Romano

Djãrãra carebaɗadua bia pananamãrẽã

15 Dadjia ĩjã ɓʉɗebema bio cawa ɓeaba mãcua adua queɗeara carebaɗida panʉa. Aɓabe dadjia quĩrĩã panʉda oɗiẽ́ panʉa. 2 Ãtebʉrʉ djãrãba quĩrĩã panʉdrʉ oɗida panʉa ãdjida bia ɓeaɗamãrẽã idjaɓa biara ĩjãnamãrẽã. 3 Wãrãda Crito biɗa ara idjia quĩrĩã ɓʉra oẽ́ basía, ãtebʉrʉ Ãcõrẽ Beɗeaɗe ɓʉ́ ɓʉ quĩrãca mãwãsia. Nãwã ɓʉ́ ɓʉa: “Ãcõrẽ, ãdjirãba bʉ biẽ́ jarasiɗaɗe mʉ̃ siɗa biẽ́ jarasiɗaa.”* 4 Ne jũma Ãcõrẽ Beɗeaɗe ɓʉɗara dadjirãa jaradiai carea ɓʉa. Dadjirãra sobiabibaria idjaɓa carebabaria jũma droaɗamãrẽã. Mãwã dadjirãba wãrãda cawa panʉa Ãcõrẽ ume ewariza bia pananida. 5 Ãcõrẽba dadjirãra sobiabibaria idjaɓa carebabaria jũma droaɗamãrẽã. Mʉ̃a quĩrĩã ɓʉa ara maʉ̃ Ãcõrẽba bãrãra careba ɓaida aɓarica crĩchaɗamãrẽã Jesucritoba quĩrĩã ɓʉ quĩrãca. 6 Mãwã bãrãba dadjirã Boro Jesucrito Zeza Ãcõrẽa ãbaa bia beɗea panania.

Beɗea bia Critoɗebema judiorãẽ́ itea biɗa ɓʉa

7 Critoba bãrã bia edaɗa quĩrãca dji bia edaɗadua. Maʉ̃ unubʉdaɗe ẽberãrãba Ãcõrẽa bia beɗeaɗia. 8 Mʉ̃a jaraya: Critora zesia dai judiorã carebai carea. Mãwã Ãcõrẽba judiorã drõã naẽnabemarã ume beɗea ɓʉɗara Jesucritoba osia. Maʉ̃ba unubisia Ãcõrẽra wãrãda beɗea aɓa ɓʉda. 9 Idjaɓa Critora zesia judiorãẽ́ba Ãcõrẽa bia beɗeaɗamãrẽã ãdjirãra quĩrã djuburiaɗa bẽrã. Maʉ̃nebemada Ãcõrẽ Beɗeaɗe nãwã ɓʉ́ ɓʉa:

Mʉ̃a bʉda judiorãẽ́ tãẽna bia jaraya. Mʉ̃a bʉ́a bia jara trʉ̃ãya.*

10 Idjaɓa nãwã ɓʉ́ ɓʉa:

Bãrã judiorãẽ́, Ãcõrẽ puru ume ɓʉsriɗaɗadua.*

11 Idjaɓa nãwã ɓʉ́ ɓʉa:

Jũma bãrã judiorãẽ́, dadjirã Boro Ãcõrẽa bia beɗeaɗadua.

Jũma puru ɓea, idjía bia beɗeaɗadua.*

12 Idjaɓa Isaíaba idji cartaɗe nãwã ɓʉsia:

Jeséɗeba aɓa zeya.* Maʉ̃gʉra jũma puru ɓea Boroda ɓeya.

Israelerãẽ́ba idjira ĩjãnia ne jũma bia ãdjia jʉ̃ã panʉra diamãrẽã.*

13 Ne jũma bia dadjia jʉ̃ã panʉra Ãcõrẽba diaya. Bãrãba idjida ĩjã panʉ bẽrã mʉ̃a quĩrĩã ɓʉa idjia bãrãra bio ɓʉsriɗabida idjaɓa necai ɓʉida. Mãwã Ãcõrẽ Jaure ʉɓʉaɗeba bãrãba biara cawaɗia ne jũma bia dadjia jʉ̃ã panʉra wãrãda edaɗida.

Pauloba judiorãẽ́a jaradiabaria

14 Djabarã, mʉ̃a cawa ɓʉa bãrãba biada wãrãda o panʉda idjaɓa bio cawa panʉ bẽrã poya dji jaradiaɗida. 15 15:15-16 Mãwãmĩna naʉ̃ cartaɗe mʉ̃a ʉ̃cʉrʉ crĩchada ebuɗa ɓʉsia bãrãba quĩrãdoarãnamãrẽã. Mãwã ɓʉsia Ãcõrẽba idji biaɗeba mʉ̃ra ɓʉɗa bẽrã judiorãẽ́ tãẽna Jesucrito nezocada ɓamãrẽã. Maʉ̃ bẽrã beɗea bia Ãcõrẽnebemada ãdjirãa jaradia ɓʉa. Ĩjãsiɗara sacerdoteba animarã babue diabʉrʉ quĩrãca mʉ̃a ãdjirãra Ãcõrẽa dia ɓʉa bia unumãrẽã. Maʉ̃ne Ãcõrẽ Jaureba ãdjirãra Ãcõrẽ itea bia ɓʉya.

