1 Samuel

Pilisteorãba Ãcõrẽ baurude eropanana

5 Pilisteorãba Ãcõrẽ baurudera Ebenezerɗeba ãdji puru Asdoɗaa edesiɗaa. 2 Maʉ̃be ãdji ãcõrẽ Dagoʉ̃ deɗe edeɗapeɗa idji caita coɓʉsiɗaa.

3 Nurẽma diapeɗeɗa Asdoɗebemarã Dagoʉ̃ deɗe eɗaa wãbʉdaɗe ãdji jʉwaba oɗa ãcõrẽ Dagoʉ̃ra egode ɓarru taɓʉda unusiɗaa Ãcõrẽ baurude quĩrãpita. Maʉ̃da idji ɓabarima ãdjia waya ʉ̃ta nũmʉsiɗaa. 4 Nurẽma diapeɗa Dagoʉ̃ deɗaa wãbʉdaɗe wayacusa unusiɗaa Dagoʉ̃ra Ãcõrẽ baurude quĩrãpita egode ɓarru taɓʉda. Dji borora jʉwa siɗa umena deɗe eɗa wãbadama ɓʉá tapanasiɗaa. Dji cacua awa taɓasia. 5 Maʉ̃ ewariɗeba ʉ̃taa Dagoʉ̃ sacerdoterãda, dewara ẽberãrã siɗa Dagoʉ̃ deɗe eɗa wãbʉdaɗe dji boro, jʉwa siɗa tapananama jeɗadʉgabadaa.

6 Maʉ̃ ewariɗe Ãcõrẽba Asdo purura, maʉ̃ puru caita ɓea siɗa bio biẽ́ ɓʉsia. Ãdji cacuaɗe zarega odjacuabisia. 7 Maʉ̃ carea ãdjirãba nãwã jarasiɗaa:

–Israelerã Ãcõrẽ baurudera dadjirã tãẽna eropananiẽ́ panʉa. Idjia dadjirãda, Dagoʉ̃ siɗa bio biẽ́ o ɓʉa.–

8 Maʉ̃ carea pilisteorãba jũma dji bororãra trʉ̃biɗapeɗa nãwã iwiɗisiɗaa:

–Israelerã Ãcõrẽ baurudera ¿sãwã oɗi?–

Dji bororãba panusiɗaa:

–Gat puruɗaa edeɗadua.–

Ara maʉ̃da Gat puruɗaa edesiɗaa. 9 Edepeɗaɗacarea Ãcõrẽba maʉ̃ puru siɗa biẽ́ ɓʉsia. Jũmarã cacuaɗe zarega odjacuabisia. Drõãrãda warrarã siɗa mãwã osia. Maʉ̃ba purura bio ne wayasiɗaa.

10 Maʉ̃ bẽrã pilisteorãba Ãcõrẽ baurudera Ecroʉ̃ puruɗaa edesiɗaa. Baribʉrʉ jũẽbʉdaɗe maʉ̃ puruɗebemarãba Ãcõrẽ baurudera ununapeɗa nãwã ɓia jarasiɗaa:

–¡Israelerã Ãcõrẽ baurudera dadjirã quenani carea namaa enebʉdaa!–

11 Ãcõrẽba maʉ̃ purura bio biẽ́ ɓʉɗa bẽrã zocãrã quinibʉda basía. Maʉ̃ba purura bio ne wayasia. Pilisteorãba ãdji bororãa wayacusa trʉ̃biɗapeɗa nãwã jarasiɗaa:

–Israelerã Ãcõrẽ baurudera ãdjirãmaa jẽda edeɗadua. Mãwã oɗaẽ́bʉrʉ dadjirãra jũma quenaya.–

12 Jũma dji zocai ɓea cacuaɗe zarega odjacuaɗa bẽrã ãdji ãcõrẽ ɓeaa quĩrã djuburiada iwiɗi duanasiɗaa.