1 Pedro

Quima bara ɓea sãwã ɓeaɗiɗebema

3 3:1-2 Wẽrã quima bara ɓea, bãrã quima beɗeara ĩjã oɗadua. Mãwã ʉ̃cʉrʉba Ãcõrẽ beɗea ĩjãnaẽ́ panʉmĩna bãrãra quĩrãipa ɓeada, Ãcõrẽ waya ɓeada ununapeɗa ĩjãnia. Bãrãba ãdjía ĩjãnamãrẽã jaraɗaẽ́mĩna bia o panʉ carea ĩjãbiɗia. 2 – 3 Bãrã quĩrãwãrẽãra aɓabe ʉ̃rʉ̃bemada ɓaiẽ́ ɓʉa; buɗa biya erupeɗa ne jũma pẽũ jʉ̃ ɓʉɗeba ɓaiẽ́ ɓʉa, djio oro oɗa jʉ̃ ɓʉɗeba ɓaiẽ́ ɓʉa, wua biya quiru jʉ̃ ɓʉɗeba ɓaiẽ́ ɓʉa. 4 Ãtebʉrʉ bãrã quĩrãwãrẽãra soɗebʉrʉ ɓaida ɓʉa; biya, necai ɓʉɗeba ɓaida ɓʉa. Maʉ̃ quĩrãwãrẽãra ãrĩcaa idjaɓa Ãcõrẽba bia unu ɓʉa. 5 Ara maʉ̃ quĩrãca drõã naẽnabema wẽrãrã Ãcõrẽ itea ɓeaɗara quĩrãwãrẽã ɓeasia. Ãcõrẽba jaraɗara ãdjirãba soɗeba wãrãda ĩjã panasiɗaa idjaɓa ãdji quima beɗeara ĩjã obadjiɗaa. 6 Saraba Abrahaʉ̃ beɗeara ĩjã obadjia idjaɓa mʉ̃ boroaɗa abadjia. Ne wayaa neẽ́ bãrãba ne jũma biada o pananibʉrʉ, Sara cauda ɓeaɗia.

7 Umaquĩrãrã quima bara ɓea, crĩcha biaɗeba bãrã quima ume bia ɓeaɗadua. Bãrã quima waya panʉneba ãdjira bia wagaɗadua, wẽrãra umaquĩrã cãyãbara ʉɓʉaẽ́ ɓʉ bẽrã idjaɓa bãrã ume ãbaa Ãcõrẽ biaɗeba bajãne zocai ɓeaɗi bẽrã. Mãwã oɗaẽ́bʉrʉ, bãrãba iwiɗibʉdara Ãcõrẽba bia ũrĩẽ́a.

Bia o panʉ carea mĩgaɗiɗebema

8 Maʉ̃ awara djabarã, aɓari crĩchaɗeba jũma bãrãra ãbaa bia duananadua. Djãrã carebai crĩchaɗeba ɓeaɗadua. Djabarã bẽrã dji quĩrĩãnadua. Dji quĩrã djuburiaɗadua idjaɓa djãrã cãyãbara biara ɓeada crĩcharãnadua. 9 Aɓaʉba bãrãda biẽ́ osira aɓari quĩrãca orãnadua. Biẽ́ jarasira aɓari quĩrãca biẽ́ jararãnadua. Ãtebʉrʉ iwiɗiɗadua Ãcõrẽba idjira carebamãrẽã. Cawa panʉa Ãcõrẽba bãrãra edasida mãwã ɓeaɗamãrẽã. Mãwã ɓeaɗibʉrʉ, Ãcõrẽba bãrã siɗa carebaya. 10 Ãcõrẽ Beɗeaɗe nãwã ɓʉ́ ɓʉa:

Bariduada ɓʉsriɗa ɓa quĩrĩã ɓʉbʉrʉ, cadjirua beɗea amaaba idji quĩrãmera wagaida ɓʉa.

Dãrã bia ɓa quĩrĩã ɓʉbʉrʉ, sewa o amaaba idji itera wagaida ɓʉa.

11 Idjia ne jũma cadjiruada igarapeɗa biada o ɓaida ɓʉa.

Djãrã ume necai ɓai carea jʉrʉpeɗa mãwã ɓaida ɓʉa.

12 Jũmarã Boro Ãcõrẽba ẽberã jipa ɓeara waga ɓʉa. Ãdjirãba iwiɗibʉdara bia ũrĩ ɓʉa.

Baribʉrʉ cadjirua obadara idu bia wãbicaa.*

13 Bãrãba biada o pananibʉrʉ, ¿caiba bãrãda biẽ́ oi? 14 Baribʉrʉ bãrãba bia o panʉ carea bia mĩgaɗibʉrʉ, Ãcõrẽ quĩrãpita bio bia ɓeaa. Bãrã biẽ́ obʉdara wayarãnadua. Jũmawãyã crĩcharãnadua. 15 Critora bãrã Boro bẽrã soɗeba idjidrʉ wayaɗadua. Bãrãba Critoɗeba edaɗi carea jʉ̃ã panʉnebemada aɓaʉba iwiɗisira ariɗe panuni carea ɓeaɗadua. Wayaaɗeba ijaraɗaẽ́ panunadua. 16 Ara bãduɓa cawa pananadua cadjiruada oɗaẽ́ panʉda. Mãwãra bãrã Critoɗeba bia nĩnanebema biẽ́ beɗeabadara peraɗia.

17 Ãcõrẽba bãrãda idu bia mĩgabibʉrʉ, biara ɓʉa bia o panʉ carea bia mĩgaɗida biẽ́ o panʉ carea bia mĩgaɗi cãyãbara. 18 Critora jipa ɓʉmĩna cadjirua carea ɓarima aɓa beusia. Maʉ̃ba dadjirã dji jipaẽ́ ɓeara Ãcõrẽ ume bia ɓʉsia. Idjira naʉ̃ djaraɗe beusia, baribʉrʉ Ãcõrẽ Jaureɗeba ʉ̃rẽbasia. 19 Idjaɓa Ãcõrẽ Jaureɗeba idjira jaure preso ɓeamaa wãsia. Wãpeɗa jarasia jũma cadjiruara poyasida. 20 Maʉ̃gʉrã jaureba Noé ewariɗe Ãcõrẽ beɗeara ĩjãnaẽ́ basía. Maʉ̃ne Noéba jãba dromada o ɓʉmisa Ãcõrẽba jũma droa ɓʉɗeba jʉ̃ã ɓasia ãdjirãba ĩjãnamãrẽã. Baribʉrʉ ẽberã zocãrãẽ́be dopapaɗebemada ẽdrʉsiɗaa. Jipa jaraibʉrʉ, ochobe ẽdrʉsiɗaa. 21 Maʉ̃ dopapaba borocuebadaɗebemada jara ɓʉa. Borocuebʉdaɗe Jesucrito ʉ̃rẽbaɗaɗeba dadjirãra ẽdrʉbadaa. Borocuebʉrʉba dadji cacua mititiara sʉgʉcaa ãtebʉrʉ mãwã obadaa dadjirãra Ãcõrẽ quĩrãpita waa beɗeaɗe panʉẽ́da cawa panʉ bẽrã.* 22 Jesucritora bajãnaa wãpeɗa Ãcõrẽ jʉwa araare ɓʉa. Jũma bajãnebema nezocarãra, jũma jairã dji dromarãra, dji ʉɓʉa ɓea siɗa idji jʉwaeɗa eroɓʉa.