17 Jesucrito ume ɓʉ bẽrã mʉ̃a Ãcõrẽ itea o ɓʉ carea bio ɓʉsriɗa ɓʉa. 18 15:18-19 Baribʉrʉ ara mʉ̃djiɗebemada ni maãrĩ biɗa bia beɗeaẽ́a. Aɓabe Critoba mʉ̃neba oɗaɗebemada bia beɗeaya. Wãrãda mʉ̃neba Critoba carebasia judiorãẽ́ba Ãcõrẽra ĩjãnamãrẽã. Mʉ̃a jaradia ɓʉɗeba, o ɓʉɗeba, ne ununaca o ɓʉɗeba biɗa mãwã carebasia. Mʉ̃a Ãcõrẽ Jaure ʉɓʉaɗeba jũma maʉ̃gʉra osia. Jerusaleʉ̃neba aɓa Ilirico druaɗaa beɗea bia Critoɗebemada mʉ̃a jũma jaradiaida ɓaɗama jaradiasia. 20 Wãrãda beɗea bia Critoɗebemada mʉ̃a jaradia quĩrĩã ɓʉa waɗi ũrĩnacama. Dewaraʉba jaradia ɓʉma mʉ̃a jaradia quĩrĩãẽ́a. 21 Mãwã mʉ̃a Ãcõrẽ Beɗeaɗe ɓʉ́ ɓʉ quĩrãca o ɓʉa. Nãwã ɓʉ́ ɓʉa:

Idjiɗebema jaraɗaca baɗama ẽberãrãba ũrĩnia. Idjiɗebema ũrĩnaca baɗaba cawaɗia.*

Paulo Romanaa wãida crĩchaɗa

22 Maʉ̃ carea ɓarima zocãrã mʉ̃ra bãrãmaa wã quĩrĩã ɓʉmĩna poya wãẽ́ ɓʉa. 23 15:23-24 Baribʉrʉ namara jũma jaradiaɗa bẽrã ara nama caitara neẽ́a sãma Critoɗebema jaradiaida. Maʉ̃ba mʉ̃ra España druaɗaa wãida crĩcha ɓʉa. Wãbʉrʉɗe bãrãma wiɓariya. Mãwã crĩcha ɓʉa dãrãbʉrʉ bẽrã bãrã acʉɗe wã quĩrĩã ɓʉda. Bãrã ume dãrã ɓʉsriɗaɗacarea ãĩbẽrã bãrãba poya carebaɗisicada mʉ̃ bia wãmãrẽã. 25 Baribʉrʉ ara nawena mʉ̃ra Jerusaleʉ̃naa wãya paratada Ãcõrẽ ẽberãrãa diai carea. 26 Maʉ̃ paratara djabarã Macedonia druaɗebemarãba, Acaya druaɗebemarã biɗa ɓʉsriɗa jʉrʉ pesiɗaa Ãcõrẽ ẽberãrã Jerusaleʉ̃nebema dji ne neẽ́ queɗeara carebaɗi carea. 27 Maʉ̃ djabarã judiorãẽ́ba ɓʉsriɗa maʉ̃ paratara djabarã judiorã itea jʉrʉ pesiɗaa. Wãrãda mãwã oɗida panasiɗaa judiorãa diai bara panʉ quĩrãca. Judiorãẽ́ba ne jũma bia Ãcõrẽnebemada judiorãneba edasiɗa bẽrã, djabarã judiorãa ne bia naʉ̃ ẽjũãnebemada diaɗida panʉa. 28 Maʉ̃ parata djabarã Jerusaleʉ̃nebemarãa diaɗacarea mʉ̃ra España druaɗaa wãya. Wãbʉrʉɗe bãrãma wiɓariya. 29 Mʉ̃a cawa ɓʉa bãrãma jũẽbʉrʉɗe Critoba dadjirãra bio carebaida.*

30 Djabarã, Ãcõrẽ Jaureɗeba dadjirãra dji quĩrĩã panʉa. Maʉ̃ bẽrã dadjirã Boro Jesucritoɗeba mʉ̃a bãrãa beɗea djuburiaya mʉ̃ careba Ãcõrẽa iwiɗiɗamãrẽã. 31 Idjía iwiɗiɗadua Judea druaɗebema Jesu ĩjãẽ́ ɓeaba mʉ̃ra biẽ́ orãnamãrẽã. Idjaɓa iwiɗiɗadua mʉ̃a parata Ãcõrẽ ẽberãrã Jerusaleʉ̃nebema itea edebʉrʉra bia edaɗamãrẽã. 32 Mãwãnacarea Ãcõrẽba quĩrĩãibʉrʉ, mʉ̃ra bãrãmaa ɓʉsriɗa wãya idjaɓa bãrã tãẽna bia ʉ̃nãũ ɓaya. 33 Mʉ̃a quĩrĩã ɓʉa Ãcõrẽ dadji necai ɓai diabarira jũma bãrã ume ɓaida. Bia ɓʉa mãwã ɓaida.