Ãcõrẽba osia nabema umaquĩrã wẽrã siɗa

Jeowaba maãrĩ ɓʉsida ẽjũãda quĩrãwãrẽãne trʉ̃ jarabada Edeʉ̃. Jãma jaʉ̃ ẽjũã quĩrãwãrẽãne basida zocãrã nepõno, bacuru, animarã siɗa. Mãwãnacarea osida naãrãbema umaquĩrã. Trʉ̃ jarabada Adaʉ̃. Jeowaba osia ẽberãda, egoroda edapeɗa quẽbʉɗe jãrãpuasida. ¿Cãrẽda mãwãsida? Maʉ̃bebʉrʉ idjira zocai ɓesia. ¿Cãrẽda jarasida Jeowaba Adaʉ̃a? Jeowaba Adaʉ̃ra jarasia animarãza trʉ̃ ɓʉcuasia.

Jeowaba jarasida Adaʉ̃ra beɗea bio biara ɓʉda. Jarasida: “Adaʉ̃, bʉa poya coida neta bariduaɗebemada, baribʉrʉ aɓa neta poya coẽ́da. Bʉa coibʉrʉ jaʉ̃ netada, beuida”.

Mãwãnacarea Jeowaba quĩchasida Adaʉ̃ra iduɓa ɓaera, maʉ̃ bʉrʉ caĩnacarea idji orroda edapeɗa wẽrã osida dji quima ɓamãrẽã”. ¿Cawa basida jaʉ̃ wẽrã nabema trʉ̃ra caida? Trʉ̃ jarabada Eva. Ãdjirã nabema cuariara basida. ¿Adaʉ̃ba cãrẽda jarasida Evaa unusiɗe? Idjia jarasida: “Jaʉ̃ wẽrãra bio mera ɓʉda. Idjira mʉ̃me ɓaida”.

Jeowaba jarasida Adaʉ̃ Evame eropananida zocãrã warrarãda. Quĩrĩã basida bio ɓʉsriɗa pananida jaʉ̃ ẽjũã quĩrãwãrẽãne. Traja panʉmisa Ãcõrẽba quĩrĩã basida bio ɓʉsriɗa pananida. Baribʉrʉ jaʉ̃ra mãwãẽ́ basida. ¿Cãrẽda mãwãsida? Dewaraʉ beɗeaɗe cawaɗida.