QUEDUA NAÃRÃBEMA | SOPUA ƁɄƊE, ¿BEU QUĨRĨÃBARIDA?

1 Beɗea droma eropanʉmĩna jõida

“Daira ne jũmane bia mĩga panʉmĩna poya ẽdrʉɗaẽ́da, [jãʉ̃ra] crĩchaɗacaa” (2 CORINTO 4:8).

Ʉ̃cʉrʉba crĩchabadada bio beɗea droma eropanʉ bẽrã, maʉ̃ bʉrʉ beu quĩrĩãbadada. Baribʉrʉ beɗea droma zarea ɓʉmĩna jãʉ̃ra ara oida (Acʉdua jara ɓʉmae “Ãdjirãra beɗea droma eropanasiɗamĩna awara panesiɗada”).

Bʉ beɗea dromada jõẽ́bʉrʉ ¡bʉa droaida! Jesuba jarasida:“Nubemada jũmawãyã crĩcharãnadua, nu biɗa Ãcõrẽba bãrãra waga eroɓai bẽrã. Ewariza ne crĩchaira baraya” (Mateo 6:34).

Enferma ɓʉbʉrʉ, bʉ quimaba amaibʉrʉ, idjaɓa bʉ cuariara beubariɗibʉrʉ, ¿cãrẽba poya carebaida?

Bio beɗea droma eropanʉmĩna, crĩchaɗida aɓabe Jeowabʉrʉ careba ɓʉda. Maʉ̃ bʉrʉ droaɗida. Eɗauɗe ne oɗaẽ́mĩnã, poya necai pananida (Proverbios 15:15). Crĩcharãdua beuira, jãʉ̃gʉba ara oida idjaɓa necai ɓaida (Job 2:10).

QUĨRÃNEBADUA: Beɗea dromada eroɓʉbʉrʉ, ʉ̃taa eyaɗe wãbʉrʉ quĩrãca maãrĩ maãrĩ wãida.

¿CÃRẼDA OI?: Beɗeaida cuariarãme. Mãwãra ãdjia carebaɗida (Proverbios 11:14).

ÃDJIRÃRA BEDEA DROMA EROPANASIƊAMĨNÃ AWARA PANESIƊADA

Naãrãɓema ẽberã Ãcõrẽ Beɗea ĩjãbadara quĩmãrẽ panʉba, crĩchasiɗada beuɗira bio biara ɓʉda.

Rebeca: “¿Sãwãẽrã mʉ̃ra jãwã mĩga ɓʉ?” (Genesi 25:22).
Moise: “Biara ɓʉa mʉ̃ra beaida. . . mʉ̃ra beadua waa bia mĩgarãmãrẽã” (Numero 11:15).
Elia: “Biara ɓʉa beuida. Mʉ̃ra beadua. Mʉ̃ drõã naẽnabemarã beupeɗada cãyãbara mʉ̃ra biara ɓʉẽ́a” (1 Reye 19:4).
Job: “¿Cãrẽã beuẽ́ basida tosiɗaɗe?” (Job 3:11).

Mãsa lea pananibʉrʉ drõãrenabemarã ẽberãrãba nẽbʉrʉɗada, dadjirãba cawaɗida naãrã ni aɓaʉba crĩchaɗaẽ́ basia bio biara ɓʉ zeira. Baribʉrʉ tẽãbe ãdjirãra bio bia wãsiɗada. Aɓari quĩrãca bʉra mãwãida (Eclesiastés 11:6). Maʉ̃ bʉrʉ droadua.