1 Samuel

4 Maʉ̃ra Samuelba jũma israelerãa jarabadjia.

Pilisteorãba Ãcõrẽ baurude edapeɗaɗa

Maʉ̃ ewariɗe pilisteorãra israelerã ume djõni carea Apec puruɗe ãbaa dji jʉresiɗaa. Maʉ̃ bẽrã israelerãra ãdjirãmaa djõne wãnapeɗa Ebenezer caita duanesiɗaa. 2 Djõsiɗaɗe pilisteorãba israelerãra mil quĩmãrẽ quenanapeɗa poyasiɗaa.

3 Israelɗebema sordaorã jẽda zebʉda unusiɗaɗe dji bororãba ãdjiza iwiɗisiɗaa:*

–¿Cãrẽ cãrẽã iɗi Ãcõrẽba pilisteorãa idu poyabisi? Ãcõrẽ baurudera Siloɗe edaɗe wãna dadjirã tãẽna ɓamãrẽã. Mãwã Ãcõrẽba dadjirãra dji quĩrũ jʉwaeɗabemada ẽdrʉ ɓʉya.–

4 Maʉ̃ carea sordaorãba ʉ̃cʉrʉ Siloɗaa diabuesiɗaa Ãcõrẽ baurude enenamãrẽã. Maʉ̃ baurude ʉ̃rʉ̃ Ãcõrẽ jũma poya ɓʉra bajãnebema nezocarã zaca i bara panʉ ẽsi ɓabadjia. Eli warrarã Opnira, Piné siɗa Ãcõrẽ baurude enebʉdarã ume zesiɗaa.* 5 Ãcõrẽ baurude israelerã sordaorã duanʉma jũẽbisiɗaɗe jũmarãda ɓʉsriɗa jĩgua ɓiasiɗaa. Maʉ̃ba egorora uresia. 6 Maʉ̃ ɓʉga duanʉra pilisteorãba ũrĩnapeɗa ãdjiza iwiɗisiɗaa:

–¿Cãrẽ cãrẽã hebreorãra jãcua ɓʉga duanʉ?–

Maʉ̃ne cawasiɗaa Ãcõrẽ baurudera israelerã duanʉmaa enesiɗada. 7 Maʉ̃ carea bio ne waya panʉneba jarasiɗaa:

–¡Ãdji Ãcõrẽra ãdjirã duanʉma jũẽsia! ¡Ay, dadjirãra mĩã djuburi panʉa! Waɗibiɗa ni aɓaʉba ãdji ãcõrẽra dadjirã ume djõne enenaca basía. 8 ¡Ay, dadjirãra mĩã djuburi panʉa! ¿Caiba dadjirãra jãʉ̃ ãcõrẽ ʉɓʉa ɓea jʉwaeɗabemada ẽdrʉ ɓʉi? Ara maʉ̃ ãcõrẽ ɓeaba egiptorãra ẽjũã põãsa ewaraga ɓʉɗe ne quĩrãtanoaneba quinibisiɗaa. 9 Maʉ̃ carea ¡dadjirãra sozarra ɓeaɗadrʉ! ¡Mẽsrã djõnadrʉ hebreorã jʉwaeɗa ɓaeɗa amaaba, ãdjirãra dadjirã jʉwaeɗa panana quĩrãca!–

10 Maʉ̃be pilisteorãra waya djõne wãnapeɗa israelerãra poyasiɗaa. Mãwã poyabʉda carea israelerãra ãdji deɗaa mĩrũ wãbʉrʉsiɗaa. Pilisteorãba zocãrã quenasiɗaa. Israelɗebema sordaorã jĩrũba djõne wãbadara treinta mil quenasiɗaa. 11 Maʉ̃be pilisteorãba Ãcõrẽ baurudera edasiɗaa. Maʉ̃ awara Eli warrarã Opnira, Piné siɗa beasiɗaa.

