba bia o panʉda, idji ʉɓʉaɗeba careba ɓʉ bẽrã bia o pananamãrẽã.

5 Idjaɓa ʉ̃cʉrʉ djabarãba crĩcha panʉa ʉ̃cʉrʉ ewarira ewari dromada. Ʉ̃cʉrʉ djabarãba crĩcha panʉa ewarira jũmaena aɓarida. Baribʉrʉ ãdjiza soɗeba crĩcha panʉ quĩrãca oɗida panʉa. 6 Ewari droma waga ɓʉba dadjirã Boro Ãcõrẽ itea mãwã o ɓʉa.* Ne jũma cobariba mãwã cobaria dadjirã Boro Ãcõrẽra waya ɓʉ bẽrã. Maʉ̃ carea ne cobʉrʉɗe idjia Ãcõrẽa bia ɓʉaɗa abaria. Idjaɓa ne jũma cocaba mãwã cocaa dadjirã Boro Ãcõrẽra waya ɓʉ bẽrã. Maʉ̃ carea ne cobʉrʉɗe idjia biɗa Ãcõrẽa bia ɓʉaɗa abaria.

7 Ni aɓaʉda ara idji itea zocai ɓʉẽ́a. Idjaɓa ni aɓaʉda ara idji itea beuẽ́a. 8 Zocai panʉne dadjirã Boro Ãcõrẽ itea zocai panʉa. Idjaɓa beusiɗara dadjirã Boro Ãcõrẽ itea beuɗia. Mãwã zocai panʉne wa beubʉdaɗe biɗa dadjirã Boro Ãcõrẽnea.

9 Critora beusia beuɗarã Boro bai carea. Idjaɓa ʉ̃rẽbasia zocai ɓea Boro bai carea. 10 Maʉ̃ bẽrã ¿cãrẽ cãrẽã bʉ djabada biẽ́ jara ɓʉ? ¿Cãrẽ cãrẽã idjira igara ɓʉ? Jũma dadjirãra Ãcõrẽ quĩrãpita panania dadjiza opeɗaɗara cawa omãrẽã.* 11 Ãcõrẽ Beɗeaɗe nãwã ɓʉ́ ɓʉa:

Dadjirã Boroba nãwã jara ɓʉa: mʉ̃ra wãrãda zocai ɓʉ bẽrã wãrãneba jaraya jũmarãda

mʉ̃ quĩrãpita chĩrãboroɗe coɓeaɗida mʉ̃́a bia beɗeaɗi carea.

Idjaɓa jũmarãba jaraɗia mʉ̃ra Ãcõrẽda.*

12 Wãrãda dadjiza opeɗaɗara Ãcõrẽa jũma jaraɗia. 13 Maʉ̃ bẽrã djãrãba o ɓʉ carea waa biẽ́ beɗeaɗiẽ́ panʉa. Ãtebʉrʉ soɗeba nãwã crĩchaɗida panʉa: dadjia o panʉneba djaba aɓaʉda cadjiruaɗe ɓaebiɗibʉrʉ, biara ɓʉa oɗaẽ́da. 14 Mʉ̃ra dadjirã Boro Jesucrito ume ɓʉ bẽrã wãrãda cawa ɓʉa ni aɓaʉ djicoda cadjirua ɓʉẽ́da. Baribʉrʉ aɓaʉba baridua djico coida cadjiruada crĩchaibʉrʉ, maʉ̃gʉra cocara ɓʉa. 15 Bʉa co ɓʉɗeba bʉ djabada idji soɗe biẽ́ ɓeibʉrʉ, bʉra quĩrĩãneba nĩẽ́a. Bʉa co ɓʉɗeba bʉ djaba crĩchara ãrĩrãdua Critora idji carea beuɗa bẽrã. 16 Bãrãba o panʉra biada cawa panʉa. Baribʉrʉ djãrãba maʉ̃da biẽ́ jaraɗibʉrʉ, orãnadua biẽ́ beɗearãnamãrẽã. 17 Ãcõrẽba pe eroɓʉɗebemarãa jaracaa cãrẽda coɗida panʉda idjaɓa cãrẽda doɗida panʉda. Ãtebʉrʉ quĩrĩã ɓʉa ãdjirãba idji Jaureɗeba jipa o pananida, necai pananida, idjaɓa ɓʉsriɗa pananida. 18 Crito mãwã ẽpẽ ɓeara Ãcõrẽba bia unu ɓʉa. Ẽberãrã biɗa bia unubadaa.

19 Maʉ̃ carea jʉrʉɗida panʉa djabarã ume necai ɓeaɗi carea. Mãwã dji careba panania biara ĩjãni carea. 20 Bãrãba co panʉneba Ãcõrẽba djãrã soɗe oɗara ãrĩrãnadua. Wãrãda Ãcõrẽ quĩrãpita jũma djicora bia ɓʉa. Baribʉrʉ biẽ́ ɓʉa dadjia co panʉneba dewaraʉda cadjiruaɗe ɓaebiɗida. 21 Biara ɓʉa nedjara coẽ́da, uva ɓa doẽ́da, wa ni cãrẽ siɗa oẽ́da bʉ djabara cadjiruaɗe ɓaebi amaaba.

22 Bʉa ne jũmada coida ɓʉda crĩcha ɓʉbʉrʉ, wa ne jũmada cocara ɓʉda crĩcha ɓʉbʉrʉ, aɓabe bʉabʉrʉ Ãcõrẽ ume bʉ crĩchara cawaida ɓʉa. Bʉa crĩcha ɓʉ quĩrãca djãrãa õgo crĩchabirãdua. Wãrãda dadjia o panʉ carea dadji soɗe biẽ́ crĩchaɗaẽ́bʉrʉ, bio ɓʉsriɗa panania. 23 Baribʉrʉ aɓaʉba nãwã crĩchaisicada: “Ãĩbẽrã naʉ̃gʉra cocara ɓʉa.” Dji mãwã crĩcha ɓʉba maʉ̃da coibʉrʉ, idji soɗe biẽ́ ɓeya, biẽ́ o ɓʉda crĩcha ɓʉ bẽrã. Wãrãda aɓaʉba o ɓʉra ãĩbẽrã jipa ɓʉẽ́da crĩchaibʉrʉ, cadjiruada o ɓʉa.