1 Pedro
Crito nĩbaɗa quĩrãca nĩbaɗadua
4 Critora naʉ̃ djaraɗe bia mĩgaɗa bẽrã bãrã biɗa aɓari crĩchada eroɓeaɗadua. Naʉ̃ djaraɗe bia mĩga ɓʉba cadjiruada igarasia. 2 Maʉ̃ba waɗi naʉ̃ ẽjũãne ɓʉɗe naʉ̃ cacuaba cadjirua o quĩrĩã ɓʉra o ɓaẽ́a, ãtebʉrʉ Ãcõrẽba quĩrĩã ɓʉdrʉ o ɓaya. 3 Naẽna bãrãba cadjiruara o ɓeasia Ãcõrẽ adua ɓeaba obada quĩrãca. ¡Ɓesia! ¡Waa mãwã orãnadua! Jũmawãyã auɗuada obadjiɗaa, naʉ̃ cacuaba cadjirua o quĩrĩã ɓʉda obadjiɗaa, beu nĩbabadjiɗaa, ɓʉsriɗa obadaɗe jũmawãyã cadjiruada obadjiɗaa, itua do awua ɓeasia, idjaɓa jʉwaba oɗa ãcõrẽda ẽpẽbadjiɗaa. Maʉ̃ra Ãcõrẽba quĩrĩãcaa. 4 Iɗira bãrãba waa Ãcõrẽ adua ɓea ume cadjiruada oɗaca bẽrã ãdjirãba cawa crĩchaɗacaa. Maʉ̃ carea bãrãnebemada biẽ́ beɗeabadaa. 5 Baribʉrʉ Ãcõrẽba cawa obʉrʉɗe ãdjia opeɗaɗara idjía jũma jaraɗia. Idjia zocai ɓeara, beuɗarã siɗa cawa oi carea ɓʉa. 6 Maʉ̃ bẽrã beɗea bia Critoɗebemada beuɗarãa jaradiasiɗaa ãdji jaurera zocai ɓeaɗamãrẽã Ãcõrẽ zocai ɓʉ quĩrãca.* Mãwãmĩna ãdjirãra naʉ̃ djaraɗe beusiɗaa Ãcõrẽba jũmarãda beuɗida panʉana aɗa bẽrã.
7 Ne jũma jõi ewarira caita ɓʉa. Maʉ̃ bẽrã jipa crĩcha ɓeaɗadua idjaɓa quĩrãcuita ɓeaɗadua. Mãwã Ãcõrẽa poya iwiɗiɗia. 8 Bio dji quĩrĩã ɓeaɗadua. Maʉ̃gʉra ne jũma cãyãbara biara ɓʉa. Quĩrĩã eroɓʉba cadjiruara ɓarima zocãrã quĩrãdoabaria. 9 Bãdji diguiɗa biẽ́ crĩchaɗaẽ́ dji bia edaɗadua. 10 Ãcõrẽba idji biaɗeba dadjirãza djãrã carebaɗamãrẽã awara awara diasia. Ãcõrẽ nezoca biarã bẽrã idjia bãdjiza diaɗaɗeba djãrãra carebaɗadua. 11 Aɓaʉba jaradiaibʉrʉ, Ãcõrẽ beɗeada jaradia ɓʉ bẽrã quĩrãcuita jaradiaida ɓʉa. Aɓaʉba djãrãda carebaibʉrʉ, Ãcõrẽba dia ɓʉ ʉɓʉaɗeba carebaida ɓʉa. Ne jũma oɗadua jũmarãba Jesucritoɗeba Ãcõrẽa bia beɗeaɗamãrẽã. Idjíabʉrʉ ewariza bia beɗeaɗida panʉa. Bia ɓʉa ne jũmada idji jʉwaeɗa eroɓaida. Bio bia ɓʉa mãwã ɓaida.*
Crito ĩjã ɓʉ carea bia mĩgaida ɓʉɗebema
12 Djabarã, bãrã bia mĩga panʉ carea jũmawãyã crĩcharãnadua. Mãwã panʉa Critoda biara ĩjãni carea. Maʉ̃ bẽrã bia mĩgaɗiẽ́ panʉda crĩcharãnadua. 13 Ãtebʉrʉ Crito quĩrãca bia mĩga panʉ bẽrã ɓʉsriɗa ɓeaɗadua. Mãwã Ãcõrẽba Critora dji dromaara ɓʉda unubibʉrʉɗe bãrãra bio ɓʉsriɗaɗia. 14 Bãrãda Crito ĩjã panʉ carea biẽ́ jaraɗibʉrʉ, Ãcõrẽ quĩrãpita bio bia ɓeaa. Ãcõrẽ Jaure quĩrãwãrẽã quirura bãrã ume ɓʉa. 15 Bãrãra bia mĩgaɗimĩna ni aɓaʉda mĩã beaɗa carea, ne drʉaɗa carea, djãrã nẽbʉraɗe eɗa ɓaɗa carea, dewara cadjirua oɗa carea biɗa mĩgaiẽ́ ɓʉa. 16 Baribʉrʉ aɓaʉda Crito ĩjã ɓʉ carea bia mĩgaibʉrʉ, peraiẽ́ ɓʉa. Ãtebʉrʉ Critoɗe bẽrã Ãcõrẽa bia beɗeaida ɓʉa. 17 Ewarira jũẽsia Ãcõrẽba idjiɗerãda cawa omãrẽã. Ãcõrẽba dadjirãda naãrã cawa oibʉrʉ, ¿beɗea bia Ãcõrẽnebema ĩjãẽ́ ɓeara sãwã panani?
18 Ẽberã jipa ɓʉda ẽdrʉi carea zarea ɓʉbʉrʉ, ¿Ãcõrẽ igarapeɗa cadjirua obarira sãwã ẽdrʉi?*
19 Maʉ̃ carea Ãcõrẽba quĩrĩã ɓʉ quĩrãca bia mĩga panʉba ara ãdjida idji jʉwaɗe ɓʉɗapeɗa ne biada oɗida panʉa. Dadji Oɗara beɗea aɓa ɓʉa.