12 Benjamiʉ̃neba yõnada aɓa ãdji djõ duanʉmaʉba pira wãpeɗa aɓari ewariɗe Siloɗe jũẽne wãsia. Sopuaba idjia cacuaɗe jʉ̃ ɓʉra jũma cõãcuapeɗa egoro siɗa idji boro ʉ̃rʉ̃ cua eroɓasia. 13 4:13-15 Maʉ̃ne Elira idji bugueɗe óare chũmasia quĩrãcuita ɓai carea. Idjira 98 poa ɓʉ bẽrã dau towa ɓasia. Baribʉrʉ Ãcõrẽ baurude carea jũmawãyã crĩcha ɓʉ bẽrã mãwã quĩrãcuita ɓasia. Maʉ̃ne dji ẽberã mĩrũ wãnara puruɗe jũẽpeɗa israelerã sordaorã sãwãpeɗaɗada jũma nẽbʉrʉsia. Maʉ̃ ũrĩnapeɗa sopuaba purura ɓʉga duanesia. Mãwã ɓʉga duanʉ ũrĩbʉrʉɗe Eliba iwiɗisia:

–¿Cãrẽ cãrẽã ẽberãrãra jãcua ɓʉga duanʉ?–

Maʉ̃ne dji ẽberã mĩrũ wãnaba israelerã sordaorã sãwãpeɗaɗada Elia jaraɗe wãsia. 16 Idjia Elia nãwã jarasia:

–Dadji israelerã djõ duanʉmaʉba mʉ̃ra mĩrũ zesia.–

Eliba iwiɗisia:

–Warra ¿sãwãsi?–

17 Dji jaraɗe zeɗa ẽberãba nãwã panusia:

–Pilisteorãba poyabʉda carea dadji israelerãra mĩrũsiɗaa. Ãdjirãba zocãrã quenasiɗaa. Bʉ warrarã Opnira, Piné siɗa beasiɗaa. Maʉ̃ awara Ãcõrẽ baurudera pilisteorãba edasiɗaa.–

18 Ãcõrẽ baurudeɗebema ũrĩbʉrʉɗe Elira puruɗe eɗa wãbada orrocawa jẽdaa ɓaesia. Idjira drõãda ɓʉ bẽrã idjaɓa bio boreguea ɓʉ bẽrã, ɓaebʉrʉɗe idji ʉ̃rʉ̃mʉsira ɓʉapeɗa beusia. Elira cuarenta poa israelerã ẽdrʉ ɓʉbari basía.

19 Maʉ̃ ewariɗe Eli ãĩguda ɓiogoa ɓasia, warra toi carea ɓasia. Idjira Piné quima basía. Maʉ̃ne idjia ũrĩsia pilisteorãba Ãcõrẽ baurudera edasiɗada, idji quimara beasiɗada, idjaɓa dji zãwãrẽ siɗa jaiɗasida. Maʉ̃ ũrĩbʉrʉba cawaẽ́ne warra puapeɗa tosia. Baribʉrʉ warra puara droaẽ́ basía. 20 Beubʉrʉɗe idji carebabʉda wẽrãrãba idjía nãwã jarasiɗaa:

–Necai ɓadua. Bʉa umaquĩrã warrada tosia.–

Mãwã jarapeɗaɗamĩna idjira quĩrã cawaẽ́ nũmʉ bẽrã ni cãrẽ siɗa panuẽ́ basía. 21 4:21-22 Ãtebʉrʉ nãwã jarasia:

–Ãcõrẽra dadji israelerã tãẽna ɓaɗada neẽ́a, idji baurudera dewaraba edapeɗaɗa bẽrã.–

Mãwã jarasia idji zãwãrẽ Elida, dji quima Piné siɗa beupeɗaɗa bẽrã idjaɓa Ãcõrẽ baurudera dewaraba edapeɗaɗa bẽrã. Ãcõrẽra dadji israelerã tãẽna ɓaɗada neẽ́ana aɗa bẽrã idji warrara trʉ̃ ɓʉsia Icabod.–